3. होलडो।

था लो युम कि गुपला, जमबुलिंग दु मि युम दोतिका। खोशाक ज्ञामनि आखि रांग लाक ढियान वोका। खोशाक वोचम आखि वोका कि कोंजोक सु उइ जमबुलिंग तोलि ला होलडो रांग सेनदु चुककान से थाह चावा।

कोंजोक ते नुह नासु गरि शिया वोका। खो मि ङानबा याकि जुङदु दोतकान मि धारमिक नोक। कोंजोक सु नुह ला शतपा ञा होलडो छिपु चिक तोङान। ओए छिला ख्योरांङ नाव छिपु चिक ज़ोया ला नावा।

कोंजोक सु नुह ला 140 मीटर रिंगबु, 23 मीटर शांगजिन तेने 13.5 मीटर थोनपु नाव जो नावा। नुह लाओए नाव ते शिङ कि जोलाङ नोक। ओएरु थोक सुमबा खांगबा युम, तेने ताङ चिक, कारकुंङ चिक जोलांङ नोक। ओए नाव ते नुह, कि पेरांङ, रांग जमबुलिंग ना वोकन सिमशिन तोलि ला ओय नांग दु फोरा होलडो नासु दिमु फोरका।

नुह सु कोंजोक कि वुर ञानबा। तेने कोंजोक चुक सेरकान ते नुह सु खोए टु सुमला याला वोतुका ज़ोरु चुकपा। चिला सेरना ओए नाव ते ज्ञामनि छिपु वोका। खोला ज़ोया ला लौ युम गौरा। नुह सु मियाला होलडो वोगजे हा कातपा। तेने खोशाला कोंजोक कि वुर ञोन नावा। ओए मिया सु खोइ वुर ला दिन माछिवा।

कोंजोक सु नुह ला खोए पेरांग दांङ सेमशिन या कि छिला सामा सापतुंग दु ला फोर नावा। था तोलि छोमशा वोका, तेने कोंजोक सु नुह ला नावा, थासांग ते ख्योए नामा ला तेने ख्योए टु नामा तेने छाव छामु पेरांग तोलि चाया मिदा ज्ञित नाव कि नांगदु डोलाग नोक।

कोंजोक सु चा चिव, सेमशिन कि फो रांग मो तोलि ला नुह कि नाव रु तागंबा होलडो वोगज़े ना मेथिचा ला। कोंजोक सेमशिन तोलि कि टु रांग फोमु दुन दुन तांगबा। चिला सेरना पुज़ा तोंगजा ला। था खोशा तोलि नाव रु लिपचा वोतज़िना। तेने कोंजोक सु नाव कि गो ज्ञप ताक।

था छारवा ज्ञाकचा सुकपा, फा ज्ञाकिन दतपा, ज्ञाकिन दतपा। शाकपा जिपचु ञिन छंन ज्ञाकिन दतपा। जमबुलिंग कि नोर चिक मिता। ओए मिता ला थोनपो सि थोनपो ला कांग छु ला गुङसा।

सेया कामफु रु दोतकान सिमशिन मि नोर तोलि शि साक, ओए मिया रांग सेमशिन याला तांग शा नाव ना वोकान ते। ओए नाव ते छुइ खातोरु खोरकिन दतपा तेने नाव कि नांगना वोकान नोर तोलि दिमु वोका।

शारवा छत पि तिंगला, दा ञाह छुहु नाव छुइ खातोरु खोरकिन दता, तेनि था छु ते ञुन फु डिका। तेने शाकचिक नाव ते ला कि गौ रु खात दता। से ते थुना छुला गुङशा वोका। दा सुम कि तिगला, लाए गौ या मनताइ थोए का।

तेनि दुरुंग शाकपा जिपचु कि तिगला, नुह सु काकचि चिक तारु तागबा कि फिता ना छु काम दोकपा। ओए काकचि ते सेया कामफु फातकिन फाला- छुला फुरकिन दता, खोला वोतुक कामफु ज़ा माथोवा।

तेने तिगला नुह सु मुकु ला फिताला तागबा। था खो ला कांग सेया कामफु माथोवा। ओए छिला खो लोकचा नुह कि दोरु वोङ ताक। शाकपा दुन कि तिगला ञा ओए मुकु ते ला तागबा, था खो ते खारु ङोनपु होक चि खेरचा लोकचा वोगंबा। तेने छु ठिया ञुन फुडिक, तेने पांगया ञा किएका।

शाकपा दुन गुहवे तिगला शाकपा सुमङो ते ओए मुकु तेला फिताला तागबा। थालिम, खोला दोतचे ज़ा थोप सा तेनि खो लोक चा मायोंबा। छु काम डेका।

दा ञि तिगला कोंजोक सु नुह ला नावा, “सेमशिन या रांग ख्योए पेरांग याला खेरचा नाव ना सु थोन ला सोग। तेने ठा फुटिंग रांग छाव छामु कि ला जमबुलिंग ला खोंग तोग।” था खो खोरि पेरांग तोलि ला खिर चा फिताला वोङबा।

नुह नाव नासु फिताला वोगबे तिंगला, सिंगसांग थांगला खो सु पुज़ा तोञसा ज़ोया पुज़ा तोञलाङ रिह तोलि कि सेमशिन गनजिक याला खेरचा पुज़ा तागबा। ओए पुज़ा ते सु कोजोक गरि शिया वोका। तेने नुह कि पेरांग ला जिंनलाफ तातपा।

कोंजोक सु नावा, “ङा थामजा फिते कि मि चावि लाहा ङानबा कि छिला ङा जमबुलिंग ला खामाटो मिसेर होलडो रांग जमबुलिगं ला सेनदु मिजोक, चाना कांग मि ते केनासु दिकपा नोक।

तेने कोंजोक खोरि थामजा कि जिह चोरे गोमा झ़ा जोवा। नाम कांग नमखा ला झ़ा थोगजा ना कोंजोक ते आतला फेका। कि खो सु चि थामजा चाया वोका। तेने खोए मिया कांग वोतुक आतला फेकाक।