42. Jesus Returns to Heaven

Iha loron bainhira Nai halo moris Jezús husi mate, Jezús nia eskolante nain-rua ba sidade ida besik liu mai. Lao daudaun, sira koalia kona-ba saida mak akontese ona ba Jezús. Sira espera katak Nia duni mak Mesias, maibe ema oho ona Nia. Agora feto sira ne’e dehan katak Nia moris fila fali. Sira lahatene atu fiar los ida ne’ebe.

Jezús hakbesik ba sira no komesa lao ho sira, maibe sira la konhese Nia. Nia husu sira koalia hela saida. Sira konta ba Nia kona-ba buat hotu ne’ebe akontese ba Jezús durante loron hirak liu ba. Sira hanoin katak sira koalia hela ho ema fuik le’et ida ne’ebe lahatene buat seda mak akontese ona iha Jeruzalem.

Hafoin Jezús esplika ba sira kona-ba Mesias bazeia ba Maromak nia Liafua. Uluk liu, profeta sira hateten katak ema aat sira sei halo Mesias sofre no mate. Maibe profeta sira mós hateten katak Nia sei moris hikas fali iha loron da-tolu.

Bainhira sira too iha sidade ema nain-rua ne’e nia hela fatin, rai nakaras ona. Sira konvida Jezús atu hela hamutuk ho sira, no Nia mos tama ba uma ida. Sira tuur hodi han kalan. Jezús foti paun baluk ida, fó agradesimentu ba Nai Maromak, no fera paun ne’e. Derepenti, sira foin hakfodak no konhese katak Nia mak Jezús. Maibe iha momentu ne’eba kedan, Nia lakon husi sira nia oin.

Ema nain-rua ne’e koalia ba malu, “Ohin ne’e Jezús, Tan ne’e mak ami haksolok tebes bainhira nia esplika Maromak nia liafuan mai ami!” Sira fila ba kedan Jeruzalem. Bainhira sira too, sira fó hatene ba eskolante sira, “Jezús moris! Ami haree ona Nia!

Bainhira eskolante sira konversa hela, Jezús derepenti mosu iha sala laran hamutuk ho sira. Nia dehan, “Dame no prósperu ba imi!” Eskolante sira hanoin Nia mate-klamar, maibe Jezús dehan, “Tamba sá mak imi tauk? Tamba sá mak imi la fiar katak ne’e Hau duni, Jezús? Haree Hau nia liman no ain. Mate-klamar la iha isin hanesan Hau nian.” Atu hatudu katak Nia laos mate-klamar, Nia husu hahan. Sira fó Nia ikan baluk ida, no Nia han.

Jezús dehan, “Buat hirak kona-ba Hau ne’ebe koalia husi Maromak nia Liafuan sei akontese, Hau dehan tiha ona ba imi katak buat ne’e sei akontese duni.” Hafoin Jezús halo sira komprende Maromak nia Liafuan ho diak liu tan. Nia dehan, “Inisiu, profeta sira hakerek ona katak Hau, Mesias, sei sofre, mate no hafoin moris hias husi ema mate sira nia leet iha loron da-tolu.”

“Profeta sira mos hakerek katak Hau nia eskolante sira sei hato’o Maromak nia mensagem. Sira sei fó hatene ema hotu atu arepende. Se sira arepende, Maromak sei perdua sira nia pekadu-sira. Hau nia eskolante sira sei hato’o mensagem ne’e hahu husi Jeruzalém. Hafoin sira sei bá ema husi grupu ne’ebe deit. Imi mak testamunha sira husi buat hirak ne’ebe Hau koalia no Hau halo, no buat hotu ne’ebe akontese ona mai Hau.”

Durante loron 40 tuirmai, Jezús hatudu ann ba Nia eskolante sira fila-fila. Dala ida, Nia hatudu ann ba ema liu 500 iha momentu ne’ebe hanesan! Ho maneira oi-oin, Nia hatudu ba Nia eskolante sira katak Nia sei moris no hanorin sira kona-ba Maromak nia reiñu.

Jezús dehan ba Nia eskolante sira, “Nai Maromak fó ona ba hau direitu atu ukun ema hotu ne’ebe iha lalehan no iha mundu. Tamba ne’e, Hau dehan ba imi: Bá no halo povu hotu-hotu sai Hau nia eskolante. Atu halo nune’e, imi tenki fó sarani sira hodi Aman, Oan no Ispiritu Santu nia naran. Imi mos tenki hanorin sira atu halo buat hirak ne’ebe mak Hau orienta ona ba imi. Hanoin hetan ba, Hau sempre hamutuk ho imi.”

Loron ha’at nulu depoizde Jezús moris hias husi mate, Nia dehan ba Nia eskolante sira, “Hela ba iha Jeruzalém to’o Hau nia Aman haraik ba imi poder. Nia sei halo nune’e ho haruka Ispiritu Santu mai ba imi nia leten.” Hafoin Jezús sae ba lalehan, no kalohan taka metin Nia husi sira-nia vizaun. Jezús tuur iha lalehan iha Nai Maromak nia sorin loos atu ukun buat hotu-hotu.