37. Jesus halo Lazarus moris hi'as husi mate

Iha ema ida naran Lazaru. Nia iha alin feto na'in-rua naran Maria no Marta. Sira hotu mak Jesus nia belun di'ak. Loron ida ema ida dehan ba Jesus katak Lazaru moras makaas hela. Bainhira Jesus rona ida-ne'e, Nia dehan, "Moras ne'e sei la hotu ho Lazaru nia mate. Maibe, moras ne'e sei halo ema hahii Maromak."

Jesus hadomi Nia belun sira, maibe Nia hein iha fatin ne'e durante loron rua. Liutiha loron rua, Nia dehan ba Nia eskolante sira, "Mai ita fila ba Judeia." "Maibe mestre," Nia eskolante sira hatan, "tempu balun liu ba ema sira iha-ne'eba hakarak oho Ita-Boot!" Jesus dehan, "Ita-nia belun Lazaru toba ona no Hau tenke fanu nia."

Jesus Nia eskolante sira hatan, "Mestre, se Lazaru toba, nia sei hetan kura." Tuirmai Jesus dehan ho klaru ba sira, "Lazaru mate tiha ona. Hau kontente katak Hau la iha ne'eba, atu imi fiar mai Hau."

Bainhira Jesus to'o iha Lazaru nia knua moris fatin, Lazaru mate tiha ona durante loron haat. Marta la'o hasoru Jesus no dehan, "Mestre, se Ita-Boot iha ne'e, hau-nia maun sei la mate. Maibe hau fiar katak Maromak sei fo saida mak Ita-Boot husu ba Nia."

Jesus hatan, "Hau mak Moris hias no Moris. Se de'it mak fiar mai Hau, nia sei moris maske nia mate tiha ona. Se de'it mak fiar mai Hau, nia sei la mate. O fiar kona-ba ida-ne'e?" Marta hatan, "Loos, Mestre! Hau fiar katak Ita-Boot mak Mesias, Maromak Oan."

Tuirmai Maria to'o. Nia monu ho oin iha Jesus Nia ain no dehan, "Mestre, se Ita-Boot iha ne'e, hau-nia maun sei la mate." Jesus husu ba sira, "Imi tau Lazaru iha-ne'ebe?" Sira hatan, "Iha rate laran. Mai no haree ba." Depois Jesus tanis.

Rate ne'e mak fatuk-kuak ida ho fatuk ne'ebe taka netik iha rate nia odamatan. Bainhira Jesus to'o iha rate ne'e, Nia dehan ba sira, "Dudu sees tiha fatuk ne'e." Maibe marta dehan, "Nia mate loron haat ona. Sei iha iis ne'ebe ladi'ak."

Jesus hatan: "Laos Hau dehan ona o, katak o sei haree Masromak nia poder, se o fiar mai Hau?" Depois sira dudu sees tiha fatuk ne'e.

Depois Jesus haree ba lalehan no dehan, "Aman, obrigadu tanba ITA-BOOT rona ona Hau. Hau hatene ITA-BOOT sempre rona Hau, maibe Hau dehan ida-ne'e hodi ajuda ema hotu ne'ebe hamriik iha-ne'e, atu sira fiar katak ITA-BOOt haruka ona hau." Depois Jesus hakilar, "Lazaru, sai mai ba!"

Nune'e Lazaru sai mai! Nia sei taka ho hena mutin. Jesus dehan ba sira, "Ajuda nia hasai tiha hena ne'e no husik nia bá!" Ema Judeu barak mak fiar ba Jesus tanba milagre ne'e.

Maibe lideransa relijiozu sira laran moras ba Jesus, to'o sira halibur hamutuk hodi planu oinsa sira bele oho Jesus no lazaru.