43. The Church Begins

Depoizde Jezús fila tiha ba lalehan, eskolante sira hela nafatin iha Jeruzalém hanesan Jezús nia orientasaun ba sira. Ema sira ne’ebe fiar iha fatin ne’eba sempre halibur hamutuk hodi halo orasaun.

Kada tinan, loron lima-nulu depoizde Páskoa, ema Judeu sira komemora loron importante ne’ebe hanaran Pentakosta. Pentakosta mak tempu bainhira ema Judeu sira selebra ko’a hare. Ema Judeu sira mai husi mundu tomak ba iha Jeruzalém atu selebra Pentakosta hamutuk. Tinan ida ne’e, Pentakosta monu mais-ou-menus semana ida depoizde Jezús fila ba lalehan.

Bainhira ema fiar sira halibur hamutuk hela, derepenti uma ne’ebe sira halibur bá nakonu ho lian hanesan anin bo’ot. Hafoin buat ida hanesan ahi-lakan mosu iha ema fiar sira nia ulun. Sira hotu nakonu ho Ispiritu Santu, no sira hahi Nai Maromak ho lian oin seluk. Sira rasik lahatene lian sira ne’e, maibe Ispiritu Santu mak halo sira bele koalia lian sira ne’e.

Bainhira ema sira iha Jeruzalém rona lian ne’e, sira halibur atu haree saida mak akontese daudaun. Sira rona ema fiar sira fó sai buat bo’ot sira ne’ebe Nai Maromak halo ona. Sira hakfodak tamba sira bele komprende mazke sira mai husi nasaun oi-oin no koalia ho lingua oi-oin. Eskolante sira ne’e mai husi Izrael no koalia ho lian Aram, Ebreu, ka Gregu, maibe ema barak sira ne’e rona saida mak Nai Maromak halo ona ho sira nia inan nia lingua rasik.

Sira balun dehan katak eskolante sira ne’e lanu hela. Maibe Pedru hamrik no dehan ba sira, “Rona mai hau! Ema sira ne’e la lanu! Maibe, ida imi haree ne’e hanesan saida mak profeta Joel hateten ona sei akontese: Nai Maromak dehan ona, “Iha loron-sira ikus, Hau sei haraik Hau nia Ispiritu.”

“Hei ema Izrael sira, Jezús mak ema ne’ebe halo buat majiku oi-oin atu revela Nia ann. Nia halo buat barak ne’ebe furak ho Nai Maromak nia poder. Imi hatene ida ne’e tamba imi haree ona. Maibe imi krusifika Nia!”

“Jezús mate ona, maibe Nai Maromak halo Nia moris hias husi ema mate sira nia leet. Ho nune’e halo tuir ona saida mak profeta ida hakerek: “Ita boot sei la husik Ita-nian Mak Santu att iha rate laran. Ami mak testamunha katak Nai Maromak halo ona Jezús moris hias fila fali.”

Maromak Aman agora foti ona Jezús atu tuur iha Nia sorin loos. No Jezús haruka ona Ispiritu Santu mai ba ita tuir Nia promesa. Ispiritu Santu mak halo buat hirak ne’ebe imi haree no rona daudaun ne’e.”

“Imi krusifika ema ne’e, mak Jezús. Maibe imi tenki hatene ho loloos katak Nai Maromak halo ona Jezús sai Maromak ba buat hotu-hotu no Mesias!”

Ema sira ne’ebe rona Pedru senti buat hirak ne’ebe nia koalia kona tebes ba sira nia laran. Depoiz sira husu ba Pedru no nia eskolante sira, “Irmaun sira, saida mak ami tenki halo?”

Pedru hatán ba sira, “Imi presiza Nai Maromak atu perdua imi nia pekadu sira. Tamba ne’e arepende ona bá no fó imi nia ann atu sarani hodi Nain Jezús nia naran. Nune’e Nai Maromak sei haraik Ispiritu Santu ba imi nu’udar prezente husi Nia.”

Mais ou menus ema nain 3.000 fiar bá saida mak Pedru hateten no sai Jezús nia eskolante. Sira sarani no hola parte iha igreja iha Jeruzalém.

Ema sira kontinua fiar bainhira rona apóstolu sira hanorin sira. Sira hasoru malu hela deit no han hamutuk, no sira dalabarak halo orasaun hamutuk. Sira hahi ba Nai Maromak hamutuk no sempre fahe buat ne’ebe sira iha ba malu. Ema hotu iha sidade ne’eba hanoin diak ba sira. Loron baloron, ema barak liu tan mak sai fiar.