31. यीशु पाणी पांदी हाँडा

पांची होजारौ लौगौ कै खाणौं खियांणौ कै बाद, यीशुऐ आपणै चैलै कै किश्ती पांदी जाणौ कै बौल़ौ। तैणै तिनुकै झीलौ कै औकी ढौबौ कै जाणौ कारिए बौल़ौ जोबै कै सै ऐघौड़ै तिथी रौके गौआ। औरौ चैलै आगु हौटे औरौ यीशुऐ भीड़ौ कै बिदा कौरे कै भीड़ आपणै घौरौ कै जांव। इथकै बाद, यीशु प्रार्थना कौरणौ कारिए ऐकी धारौ पांदी हौटे गौआ। तिथै सै ऐकली थिया, औरौ तैणै रात भौरै प्रार्थना कौरे।

तौलौ, चैलै आपणै किश्ते चौलाए लौए थै, पौरौ बागुर बैरवें कै बौऐ रौए थै। बौहिते रात हौए जाणौ के बाद बै सै सिरफ झील कै बीचो दै पौंऐचे रौवे थिऐ।

तौलौ तोड़ी यीशुऐ प्रार्थना कौरे पाए औरौ आपणै चैलै कै धौरे पाछु जाणौ शुरू कौरौ। सै किश्ती पांदी जाणौ कारिए पाणी पांदी हांडदा लागा।

तोबै चैलै तैसीकै दैखा। सै बैजाए डौरे गौवे जिथुकै तिनुऐ सौंचै राए थियु कै सै कुणजाई भूत औसौ। यीशु जाणौ थिया कै सै डौरे गौवे, इथकारिए तैणै तिनुकै धाव दैऐबा बौल़ौ, “डौरेया नै, हांव औसौ!”

तोबै पतरसै यीशु कै बौल़ौ, “ ओए रै प्रभु, जै ऐजा तू औसौ तौ मौखै पाणी पांदी हांडेबा आपणै धौरे आणौ का आदेश दै।” यीशुऐ पतरसौ कै बौल़ौ, “आ”

औरौ पतरस किश्ती पौरेशा उदा उतरा औरौ यीशु कै धौरे जाणौ कारिए पाणी पांदी हांडणौ शुरू कौरौ। पौरौ देणिक दूर जाऐबा, तैणै आपणी आखी यीशु पौरेशी हौटाए दी औरौ फालौ दैखयो औरौ जौराल़े बागुर दैखेबा डौरे गौआ।

तोबै पतरस डौरे गौआ औरौ पाणी मुंजी डूबदा लागा। तैणै लेरौ मारी, “ओए रै प्रभु, मौखै बौचा!” यीशुऐ तौलौंई हाथ दैऐबा तैसी पाकड़ै दिया। तोबै तैणै पतरसौ कै बौल़ौ, “तैरा बिशवाश बैजाए कम औसौ! आपणा बोचाव राखणौ कारिए तौंऐ मौ पांदी बिशवाश काए ना कौरी?”

तोबै यीशु औरौ पतरस किश्ती पांदी बौठ गौवे, औरौ तौलौंई बागुर बौहणै बौन्द हौए गौऐ औरौ पाणी का शाद बै बौंद हौए गौआ। चैलै हैरान हौऐबा यीशु कै औगौड़ियौ घुन्डु नियुड़ाए दिऐ। तिनुऐ तैसकै बौड़ाए कौरे औरौ तैसीकै बौल़ौ, “सौथी कै तू पौरमेशवर का बैटा औसौ।”