32. Jesus kura ema ne'ebé prosedu husi sataná & feto ida ne'ebé moras

Jesus ho Nia eskolante sira ho ró bá area iha ne'ebé ema Gerasa sira hela ba.

Agora iha mane ida iha ne'ebá ne'ebé posedu husi sataná.

Ema ne'e forsa tebes to'o la iha ida mak bele kontrola nia. Dalaruma ema kesi nia liman no ain ho arame, maibe nia nafatin sobu.

Mane ne'e hela entre rate sira iha area ne'ebá. Mane ne'e sempre hakilar loron no kalan tomak. Nia la uza ropa, no nia kadavéz hakanek nia an rasik ho fatuk.

Ema ne'e halai ba Jesus no hakneak iha Nia oin. Depois Jesus ko'alia ba Espíritu aat ne'ebé iha nia laran no dehan, "Sai tiha husi ema ne'e!"

Sataná ne'e hakilar ho lian maka'as, "Saida mak Ita-boot hakarak husi ha'u, Jesus, Maromak Oan ne'ebé aas liu hotu? Favór labele tortura/kastigu ha'u!" Depois Jesus husu ba sataná ne'e, "Ó-nia naran saida?" Nia hatan, "Hau-nia naran Lejiun, tamba ami barak."

Espíritu aat sira ne'e husu ba Jesus, "Favór labele duni ami husi area ne'e!" Iha-ne'ebá iha fahi-lubun ida mak buka hela hahan iha foho besik ne'ebá. Nune'e Espíritu aat sira ne'e husu ba Jesus, "Favór haruka ami tama ba fahi sira ne'ebá!" Jesus dehan, "Di'ak, tama ba iha fahi sira ne'ebá.

Nune'e espríitu aat sira sai husi ema ne'e no tama ba iha fahi sira. Fahi sira ne'e halai tuun husi foho ne'ebé klean tuun ba tasi no mout. Fahi-lubun ne'e besik 2.000.

Iha ema balu mak tau-matan ba fahi sira ne'e. Bainhira sira haree saida mak akontese, sira halai ba sidade. Iha-ne'ebá sira konta ba ema hotu kona-ba saida mak Jesus halo ona. Ema sira husi sidade mai no haree ema ida uluk prosedu husi sataná ne'e. Nia tur ho kalma, uza ropa, no halo hahalok hanesan ema normal.

Ema sira ta'uk tebes no husu Jesus atu bá/sai. Nune'e Jesus sa'e ba ró laran. Ema ne'ebé uluk prosedu husi sataná husu atu tuir Jesus.

Maibe Jesus dehan ba nia, "Lae, Hau hakarak ó fila no konta ba ema hotu saida mak Maromak halo ona ba ó. Konta ba sira oinsa Nia sadia ona ó."

Nune'e ema ne'e bá no konta ba ema hotu kona-ba saida mak Jesus halo ona ba nia. Ema hotu ne'ebé rona nia istoria hakfodak tebes.

Jesus fila fali ba tasi sorin. Nia to'o iha ne'ebá, ema barak hobur no sena Nia. Entre ema barak ne'e iha feto ida mak sofre ran fakar durante tinan 12. Nia selu hotu ona nia osan ba doutor sira hodi sira bele kura nia, maibe nia ran ne'e aumenta fakar barak.

Feto ne'e rona tiha ona katak Jesus kura ona ema moras barak no hanoin, 'Hau fiar katak hau bele kaer Jesus nia ropa, nune'e hau mós sei di'ak!' Nune'e nia hakbesik ba Jesus no kaer Nia ropa. Depois nia kaer, nia ran fakar ne'e para!

Momentu ne'ebá kedas, Jesus realiza katak Nia kbi'it sai ona husi Nia. No nia fila no husu, "Sé mak kaer Hau?" Nia eskolante sira hatan, "Iha ema barak mak hobur Ita-boot no soke Ita-boot. Tansá Ita-boot husu, 'Sé mak kaer Hau?'"

Feto ne'e hakne'ak iha Jesus nia oin, nakdedar no ta'uk tebes. Depois nia konta saida mak nia halo ona, katak nia hetan ona kura. Jesus dehan ba nia, "Ó-nia fé kura ona ó. La'o ba ho dame."