36. ३६. येशूक् रुप परिवर्तन

एकदिन, येशूक् ओँहाँक् तीन जाने चेलानके पत्रुस, याकुब ओ युहन्नाहे अपन सँगे लैगैलाँ। – (यी युहन्ना येशून्हे बप्तिस्मा डेना व्यक्ति नै हो।) ओईने एक ढेँग परबट्ओक् उँप्पर प्रार्थना करे गैलाँ।

जब येशू प्रार्थना कैटी रहिँट्, ओँहाँक् मुँह् सुर्य जैसिन चम्किलो हो गैलिन् ओ ओँहाक् झुलुवा ज्योति जैसिन हस् झक–झक् उज्जर होगैलिन्।

तब ओकर पाछे ओँहाँ मोशा ओ यलिया अगमवक्ता डेखा परलाँ। यी मनै अईसिन घटना हुईनासे सयौँ वर्ष आघे बाँचल रहिँट्। ओईने येशूसँगे ओँहाँक् मृत्युके बारेमे बाट् कैलाँ, जौ महा हल्हिल यरुसलेम्मे हुईना वाला रहे।

जब मोशा ओ यलिया येशूसँगे बाट्–चिट् कैटि रहिँट्, पत्रुस येशून्हे कहलाँ, “ हम्रे यहाँ रहना बढियाँ बा। हम्रे तीनठो बैठ्ना ठाउँ बनाई, एकठो अपनीक् लग्, एकठो मोशाक लग् ओ एकठो यलियाक लग्।” उ बेला मै का बहटुँ कहिके ओईसिन बाट् पत्रुसहे पटा नैरहिस्।

जब पत्रुस बोल्टी रहिँट्, एकठो ओज्ज्रार बड्री टरे आके ओईनहे घेरल ओ बड्रीमनसे परमेश्वरके आवाज अईसिक् कहल्, “यि मोरीक् प्रिय पुत्र हुँईट् जीहिहे मै प्रेम कैठुँ। मै ओकर सँगे प्रसन्न बटुँ। ओकर बाट् सुन्हो।” उ तीन चेलानके डरकेमारे भुँईयामे गिरपरलाँ।

तब येशू ओईनहे छुलाँ ओ कहलाँ, जिन डराऊ, उठो।” जब ओईने एहोँ–ओँहोँर हेरलाँ, ओँहाँ टे केवल येशू किल रहिँट्।

येशू ओ उ चेलान्के फेन परवटवा मन्से टरे उटरलाँ। तब येशू ओईनहे कहलाँ, “यहाँ हुईलक् घटनाक् बारेमे अभिन केहुहे जिन बटैहो। मै हलिहिल मुँबुँ र तब पाछे फेन मै जीवित हुईबुँ। तब पाछे फेन टेहरे मनैनहे बटाई सेक्बो।”