9. ୦୯. ପାର୍ମେଶ୍ଵାର୍ ମୁଶା କେ କେଡ଼ା କିଜାଏ
ଯୋସେଫ୍ ଗୋଏଃ ଜାନ୍ ତାୟୋମ୍ତେ, ଆଜାଃ ସୋବେନ୍ ଜାତି-କୁଟୁମ୍ କୋ ମିଶାର୍ ଦିଶୁମ୍ ରେ ତାଇନ୍ ଜାନାକୋ। ଇନ୍କୁ ହାର୍ ଇନ୍କୁୱାଃ ବାଂଶ୍ ରେନ୍ କୋ ହେନ୍ତାଃ ରେ ଥିମ୍ବାଗି ଶିର୍ମା ସାନ୍ତେ ତାଇଜାନାକୋ ହାର୍ ଇନ୍କୁୱାଃ ବେଶେଗି ହୋନ୍-ଗାଣାକୋ ଜାନାମ୍ ନାକୋ। ଇନ୍କୁ ଇସ୍ରାଏଲୀ ନୁତୁମ୍ ତେ କେଡ଼ା ଜାନାକୋ।
ଶାଅ-ଶାଅ ଶିର୍ମା ତାୟୋମ୍ତେ, ଇସ୍ରାଏଲୀ ହୋଡ଼ୋକୋ ଗିନ୍ତିରେ ଥିମ୍ବାଗି ହାରା ଇଦିଜାନାକୋ। ମିଶାର୍ ଦିଶୁମ୍ ରେନ୍ କୋ ଯୋସେଫ୍ ଇନ୍କୁକେ ଚିମିନ୍ ଗି ଦେଙ୍ଗା ଲେଃକୋ ତାଇନାଏ ଏନାକେ ଇନ୍କୁ ରିଡ଼ିଙ୍ଗ୍ ଇଦିୟାନାକୋ। ଇନ୍କୁ ଇସ୍ରାଏଲୀ ହୋଡ଼ୋକୋକେ ବୋରୋ କେଦାକୋ ଚିୟାଃଚି ଇନ୍କୁ ଗିନ୍ତି ରେ ଥିମ୍ବାଗି ତାଇଲେନାକୋ। ଏନାମେନ୍ତେ ଏନ୍ ସାମାୟ୍ ରେନ୍ ରାଜା ଫିରୋନ୍ ଅକନିଃ ମିଶାର୍ ଦିଶୁମ୍ କେ ରାଇଜ୍ ତାଇକେନାଏ ଇସ୍ରାଏଲୀ କୋକେ ମିଶାର୍ ଦିଶୁମ୍ ରେନ୍ ହୋଡ଼ୋକୋୱାଃ ଦାସୀ ବାଇକେଃକୋୱାଏ।
ମିଶାର୍ ଦିଶୁମ୍ ରେନ୍ ହୋଡ଼ୋକୋ ଇସ୍ରାଏଲୀ କୋକେ ଥିମ୍ବାଗି ଅଡ଼୍ଆଃକୋ ବାଇ ହାର୍ ନେତାଃ ସାନ୍ତେ ଚି ଖୋବ୍ ଗି ସାହାର୍ କୋକେ ବାବାଇ ଲାଗିନ୍ ଯାବ୍ରାଇ କେଃକୋୱାକୋ। ଏନ୍ କେଟେଃ କାମିକୋ ଇନ୍କୁୱାଃ ଜୀଦାନ୍ କେ ଦୁକୁ ତେ ଫେରେଃ ତାଃକୋୱାଏ, ମେନ୍ଦୋ ଇନ୍କୁକେ ପାର୍ମେଶ୍ଵାର୍ ଆଶିଷ୍ କେଃକୋୱାଃଏ, ହାର୍ ଇନ୍କୁୱାଃ ଆଡୋଃ ଥିମ୍ବାଗି ହୋନ୍-ଗାଣା କୋ ହୋବାଜାନାକୋ।
ଫିରୋନ୍ ରାଜା ନେଲ୍ କେଦାଏ ଚି ଇସ୍ରାଏଲୀ ହୋଡ଼ୋ କୋୱାଃ ଥିମ୍ବାଗି ହୋନ୍-ଗାଣା କୋ ହୋବାଅଃ ତାନାକୋ, ଏନାମେନ୍ତେ ଇନିଃ ଆଜାଃ ହୋଡ଼ୋକୋକେ ଇସ୍ରାଏଲୀ କୋୱାଃ ସୋବେନ୍ କୋଡ଼ାହୋନ୍ କୋକେ ନିଲ୍ ନାଇ ରେ ଦୁଡ଼ିଙ୍ଗ୍ ଗୋଏଃ ଲାଗିନ୍ ଆଚୁ କେଃ କୋୱାଏ।
ମିହୋଡ଼ ଖାସ୍ ଇସ୍ରାଏଲୀ କୁଡ଼ି ମିୟାଃ କୋଡ଼ାହୋନ୍ କେ ଜାନାମ୍ କିଜାଏ। ଇନିଃ ହାର୍ ଆଜାଃ କଡ଼ା ଆକିନାଃ ହୋନ୍କଡ଼ା କେ ଚିମିନ୍ ଧାଡ଼ି ଜାନାକିନ୍ ଇମିନ୍ ହୁଲାଙ୍ଗ୍ ସାନ୍ତେ ଉକୁ ମାଣ୍ଡାଅ କିଜାକିନ୍।
ଚିମ୍ତାଙ୍ଗ୍ ଏନ୍ କୋଡ଼ାହୋନ୍ କେ ଏଙ୍ଗା-ଆପୁ କିନ୍ ଆଡୋଃ ଥିମ୍ବା ସାମାୟ୍ ସାନ୍ତେ ଉକୁ କାକିନ୍ ଧାଡ଼ିଜାନା, ଦୋ ଇନ୍କିନ୍ ଏନ୍ ହୋନ୍ କେ ଗୋଜୋଃ ତେ ବାଞ୍ଚାଅ ଲାଗିନ୍ତେ ମିୟାଃ କାଡୁବିଜୋଃ ତେୟାଃ ଟୁଙ୍କି ରେ ନିଲ୍ ନାଇ ରାଃ ଗେନା ରେ ନାଡ଼ା ତାସାଃ ଥାଲା ରେ ମାଣ୍ଡାଅ ତାଇଜାକିନ୍। ଆଜାଃ ମାରାଙ୍ଗ୍ ମିଶି ନେୟା ନେନେଲ୍ ଲାଗିନ୍ତେ ଲୋଡ଼ୋବାଡ଼ା କେଦାଏ ଚି ଏନ୍ ହୋନ୍ ଆଃ ଚିନାଃ ହୋବାଅଃୱା।
ଫିରୋନ୍ ରାଜା ରାଃ ହୋନ୍ କୁଡ଼ି ଟୁଙ୍କି କେ ନେଲ୍ କେତେ ଏନାରାଃ ଭିତାର୍ ଆରିଃ ଲୋଡୋ କେଦାଏ। ଚିମ୍ତାଙ୍ଗ୍ ଇନିଃ ମିୟାଃ କୋଡ଼ାହୋନ୍ କେ ନେଲ୍ କିଜାଏ, ଇମ୍ତା ଇନିଃ ଏନ୍ ହୋନ୍ କେ ଆଜାଃ ହୋନ୍କଡ଼ା ବାଇ କେତେ ଇଦିକିଜାଏ। ଇନିଃ ମିହୋଡ଼ ଇସ୍ରାଏଲୀ କୁଡ଼ି କେ ହୋନ୍ କେ ତୋୱା ଆନୁଇୟାଏ ମେନ୍ତେ ମାଣ୍ଡାଅ କିଜାଏ, ନେୟା ହ କାଏ ସାରିଲେଦାଏ ଚି ଏନ୍ କୁଡ଼ି ଗି ଏନ୍ ହୋନ୍ ରାଃ ଏଙ୍ଗା ତାନିଜାଏ। ଚିମ୍ତାଙ୍ଗ୍ ହୋନ୍ ମାରାଙ୍ଗ୍ ଜାନାଏ ଦୋ ଇନିଃକେ ଏଙ୍ଗା ତୋୱା ରାଃ ଦାରକାର୍ କା ତାଇଜାନା, ଇମ୍ତା ଆଜାଃ ଏଙ୍ଗାକିନ୍ ଏନ୍ ହୋନ୍ କେ ଫିରୋନ୍ ରାଃ କୁଡ଼ିହୋନ୍ ତାଃ ରୁଆଡ଼ ତାଇଜାଏ, ଅକନିଃ ଇନିଜାଃ ନୁତୁମ୍ ମୁଶା ମାଣ୍ଡାଅ କେଦାଏ।
ମୁସୀଙ୍ଗ୍, ଚିମ୍ତାଙ୍ଗ୍ ମୁଶା ମାରାଙ୍ଗ୍ ଜାନାଏ, ଇମ୍ତା ଇନିଃ ନେଲ୍ କେଦାଏ ଚି ମିହୋଡ଼୍ ମିଶାର୍ ରେନ୍ ହୋଡ଼ ଇସ୍ରାଏଲୀ ଦାସୀ କେ ବିଡ଼ାଇ ତାନାଏ। ମୁଶା ଇସ୍ରାଏଲୀ ହୋଡ଼ କେ ବାଞ୍ଚାଅ ଲାଗିନ୍ତେ ସାନାଙ୍ଗ୍ କେଦାଏ।
ଚିମ୍ତାଙ୍ଗ୍ ମୁଶା ପାହୋମ୍ କେଦାଏ ଚି, ଇନିଃକେ ଜେତାଏ କାକୋ ନେଲ୍ ତାନା, ଇନିଃ ମିଶାର୍ ରେନ୍ ହୋଡ଼ କେ ଗୋଏଃ ତାଇଜାଏ ହାର୍ ଆଜାଃ ହୋଡ଼ମୋ କେ ତୋପା ତାଦାଏ। ମେନ୍ଦୋ ଜେତାଏ ମିହୋଡ଼ ମୁଶା କେ ଅକନାଃ ରିକା କେଦାଏ ଏନାକେ ନେଲ୍ ତାଦାଏ।
ଚିମ୍ତାଙ୍ଗ୍ ମୁଶା ଅକନାଃ ରିକା କେଦାଏ ଏନାକେ ଫିରୋନ୍ ରାଜା ଆୟୁମ୍ କେଦାଏ, ଦୋ ରାଜା ଇନିଃକେ ଗୋଏଃ ସାନାଙ୍ଗ୍ କିଜାଏ। ମେନ୍ଦୋ ମୁଶା ମିଶାର୍ ଦିଶୁମ୍ ଏତେ ଟୋନାଙ୍ଗ୍ ପାଡ଼ ନିର୍ ଜାନାଏ। ଏନ୍ତେ ଫିରୋନ୍ ରାଜା ରାଃ ସିପାହୀ କୋ ଇନିଃକେ କାକୋ ନାମ୍ ଧାଡ଼ିକିଜା।
ମିଶାର୍ ଦିଶୁମ୍ ଏତେ ଥିମ୍ବାଗି ସାଙ୍ଗିନ୍ ଗୀତିଲ୍ ଅତେ ରେ ମୁଶା ମିୟାଃ ମିଣ୍ଡି ଗୁପିନିଃ ବାଇଜାନାଏ। ହେନ୍ତାଃ ରେ ମିୟାଃ କୁଡ଼ି ଲୋଃ ଇନିଃ ଆଣାଦି ଜାନାଏ ହାର୍ ଆଜାଃ ବାରିୟା ହୋନ୍ ହୋବା ଜାନାକିନ୍।
ମୁଶା ଆଜାଃ ହୋୟାଁର୍ ରାଃ ମିଣ୍ଡୀ କୋକେ ଗୁପୀକୋ ତାଇକେନାଏ। ମୁସୀଙ୍ଗ୍ ହୁଲାଙ୍ଗ୍ ଇନିଃ ମିୟାଃ ଚୁପାଃ କେ ସେଙ୍ଗେଲ୍ ରେ ଜୁଲୋଃତାନ୍ ନେଲ୍ କେଦାଏ। ମେନ୍ଦୋ ଏନ୍ ଚୁପାଃ କା ରୋଙ୍ଗୋଃୟୋଃ ତାଇନା। ମୁଶା ଚୁପାଃ ନାଡ଼େଏ ପାଡ଼୍ ବେସ୍ ତେ ନେଲ୍ ଲାଗିନ୍ ସେନ୍ ଜାନଏ। ଚିମ୍ତାଙ୍ଗ୍ ଇନିଃ ନାଡ଼େଏ ରେ ତାଇକେନାଏ, ଏଣ୍ଡେ ପାର୍ମେଶ୍ଵାର୍ ଇନିଃକେ କାଜିକିଜାଏ, “ହେ ମୁଶା, ଆମାଃ ଖାର୍ପା କେ ଖୋଲାଅତାମ୍। ଚିୟାଃଚି ଆମ୍ ପାବିତାର୍ ଜାଗାରେ ତିଙ୍ଗୁ କାନାମ୍।”
ଏନ୍ତେ ପାର୍ମେଶ୍ଵାର୍ କାଜିକେଦାଏ, “ଇଙ୍ଗ୍ ଇଙ୍ଗ୍ଆଃ ହୋଡ଼ୋକୋୱାଃ ଦୁକୁକୋକେ ନେଲ୍ କେଦାଇଙ୍ଗ୍।” ଇଙ୍ଗ୍ ଆମ୍ କେ ଫିରୋନ୍ ରାଜା ତାଃ କୁଲ୍ ମେୟାଇଙ୍ଗ୍ ଏନାତେ ଆମ୍ ଇସ୍ରାଏଲୀ କୋକେ ମିଶାର୍ ଦିଶୁମ୍ ଏତେ ଇନ୍କୁୱାଃ ଦାସୀକାନ୍ ତେୟାଃତେ ଇନ୍କୁକେ ଅଡୋଙ୍ଗ୍ ଆଉକୋମ୍। ଇଙ୍ଗ୍ ଇନ୍କୁକେ କାନାନ୍ ଦିଶୁମ୍ ଏମାକୋୱାଇଙ୍ଗ୍, ଅକନାଃ ଇଙ୍ଗ୍ ଆବ୍ରାହାମ୍, ଇସାହାକ୍ ହାର୍ ୟାକୁବ୍ କେ କିରିୟା ଏମ୍ ଲେମ୍ ଲେଃକୋୱାଇଙ୍ଗ୍।
ମୁଶା କୁଲିକେଦାଏ, “ଆଗାର୍ ହୋଡ଼ୋକୋ ସାରିନ୍ ସାନାଙ୍ଗ୍ ଏରେଦୋ ଇଙ୍ଗ୍ କେ ଅକୋଏ କୁଲ୍ କାଦିଙ୍ଗ୍ଆଏ, ଏଣ୍ଡେ ଇଙ୍ଗ୍ ଇନ୍କୁକେ ଚିନାଃ କାଜିକୋୱାଇଙ୍ଗ୍?” ପାର୍ମେଶ୍ଵାର୍ କାଜିକେଦାଏ, “ଇଙ୍ଗ୍ ଅକନିଃ ତାନିଙ୍ଗ୍ ଇନିଃ ତାନିଙ୍ଗ୍।” ଇନ୍କୁକେ କାଜିକୋମ୍, “ଅକେୟାଃ ନୁତୁମ୍ ଇଙ୍ଗ୍ ତାନିଙ୍ଗ୍ ତାନାଃ ଇନିଃ ଇଙ୍ଗ୍ କେ ଆପେତାଃ କୁଲ୍ କାଦିଙ୍ଗାଏ।” ଆଡୋଃଗି ଇନିଃ କେ କାଜିକୋମ୍, “ଇଙ୍ଗ୍ ୟାହୋୱା ତାନିଙ୍ଗ୍, ସୋବେନ୍ ହୁଲାଙ୍ଗ୍ ଲାଗିନ୍ ନେୟା ଗି ଇଙ୍ଗ୍ଆଃ ନୁତୁମ୍ ତାନାଃ। ଇଙ୍ଗ୍ ଆପେଆଃ ପୁର୍ଖା ହାଡ଼ାମ୍, ଆବ୍ରାହାମ୍, ଇସାହାକ୍, ହାର୍ ୟାକୁବ୍ କୋୱାଃ ପାର୍ମେଶ୍ୱାର୍ ତାନିଙ୍ଗ୍।”
ମୁଶା ବୋରୋ ତାଇନାଏ ହାର୍ ଫିରୋନ୍ ରାଜା ନାଡ଼େଏ ତାଃ ସେନ୍ ଲାଗିନ୍ କାଏ ସାନାଙ୍ଗ୍ ତାଇନା, ଚିୟାଃଚି ଇନିଃ ପାହୋମ୍ ତାଇନାଏ ଚି ଇନିଃ ବୁଗିନ୍ତେ ବାଖାଣ କାଏ ଧାଡ଼ିଆଏ, ଏନାମେନ୍ତେ ପାର୍ମେଶ୍ୱାର୍ ମୁଶା ରାଃ ହାଗା, ହାରୁନ୍, କେ ଆଏଃକେ ଦେଙ୍ଗା ଲାଗିନ୍ତେ କୁଲ୍ କିଜାଏ।
ବାଇବାଲ୍ ମିୟାଃ କାହାନୀ: ସେସେନ୍ ପୁଥି ରାଃ୧-୪
Free to use, adapt, and share under an open license (CC BY-SA 4.0).