42. यीशु स्वर्ग ते रुवाड़ केनोगअ:

जे हुलङ परमेश्वर यीशु के गोजाकन कोए ते जीद लिजाए, एन हुलङ इनिअ: बरिया चेला किन नड़े रअ: हातू रेकिन सेनो: ताइना। सेन होरा तन इमतंग इनकिन यीशु गअ: चेतन रे जे नअ: को होबा लेना, एना रअ: बारे रेकिन बकड़ ताइना। इनकिन के बिश्वास ताइकेना चि इनि: मसीह ताइकेना। मगर एन रेओ इनि: के गोज लिजअ: को। नअ: दो एन एरा को कजि यको चि इनि: हडो जीद रुवाड़ कना, इनकु कको सरी ताइनको चि ओकोन बकड़ कोरे बिश्वसे चाही।

यीशु इनकिन तअ: हिजु केअते इनकिन लोओ: मिसाते सेन एटेज केदा, मगर इनकिन इनि: के ककिन उरुम किजअ:। इनि: कुली केद किना चि चिकिनअ: रअ: बारे रेकिन बकड़ तना। इनकिन इनि: के सेनो:जन दिन रे यीशु लोओ: होबा लेन सोबेन घटना कोरअ: बारे रेकिन उदुबइजअ:। इनकिन सोचाव ताइकेना किन चि जाए परदेसी होड़ो लोओ: किन बकड़ तना, जे इनि: काए सरी ताइना चि यरूशलेम शहर रे चिनअ: होबा लेना।

एनेद यीशु इनकिन के समझाव केद किना चि परमेश्वरअ: वचन मसीह गअ: बारे रे चिनअ: कजियअ। ढेइर सिदा, भविष्यद्वक्ता को कजि लअ: चि एटकन होड़ो: को मसीह केको सतावीयअ: ओड़ो: गोजियको। मेनदो भविष्यद्वक्ता को नेआव को कजि लअ: चि इनि: तीसरा दिन रे जीद रुवाड़ोगअ:।

जब एनकिन एन नगर रेकिन सेटेर जना जे तअ:रे इनकिन ताइन किन सनङ ताइना, इमतङ लगभग नुबा लेना। इनकिन यीशु के अकिन लोओ: ताइनो लाइ किन कजियजअ:, एना मेनते इनि: इनकिन लोओ: मियद ओड़ा: रे सेनो: जना। इनकु अयुब रअ: जोम जोजोम लाइ को दूब जना। यीशु मियद होलोङ के इदि केअते एन होलोङ लाइ परमेश्वर के धन्यवाद ओमा जाए, ओड़ो: एना के तरा केदा। अचका गी इनकिन सरी जना किन चि इनि: यीशु तनी। मेनदो इमतङ गी, इनि इनकिना नजइर ते उकु जना।

एनकिन अकिन-अकिन रेकिन कजि केदा, “इनि: यीशु ताइकेना! एना लाइ तेगी जब इनि: अलङ के परमेश्वरअ: वचन के समझाव केद लङअ: इमतङ अलङ इसु रसिका लङ ताइकेना।” इमतङ गी, ओड़ोङ केअते यरुशलेम किन रुवाड़ जना। इनकिन सेटेर जन चि चेला कोके किन उदुबद कोअ:। “यीशु जीद गीअ: अलीङ इनि: केलिङ नेला कजअ:।

जब चेला को बकड़ ताइनको यीशु अचका तेगी एन कोठरी रे इनकुअ: अयार रे देखाव जना। इनि: कजि केदा, “अपे के शन्ति नमोकअ:” चेला को सोचव केदा को चि इनि: जन बोंगा ताइकेना, मगर यीशु कजि केदा, “अपे चिनअ: लाइ पे बोरो तना? अपे चिनअ: लाइ नेयअ: कपे सोचावयअ: चि सरती गी अञङ यीशु तनिङ? अञङअ: ती ओड़ो: काटा कोके नेलेपे। बोंगा कोअ: नेका होड़मो का ताइना चिलका अञङअ: मेनअ:।” नेयअ: देखाव लाइ चि इनि: जेतन बोंगा काए ताइकेना इनि: जोजोम लाइ ज नअ: कोए असी केद कोअ:। इनकु इनि: के हकुवअ: मियद खांड को ओमाजअ:, ओड़ो: इनि: एना के जोम केदा।

यीशु कजि केदा, “अञङअ: बारे रे परमेश्वरअ: वचन जे तेअ: कजियअ: एना होबवगअ:। अञङ अपे के उदुब लेद पेञङ चि नेया होबाव जरूरी गिया।” एनेद यीशु इनकु के परमेश्वरअ: बचन बेस लेकाते समझाव केद कोअ:, इनि: कजि केदा, “ढेइर सिदा भविष्यवक्ता ओल लअ: चि अञङ, मसीह के दुकु को उठाव होबव गअ: गोजेन होबव गअ: आद एनेद तीसरा दिन रे गोजाकनेते जीद रुवाड़ेन होबव गअ:।

एन भविष्यवक्ता को नेआव को ओल लअ: चि अञङअ: चेला को परमेश्वर गअ: बचन रअ: को घोषणायअ:। इनकु सोबेन मियद होड़ो कोके अकोवअ: पाप के मानतिङ लाइ को उदुबकोअ:। अगर इनकु नेकाय रेदो को परमेश्वर इनकुअ: पाप कोके क्षेमायअ:। अञङअ: चेला को ने संदेश के परचार यरुशलेम शहर तेको एटे जेअ:। एनेद इनकु सोबेन ठाँव: रे सोबेन जाति को तअ: को सेना। अपे अञङअ: सोबेन मियद कजि ओड़ो: कमि कोरअ: गवाह तनपे, जे अञङ कजि कदा ओड़ो: रिका कदाइङ, ओड़ो: एना कोरअ:व जे अञङअ: लोओ: होबा लेना।”

अयार ते चालीस दिन जकेद यीशु अयअ: चेला को तअ: रे ढेइर बेर देखाव जना। मिसा दो इनि: मिसा तेगी 500 तेयो थिम्बा होड़ो: को तअ: रे देखवा जना। इनि: अयअ: चेला कोअ: रे ढेइर तरीका ते सबित केदा चि इनि: जीद गी मेनाइअ:, ओड़ो इनि: इनकु के परमेश्वरअ: राइज रअ: बारे रे सेड़ा ओमाद कोअ:।

यीशु अयअ: चेला कोके कजियद कोअ:, “परमेश्वर अञङ के स्वर्ग ओड़ो: ने ओते दिसुम रेन सोबेन मियद होड़ो: कोअ: रे शासन लाइ हुकुम ओमा: कदीञङअ:। एनामेनते अञङ अपे के कजियपे तनाइङ सेन केअते सोबेन जाति रेन होड़ो: कोके चेला बाइ कोपे। नेका रिका लाइ अपेके इनकु के अपु, होन ओड़ो: पवित्र आत्मा रअ: नुतुम ते बपतिस्मा ओम मेनअ:। जे नअ: को अञङ अपे के हुकुम ओमा कद पेञङ एन सोबेन कजि कोकेयो अपे के इनकु के सिखाव होबाव गअ:। पहामे पे, अञङ जनाव गी अपे लोओ: ताइनञङ।”

यीशु गोजाकन कोएते जीद बिरिद जन रअ: चालीस दिन रअ: तयोमते, इनि: अयअ: चेला कोके कजियद कोअ:, “जब तक अञङअ: आबा अपे के पेड़ेज काए ओमा पेअ: इमतङ जकेद यरूशलेम शहर रेगी तयु पे। इनि: अपेअ: रे पवित्र आत्मा कुल केअते नेका रिकायाए।” एनेद यीशु स्वर्ग ते सेनो: जना, ओड़ो: मियद रिमिल इनि: के इनकुवअ: नजइर ते दनङ किजअ:। स्वर्ग रे यीशु सोबेन जिनिस कोरअ: शासन लाइ परमेश्वरअ: जोम पअ रे दूबा जना।