45. स्तिफनुस ओड़ो: फिलिप्पुस

सिदा मसीही अगुवा कोअ: थला रे स्तिफनुस नुतुम मियद होड़ो: ताइकेना। सोबेन होड़ो को इनि: के मइनी ताइनको। पवित्र आत्मा इनि: के इसु पेड़ेज ओड़ो: बुद्धि ओम लिजअ:। स्तिफनुस इसु चमत्कार कामी को रिका लअ:। जब इनि: यीशु गअ: चेतन रे भरोसा दोहो रअ: बारे रे शिक्षा ओमाद कोअ: दो ढेइर होड़ो: को इनियअ: रेको विश्वास केदा।

मुसिङ हुलङ स्तिफनुस यीशु गअ: बारे रे शिक्षा ओमा को ताइना:, ओड़ो: हुड़ीङ लेका नेलकन यहूदी कोको हिजु लेना जे यीशु गअ: चेतन रे कको विश्वास लअ: ओड़ो: इनि: लोओ: वाद-विवाद को एटेज केदा। इनकु इसु को खीस जना, एनामेनते इनकु धर्मिक अगुवा कोतअ: को सेनो: जना ओड़ो: इनिअ: बारे रे झूठ को कजि केदा। इनकु कजि केदा, “अले स्तिफनुस के मूसा ओड़ो: परमेश्वर गअ: बारे रे एटकन कजि को कजि तन ले अयुम कजअ:। एनामेनते धर्मिक अगुवा को स्तिफनुस केको सब किजअ: ओड़ो: इनि: के महापुरोहित ओड़ो: यहूदी कोअ: हडो एटअ: अगुवा कोअ: अयार रेको आउ लिजअ:। हडो गी झूठा गवाह कोको हिजु लेना ओड़ो: इनकुओ स्तिफनुस गअ: बारे रे झूठ को कजि केदा।

महापुरोहित स्तिफनुस के कुली किजअ:, “चिनअ: ने होड़ो: को अमअ: बारे रे सरती को कजि तना?”स्तिफनुस महापुरोहित के जबाब ओम लाइ इसु थिम्बा कजि को कजि एटेज केदा। इनि: कजि केदा चि अब्राहम गअ: समय ते यीशु गअ: समय जकेद परमेश्वर इस्राएल रेन होड़ो: को लाइ इसु थिम्बा चमत्कार कामी कोए कमि लअ:। मगर होड़ो को जनाव गी परमेश्वर गअ: हुकुम के कको मनातिङ ताइना। स्तिफनुस कजि केदा, “अपे परमेश्वर गअ: बिरोध रे ढीठ ओड़ो: विद्रोह वाला होड़ो तनपे। अपे जनाव गी पवित्र आत्मा के कपे स्वीकार केदा:, चिलका चि अबुवा पुरखा को जनाव गी पवित्र आत्मा के कको स्वीकार लअ:को ओड़ो: जनाव गी इनिअ: भविष्यद्वक्ता कोके गोए लेद कोअ: को। मगर जे इनकु को रिका लअ: एनएतेओ: अपे हडो गी एटकन कामी पे रिका केदा! अपे मसीह केपे गोए तजा!”

जब एन धर्मिक अगुवा को नेयअ: को अयुम केदा दो इनकु नीमिन को खिंस जना चि इनकु अकोअ: लुतुर केको तेपेद केदा ओड़ो: जोर तेको गुल केदा। इनकु स्तिफनुस के ओर केअते नगर रेते बाहर को इदि किजअ: ओड़ो: इनि: के गोए लाइ दिरी तेको हुदमा किजअ:।

जब स्तिफनुस गोजो ताइनाए इमतंग इनि: जोर ते हकाव केदा,“हे यीशु, अञङअ: आत्मा के स्वीकार केमे!”एनेद इनि: अयअ: मुकड़ी टेकाव केदा, ओड़ो: हडो जोर ते हकाव केदा, “हे प्रभु, ने पाप इनकुअ: रे अलोम लगाव यअ:।” एनेद इनि गोए जना।

एन हुलङ, यरूशलेम शहर रे तयु वाला इसु थिम्बा होड़ो को यीशु गअ: चेला कोके सताव को एटेज केदा, एनामेनते विश्वासी होड़ो: को एटअ: ठयाद कोते को नीर जना। मगर एन रेओ इनकु जे तअ: को सेनो: जना एनता रेओ यीशु गअ: बारे रेको परचार केदा।

फिलिप्पुस नुतुम यीशु गअ: मियद विश्वासी होड़ो ताइकेना। चिलका चि एटअ: ढेइर विश्वासी होड़ो को रिका लअ:, इनिओ एनका गी यरूशलेम शहरेते नीर जना। इनि: सामरिया ठयाद रे सेनो: जना, एनता रे इनि: होड़ो को तअ: रे यीशु गअ: बारे रे परचार केदा। ढेइर होड़ो: को इनिअ: रेको विश्वास केदा ओड़ो: छुटकारा को नम केदा। मुसिङ हुलङ फिलिप्पुस तअ: परमेश्वर पअ: ते मियद स्वर्गदूत हिजु लेनाए ओड़ो: इनि: के बुरु रे सेन लाइ ओड़ो: मियद संडक रे सेसेन लाइ कजियजअ:। फिलिप्पुस एनता सेनो: जना। जब इनि: एन संडक रे सेसेन ताइना इमतङ इनि: मियद होड़ो: के अयअ: रथ रे सेनो: तन नेल किजअ:। ने होड़ो: कुश देश रेन मियद खास अधिकारी ताइकेना। पवित्र आत्मा फिलिप्पुस के कजियजअ: चि एन होड़ो तअ: सेन केअते इनि: लोओ: बकाड़ेमे।

एनामेनते फिलिप्पुस रथ तअ: सेनो: जना। इनि: अयुम केदा चि एन कूशी होड़ो परमेश्वर गअ: बचन के पढ़ाव ताइना। जे यशायाह भविष्यद्वक्ता ओल लअ:, इनि: एना के पढ़ाव ताइना। इनि पढ़ाव ताइना, “इनकु इनि:के गोगोए इदि तन मिण्डी लेका को इदि किजअ:, ओड़ो: चिलका मियद मेरोम होन शान्त ताइनाए, इनिओ मियद मोचा काए कजि केदा। इनकु इनि: लोओ: बेस लेका कको व्यवहर केदा ओड़ो: इनि: के कको माइन किजअ:। इनकु इनिअ: जीउ केको इदि केदा।”

फिलिप्पुस एन कुशी होड़ो के कुली किजअ:, “जे अम पढाव तनम चिनअ: अम एना के समझाओ: तनम?”एन कुशी होड़ो जबाब ओमा जअ:, “कहा। जाए जेतय नेयअ: के अञङ के कको समझावएञ:,एन जकदे अञङ काञ सामझावअ:। लिबुय केअते अञङ तअ: रे हिजु केअते दुब मे। चिनअ: यशायाह नेयअ: अयअ: बारे रे ओल ताइना चि जाए एटअ: निजअ: बारे रे?”

फिलिप्पुस रथ रे रकब केअते दूब जना। एनेद एन कुशी होड़ो: के एना के उदुबजअ: जे यशायाह यीशु गअ: बारे रे ओल लअ:। फिलिप्पुस परमेश्वर गअ: बचन रअ: इसु एटअ: भाग कोरअ: ओ चर्चा केदा। ने लेका ते, इनि: एन होड़ो: के यीशु गअ: बारे रे बुगिन संदेश सुनावजअ:।

फिलिप्पुस ओड़ो: एन कुशी होड़ो सेनो तन दाअ: तअ: किन सेटेर जना। एन कुशी होड़ो कजि केदा, “नेलेम नेतअ: रे दाअ: मेनअ:! चिनअ: अञङ बपतिस्मा इदि दड़िञङ?” ओड़ो: इनि: सारथी (रथ चलाव नी) के रथ तिंगु लाइ कजियजअ:।

एनाते इनकिन दाअ: रेकीन सेनो: जना, ओड़ो: फिलिप्पुस एन कुशी होड़ो के बपतिस्मा ओमा जअ:। जे इमतंग इनकिन दाअ: ते बाहर किन ओडोङ जना दो पवित्र आत्मा अचका गी फिलिप्पुस के उठाव केअते एटअ: ठयाद ते इदि किजअ:। एनता रे फिलिप्पुस होड़ो: कोके यीशु गअ: बारे रे लगातार गी उदुब इदि केदा।

एन कुशी होड़ो अयअ: ओड़ा: पअ: अयार ते सेनो: जना। इनि: रसिका ताइकेना चि नअ: दो इनि: यीशु के सरी जना।