12. निर्गमन

इस्राएली लोक मिस्र लक निकल सारी बहुत खुश होता। वय आता गुलाम नोहता, अखिन वय वादा को देश मा जात होता! जेव काही इस्राएलीहिन न मागीन, मिस्रीहिन न उनला ऊ पुरो सपाई देयदेइन, याहान वरी की सोना अखिन चाँदी अखिन अन्य बहुमूल्य सामाइन। दूसरों देश का काई लोखहीन न परमेश्वर पर विश्वास करिन अखिन जब इस्राएली लोक मिस्र मालक निकलया त वय भी उनको संग भय गया।

दिवस मा बादर को एक विशाल खम्बा उनको सामने - सामने चलेव। अखिन रात को समय मा येव इस्तों को खम्बा बन गएव। परमेश्वर जेव की वन बादर को खम्बा मा अखिन इस्तों को खम्बा मा होतो, हमेशा उनको संग होतो अखिन वन यात्रा करन को बेरा मा उनला साथ देइस। उनला मात्र येतरो करणो होतो की ओको मंग चलन को।

थोड़ों समय को बाद मा, फिरौन अखिन ओको लोखहीन न आपरो मन ला बदल देइन। वय इस्राएलिइन ला अधिक एक बार आपरो गुलाम बनावन ला चावत होता। येकोलाइक उन इस्राएलिहिन को धावा करिन। यव परमेश्वरच होतो जेन उनको मनला बदल देइस होतीस। वन असो येकों लाइक करीस कहेकी ऊ चावत होतो की सबजन यव जान लेहेत की फिरौनसीन अखिन मिस्रीहिन का सपाई देवी देवता सीन ऊ, यहोवा, जादा शक्तिशाली से।

जब इस्राएलिहिन न मिस्र का सेनिक आवत देखिन त उनला मालूम भएव की वय फिरौन का सेनिक अखिन लाल समुद्र को बीच मा फँस गया। वय बहुत डर गया अखिन रोवन लगा, “ आमी न मिस्र ला कायला छोडया ? आमी मरने वाला सेजन। ”

मूसा न इस्राएलिइन सीन कहीस, “ डरनो बंद करो! परमेश्वर अज तुमरो लाइक लड़े अखिन तुमला बचाए। ” तब परमेश्वर न मूसा सीन कहीस, येन लोखहीन ला लाल समुद्र कर सामने जान लाइक कव। ”

तब परमेश्वर न वन बदर को खम्बा ला धरसारी इस्राएलिहिन अखिन मिस्रीहिन को बीच मा राख देइस की मिस्री लोक इस्राएलिहिन ला देख नोको सकत।

परमेश्वर न मूसा सीन समुद्र पर आपरो हाथ बडावन लाइक कहिस। मंग परमेश्वर न वारा लक समुद्र को पानी ला इतन उतन कर देइस, जोकों लक समुद्र मालक एक रस्ता बन गई।

इस्राएलि लोक आपरो दुई बाचू पानी की दीवार को संग वारी जागा पर समुद्र मालक सामने गया।

तब परमेश्वर न वन रस्ता लक बादर ला उठाइस की मिस्री लोक इस्राएलिहिन ला बचाय देख सिकत। मिस्रीहिन न उनला धरण लाइक उनको धावा करन को सोचिन।

अदिक मंग उन समुद्र को बीच मालक वन रस्ता लक इस्राएलीहिन को धावा करिन, पर परमेश्वर न मिस्रीहिन ला घबराय देईस अखिन उनको रथहिन ला अटकाय देईस। वय चील्लान लगया, “ पराओ! इस्राएलीहिन कर लक परमेश्वर लड़ रहीसे। ”

सपाई इस्राएली समुद्र को दूसरों आंग चली गया। तब परमेश्वर न मूसा सीन कहीस की ऊ अखिन पानी पर हाथ बड़ाव। जब मूसा न असो करिस, त पानी मिस्री सेना पर आय पड़ेव अखिन आपरो जसो को तसोच भए गएव। सपाई मिस्री सेना डूब गई।

जब इस्राएलीहिन न देखिन की मिस्री मर गया त उन परमेश्वर पर विश्वास करिन। उन विश्वास करिन की मूसा परमेश्वर कर लक भविष्यद्वक्ता होतो।

इस्राएली लोख येकोलाइक भी बहुत आनन्दित होता काहेकी परमेश्वर न उनला मरण लक अखिन नवकर होन सीन बचाई होतीस। आता वय परमेश्वर की आराधना करन लाईक अखिन ओकी आज्ञा को पालन करनलाइक छुटकारा होता। इस्राएलीहिन न आपरो छुटकारा को आनंद मनावन लाइक अखिन परमेश्वर की तारीफ करनलाइक कई गीतहिन ला गाईन कहेकी वन उनला मिस्रीहिन को सेना सीन बचाई होतीस।

परमेश्वर न इस्राएलीहिन ला हर साल एक पर्व मनावनको आदेश देईस यव याद करन लाइक की कसो परमेश्वर न मिस्रीहिन ला हराई होतीस अखिन उनला नवकर होनसीन छुटकारा देईस। यव फसह को पर्व कव्हनो मा आएव। येकोमा उनला आनंद करन लाइक एक अच्छों मेमना ला बली करणो होतो, ओला भुजनो होतो, अखिन ओला बगेर खमीर वाली रोटी संग खानो होतो।