16. १६. छुट्कारा बैन्याङराउ

यहोशु सियाङ न्हौ,इस्रायलिराउ अनाज्ञाकारी ओसि अनि बाकी ओयाङ कनानिराउकाना न होइतना खेक्सो ,न त परमेस्वर क आज्ञा मानेसो।इस्रायलिराउ इ यहोवे ,दाल्ठौ साचो परमेस्वरकाना पुजेम क सट्टा कनानी देब राउकाना पुजेम ग्लासी ।इस्रायलिराउ क गुन्ल राजा हैमानी ,हुन्लमारै सब्ल्हाउइल आफुकाना जाङ ठिक ग्लाआ, हुन्ल खैसो।

परमेस्वरकाना अटेरी खैछायाङ कल मारै उ इ शत्रुराउकाना इस्रायलिराउताकी बिजय बैतना दण्ड बया।इन शत्रुराउ इ इस्रायलिराउ क सामान लुटेसो ,हुराउ क सम्पतीराउ नास खैबैसो अनि चो-काना सातबैसो।चो बर्ष मचै परमेस्वर क अनाज्ञाकारी ओयाङ क मारै अनि आफ्नो शत्रुहाइतना थिचोमिचोहा ब्रीयाङ्क मारै,इस्रायलिराउ इ पश्चाताप खैसो अनि छुटकारा क लागै परमेस्वरकाना प्राथना खैसो।

अनि परमेस्वर इ हुराउक लागै दा-जना छुटकारा बैन्याङ मन्छे लेत्बया,जाङि हुराउकाना शत्रुराउ हाइतना बचाआ अनि देशहा शान्ती पित्सो।तर फेरि मन्छेराउइ परमेस्वरकाना भुलेसो अनि मुर्तिराउ पुजेम शुरु खैसो।हुन्लमारै परमेस्वरइ मिध्यानिराउ(नजिकल नैन्याङ दाठौ जाती जाङ इस्रायलिराउ क शत्रु हुइनी)काना हुराउताकी बिजय ओम बया।

सात्थ बर्ष मचै मिध्यानीराउइ इस्रायलिराउक सब्ल अन्नबाली कात्सो।इस्रायलिराउ इच्च त्रसित(प्रीयाङ)ह्रेइनी कि मिध्यानिराउइ आफुकाना ता-दाल्लएद खैतना हुराउ गुफाहा ल्हुपिन्याङ खयनी।आखिरहा हुराउइ बचाउक लागै परमेस्वरकाना पुकारेसो

दाक्काले,गिदोन ब्रीङु ओयाङ इस्रायलक दा-जना मन्छे गुप्त रुपहा अन्न छुछानी ताकी मिध्यानिराउ ओङ्त अन्न लुतेम ता-दारे।हुन्ल बेला यहोवे क दाठौ दुत गिदोन निङ्हा ओङ्तना गारा,"परमेस्वर नाङदैना ह्रेकङ,वीर योध्दा।गात अनि इस्रायलिराउकाना मिध्यानिराउक याकुहाइत् बचा।"

गिदोनक बयुहा मुर्तिकाना अर्पण खैतना बनाइयाङ दाठौ बेदि ह्रेनी।परमेस्वरइ गिदोनकाना हुन मुर्तिकाना भत्काम स्लाआ।तर गिदोन मन्छेराउदै प्रीह्रेयानी ,हुन्लमारै खुश मा-ओम मचै हुन इ कुरेया।अनि हुन इ हुन बेदिकाना भत्काबया,अनि हुन्काना टुक्राउ-टुक्राउ प्रीबया।हुन इ मुर्तिक लागै बनाइयाङ बेदि क नजिकल परमेस्वरक लागै दाठौ नवै बेदि बनाआ अनि परमेस्वरक लागै बलि चढाआ।

अर्को छकाल गुनि हुराउक बेदि भत्काबयाङ मन्छेराउ इ मुसो अनि हुराउ चो रिसेसी ।गिदोनकाना सातमक लागै हुराउ हुन्क नाम्हा स्वासी ,"तर हुन्क बयुइ हुराउकाना गारा,नाराउ आहु आफ्नो देबताकाना सहयोग खयम भ्र्याकी?यदि हुन देबाता हु खाझै त,हुनि आफुकाना बचा उ

हुन न्हौ मिध्यानिराउ फेरि इस्रायलिराउकाना लुटेम ओङ्सि ।हुराउ इच्च चो ह्रेइनी कि हुराउकाना गनेतना साध्य हैमानी ।हुराउदैना लडाइ खयमक लागै गिदोन इ इस्रायलिराउकाना दाल्साथहा जम्मा खैसी।गिदोन इ परमेस्वरदैना निठौ चिन्हराउ ह्रीता ताकि इस्रायलिक बचाउ क लागै परमेस्वर इ हुन्काना चलायाङ हु खैतना उइ निस्चित ओम ह्रोउद ।

पहिला चिन्हक लागै, गिदोनइ दाठौ ठ्याङ्ह्री दिसाहा फिमा अनि परमेस्वरकाना छकाल्याक शि-त दिसाहा माओतना हुन ठ्याङ्ह्रीहा च्याल प्रीम बयम अनुरोध खया।परमेस्वर इ हुसल खैबया।अर्को चोटा चाहिँ हुनि दिशा थिङ्बैन्याङदैना अनि ठ्याङ्ह्रीकाना सुक्खा प्रीबयम परमेस्वरकाना अनुरोध खया।परमेस्वर इ हुन कनि खैबया।इन निठौ चिन्हराउ इ गिदोनकाना मिध्यानिराउहाइत इस्रायलिराउकाना/बचामक लागै परमेस्वर इ ल हुन्काना चलायाङ हु गार्त बिश्वस्त खया।

३२,०००,इस्रायली सैनिकराउ गिदोन निङ्हा ओङ्सि तर परमेस्वर इ इन सङ्ख्या चोल् ओका गारा।हुन्लमारै गिदोनइ लडाइ खयम प्रीयाङ २२,००० जनाकाना नाम्हा लेत्बया।परमेस्वरइ गिदोनकाना मन्छेराउ क सख्या अझै चो ह्रेङ खैत गारा।हुन्लमारै गिदोन इ ३००सैनिक बाहेक बाकी सब काना नाम्हा लेत्बया।

हुन झिरी परमेस्वर इ गिदोनकाना गारा,"मिध्यानिराउक पालहा गात अनि जब नाङी हुराउइ गार्‍याङ कुरा क्लाहौ नाङ फेरि प्रीनेहैमा ।"हुन्लमारै हुन झिरी गिदोन दि पालहा झरेया अनि दा-जना मिध्यानी सैनिकइ आफ्नो सङ्घौकाना म्हानी मुयाङ आङभनी कुरा गार्तल खयाङ क्लाआ।हुन मन्छे इ इसा गार्छानी ,"इन म्हानी क अर्थ हु कि गिदोन क फौज इ मिध्यानी फौजकाना हरान्याङ ह्रेकि ।

हुन न्हौ गिदोन आफ्नो सैनिक राउहा फर्केया अनि प्रतेक जनाकाना दा-दा वटा तुरही,मच्याक गाग्री दैना राको बया।हुराउइ मिध्यानिराउ निङ्याङ शिबिरकाना घेरा जाक्सो।गिदोन क ३००मन्छेराउइ आफ्नो राकोराउ गाग्रीभित्रौ थाथासोनी ताकि मिध्यानिराउइ राकोक प्रकाश मुम ता-ह्रोएद।

अनि गिदोनक सब्ल सैनिकराउइ दाल्चोटा राको सारत्याल आफ्नो गाग्रीराउ कोइसो।हुराउइ आफ्नो तुरहिराउ क्लासो अनि क्रीक्सी ,"यहोवे दै गिदोनक लागै तरबार

पररमेस्वरइ मिध्यानिराउकाना अन्यौलहा प्रीबया,हुन्लमारै हुराउइ आक्रमण खयम ग्लासी अनि दाठौइ-अर्कोकाना सातम ग्लासी ।आल्लघरिउ अरु इस्रायलीराउकाना हुराउक नामराउहाइत मिध्यानिराउकाना खेकम स्लोक्सो।हुराउइ चोकाना सात्सो अनि बाकि ह्रेयाङराउकाना इस्रायलिराउक भुमिहाइत भाइरौ खेक्बैसो ।हुन् काले १,२०,००० मिध्यानिराउ सिसि। इस्रायलकाना परमेस्वरइ बचायाङ हुनि।

मन्छेराउ इ गिदोनकाना हुराउक राजा बनाम भ्र्याथासोनि।गिदोन इ हुराउकाना हुसाखयम बयामा,तर हुराउइ मिध्यानिराउहाइत पित्याङ सोनाक आइचिदा मुन्द्रीराउ ह्रीता, मन्छेराउइ गिदोनकाना चो-भागै सोना बैसो

अनि गिदोनइ हुन सोनाकाना प्रधान पुजारी फाङ्न्याङ्साङ्ल दाठौ खास ठ्याङ्ह्री बनामक लागै प्रयोग खया।तर मन्छेराउइ हुनकाना पुजेम ग्लासी मानेये कि हुन दाठौ मुर्तिल ह्रेनी ।हुन्लमारै परमेस्वरइ फेरि इस्रायलकाना दण्ड बया आहुखाझै हुराउइ मुर्तिकाना पुजेसो।परमेस्वरइ हुराउक शत्रुराउकाना हुराउताकी बिजय ओमबया।अन्तिमहा हुराउइ परमेस्वरकाना साहायताक लागै पुकारेसो,अनि परमेस्वर इ हुराउकाना अर्को दा-जना छुटकारा बैन्याङ मन्छे लेत्बया ।

इन किसिम क खाका चो-चोटा दोहोरिया इस्रायलिराउइ पाप खयनी ,परमेस्वर इ हुराउकाना दण्ड बयुनी ,हुराउइ पश्चाताप खयनी अनि परमेस्वर इ हुराउकाना बचामक लागै छुट्कारा बैन्याङ मन्छेराउ लेतुसिनी ।चो बर्ष क अन्तरालहा ,परमेस्वर इ चो छुट्कारा बैन्याङराउ लेत्सी जाङी इस्रायलिराउकाना हुराउक शत्रुराउहाइत बचासो।

अन्तहा, मन्छेराउइ अरु रास्ट्रराउहा ओयाङसाङ परमेस्वरदैना दा-जना राजा क माग खैसो।हुराउइ इसा राजा चाहेथासोनि जाङ अग्लो दैना बल्ल्यो ओइद,अनि हुराउकाना लरेमहा अगुवाइ खयम ह्रोउद। परमेश्वर इ इन अनुरोध मनौप्रीतमानी तरकनी उ इ हुराउकाना भ्र्यायाङसाङ्ल राजा बया।