21. परमेश्वर मसीह को वादा करसे

जब परमेश्वर न संसार की सृष्टि करिस होतीस, ऊ जानत होतो की ओको बाद मा कोई दिवस मसीह ला धाडनों पड़े। वन आदम अखिन हव्वा सिन वादा करी होतीस की ऊ असो करे। वन कहीस की हव्वा सिन एक वंशज पैदा लेए जो साँप को डोसकि ला कुचल देहे। जेन साँप न हव्वा ला धोको देईस ऊ नि:सन्देह शैतान होतो। परमेश्वर को अर्थ होतो की मसीह पुरो तरहलक शैतान ला हराय देहे।

परमेश्वर न अब्राहम सिन वादा करिहोतीस की ओको वजह लक संसार की पूरी जाती आशीषत रहेती। परमेश्वर बाद मा कोई बेरा मा मसीह ला धाडन को वजह लक यन वादा ला पुरो करे। ऊ मसीह संसार को पुरी एक जाती मालक लोखहिन ला उनको पापईन मालक छुड़ाएती।

परमेश्वर न मूसा सिन वादा करि होतीस की भविष्य मा ऊ मूसा को जसो एक दूसरों भविष्यद्वक्ता ला धाड़े। यव भविष्यद्वक्ता मसीह होए। एन वजह लक, परमेश्वर न मंग अखिन वादा करिस की ऊ मसीह ला धाड़े।

परमेश्वर न राजा दाऊद सिन वादा करि होतीस की ओको एक वंशज मसीह होए। ऊ राजा होए अखिन परमेश्वर को लोखहिन पर हमेश लाईक अधिकार राखे।

परमेश्वर न यिर्मयाह भविष्यद्वक्ता सिन बात करिस अखिन कहीस की एक दिवस ऊ एक नवो वादा करे। ऊ नवो वादा इस्राइल को संग सीनै पर करे पुरानो वादा को समान नहीं रहे। जब लोखहिन को संग ऊ आपरो नवो वादा करे, त ऊ ऊनको पर खुद ला व्यक्तिगत रुप मा प्रकट करे। पूरा एक जन ओको सिन प्रेम करे अखिन ओको व्यवस्था ला मानन लाईक इच्छा राखेती। परमेश्वर न कहीस की ऊ ओको व्यवस्था ला ऊनकों ह्रदयहिन पर लिखेव समान होए। वय ओका लोख होएती, अखिन परमेश्वर ऊनकों पापईन ला माफ करे। ऊ मसीह होए जो ऊनको संग वन नवो वादा ला करे।

परमेश्वर का भविष्यद्वक्ताहिन न यव भी कहिन की मसीह एक भविष्यद्वक्ता होए। एक भविष्यद्वक्ता ऊ आदमी आए जो परमेश्वर को वचनहिन ला आयके अखिन मंग लोखहिन ला परमेश्वर को संदेश की घोषणा करे। जेला परमेश्वर न धाडन को वादा करि होतीस ऊ मसीह एक परख्यात भविष्यद्वक्ता होतो। समजो की ऊ मसीह परमेश्वर को संदेश ला अच्छों लक आयके, अखिन ऊ लोखईन ला ऊन्न संदेशहिन ला अच्छों लक सिखाए।

इस्राएली याजकहिन न लोखहिन लाईक परमेश्वर को सामुर बलिदान करणो सुरू ढेईन। यव बलिदान लोखहिन को पापहिन लाईक ऊनला परमेश्वर सिन दंडित करण को जागा पर चढाया गया होता। याजकहिन न लोखहिन लाईक प्रार्थना भी करिन। पर, ऊ मसीह सिद्ध महायाजक होए जो परमेश्वर ला देन लाईक एक सिद्ध बलि को रूप मा खुद ला चढाय देहे। तमंग, ऊ कभी पाप नहीं करणको, अखिन जब ऊ खुद ला बलि होन लाईक देहे, त संसार की कोई भी दूसरी बलि जरूरत नहीं पड़े।

लोखहिन को झुंड पर राजा अखिन प्रधान राज्य करसेत, अखिन कभी-कभी वय गलती करसेत। राजा दाऊद न मात्र इस्राएलिहिन पर राज्य करे, पर राजा दाऊद को वंशज मसीह पुरो संसार पर राज्य करे, अखिन ऊ हमेशा लाईक राज्य करे। एको अलावा, ऊ हमेशा न्याय लकच राज्य करे, अखिन सही निर्णयहिन ला लेए।

परमेश्वर को भविष्यद्वक्ताहिन न मसीह को बारे मा बहुत सारी गोस्टी करिन। उदाहरण लाईक, मलाकी न कहीस की मसीह को आवन को पहीले एक दूसरों भविष्यद्वक्ता आए। ऊ भविष्यद्वक्ता बहुत खास होए। एको अलावा, यशायाह भविष्यद्वक्ता न लिखीस की मसीह एक कुंवारी सिन पैदा लेहे। अखिन मीका भविष्यद्वक्ता न कहीस की मसीह बैतलहम नगर मा पैदा लेहे।

यशायाह भविष्यद्वक्ता न कहीस की मसीह गलील को सरहेद मा वास करे। जो लोख बहुत दु:खी सेत मसीह ऊनला शान्ति देहे। ऊ कैदीहिन ला आजाद करे। मसीह बीमारहिन ला अखिन जो आयेक नहीं सिकत, अना देख नहीं सिकत, बोल नहीं सिकत, ना चल नहीं सिकत ऊनला भी चंगा करे।

यशायाह भविष्यद्वक्ता न यव भी कहीस की लोख मसीह सिन नफरत करेती अखिन ओला मानो सिन ईनकार करेती। दूसरा भविष्यद्वक्ताहिन न कहीन की मसीह को संगी ओको विरुद्ध उठे। जकर्याह भविष्यद्वक्ता न कहीस की ओको यव संगी असो करण लाईक दूसरों लोखहिन सिन चांदी का तीस सिक्का लेए। एको अलावा, काई भविष्यद्वक्ताहिन न कहीन की लोख मसीह ला मार डाकेती, अखिन यव की वय ओको कपड़ाहिन लाईक जुआ खेलेती।

भविष्यद्वक्ताहिन न यव भी सागीन की मसीह कसो मरे। यशायाह न भविष्यद्वाणी करिस की लोख मसीह पर थूकेत, ओको मज़ाक उड़ायेती, अखिन ओला मारेती। वय ओला छेद देयेती अखिन ऊ मोठो दर्द अखिन यातना मा मर जाए, जबकि वन काईच भी गलती नहीं करी रहेस।

भविष्यद्वक्ताहिन न यव भी सांगीन की मसीह पाप नहीं करे। ऊ सिद्ध रहे। पर ऊ एकोलाईक मरे की परमेश्वर ओला दूसरों लोखहिन को पापईन को लाईक दंडित करे। ओको मरनो लक लोख परमेश्वर को संग मेल खान ला सही रहेत। एकोलाईक परमेश्वर चाव्हसे की मसीह मर।

भविष्यद्वक्ताहिन न यव भी सागीन की परमेश्वर मसीह ला मरेव मालक जिंदों करे। यव दर्शाव से की यव पुरो नवो वादा ला करण को परमेश्वर की योजना होती, की ऊ वन लोखहिन ला बचाए सीके जे लोख ओको विरुद्ध पाप करीसेन।

परमेश्वर न भविष्यद्वक्ताहिन पर मसीह को बारे मा बहुत सारी बातईन ला प्रकट करिस, पर मसीह वन भविष्यद्वक्ताहिन मालक कोई को भी जीवनकाल मा नहीं आएव होतो। एन भविष्यद्वाणियों को देन को 400 साल को बाद मा, सही समय पर, परमेश्वर मसिह ला एन दुनिया मा धाड़े।