8. Nai Maromak salva José no nia familia sira

Depoiz liu tinan ba tinan, bainhira Jakó katuas ona, nia haruka nia oan favoritu José, hodi ba haree nia maun-alin sira ne’ebé tau matan ba animal sira.

Nia maun-alin odi José tamba sira nia aman hadomi tebes nia no tamba José hetan ona mehi ida katak José sei sai ukun-nain ba sira. Bainhira José hasoru nia maun-alin, sira na’ok no fa’an nia ba negosiante atan sira nian.

Antes sira fila ba uma, José nia maun-alin sira lees José nia ropa no habokon ropa ne’e ba bibi nia ran. Depoiz sira hatudu ropa ne’e ba sira-nia aman no bosok hodi nia hanoin katak animal fuik mak oho ona José. Jakó triste tebes.

Negosiante atan sira lori José ba Ejiptu. Ejiptu mak nasaun bo’ot ida no forsa ne’ebé lokaliza iha mota Nilo nia sorin. Negosiante atan sira fa’an José hanesan atan ida ba funsionariu governu nian ida ne’ebé riku. José serbí nia patraun ho di’ak no Maromak fó bensaun ba José.

Patraun nia fen koko konvida José hodi toba ho nia, maibe José lakohi atu halo sala hasoru Maromak ho maneira ne’e. Feto ne’e sai hirus no duun José, nune’e José hetan kaer no hatama ba komarka. Maske iha komarka mos José nafatin leal ba Maromak no Maromak fo bensaun.

Liu tiha tinan rua, José sei iha komarka, maske nia la halo sala. Kalan ida, Liurai Ejiptu ne’ebe bolu Faraun, hetan mehi rua ne’ebe inkomoda tebes nia. Laiha ema ida husi nia asesor bele fo-hatene signifikasaun husi nia mehi sira ne’e.

Maromak fo tiha ona abilidade ba José hodi interpreta mehi, nune’e Faraun haruka ema hodi lori sai nia husi komarka. José interpreta mehi ne’e no dehan, “ Maromak sei fo kolleta ne’ebe di’ak iha tinan hitu nia laran no tuir kedas ho tinan hitu hamlaha.

Faraun sente impresionadu tebes ho José to’o nia foti José sai ema daruak ne’ebe kaer poder iha rai Ejiptu tomak.

Durante tinan hitu hetan kolleta ne’ebe di’ak, José haruka ema sira hodi rai hahan barak tebes. Depoiz tinan hitu hamlaha nian mosu mai, José faan hahan ba ema sira hodi sira sei hetan hahan ne’ebe naton ba sira han.

Hamlaha boot ne’e laos deit kona Ejiptu, maibe kona mos rai Kanaan iha ne’ebe Jakó no nia familia hela ba.

Nune’e Jakó haruka nia oan sira ba sosa hahan. Bainhira José nia maun-alin hamriik iha José nia oin hodi sosa hahan , sira la koñese nia. Maibe José koñese sira.

Hafoin koko sira hodi haree sira nia hahalok muda ona ka lae, José dehan ba sira, “Hau imi nia maun-alin, José! Labele tauk. Imi koko atu halo krimi ida bainhira imi faan hau hanesan atan ida, maibe Maromak uza krimi ne’e ba buat di’ak! Mai no hela ba iha Ejiptu hodi hau bele prepara hahan ba imi no imi nia familia.”

Bainhira José nia maun-alin sira fila no konta tuir ba Jakó katak José sei moris, Jakó kontenti tebes.

Maske Jakó idade ona, nia muda ba Ejiptu h onia familia tomak, no sira hotu hela iha ne’eba. Antes Jakó mate, nia fo bensaun ba nia oan sira.

Promete sira husi promesa ne’ebe Maromak fo ba Abraun kontinua ba Izak. Depois Jakó no ba Jakó nia oan sanulu-resin-rua ho sira nia familia. Jerasaun husi oan-mane sanulu-resin-rua ne’e sai Izrael nia suku sanulu-resin-rua.