15. प्रतिज्ञा कि युल।

था जुङमा ला ओए नमला ते वोगंबा कि इस्राएलि मिया या प्रतिज्ञा कि छवनि, कनान ला डोए। ओए ना यरिहो से युल चिक वोका। खोला गाहशा छिला थथि गिरला सिकपा टानते सिकचा वोका। यहोशु सु मि चोकति नि ला ओएरु तंगबा। ओए युल दु राहाब सि वेश्या चिक वोका। खो सु ओए चोकति नुहु ला बवा, तेने था तिंगला खोसु खोशाकला ओए ना सु शोरचा ला खोशि रोह चावा। खोसु वोतुक ओए छिला चावाक चिला सेरना खो कोंजोक ला दिन छियाक। इस्राएलि या यरीहो ला सोत ज़िना खोशाक सु राहाब रांग खोए पेरांग ला क्योफ चि प्रतिज्ञा चावा।

इस्राएलि मिया प्रतिज्ञा कि छवनि रु डोया ला यरदन लुंगबा कि फारका ला थोन लांग नोक। कोंजोक सु यहोशु ला नावा, “पुजारि याला थांगला डोरु छुक। तेने पुजारि यासु लुंगबा कि नांगदु कांगबा फोरा ज़िना छु ते शत साक, तेने इस्राएलि मिया लुंगबा कि फाओं छोक ला सेइ कामफु रु थोंनजा ला।

खोशाक सु यरदन नदि ना सु फारका थोंन जासु तेनि कोंजोक सु यहोशु ला नावा था यरिहो युल ला छिलजा फेतचा ला छोंम ला दोत, ओए युल ते ज्ञन टानते वोका। कोंजोक सु ओए मिया ला नावा खोशे पुजारि रांग माहमि याला शाकपा टुक ते ओए युल कि कोरा ज्ञोप नावा। तिंगला पुजारि रांग माहमि या सु वोतुक चावा।

शाकपा दुन कि शाकि, इस्राएलि सुओए ञा युल कि थथि ला लनमा दुन कोरा ज्ञपा गुपला, पुजारि या सु सुरना फुतकिन माहमि यासु शेतचिन कुरा ज्ञपा।

तेने यरिहो कि थथि सिकपा तोलि लोकसाक !कोंजोक सु आज्ञा तातपा कि इस्राएलि या सु ओए युल कि नोर थाकपु चाक ताक। खोशाक सु लिम राहाब रांग खोए पैरांग तांगशा, था खोशाक इस्राएलियों कि छोकला वोका। कनान दु दोतकान जिनमा मिया सु छोरा कि इस्राएलि मिया सु यरिहो तोलि सेनदु चुकताक, तेने खोशाक जिहसाक इस्राएलि मिया सु खोशाला कांग सात मे।

कोंजोक सु इस्राएलि याला आज्ञा तातपा। कि कनान रु दोतकान सु कांग रिह रुहा रांग ञाबु माडिवा दोत। परन्तु गिबोनिया मिन कनानि रिह रुहा ते सु यहोशु ला जुन क्युवाक कि खो कनान नासु थाकरिंग ना वोकान युल ना यिन। खोशाक सु यहोशु ला खोशा रांग ञांबु डिरो चि से वोरछे नावा। यहोशु रांग जिनमा इस्राएलि अगुवों सु माठिवा कि खोशाक चि फितचा से। ओए मागोता,खोशाक सु गिबोनियों रांग ञाबु डिसाक।

शाकपा सुम कि तिगंला इस्राएलियों हुन छोता कि गिबोनि मिया ते कनान दुआ दोतेका। खोशाक छिङनाह लांगबा। चिला सेरना खोशाला डोख्या चावा। परन्तु खोशाक सु खो रांग ञाबु डिकचा वोकान ला माशिकपा। चिला सेरना कोंजोक कि दोरु चावा। तेने नमला युम कि तिंगला, कनान दु दोतकान जिनमा रिह रुहा, एमोरियों कि ज्ञालवु सु छोरा कि गिबोनियों सु इस्राएलियों रांग ञाबु नांगडिक चावा सि। ओए छिला खोशाकसु रांग रांगसि माहमि याला चिक चाशा माहमि छो छिपु चिक ज़ोवा। गिबोन रांग ला क डिया ला। गिबोनियों सु खोशे रोह फितचाला यहोशु ला लोन कुरा।

ओए लोन ते ङानशा यहोशु सु इस्राएलि माहमि याला ज़ोमदु चुकपा, तेने गिबोनिया कि दोरु लितचा ला छांन छिरि डुलवा। ङारो ते खोशाक सु एमोरियओं कि माहमि याला हा लारु चुकता। तेने खोशाला छिल ताक।

ओए शाक कोंजोक इस्राएलि कि छिला लाक डिवाक। खोशाक सु एमोरियों ला जिह तु चुकताक खोशे खातोरु छेपु छेपु सिरा युम ज्ञपचा एमिरियों माहमि ला सात ताक।

था कोंजोक सु ञिमा ला कांग ज़ा चिक तु फोर ताक, ओए छिला कि इस्राएलियों ला नमला मागबु थोपतु चुकचा तेने एमोरियों ला फामगु जुक चा ला। ओए शाक, कोंजोक सु इस्राएलियों कि छिला सु गन छिपु ज्ञलजा थोपा।

कोंजोक सु ओए लामि याला फामदु चुकपे तिंगला, कनानि कि युम रिह रुहा इस्राएल छिलजा ला ज़ोम्बा। यहोशु रांग इस्राएलियों ञुहु सु हमला चाया खोशाक तोलि ला सात ताक।

ओए माह थारवि तिंगला, कोंजोक सु इस्राएल कि गोतर थमशे ला थामजा कि युल दु खोशे काला तातपा। कोंजोक सु इस्राएल कि खोशे तालछम तोलि ला शान्ति तातपा।

था यहोशु गतपु फुसा तेने खो सु इस्राएल कि मि तोलि ला ञाबु कात ज्ञपा। तेने यहोशु सु ओए मिया ला आयका कातपा कि कोंजोक सु सिनै लारु दमङान ओए थामजा ते ञानजे प्रतिज्ञा चाशा वोकानुको। ओए मिया सु कोंजोक तांग ञाबु दांग चाया दोतचे तेने खोए थाडैक ला पालन फेतचि थामंजा चावा।