23. २३. येशु क जन्म

योसेफ ब्रीङु ओयाङ दा-जना धर्मी मन्छेदैना मरियमक मगनी ओह्रेयानि ।जब मरियम गर्भवती ओयाङ हुनि थाहा दारा,हुन्क गर्भहा ओयाङ बालख उइ क माहु खैतना गार्न्याङ कुरा हुन्कना थाहा ह्रेनी।योसेफ मरियमकना सरमहा प्रीम भ्र्यातमानी ,हुन्लमारै हुनि गुप्त रुपहा मरियमकना त्यागेन्याङ योजना बनाआ।तर हुनि हुसा खयमहाइत ध्री,हुन्क सपनाहा दाठौ स्वर्गदुत हुन निङ्हा ओङा।

हुन्कना स्वर्गदुतै गारा,"योसेफ मरियमकना आफ्नो मत्काउक रुपहा स्विकारेम ता-प्री ।आहुखाझै हुनभित्रौ ओङ्याङ बालख्ख पबित्र-आत्माहाइत ओङ्याङ हु।हुनि दाठौ चाउ जन्मान्याङ ह्रेङ ।उइ क ब्रीङु येशु थाम (जाङ्क अर्थ हु,""योहोवेइ बचाकी"),आहुखाझै उइ मन्छेराउकना हुराँउक पापहाइतना बचानेह्रेङ।"

हुन्लमारै योसेफै मरियम दैना ब्याहा खया अनि हुन्कना आफ्नो मत्काउक रुपहा आफ्नो नाम्हा काता,तर बालख्खक जन्म माओम मचै योसेफ मरियम दै निङामा।

मरियमै बालख्ख जन्मान्याङ समय नजिक ओङ्याङ बेलाहा,रोमि सरकारै सब्ल्हाउकना जन-गणनाक लागै आफ्नो पुर्खाराँउ नयाङ शहरहा स्वान्याङ आदेश जारी खया।योसेफदै मरियमै उइराँउ नयाङ ठन्क नासरतहाइत बेथलेम मचैक लामो यात्रा खयम ब्रीन्याङ ह्रेनी ,आहुखाझै हुराँउक पुर्खा दाउदक शहर बेथलेम हुनि।

जब हुराँउ बेथलेम तोम्पिसी ,हुन्हा नयमक लागै आङ्ल ठाउँ हैमानी ।हुराँउइ दाल्लमह्रोयाङ दाठौ च्याल ठन्क गाइबस्तुक गोठ ह्रेनी ।बालख्ख ह्वाल जन्मेया अनि मरियमै हुन्कना डुडहा थाआ,आहुखाझै बालख्खकना थान्याङ हुराँउदै आङ्लकनि ठन्क हैमानी।हुराँउइ बालख्खक ब्रीङु "येशु"थासो।

हुन झिरी ,नजिककल खेतहा आइचिदा गोठालाराँउ आफ्नो गोठकना मुम नैह्रेसिनी ।अचानक चम्केछायाङ दा-जना स्वर्गदुत हुराउकहा देखाब्रीया ,अनि इन मुतना हुराउ प्रीसि ।स्वर्ग दुति गारा,"ता-प्रीनी,आहुखाझै ङा दैना नराँउक लागै आङ्भनी खुशिक समचारराँउ ह्रेकि।नराँउक मशिह बेथलेमहा जन्मेह्रेका ।

बालख्ख कना भ्र्याम गात्नी ,अनि नराँउइ उइकना थ्याङ्ह्रीहा बेह्रेयाङ अनि डुडहा निङ्ह्रेयाङ दाल्लहे।अचानक,आकाशराँउ परमेश्वरक प्रशंसा खैछायाङ स्वर्गदुतराँउहाइत इसा गार्तल भरेसी "सर्बोच्चहा मरमेश्वरकना महिमा,अनि पृथ्बिहा जाङ मन्छेदैना उइ प्रसन्न ओकङ,हुराउकना शान्ति

आइची न्हौ ,गोठालाराँउ येशु जन्मेयाङ ठन्कहा तोम्पिसी खै स्वर्गदुती गार्याङसाङ्ल उइकना डुडहा निङ्छायाङ दाल्लसो ।हुराउ चो उत्साहित ह्रेइनी ।मरियमकनी चो खुशि ह्रेनी ।गोठालाराँउइ ,हुराउइ मुयाङ-क्लायाङ सब्ल कुराक लागै परमेश्वरकना प्रशंसा चढातल आफ्नो भेडिराँउ ओयाङ खेतहा फर्केसी ।

आइची समय न्हौ,टा-ढो पुर्बक ज्ञानी मन्छेराँउइ आकाशहा अनौठो तारा मुसो ।हुन्क अर्थ यहुदिराँउक दा-जना नवै राजाक जन्म ओह्रेका गार्त हुराँउइ थाहा दार्सो ।हुन्लमारै हुन राजाकना मुम्क लागै हुराँउइ लामो यात्रा खैसो।हुराँउ बेथलेमहा ओङ्सि अनि येशु दै उइक जेयु-बयु नैह्रेयाङ ठन्क पत्ता स्लासो।

जब हुन ज्ञानी मन्छेराँउइ येशुकना उइक जेयुदैना मुसो,हुराँउइ घोप्टो ब्रीत दण्डवट खैसो अनि उइक आराधना खैसो ।हुराँउइ येशुकना बहुमुल्य उपहारराँउ चढासो।हुन न्हौ हुराँउ आ-आफ्नो नाम्हाइ फर्केसी ।