41. परमेश्वर यीशु ला मरेव मालक जिनदों करसे

सैनिकहिन को द्वारा यीशु ला क्रूस पर चढ़ा वन को बाद मा, यहूदी गुरुहीन न पिलातुस सीन कहीस, “ वन झूठो यीशु न कही होतीस की ऊ तीन दिवस को बाद मा मरेव मालक जिनदों होऊ। कोई ला यव सही करण लाईक कब्र की देखरेख करणो पड़े की ओका चेला ओको देह ला चोर सारी नोको लिजाय लेत। अगर वय असो करसेती त वय कहेती की ऊ मरेव मालक जिनदों भईसे। ”

पिलातुस न कहीस, “ काई सैनिकहिन ला लिजावों, अखिन जसो तुमि कर सिकसेव तसो कब्र की देखरेख करो। ” येकोलाईक ऊन्न वन कब्र मा जान को दरवाजो को गोटा पर एक सील लगाय देईन। ऊन्न यव मालूम करण लाईक वहाँ सैनिकहिन ला बसाय देईन की कोईच ओको देह ला चोर नोको सीकेत।

यीशु को मरनों को बाद को दिवस सब्त को दिवस होतो। कोईच सब्त को दिवस काम नहीं कर सिकत होतो, येकोंलाईक यीशु का कोईच संगी कब्र पर नहीं आया होता। पर सब्त को बाद को दिवस, सकारिच बहुत भूमसार, कई बायका यीशु को कब्र पर जान लाईक तैयार भईन। वय ओको देह पर अखिन मसाल लगावन ला चाव्हत होतीन।

वन बायकाहिन को आवन को पहले, कब्र पर एक मोठों भूकम्प भएव। स्वर्ग लक एक स्वर्गदूत न आयसारि वन गोटा ला हटाय देईस जो कब्र को जान को दरवाजो पर झाकेव होतो अखिन ओको पर बस गएव। ऊ स्वर्गदूत उजाड़ो को जसो चमकत होतो। कब्र पर जो सैनिक होता ऊन ओला देखिन। वय येतरा डर गया होता की मरेव वाणी जमीन पर पड़ गया।

जब वय बायका कब्र पर आईन त वन स्वर्गदूत न उनको सीन कहीस, “ कंदराव नोको। यीशु यहाँ नाहाय। ऊ मरेव मालक जिनदों भय गईसे, जसो की वन कही होतीस की ऊ जिनदों होए! कब्र मा ढूड़ों अखिन देखो। ” वन बायकाहिन न कब्र को अंदर अखिन जहाँ यीशु को देह ला राखीन होतीन वहाँ ढूडीन अखिन देखिन की ओको देह वहाँ नोव्हतों!

तब वन स्वर्गदूत न वन बायकाहिन सिन्न कहीस, “ जायसारि ओको चेलाहिन ला सांगो, ‘ यीशु मरेव मालक जिनदों भईसे अखिन ऊ तुम्हारों सामुर - सामुर गलील ला जाय रहिसे। ’’’

वय बायका अचम्भित भई अखिन बहुत आनन्दित भई। वय चेलाहिन ला यव अछी खबर सांगन लाईक पराईन।

जब वय बायका चेलाहिन ला यव अछी खबर सांगन लाईक रस्ता माच होतीन, त यीशु उनको पर प्रकट भएव। वय ओको पाईन पर पडी। तब यीशु न कहीस, “ नोको कंदराव। जायसारि मोरो चेलाहिन ला गलील जान लाईक कहो। वय वहाँ मोला देखेती। ”