2. पाप दूनया मा आएव।

आदम अखिन ओकी बायको परमेश्वर दूवारा बनाएव गएव सुंदर बगीचा मा बहुत मजा ल रव्हत होता। उनको मालक कोई भी कपड़ा नही पेहरत होता, तभी एन बात लक उनला कोई शर्म नोहती, काहेकी दूनया मा पाप नोहतों। वय अक्सर वन बगीचा मा घुमत होता अखिन परमेश्वर सीन बात करत होता।

पर वन बगीचा मा एक सर्प भी होतो। उ बहुत हुशार होतो। वन वोकों बायको सीन पूछीस, ” का सहिमा परमेश्वर न तुमारों लक एन बगीचा को कोनतोंच झाड़ को फल खान ला मना करीसे ?”

वन बायको न जवाब देइस, “ परमेश्वर न आमरो सीन कहिसे की आमी वन सही अखिन गलत को ज्ञान को झाड़ को सिवाय कोनतोंच झाड़ को फल खाए सिक सेजन। पर परमेश्वर न आमरो सीन कहिसे की कदाच तुमिह वन फल ला खायात या वला छूयात भी, त तुमी मर जाओ।”

वन सर्प न बायको ला जवाब देइस, “ एव सही नाहाय! तुमी नही मरो। परमेश्वर जानसे की जसो तुमी वन फल ला खाओ, त तुमी परमेश्वर को समान होय जाओ अखिन ओको समान सही गलत ला जान लेहो।”

एन बायको न देखीस की उ फल मनभाऊक से अखिन स्वादिष्ट दिखाई देसे। वा भी समझदार बन ला चाव्हत होती, एकोलाइक वन फल ला तोड़ कर खाए लेइस। मग वन आपरो नवरा जो वोकों संग होतो वन फल ला देइस अखिन वन भी खाए लेइस।

एकदम लक, उनका डोरा खुल गया, अखिन उनला मालूम पडे गयेव की अमी नंगा सेजन। उन पानाहिन ला एक साथ जोड़ कर वका कपड़ा बनाईन वको लका आपरो देहला झाकण कि कोशिस करीन।

मग आदमी अखिन ओकी बायको न वन बगीचा मा फिरेव समान परमेश्वर की आवाज आयकीन। वय दुई परमेश्वर सीन लुकाय गया। मंग परमेश्वर न आदमी ला आवाज देइस, तू काहा से ? ” आदम न जवाब देइस, “ मी न तुमारो बगीचा मा चलन कि आवाज आयकेव, त मोला डर लगेव, की मी नंगा सेव। एको लाइक मी लुकाय गयेव। ”

मंग परमेश्वर न खबर लेइस की, “ तोला कोण सगीस की तू नंगा से ? का तू न वन फल ला खाएस जेला मीन खान ला मना करेव होतो ? ” आदमी न जवाब देइस, “ तुमीन मोला या बायको देयात यन मोला एव फल देइस। ” मंग परमेश्वर न बायको सीन खबर लेइस, “ तुन एव का करेस ? ” वा बायको बोली, “ सर्प न मोला धोखा देइस। ”

परमेश्वर न सर्प ला कहिस, “ तू शापित से! तू आपलो पेट को भार लक चलजो अखिन माटी चाटजो। तू अन या बायको एक दुसरोइन सीन घृणा करो, अन तोरा लेकरू अखिन वोका लेकरू एक दूसरों सीन घृणा करेत। एन बायको की संतान तोरों डोसकी ला कुचलेती, अन तू ओको पाय ला चाबजो। ”

तब परमेश्वर न बायको सीन कहिस, “ कि मी तोरों लेकरू ज्न्न को दुख ला बहुत ब्डाऊ। तू आपरो नवरा सीन अपेक्षा करजो, अन उ तोरों पर प्रभूता डेए। ”

परमेश्वर न आदमी सीन कहिस, “ की तुन आपरो बायको की आयकेस अखिन मोरी आज्ञा नही मानेस। एको लाइक जमीन शापित से, अखिन तोला भोजन लाइक कठिन परिश्रम करनो पड़े। आता तू मर जाजों, अखिन तोरों शरीर माटी मा मिल जाये। ” वन आदमी न आपलो बायको को नाम हव्वा डेइस, जेकों मतलब से “ जीवन देन वाली ”, काहेकी वा सपाई जाती हिन की माय होये। अखिन परमेश्वर न आदम अन हव्वा ला ढोर की खाल का कपड़ा पेहराईस।

मंग परमेश्वर न कहिस, “ आता आदमी अच्छो अन गलत को बारे मा जान कर आमरो ज्सो भय गइसे, एको लाइक उनला वन जीवन को झाड को फल नही खान देए पायजे नही त वय हमेसा लाइक जिंदा रहेती। ” एको लाइक परमेश्वर न आदम अखिन हव्वा ला वन बगीचा मालक बाहेर निकाल देइस। अखिन परमेश्वर न कोईला भी वन जीवन को झाड को फल ला खान ला रोकन लाइक वन बगीचा मा अंदर जानको रस्ता मा शक्तिशाली स्वर्गदूतहिन ला बसाए देईस।