38. Jesus Is Betrayed

Kada tinan, ema Jedeu selebra Paskua. ne'e mak selebrasaun hodi hanoin oinsa maromak salva ona sira-nia bei'ala husi servisu atan iha Ejitu iha sekulu sira antes. Maizoumenuz tinan tolu liutiha Jesus haklaken ba dala uluk no hanorin iha publiku, Jesus fo hatene Nia eskolante sira katak Nia hakarak selebra Paskua hamutuk sira iha Jerusalem no Nia sei hetan oho iha-ne'eba.

Jesus Nia eskolante ida naran Judas. Judas responsavel ba apostolu sira-nia saku osan nian, maibe dalaruma nia na'ok osan husi saku refere. Depois Jesus no eskolante sira to'o iha Jerusalem, Judas la'o ba lideransa Judeu sira. Nia halo negosiasaun ba Nia An hodi trai Jesus ho maneira identifika Jesus ba autoridade sira hodi troka ba osan. Judas hatene katak lideransa Judeu sira la simu Jesus hanesan Mesias. Nia hatene katak sira hakarak oho Nia.

Lideransa Judeu sira, ne'ebe lidera husi am'lulik boot, selu Judas ho osan-mutin 30 hodi trai Jesus ho entrega Nia ba sira. Ida-ne'e akontese hanesan ida-ne'ebe hetan profesia ona husi profeta sira. Judas aseita, foti osan ne'e, no ba. Nia hahu buka tempu hodi ajuda sira kaer Jesus.

Iha Jerusalem, Jesus selebra Paskua hamutuk ho Nia eskolante sira, Jesus foti paun no harahun. Nia dehan, "Foti no han ba ida-ne'e. Ne'e mak hau-nia isin, ne'ebe saran ba imi. halo ida-ne'e hodi hanoin Hau." Ho ida ne'e, Jesus dehan katak Nia sei mate ba sira no Nia sei saran Nia isin ba sira.

Depois Jesus foti kopu ho tua no dehan, "Hemu ba ida-ne'e. Ne'e mak Hau-Nia ran, ran aliansa foun, ne'ebe sei fakar atu Maromak perdua imi-nia sala. Halo ba saida mak Hau halo agora, hodi hanoin Hau bainhira imi hemu."

Depois Jesus dehan ba eskolante sira, "Ida husi imi sei trai Hau." Eskolante sira hakfodak no husu se mak sei halo ida-ne'e. Jesus dehan, "Ema ne'ebe Hau fo paun pedasuk ne'e mak traidor ne'e." Depois Nia fo paun ne'e ba Judas.

Depois Judas foti paun ne'e, Satanas tama ba nia laran. Judas ba no ajuda lideransa Judeu sira hodi kaer Jesus. Momentu ne'eba kalan.

Depois de han, Jesus no Nia eskolante sira la'o ba Foho Zaitun. Jesus dehan, "Imi hotu sei husik hela hau kalan ne'e. Hakerek nanis ona: Hau sei baku bibi-atan no bibi-malae hotu sei namkari.'"

Pedro hatan, "Maske sira seluk husik hela Ita-Boot, hau sei la husik hela Ita-Boot!" Depois Jesus dehan ba Pedro, "Satanas hakarak domina imi hotu, maibe Hau harohan ona ba o, Pedro, atu o-nia fe la nakdoko. Make nune'e, kalan ne'e, antes manu kokorek, o sei nega dala tolu katak o konese Hau."

Depois Pedro dehan ba Jesus, "Maske hau sei mate, hau sei la nega Ita-Boot!" Eskolante sira seluk mos dehan nune'e.

Depois Jesus la'o hamutuk ho Nia eskolante sira ba fatin ida naran Getsemani. Jesus haruka Nia eskolante sira hodi harohan atu sira la monu ba tentasaun. Depois Jesus ba harohan mesak.

Jesus harohan dala tolu, "Hau-Nia Aman, se bele, labele halo Hau hemu kopu terus nian ne'e. Maibe se laiha dalan seluk atu perdua ema nia sala sira, halo ba tuir Ita-Boot nia hakarak." Jesus laran susar tebes no Nia kosar hanesan ran. Maromak haruka anju ida hodi fo forsa ba Nia.

Kada Nia harohan hotu, Jesus fila fali ba Nia eskolante sira, maibe sira toba hela. Bainhira Nia fila fali ba dala tolu, Jesus dehan, "Hader ba! Hau-Nia traidor iha ne'e."

Judas mai hamutuk ho lideransa Judeu sira, soldadu, no ema barak. Sira lori surik no ai-tonka sira. Judas mai hasoru Jesus no dehan, "Komprimentus, Mestre," depois rei Nia. Nia halo ida-ne'e hodi hatudu ba lideransa Judeu sira katak nia mak ema ne'ebe sei hetan kaer. Depois Jesus dehan "Judas, los ka o trai Hau ho beijo ida-ne'e?"

Bainhira soldadu sira kaer Jesus, Pedro hasai nia surik no tesi Am'lulik boot nia atan nia tilun. Maibe Jesus dehan, "Hadook tiha surik ne'e! Hau bele husu soldadu anju sira hodi defende Hau, maibe Hau tenke obedese ba Hau Aman." Jesus kura ema ne'e nia tilun. Depois eskolante sira halai.