23. यीशु को जन्म

यूसुफ नाव को एक धर्मी आदमी को संग मरियम की पायलगनी भय गई होती। जब वन आयकिस की मरियम पेट लक से त ऊ जानत होतो की ऊ ओको टूरा नोव्हय। पर, ऊ मरियम ला बदनाम नहीं करू कव्हत होतो, एकोलाईक वन ओको पर कूपा करण की अखिन ओला चुपचाप तलाक देन की सोचिस। पर एको पहीले की ऊ असो करतो, एक स्वर्गदूत न ओको स्वप्ना मा आयकर ओको सीन बात करिस।

वन स्वर्गदूत न कहीस, “ अ युसुफ, मरियम ला आपरी बायको को रूप मा आनन लाईक नोको कंदरास। ओको अंदर जो लेकरू से ऊ पवित्र आत्मा करलक से। वा एक टूरा ला जन्म देए। ओको नाव यीशु राखजो (जोकों अर्थ से, ‘ यहोवा बचाव से), काहेकी ऊ लोखहिन ला ऊनको पापहिन लक बचाए। ’

अधिक युसुफ न मरियम सिन बिहाया करिस अखिन ओला आपरि बायको को रूप मा घर आनिस, पर ओको लेकरू ला जन्म देत वरी ऊ ओको संग नहीं सोएव।

जब मारियम को जन्म देन को समय जवर आएव, त वन अखिन युसुफ न बैतलहम जान की एक लंबी यात्रा करिन। ऊनला वहाँ जानोच होतो काहेकी रोमी अधिकारी इस्राइल मा रवहन वाला पुरो लोखहिन की गिनती करण ला चाव्हत होता। वय चाव्हत होता की पूरा लोख वहाँ जाएती जहाँ उनकी खानदान रव्हत होता। राजा दाऊद को जन्म बैतलहम मा भएव होतो, अखिन ऊ मरियम अखिन युसुफ दुई की खानदान होतो।

मरियम अखिन युसुफ बैतलहम गया, पर वहाँ ढोरहिन को रव्हन को जागा ला सोड सारी उनला रुखन लाईक कोई जागा नोव्हती। वाच जागा होती जहाँ मरियम न आपरो लेकरू ला जन्म देईहोतीस। वन ओला चरनी मा सोवाईस काहेकी वहाँ ओको लाईक कोई बिस्तर नोव्हतों। ऊन ओको नाव यीशु रखीन।

वन रात मा, वहाँ जवरच को खेत मा काही सेरी मेंढीहिन को झुंड ला चरावन वाला जगवाली करत होता। अचानकच, एक चमकदार स्वर्गदूत ऊनको पर ऊतरेव। अखिन वय कन्दराय गया। वन स्वर्गदूत न कहीस, “ नोको कन्दरावों, काहेकी मोरो जवर तुमरो लाईक शुभ समाचार से। बैतलहम मा मसीह, प्रभु को जन्म भहीसे! ”

जायसारी वन टूरा ला ढ़ूडो, अखिन तुमि ओला कपड़ा मा लपटेव अखिन चरनी मा पडेव देखो। ’ एखदम लक, बादर स्वर्गदूतहिन लक भर गई। वय परमेश्वर की स्तुति करत होता। ऊन कहिन, “ पूरी महिमा स्वर्ग मा विराजमान परमेश्वर ला मिले। जमिन पर वन लोखाहिन ला शान्ति होए जेकि ऊ चिन्ता करसे! ”

तब स्वर्गदूत चली गया। वय भेड़ चारावन वाला आपरो सेरी मेंढीहिन ला सोड सारी टूरा ला देखन गया। जल्दीच वय वन जागा पर गया जहां यीशु होतो अखिन ऊन ओला चरनी मा पड़ेव देखिन, जसो की वन स्वर्गदूत न कहि होतीस। वय बहुत उत्साहित होता। तब वय सेरी मेंढी चारावने वाला वहाँ लक वापिस गया जहां उनकी सेरी मेंढी होती। उन जो काही भी आयकीन अखिन देखिन वन सफाई लाईक वय परमेश्वर की स्तुति करत होता।

पूर्व मा दूर एक देश मा काई आदमी होता। ऊन तराहिन को अध्ययन करि होतीन अखिन वय बहुत बुद्धिमान होता। ऊन एक असामान्य तारा ला बादर मा देखिन। ऊन कहिन की एको अर्थ से की यहूदीहिन को एक राजा को जन्म भाईसे। एकोलाईक ऊन वन टूरा ला देखन लाईक आपरो देश लक यात्रा करण को निर्णय लेईन। एक लंबी यात्रा को बाद मा, वय बैतलहम आया अखिन ऊ घर मिलेव जहाँ यीशु अखिन ओका माय-बाप रुकया होतो।

जब एन आदमीहिन न यीशु ला आपरो माय को संग देखिन त ऊन टोघरा टेक सारी ओकी आराधना करिन। ऊन यीशु ला कीमती उपहार देईन। मंग वय घर वापिस आया।