34. ३४. येशू आकुर कथा सिखैलाँ

परमेश्वरके राज्यके विषयमे येशू आकुर धेर कथा कहलाँ। उदाहरणके लग्, ओँहाँ कहलाँ, “परमेश्वर के राज्य एकठो रायोके बिया जैसिन हो, जे केहु अपन खेतवामे लगाईल्। टुहरिन हे पटे बा, कि रायो के बिया बियामनसे सबसे छोट रहठ्।”

“तर जब रायोके बिया जामठ्, तब उ बगैँचाके बिरुवामनसे सबसे भारी हुईठ्, अटना भारी कि चिँरै फेन आके उ बिरुवाके डँहिँयामे आके आराम करे सेकठाँ।”

येशू डोसर कथा कहलाँ, “परमेश्वरके राज्य खमिर जैसिन हो जौन एक स्त्री रोटी पकाई बेर सानल् पीठामे मिलैलिन्, ओ उ खमिर सानल् पीठाहे सक्कु खमिर बनाडेहल्।”

“परमेश्वरके राज्य एक गाढधन जैसिन फेन हो, जो कौनो मनैयाँ जमिन भित्तर भाँठ्के नुकाके ढैले रहे। कौनो एक डोसर व्यक्ति उ गाढधन भटाईल् ओ फेन उहिहे भँठार डेहल्। तब उ खुशीक मारे अट्ना प्रफुलिट् हुईल, कि उ जाके अपन सँगे रलक् सबचिज बेँचल ओ ओकर से अईलक् पैसासे खेटवा लेहल्।”

“परमेश्वरके राज्य शुद्ध मुल्यवान मोती जैसिन फेन हो। जब कौनो एक मोती व्यापारी उहिहे भटाईल्, उ अपन सँगे रलक सबचिज बेँचल् ओ ओमह्न से अईलक् पैसा उ मोती खरिडनामे खर्च कैलस्।”

तब येशू केहु मनैनहे एकठो कथा कहलाँ, जे अपन बढीया काममे भरोसा करठ् ओ आकुर मनैनहे घृणा कैठ्। ओँहाँ कहलाँ, “दुई जाने मनै मन्दिरमे प्रार्थना करे गैलाँ। उ मध्ये एक जाने कर उठैना मनै रहे, डोसर एकजाने चाहिँ धार्मिक अगुवा रहे।”

“उ धार्मिक अगुवा अईसिक कहिके प्रार्थना कैल, ‘धन्यवाद, परमेश्वर, मै आकुर मनै जैसिन पापी नैहुँ –जस्ते लुटहा, अन्याय कैना मनै, व्यभिचारी, अथवा उ कर उठैना मनै जैसिन।”’

“हरेक हप्ता मै दुईचो उपवास बैठ्ठुँ ओ मोरी पैलक् सक्कु पैसाके दशौ हिस्स अपनिनहे डेठुँ।”

“तर उ कर उठईना मनैयाँ चाहिँ धार्मिक अगुवासे डुस् बैठल्। ओ स्वर्गओर फेन आँख नैउठाईल्। बरटुन्, उ मुक्कासे अपन छाती पिटल ओ प्रार्थना कैल, परमेश्वर, कृपया मोर उप्पर दया डेखाई काकर् कि मै पापी बटुँ।”’

ओकर पाछे येशू कहलाँ, “मै टुहिन सत्य कहटुँ, परमेश्वर उ कर उठाईना व्यक्तिके प्रार्थना सुन्लाँ हो उहिहे धर्मी ठहरैलाँ, तर उ धार्मिक अगुवाके प्रार्थना मन नैपरैलाँ। हरेक जे अपन आपहे उच्च ठानी, परमेश्वर उहिहे होच्याईहिँ, तर जे अपन आपहे होच्याई उहिहे उच्च पारजाई।”