36. The Transfiguration

Loron ida, Jesus bolu ho Nia eskolante na'in-tolu, Pedro, Tiago no Joaun. (Eskolante ida ho naran Joaun la hanesan ho ema ne'ebe sarani Jesus). Sira la'o ba foho ida ne'ebe aas hodi harohan.

Bainhira Jesus harohan hela, Nia oin sai nabilan hanesan loro-matan. Nia ropa sai mutin hanesan naroman, mutin liu duke ida-ne'ebe ema halo iha mundu.

Tuirmai Moises no Profeta Elia mosu. Sira moris ona iha mundu tinan atus ba atus antes ne'e. Sira ko'alia ho Jesus kona-ba Nia mate tanba Nia sei mate iha Jerusalem.

Bainhira Moises no Elia ko'alia ho Jesus, Pedro dehan ba Jesus, "Di'ak tebes ita iha ne'e. Mai ita halo abrigu tolu, ida ba Ita-Boot, ida ba Moises, no ida tan ba Elia." Maibe Pedro la hatene saida mak nia dehan.

Bainhira Pedro ko'alia hela, kalohan nabilan ida tun no hale'u sira. Depois sira rona lian mai husi kalohan ne'e. Lian ne'e dehan, "Ne'e mak Hau-Nia Oan ne'ebe Hau hadomi. Hau kontenti ho Nia. Rona Nia ba." Eskolante na'in-tolu ne'e tauk tebtebes no monu ho oin tun ba rai.

Depois Jesus kaer sira no dehan, "Labele tauk. Hader ba." Bainhira sira haree sorsorin, ida-ne'ebe sei iha ne'eba maka Jesus de'it.

Depois Jesus no eskolante na'in-tolu ne'e tuun husi foho ne'e. Tuirmai Jesus dehan ba sira, "Labele dehan ba ema ida kona-ba saida mak akontese iha ne'e. Hau sei mate no moris fali. Liutiha ne'e, hafoin imi bele konta ba ema seluk."