10. Pesti Sanulu

Maromak fó-hanoin ba Móises no Araun katak Faraun sei ulun-toos. Bainhira sira hasoru Faraun, sira dehan, "Izrael sira-nia Maromak dehan, 'husik Hau-nia povu sai!" Maibe Faraun la rona sira. Laos husik ema Izrael livre, maibe nia obriga sira atu serbisu maka'as liután!

Faraun kontinua lakohi husik ema Izrael sira sai, tan ne'e Maromak hamosu Pesti aat sanulu ba rai Ejiptu. (Pesti mak dezastre ne'ebé aat tebes). Liu husi Pesti sira-ne'e, Maromak hatudu ba Faraun katak Nia iha kbi'it boot liu fali Faraun no Maromak sira hotu iha rai Ejiptu.

Maromak halo mota Nilo nia bee sai raan, maibe Faraun nafatin lakohi husik ema Izrael sira sai.

Maromak hamosu Manduku ba rai Ejiptu tomak. Faraun husu ba Móises atu halakon manduku sira-ne'e. Maibe depoiz manduku sira mate hotu, Faraun la fó fuan no lakohi ema Izrael sira sai.

Nune'e Maromak hamosu Pesti susuk no depoiz Pesti lalar. Faraun bolu Móises no Araun no dehan ba sira katak ema Izrael bele sai sé sira hapara pesti ne'e. Móises harohan no Maromak hasai lalar sira hotu husi rai Ejiptu, maibe Faraun la fó fuan no lakohi husik ema Izrael sai husi rai Ejiptu.

Tuir mai, Maromak hamosu moras ida hodi oho ema Ejiptu sira-nia animal. Faraun la fó fuan no nia lakohi husik ema izrael sira sai.

Depoiz Maromak haruka Móises atu soe ahi-kadesan ba leten iha Faraun nia oin. Bainhira nia halo nune'e, moras kulit ne'ebé todan mosu rai Ejiptu, maibe laiha ema Izrael ida mak hetan moras ne'e. Maromak halo Faraun nia fuan toos no Faraun la husik ema Izrael sai ho livre.

Depoiz ne'e, Maromak hamosu udan ho Jelu-isin ne'ebé estraga ai-horis sira iha rai Ejiptu tomak no oho sé de'it mak sai husi uma. Faraun bolu Móises ho Araun no dehan ba sira, "Hau halo sala ona. Imi bele sai." Depoiz Móises harohan no udan ho Jelu-isin para.

Maibe Faraun halo sala tan no la fó-fuan no lakohi husik ema Izrael sai.

Tan ne'e, Maromak halo Gafañotu lubun boot ba rai Ejiptu. Gafañotu sira-ne'e han ai-horis sira ne'ebé mak la hetan estraga husi udan ho Jelu-fatuk.

Depoiz Maromak hamosu nakukun durante loron tolu. Kondisaun nakukun tebes to'o ema Ejiptu labele sai husi sira-nia uma. Maibe iha ema Izrael nia hela-fatin iha naroman.

Maske hetan ona Pesti sira ne'e, Faraun nafatin lakohi husik ema Izrael sai ho livre. Tamba Faraun lakohi rona, Maromak planeia atu haruka Pesti ikus ida. Ida-ne'e sei fila Faraun nia hanoin.