17. दाऊद रांग ञाबु कोंजोक कि थामजा।

इस्राएल कि गोमा ज्ञलवु ते शाऊल नोक। खो लाहु रांग रिगबु वोका, मिया चुक गोशा वोकान ते वोतुक वोका। शाऊल इस्राएल कि खोए शासन चावि लौ गोमा ज्ञनजिक ज्ञलवु दिमु दता। परन्तु तिंगला खो मि आखि रु फुसाक जिसने कोंजोक कि वुर ला माञिंदा, ओए छिला कोंजोक सु खोए ज़ा रु ज्ञलवु जोया ला जिनमा मि चिक ला लांङबा।

शाऊल कि ज़ा रु ज्ञलवु जोया ला कोंजोक सु दाऊद मिन। कि इस्राएलि टु चिक ला दामशा जोया सुकपा। दाऊद बैतलहम नगर कि लुगज़ि नोक। लनमा युम चङकु रांग ठेनमु ञुहु ला सातताक चिला सेरना दाऊद खोए आपा कि छुगमा छोजिना खोशाक सु (भालु, सिंह)छिलवा। दाऊद ते ञिंगजिमु रांग गाङशेन मि नोक। खो कोंजोक ला दिनछियाक तेने खौए वुर ला ञिनङाह।

दाऊद ख्योाकतोंग वोत ज़िना, खोसु गोलियत कि मि शितचिन वोकान यारांग ञाबु लाक डेवाक। गोलियत ते ज्ञमनि दिमु माहमि चिक नोक। खौ ज्ञमनी शेतचिन वोका। तेने कोंजोक सू गोलियत ला सोतचा रांग इस्राएल ला क्योयफशाला दाउद कि रोह चावा। ओए तिंगला दाउद सु इस्राएल कि डाया ला लनमा युम फामदु चुकपा। दाउद ते माहमि छिपु रु फुसाक। तेने खो सु माहथारजिना इस्राएलि माहमि कि रोह चावा। मिया सु खोला मोना।

मिया सु दाउद ला ज्ञामनि ञिमु चावा कि शाउल ते खो नासु थुकिका। था जुङमाला शाउल खोला सात तोंगमु वोका, ओए छिला दाउद खो रांग खोए माहमि नासु यिपचाला रिया ला शोर साक। शाक चिक, शाउल रांग खोए माहमि दाउद ला फातेका तेने शाउल फु ज़िक रु फुताक। ओए फुए नांग ना दाउद यिपचा वोका परन्तु शाउल माथोंवा। दाउद ते शाउल कि गुपला खोए दोरु फुता, तेने खौ सु शाउल कि खौन्जा चुन जिक चता। तिंगला शाउल फु नासु फिताला थोन ज़िना दाउद सु कात ज्ञपा तेने खोंजा ते तोनबा। ओते लुह नासु, शाउल शेवा कि दाउद खोला ज्ञलवु फेतचाला खोला सोतचाला माञिदा।

था नमला युम कि तिंगला, शाउल माहथारचा ठोंग साक, तेने दाउद ते इस्राएल कि ज्ञलवु नोक। खो ते ज्ञलवु दिमु चिक नोक, तेने मिया सु कांग ञिमु चावा। कोंजोक सु दाउद ला जिनलाफ तातपा तेने थार खीलदु चुकपाक। दाउद सु युम माहथारवा, तेने कोंजोक सु इस्राएल कि डया ला फामदु जुकचा ला खोय रोह चावा। दाउद सु यरुशलेम ला ज्ञलजा ओए रु राजधानि जोवा। ओए रु खो दता शासन चावा। दाउद लो जिपचु छुवु ज्ञलवु दता। ओए खांबु ला इस्राएल ज्ञामनि छुकपु रांग शेतचिन वोका।

दाउद गोन्बा चिक ज़ोमु वोका ओए रु इस्राएलि मिया कोंजोक कि मिहवा फिचाला तेने प़ूजा तोंगजाला लामसाम लौ जिबज्ञा ना सु, खौशाक मूसा सु ज़ोया वोकान ते रु मिलाप कि खुर कि नांगदु कोंजोक कि मोल्लमम फितकिन वोका। तेने खोय छिला प़ूजा तोइका।

परन्तु ओएना नातान मिन कि मि ङोनशि शोतकान चिक वोका। कोंजोक सु नातान ला दाउद ला नारु तंगबा: कि ख्योित सु युम माहथारवा, ओएय छिला ङाए छिला ओए गोन्बा ते माज़ो। ख्योकए टु ते ज़ोवा नुक। तौभि, ङा ख्योतला युम आशीषित फेतकान। ख्योाए रिह रुहा चिक फा कि छिला मिया कि खातोरु ज्ञलवु कि लामु शासन फेका। फादिङ कि छिला शासन फेतकान ते दाउद कि रिह रुहा चिक मसीह यिनोक। मसीह ते कोंजोक सु दामजा वोकान ते नोक ओए ते मिया ला जमंबु लिग कि दिकपा नासु क्यो फका।

जब दाउद सु नातान कि लौन ञानबि तिंगला खो कोंजोक ला वोरछि चावा तेने खोए मिहवा चावा। कोंजोक खोए हैसियत ला ज्ञा छिपु ज़ोएका। तेने खोला युम जिनलाप तेरिका। बेशक, दाउद ला हुन मिका कोंजोक ओए वुर या नम फिकावा थासांग वोशाक वोचम शेयाक कि इस्राएलियो ला नामला रिगबु छुहु, लौ तोंग चिक छुहु मसीह वोंगजा ला गुहशा दोतगु वोङा।

दाउद लौ युम छुहु ठांगबु दांग ञांबु मिया कि खातोरु शासन चावा। खो ज्ञामनि दिंगनासु कोंजोक कि वुर ञांदा, तेने कोंजोक सु खोला आशिषीत चावा। हालाकि, खोए मिज़े जुङमाला खो सु कोंजोक कि खिलाफ दिकपा छेपु चावा।

शाकचिक दाउद खोए महल नासु फिताला तावा तेने फोमु लाहु चिक जुहु ठतकिन वोका। दाउद खोला मिशियाक, लेकिन खोला हुन छोतसाक कि खोए मिन बतशेबा नोक से।

खो मिथोंगखुम चाया दोतचे मिते खाला, दाउद सु खोला खोए दोरु खिंगजा ला मि चिक ला तांगबा। खो ओए फोमु ञांबु ञालवा तेने खोरि खांगबा रु लोक ताक। नामला गनज़िक कि तिंगला बतशेबा सु दाउद ला लौन कुरा कि खो जुहु नाथपा वोत।

बतशेबा कि मिमि कि मिन ते ऊरिय्यााह नोक। खो दाउद कि माहमिया नांग नासु ज्ञाङशिन ते नोक। ओए ज़िना खो माहथारतु फिताला फुतचा वोका। दाउद सु उरिय्‍याह ला माहथारसा नासु कत ज्ञपचा खोए नामा कि दोरु दोतसि नावा। परन्तु जिनमा माहमि या माह थारसा ना वोका ओए छिला खो खांबाला मिडो नावा। तिंगला दाउद सु उरिय्यालह ला माहथारसा रु लौकचा तांगता। माहमि छिपु तेला नाया तांगबा कि उरिय्यांह ला सिंगसाग शेचिन माहमि वोकान छोकला उरिय्याह ला फोर सि। खो शिडोयि छिला। तेनि वोतुक चाया उरिय्या ह ठोंङसाक।

उरिय्यािह माहथारसा रु ठोंगबि तिंगला दाउद सु बतशेबा ला नामाला खिङबा। तिंगला, खोसु दाउद कि टु चिक किवा। दाउद सु चाया वोकान ते ला कोंजोक ज्ञामनि छिङनाह लाङशा वोका, ओए छिला नातान ङोनशिह भविष्याद्वकता तेला कोंजोक सु दाउद ला ओए शोततु तांगबा खो सु च़ाम दिकपा छिपु चिक चावावा तेने दाउद सु खोरि दिकपा चाया वोकान ला दुङाल चावा। तेने कोंजोक सु खोला माफ चावा। खोए मिज़ि कि जुङमाला, ला दाउद काहु ला वोतज़िना कांग कोंजोक कि गुपला 2 फुता तेने खोए वुर ङादा।

परन्तु दाउद कि छिवा ते ठोंगसाक। ओए लुह नासु कोंजोक सु दाउद ला दंडित चावा। ओए मागोता, दाउद ठोंग ठोंग छुहु, खोए पेरांग कि मि गनजिक खोए खिलाफ लाकडिवा, दाउद कि शित कांग ञुन फुसाक।परन्तु कोंजोक ला दिन छीलाङ वोका। तेने खोसु दाउद रांग ञांबु चि फेतचि थामजा चाया वोतना, कांग खो तोलि फेतकान नावा। भले हि दाउद सु खोला ङोज़ा कुवा। तिंगला, दाउद रांग बतशेबा कि जिनमा बुटींग चिक केवा, तेनि खौशाक सुखोए मिन ते सुलैमान फोरा।