31. Jesus la'o iha bee leten

Depois de Jesus fó han ema barak, Nia haruka Ninia eskolante sira sa'e ba ró. Nia haruka sira atu hakur tasi enkuantu Nia hela kleur oituan. No eskolante sira bá, no Jesus haruka ema barak ne'e fila ba sira-nia uma ida-idak. Liu tiha ne'e, Jesus sa'e ba foho hodi harohan. Nia mesak iha-ne'ebá, no Nia harohan to'o kalan bo'ot.

Durante ne'e, eskolante sira sa'e sira-nia ró, maibe anin huu maka'as hasoru sira. Bainhira kalan boot ona mak, sira foin to'o iha tasi klaran.

Momentu ne'ebá, Jesus harohan hotu ona no hahu fila la'o hasoru Nia eskolante sira. Nia la'o iha bee leten ba sira-nia ró.

Depois eskolante sira haree Nia. Sira ta'uk tebes tamba sira hanoin Nia mate-klamar. Jesus hatene katak sira ta'uk, nune'e Nia hatete ba sira no dehan, " Labele ta'uk. Ne'e Ha'u!"

Depois Pedru dehan ba Jesus, "Mestre, se ne'ebá ita-boot, komanda hau la'o iha bee leten ba ita-boot." Jesus dehan ba Pedru, "Mai ba!"

Nune'e, Pedru tuun husi ró no hahu la'o ba Jesus iha bee leten. Maibe depois nia la'o pasu balu, nia hateke ses husi Jesus no hahu haree ba laloran no sente anin boot.

Depois Pedru sai ta'uk no hahu mout ba bee laran. Nia hakilar, "Mestre, salva hau!" Iha ne'ebá kedas, Jesus fó liman no kaer Pedru. Depois Nia dehan ba Pedru, "Ó-nia fé ki'ik tebes! Tansá ó la tau fiar mai Ha'u hodi kuidadu ó?"

Depois Pedru ho Jesus sa'e ba ró laran, no anin para kedas. Bee sai kalma. Nia eskolante sira hakfodak tebes no hakneak hodi hahii Jesus. Sira hahii Nia hodi dehan ba Nia, "Tebes, Ita-boot mak Maromak Oan.