19. कोंजोक कि वुर शोतकान।

कोंजोक ते फादिंग इस्राएलियों कि दोरु ङोनशि शोतकान याला तोङिन दोतका। ङोनशि शोतकान ते कोंजोक कि लोन ञानिका तेने मिया ला शोतका।

था अहाब ते इस्राएल कि ज्ञलवु नोक ओए ज़िना एलिय्याह ते ङोनशि शोतकान नोक। अहाब ते मि आखि वोका। खो सु ज़ुनबा लाकि मिहवा फेतचाला मिया ला नानतान चावा। ओए छिला एलिय्याह सु अहाब ला चावा कोंजोक ओए मिया ला दडिंत फेतलांग नोक।खोसु खोला नावा, “जब तक ङा सिर सिर छुहु छारवा मागोता थिहवा कांग इस्राएलकि राज्यक रु मिज्ञाका।” ओए वुर ते सु अहाब ला वोतुक छिङनाह लागंदु चुकपा कि खो एलिय्यािह ला सोतचा सिमजा वोका।

ओए छिला कोंजोक सु एलिय्याुह ला अहाब नासु यिपचा ला रिया रु दोत नावा। एलिय्यातह ओए बमजर कि दोरु फुता जहां डोया ला कोंजोक सु शतपा। शाकतांग ङारो रंग फिरो, छा ते एलिय्यालह ला रोटि रंग छिया खेरचा वोङा। ओए कांगबु ला अहाब रंग खोए माहमि एलिय्याह ला फातकिन दता, परन्तु खोशाक खोला फातगु माछोता।

नम माज्ञवा मज्ञवासु तिंगला बमजार ते कामसा। ओए छिला एलिय्याह दोए छवनि रु फुसाक। ओए छवनि ना मितपु युकसामु वोका खोए टु चिक वोका। खोशि दोना सालांग ते गन सीन डेका चिला सेरना ओएरु आनकालांग कि छिनासु तोदोक माकिवा। ओए फोमु ते सु एलिय्याह ला तावा तेने कोंजोक सु खोरंग खोए चिवा कि छिला चि गोना कांग ताताक, खोशे चांबा रांग मरकु कि कुपा मासिंदा। ओए आनकांलाग वोतज़िना खोशे दोना सालांग वोका। एलियाह लौ गनजि ओएरु दता।

लौ सुम दा टुक कि तिंगला, कोंजोक सु एलिय्या ह ला नावा कि खो नम ज्ञाकतु जुका। खौ सु एलिय्याह ला लोकचा इस्राएल कि राज्या रु फुतचा अहाब ला वुर थोंग नावा। ओए छिला एलिय्याेह अहाब कि दोरु फुता। तेने अहाब सु खोला तावा तेने नावा, ”ख्योत यिनदा, काहु वोंगदु जुकान ते!”एलिय्याह सु नावा, “काहु वोंगदु जुकान ख्यो त नोक !“ ख्योत सु यहोवा ला तांगता। ओए ते ठांगबु कोंजोक नोक,लेकिन ख्योत बाल कि उपासना फेतोक। था ख्यो त इस्राएल राज्य् कि मि तोलि ला करमेल कि लाए गोरु खेरचा योगिशाक।

अत:मि तोलि करमेल लारु फुता। ओए टुया कांग वोगंबा जो बाल कि लौन ला सेरिका बाल कि ङोनशि शोतकान नोक। खोशाक तोलि 450 वोका। एलिय्यागह सु मिया ला नावा, ”ख्योशाक नम छुहु रांए सिम ला खोरतु जुकान? यदि कोंजोक यहोवा यिनना तेने खोए मिहवा चि! यदि बाल कोंजोक यिनना खोए मिहवा चि!”

तेने एलिय्याह सु बाल कि ङोनशि शोतकान याला नावा, ”लांगतो चिक ला प़ुजा थोंगला खोए छिया ला प़ुजा तोंगसि खातोरु फोर, परन्तु ओए ला मि मापार चिक। ओए तिंगला ङा कंग वोतुक का फेति तेने जिनमा वेदि किखातोरु ओए छिया ला फोरि। तेने कोंजोक वेदि ला मि पोसुंग ना तेने ख्योशाक छेयानुक कि कोंजोक ते दिनबानोक सेमङा नुक। तेने बाल कि ङोनशि शोतकान या सु प़ुजा तोंगजा ला तोलि ज़ोया फोरा परन्तु मि माचुकपा।

तेने बाल कि ङोनशि शोतकानया सु बाल ला मिहवा चावा, ”ये बाल ङाशी ञोन!” ओए शाक खोशाक ओए शाक ते ञिन सेरि मिहवा चावा कुरा ज्ञपा रांए लाकपा कांगचत ताक, परन्तुा बाल सु आलिंग माटिंगबा, ना मि कांग माबारा।

बाल कि ङोनशि शोतकान या सु बाल ला ञिन छिरि मिहवा चावा। जुंमाला खोशा सु मिहवा माचावा दता। था एलिय्यानह सु जिनमा लांउ कि छिया ला कोंजोक कि वेदि कि खातोरु फोरा। ओए तिंगला, खो सु मियाला छुइ नोशात चुञि छिपु रु छु खिंग जा ओए प़ूजा तोंगसा रु फो नावा जब तक ओए छिया, शिंग, तेने ओए वेदि कि थथि सेया थाकपु लानते डो डो छुह।

तेने एलिय्यागह सु मोलळम ज्ञपा, ”हे यहोवा, अब्राहम,इसहाक, तेने याकूब कि कोंजोक मांगशाला थोन कि ञित ते इस्राएल कि कोंजोक यिन तेने मांग ञि योकपु यिन। मांगला लान नांग तेने उइ मिया ला शोत कि ञित तेका ठांगबु कोंजोक नोक।”

ओति ज़िना, नम ना सु मे वोङ शा वेदि कि खातोना वोकान छिया, शिंग, दुआ थावा ओए मागोता ओए थथि ना वोकान छु ला कांग मे बारसा। जब मिया सु थोवां, तेने खोशाक सेय रु फिर चा नावा, “यहोवा तिया कोंजोक नोक! यहोवा तिया कोंजोक नोक!”

तेने एलिय्या ह सु नावा, ”बाल कि ङोनशि शोतकान चिक ला कांग डोरु माजुक!” ओए छिला बाल कि ङोनशि शोतकान याला ज़ुम ताक तेने खोशाला पेया खेरचा सात ताक।

तेने एलिय्याह सु अहाब ला नावा, ”ज्ञोवा खांबाला सोंग, चिला सेरना नम ज्ञाकलांग यिनो।” वोति ज़िना नम ठिह शा नम ज्ञप वोंगबा। यहोवा आनकालांग सेनदु जुयिका। वोतुक दोनिका कि यहोवा तेया ठांगबु कोंजोक नोक।

जब एलिय्याह ते खोरि लाहा सेनदु चुकचा वोका, तेने कोंजोक सु ङोनशि शोतचाला एलिशा मिन कि मि ला दामबा। कोंजोक सु एलिशा छिनासु युम हालालांग लाहा चवा। हा लालांग चिक नामान रांग ञांबु चावा। खौ ते डा जिक कि माहमि छेपु नोक, परन्तु खोला ङोनोङ ला नाज़ा आखो चिक वोका। नामान सु एलिशा कि बारे ला छोरचा वोका, ओए छिला खो एलिशा कि दोरु फुता तेने खोला दिमु ज़ोरोछि नावा। एलिशा सु खोला यरदन नदि रु फुत ला लानमा दुन छु ला गुङतोंङ।

नामान ते छिङनाह लांगसा। खो सु वोतुक मिफित नावा, चिला सेरना ओए ते खोला मुरखता छोरिका। परन्तु तिंगला खोए सेंम्बा ज्ञुर सा तेने यरदन नदिरु फुतचा चल ज्ञपा। जब जुंमाला खो छु नासु फिताला थोनज़िना कोंजोक सु खोए नाज़ा ला दिमु ज़ो ताक।

कोंजोक सु इस्राएल कि मिया कि दोरु ङोनशि शोतकान युम तांगबा। खोशाक तोलि सु मिया ला कुया कि मिहवा फेतचा थोंग से नावा। वोतुक माछावा, खोशाला चिकतांग चिक ला ठिम दिमु रांग ञाबु दोतचि ञिंग जिमु चाया दोतचा ला नावा। ओए ङोनशि शोतकान या सु मिया हा काता कि लाहा ङानबा फेतचा बंद चि नावा, ओए सांग ता कोंजोक कि वुर ला ञानजा दोत। खालते खोशाक वोतुक मिफितचाना तेने कोंजोक खोशाक ला दोषि सेमझा खोशि ठिम चोतका, तेने खोशाला दडिंत फेका।

नमला मांगबु, ओए मिया सु कोंजोक कि आज्ञा कि पालन माचावा। खोशाक सु गन ञोनशि शोतकान याला ज्ञामनि आखि चावा तेने ओए मागोता खोशा गन ला सात ताक। लनमा चिक, यिमयाह ला यिन कामफु कि नांगदु चुकताक तेने खोला छिया ला युहसा। खो यिन कि नांगगि कालक ला गुंङसा। लेकिन बिन्यमिन ज्ञलवु ते खोला ञिंग जिसा तेने खो सु खोए माहमि ला नाया यिमयाह कि छियि थांगला फिताला तोंदा।

मिया सु चाम आखि चाना कांग ङोनशि शोतकानया कोंजोक कि छोक नासु सेर किन दता भले हि खोशाक आखि चानाकंग। ङोनशि शोतकान या सु खोशाक ला हा काता कि खालते खोशाक सु पछतावा मिफितचाना कोंजोक खोशाला नाश चातोङा। खोशाक सु मिया याला कोंजोक कि ओए थामजा ते आतला कुलवा कि कोंजोक सु खोशे दोरु मसिह ला तोंगजे प्रतिज्ञा चावा।