10. ୧୦. ଦାଶ୍ ଠୁ ମାହାମାରୀ

ପାର୍ମେଶ୍ଵାର୍ ମୁଶା ହାର୍ ହାରୁନ୍ କେ ଚେତାଓ କେଃକିନାଏ ଚି ଫିରୋନ୍ ରାଜା ରାଃ ଜିଦ୍ଧି ବାଇକେନୋଗାଏ। ଚିମ୍ତାଙ୍ଗ୍ ଇନ୍‍କିନ୍ ଫିରୋନ୍ ରାଜା ନଡ଼େଏ ହିଜୁଃ ଲେନାକିନ୍ ଦୋ କାଜିକେଦାକିନ୍, “ଇସ୍ରାଏଲ୍ ହୋଡ଼ୋକୋୱା ପାର୍ମେଶ୍ଵାର୍ ନେକା କାଜିତାନାଏ, “ଇଙ୍ଗ୍ଆଃ ହୋଡ଼ୋକୋକେ ସେନ୍ ରିକା କୋମ୍!” ମେନ୍ଦୋ ଫିରୋନ୍ ରାଜା ଇନ୍‍କିନାଃ କାଜି କାଏଆୟୁମ୍ କେଦାଏ ହାର୍ ଇସ୍ରାଏଲୀ ହୋଡ଼ୋକୋକେ ବାଗେକୋ ଚାହି ତାଇନା ମେନ୍ଦୋ ଇନିଃ ଇନ୍‍କୁକେ ଆଡୋଃଗି କେଟେଃ କାମି ଲାଗିନ୍ତେ ଜାବ୍ରାଇ କେଃକୋୱାଏ।

ଫିରୋନ୍ ରାଜା ଏନ୍ ହୋଡ଼ୋକେକେ ବାଗେ ଲାଗିନ୍ ସୋବେନ୍ ଇମ୍ତାଙ୍ଗ୍ ମାନା କେଦାଏ, ଏନାଲାଗିନ୍ ପାର୍ମେଶ୍ଵାର୍ ମିଶାର୍ ଦିଶୁମ୍ ରେ ଦାଶ୍ ଠୁ ବୋରୋଆନ୍ ମାହାମାରୀ କୁଲ୍ କେଦାଏ। ନେ ମାହାମାରୀ ରାଃ ହୋରାତେ, ପାର୍ମେଶ୍ଵାର୍ ଫିରୋନ୍ ରାଜା କେ ଉଦୁବ୍ କିଜାଏ ଚି ଇନିଃ ଫିରୋନ୍ ରାଜା ହାର୍ ମିଶାର୍ ଦିଶୁମ୍ ରେନ୍ ଦେଓତା କୋଏତେ ଥିମ୍ବା ପେଡ଼େଜାନ୍ ତାନିଃ।

ପାର୍ମେଶ୍ଵାର୍ ନୀଲ୍ ନାଈ ରାଃ ଦାଆକେ ମାୟୋମ୍ ରେ ବାଦ୍‍ଲାୱ ତାଦାଏ, ଏଣ୍ଡେ ହଁ ଫିରୋନ୍ ରାଜା ନାଆ ଓଗି ଇସ୍ରାଏଲୀ କୋକେ ସେନ୍ କାଏ ରିକା କେଦାଏ।

ପାର୍ମେଶ୍ଵାର୍ ଗୋଟା ମିଶାର୍ ଦିଶୁମ୍ ରେ ଚୋକେ କୋକେ କୁଲ୍ କେଦାଏ। ଫିରୋନ୍ ରାଜା ଚୋକେ କୋକେ ହାର୍ ଲାଗିନ୍ତେ ମୁଶା କେ ଆର୍ଜି କିଜାଏ। ମେନ୍ଦୋ ସୋବେନ୍ ଚୋକେ କୋ ଗୋଏଃ ଜାନ୍ ରାଃ ତାୟୋମ୍ତେ, ଫିରୋନ୍ ଆଜାଃ ମୋନ୍ କେ କେଟେଃ ତାଦାଏ ହାର୍ ଇସ୍ରାଏଲୀ କୋକେ ମିଶାର୍ ଦିଶୁମ୍ ଏତେ ଅଡ଼ୋଙ୍ଗ୍ ଲାଗିନ୍ କାଏ ଏମାଃକୋୱାଏ।

ଏନାମେନ୍ତେ ପାର୍ମେଶ୍ଵାର୍ ସିକିଣି(ଶିକୁ) ରାଃ ମାହାମାରୀ କୁଲ୍ କେଦାଏ। ଏନାରାଃ ତାୟୋମ୍ତେ ଇନିଃ ରୋକୋ ରାଃ ମାହାମାରୀ କୁଲ୍ କେଦାଏ। ଫିରୋନ୍ ରାଜା ମୁଶା ହାର୍ ହାରୁନ୍ କେ କେଡ଼ା କେଃକିନାଏ ହାର୍ ଇନ୍‍କିନ୍ କେ କାଜିକେଦାଏ ଚି ଆଗାର୍ ଇନ୍‍କିନ୍ ଏନ୍ ମାହାମାରୀ କେ ବାନ୍ଦ୍ ତାଃକିନ୍ ଏଣ୍ଡେ ଇସ୍ରାଏଲୀ ହୋଡ଼ୋକୋକେ ମିଶାର୍ ଦିଶୁମ୍ କେ ବାଗେକେତେ ସେନ୍ ଧାଡ଼ିୟାକୋ। ଚିମ୍ତାଙ୍ଗ୍ ମୁଶା ବିନ୍ତି କେଦାଏ ଦୋ ପାର୍ମେଶ୍ଵାର୍ ମିଶାର୍ ଦିଶୁମ୍ ଏତେ ରୋକୋ କୋକେ ଆତୋମ୍ ତାଦାଏ। ମେନ୍ଦୋ ଫିରୋନ୍ ରାଜା ଆଜାଃ ମୋନ୍ କେ କେଟେଃ ତାଦାଏ ହାର୍ ଏନ୍ ହୋଡ଼ୋକୋକେ କାଏ ବାଗେ ସାନାଙ୍ଗ୍ କେଦା।

ନେୟାରାଃ ଆୟୁର୍ତେ, ପାର୍ମେଶ୍ଵାର୍ ମିଶାର୍ ଦିଶୁମ୍ ରେନ୍ ହୋଡ଼ୋକୋୱାଃ ଆସୁଲାକାନ୍ ପାଶୁ କୋକେ ବେମାର୍ ତେ ଗୋଏଃ ରିକା କେଦାଏ। ମେନ୍ଦୋ ଫିରୋନ୍ ରାଜା ରାଃ ମୋନ୍ କେଟେଃ ଜାନା ହାର୍ ଆଏଃ ଇସ୍ରାଏଲୀ ହୋଡ଼ୋକୋକେ ସେନ୍ କାଏ ରିକା କେଦା।

ଏନ୍ତେ ପାର୍ମେଶ୍ଵାର୍ ମୁଶା ରାଃ ହୋରାତେ କେ ଫିରୋନ୍ ରାଜା ରାଃ ନଡ଼େଏ ହୟ ରେ ତୋରେଃ କେ ଦୁଡ଼ିଙ୍ଗ୍ ଲାଗିନ୍ କାଜିକେଦାଏ। ଚିମ୍ତାଙ୍ଗ୍ ଇନିଃ ଏନ୍ ଲେକା ରିକା କେଦାଏ ଦୋ ମିଶାର୍ ଦିଶୁମ୍ ରେନ୍ ହୋଡ଼ୋକୋୱାଃ ହୋଡ଼ମୋ ରେ କାସାହାତିଙ୍ଗ୍ ଲେକାନାଃ ଗୁଡ଼ା-ଘାଅ ଅଡ଼ୋଙ୍ଗ୍ ଜାନା, ମେନ୍ଦୋ ଇସ୍ରାଏଲୀ ହୋଡ଼ୋକୋକେ ଯେତେନାଃ କାହୋବାନା। ମେନ୍ଦୋ ପାର୍ମେଶ୍ଵାର୍ ଫିରୋନ୍ ରାଜା ରାଃ ମୋନ୍ କେ କେଟେଃ ତାଦାଏ, ହାର୍ ଫିରୋନ୍ ରାଜା ଇସ୍ରାଏଲୀ ହୋଡ଼ୋକୋକେ ସେନ୍ କାଏ ରିକା କେଃକୋୱାଏ।

ଏନାରାଃ ତାୟୋମ୍ତେ, ପାର୍ମେଶ୍ଵାର୍ ଆରିଲ୍ ଗାମା କେଦାଏ, ହାର୍ ମିଶାର୍ ଦିଶୁମ୍ ରେୟାଃ ଥିମ୍ବାଗି ଚାଷ୍ କେ ନାଷ୍ଟ୍ ତାଦାଏ ହାର୍ ଅକଏହଗି ବାହ୍‍ରେ ଅଡ଼ୋଙ୍ଗ୍ ନାଏ ଇନିଃ କେ ଗୋଏଃ କିଜାଏ। ଫିରୋନ୍ ରାଜା ମୁଶା ହାର୍ ହାରୁନ୍ କେ କେଡ଼ା କେଃକିନାଏ ହାର୍ ଇନିଃ କାଜିକେଦାଏ, “ଇଙ୍ଗ୍ ପାପ୍ କେଦିଙ୍ଗ୍। ଆପେ ସେନ୍ ଧାଡ଼ିୟାପେ।” ଏନ୍ତେ ମୁଶା ବିନ୍ତି କେଦାଏ, ହାର୍ ରିମିଲ୍‍ଦିଶୁମ୍ ଏତେ ଆରିଲ୍ ଉୟୁଃ ବାନ୍ଦ୍ ଜାନା।

ମେନ୍ଦୋ ଫିରୋନ୍ ଆଡୋଃଗି ପାପ୍ କେଦାଏ ହାର୍ ଆଜାଃ ମୋନ୍ କେ କେଟେଃ କେଦାଏ। ହାର୍ ଫିରୋନ୍ ରାଜା ଇସ୍ରାଏଲୀ ହୋଡ଼ୋକୋକେ ସେନ୍ କାଏ ରିକା କେଃକୋୱାଏ।

ଏନ୍ତେ: ପାର୍ମେଶ୍ଵାର୍ ମିଶାର୍ ଦିଶୁମ୍ ରେ ସନ୍‍ସୋରୋଦ୍ ରାଃ ଦାଲ୍ କୋକେ କୁଲ୍ କେଦାଏ। ନେ ସନ୍‍ସୋରୋଦ୍ କୋ ଏନ୍ ସୋବେନ୍ ଯଅ-ସାକାମ୍ କାନ୍ ତେୟାଃକେ ଜୋମ୍ ତାଦାକୋ ଅକନାଃକେ ଆରିଲ୍ ଗାମା କାଏ ନାଷ୍ଟ ଲେଦାଏ।

ଆଡୋଃଗି ପାର୍ମେଶ୍ଵାର୍ ଆପୀ ହୁଲାଙ୍ଗ୍ ସାନ୍ତେ ନୁବାଃ ତାଦାଏ। ନେୟା ଇମିନ୍ କୁଲ୍‍କୁଲ୍ ତାଇକେନା ଚି ମିଶାର୍ ଦିଶୁମ୍ ରେନ୍ ହୋଡ଼ୋକୋ ଆକୋୱାଃ ଅଡ଼୍ଆଃ ଏତେ ଅଡୋଙ୍ଗ୍ କାକୋ ଧାଡ଼ିଜାନା। ମେନ୍ଦୋ ଅକତାଃରେ ଇସ୍ରାଏଲୀ ହୋଡ଼ୋକୋ ତାଇନ୍ ତାଇନାକୋ ଏନ୍ତାଃରେ ମାର୍ଶାଲ୍ ତାଇକେନା।

ନେ ନାଅ ମାହାମାରୀ ରାଃ ତାୟୋମ୍ତେ ହଁ, ଫିରୋନ୍ ରାଜା ଇସ୍ରାଏଲୀ ହୋଡ଼ୋକୋକେ ସେନ୍ ଲାଗିନ୍ ମାନା ତାଦାଏ। ଚିୟାଃଚି ଫିରୋନ୍ ରାଜା କାଏ ଆୟୁମ୍ କେଦା ଏନାଲାଗିନ୍ତେ ପାର୍ମେଶ୍ଵାର୍ ମିୟାଃ ଆଖ୍ରୀ ମାହାମାରୀ କେ କୁଲ୍ ଲାଗିନ୍ ମୋନ୍ ବାଇକେଦାଏ। ନେୟା ଫିରୋନ୍ ରାଜା ରାଃ ମୋନ୍ କେ ବାଦ୍‍ଲାଅ ତାଆଏ।