12. ୧୨. ମାରାଙ୍ଗ୍ ସେସେନ୍
ଇସ୍ରାଏଲୀ ହୋଡ଼ୋକୋ ମିଶାର୍ ଦିଶୁମ୍ ତେ ଅଡୋଙ୍ଗ୍ କେତେ ଥିମ୍ବାଗି ସୁକୁ ରେ ତାଇକେନାକୋ। ଇନ୍କୁ ନାଆ ଦାସୀ କାକୋ ତାଇନ୍ କେନା, ହାର୍ ଇନ୍କୁ କିରିୟା ଏମାକାନ୍ ଦିଶୁମ୍ ତେ ସେନ୍ ତାଇକେନାକୋ! ଅକନାଃ ଅଗି ଇସ୍ରାଏଲୀ କୋ ଆସିକେଦାକୋ, ମିଶାର୍ ଦିଶୁମ୍ ରେନ୍ ହୋଡ଼ୋକୋ ଇନ୍କୁକେ ଏନା ସୋବେନାଃ ଏମ୍ କେଦାକୋ, ନେତାଃ ସାନ୍ତେ ଚି ସୋନା ହାର୍ ରୂପା ହାର୍ ଏଟାଃ ଗୋନୋଙ୍ଗ୍ଆନ୍ ଜିନିଷ୍ କୋ। ଏଟାଃ ଦିଶୁମ୍ ରେନ୍ ଚିମିନ୍ ହୋଡ଼ୋକୋ ପାର୍ମେଶ୍ଵାର୍ କେ ବିଶ୍ଵାସ୍ କେଦାକୋ ହାର୍ ଚିମ୍ତାଙ୍ଗ୍ ଇସ୍ରାଏଲୀ ହୋଡ଼ୋକୋ ମିଶାର୍ ଦିଶୁମ୍ ଏତେ ଅଡୋଙ୍ଗ୍ ଜାନାକୋ ଇମ୍ତା ଇନ୍କୁଅଗି ଆକୋଲୋଃ ସେନ୍ ଜାନାକୋ।
ଶିଙ୍ଗୀ ଇମ୍ତା ରିମିଲ୍ ରାଃ ମିୟାଃ ମାରାଙ୍ଗ୍ ଖୁଣ୍ଟୁ ଇନ୍କୁୱାଃ ଆୟୁର୍-ଆୟୁର୍ ସେନ୍ ଜାନାଏ। ହାର୍ ନିଦା ଇମ୍ତା ଏନା ସେଙ୍ଗେଲ୍ ରାଃ ଖୁଣ୍ଟୁ ବାଇଜାନା। ପାର୍ମେଶ୍ଵାର୍ ଅକନିଃ ଏନ୍ ରିମିଲ୍ ରାଃ ଖୁଣ୍ଟୁ ରେ ହାର୍ ସେଙ୍ଗେଲ୍ ରାଃ ଖୁଣ୍ଟୁ ରେ ତାଇନ୍ ଲେନାଏ, ସୋବେନ୍ ଇମ୍ତାଙ୍ଗ୍ ଇନ୍କୁଲୋଃ ତାଇକେନାଏ, ହାର୍ ଇନିଃ ସେସେନ୍ ସାମାୟ୍ ରେ ଇନ୍କୁକେ ହୋରା ଉଦୁବ୍ କୋତାଇନାଏ। ଇନ୍କୁକେ ନିମିନ୍ ଭାଇର୍ ରିକାରାଃ ତାଇକେନା ଚି ଇନିଜାଃ ତାୟୋମ୍-ତାୟୋମ୍ ସେନେ ୟାକୋ।
ହୁଡିଙ୍ଗ୍ ସାମାୟେ ରାଃ ତାୟୋମ୍ତେ, ଫିରୋନ୍ ରାଜା ହାର୍ ଇନିଜାଃ ହୋଡ଼ୋକୋ ଆପ୍ନାଃ ମୋନ୍ କୋକେ ବାଦ୍ଲାଅ ତାଦାକୋ। ଏନ୍ତେ ଇନ୍କୁ ଇସ୍ରାଏଲୀ ହୋଡ଼ୋକୋକେ ଆଡୋଃଗି ଆକୋୱାଃ ଦାସୀ ବାବାଇ ସାନାଙ୍ଗ୍ ତାଇକେନାକୋ। ଏନାମେନ୍ତେ ଇନ୍କୁ ଇସ୍ରାଏଲୀ ହୋଡ଼ୋକୋକେ ଅତୋଙ୍ଗ୍ କେଦାକୋ। ନିଈ ପାର୍ମେଶ୍ଵାର୍ ଗି ତାଇକେନାଏ ଅକନିଃ ଇନ୍କୁୱାଃ ମୋନ୍ କେ ବାଦ୍ଲାଅ ଲେଦାଏ। ଇନିଃ ନେଲେକା ନେୟାମେନ୍ତେ ରିକାଲାଆଏ ଚିୟାଃଚି ଇନିଃ ସାନାଙ୍ଗ୍ ତାଇନାଏ ଚି ସୋବେନ୍ ହୋଡ଼ୋକୋ ନେୟା ସାରିକାକୋ ଚି ଫିରୋନ୍ ରାଜା ଏତେ ହାର୍ ମିଶାର୍ ଦିଶୁମ୍ ରେନ୍ ଦେଓତା କୋଏତେ ଇନିଃ, ୟାହୋୱା, ପାର୍ମେଶ୍ଵାର୍ ସୋବେନ୍ ଏତେ ପେଡ଼େଜାନ୍ ତାନିଃ।
ଚିମ୍ତାଙ୍ଗ୍ ଇସ୍ରାଏଲୀ ହୋଡ଼ୋକୋ ମିଶାର୍ ଦିଶୁମ୍ ରେନ୍ ସିପାହୀ କୋକେ ହିଜୁଃତାନ୍ ନେଲ୍ କେଦାକୋ ଏଣ୍ଡେ ଇନ୍କୁ ସାରିଜାନାକୋ ଚି ଇନ୍କୁ ଫିରୋନ୍ ରାଜା ରାଃ ସିପାହୀ କୋଏତେ ହାର୍ ଆରାଃ ସାମୁଦାର୍ ଗାଡ଼ା ଥାଲା ରେ ଫାସେ କାନାକୋ।ଇନ୍କୁ ଥିମ୍ବାଗି ବୋରୋ ଜାନାକୋ ହାର୍ ରାଆ ଏଟେଃକେଦାକୋ, “ଆଲେ ମିଶାର୍ ଦିଶୁମ୍ କେ ଚିନାଃ ମେନ୍ତେ ବାଗେ କେଦାଲେ? ଆବୁ ଗୋଏଃ କେନୋଗାବୁ!”
ମୁଶା ଇସ୍ରାଏଲୀ ହୋଡ଼ୋକୋକେ କାଜିକେଦାଏ, “ଆଲୋପେ ବୋରୋୟା! ପାର୍ମେଶ୍ଵାର୍ ଇସିଙ୍ଗ୍ ଆପେୟାଃ ଲାଗିନ୍ ଲାଡ଼ାଇୟାଏ ହାର୍ ଆପେକେ ବାଚାଅ ପେୟାଏ।” ଏନ୍ତେ ପାର୍ମେଶ୍ଵାର୍ ମୁଶାକେ କାଜିକିଜାଏ, “ନେ ହୋଡ଼ୋକୋକେ ଆରାଃ ସାମୁଦାର୍ ପାଡ଼୍ ଆୟୁର୍ ସେନ୍ ଲାଗିନ୍ କାଜିକୋମ୍।”
ଏନ୍ତେ ପାର୍ମେଶ୍ଵାର୍ ଏନ୍ ରିମିଲ୍ ରାଃ ଖୁଣ୍ଟୁ କେ ଇଦିକେତେ ଇସ୍ରାଏଲୀ ହୋଡ଼ୋକୋୱାଃ ହାର୍ ମିଶାର୍ ଦିଶୁମ୍ ରେନ୍ ହୋଡ଼ୋକୋୱାଃ ଥାଲା ରେ ମାଣ୍ଡାଅ ତାଦାଏ ଏନାତେ ମିଶାର୍ ଦିଶୁମ୍ ରେନ୍ ହୋଡ଼ୋକୋ ଇସ୍ରାଏଲୀ ହୋଡ଼ୋକୋକେ ନେଲ୍ କାକୋ ଧାଡ଼ିକା।
ପାର୍ମେଶ୍ଵାର୍ ମୁଶାକେ ସାମୁଦାର୍ ପାଡ଼୍ ଆଜାଃ ତିଈ କେ ଜିଲିଙ୍ଗେମ୍ ମେନ୍ତେ କାଜିକିଜାଏ। ହାର୍ ପାର୍ମେଶ୍ଵାର୍ ହୋୟୋ ତେ ସାମୁଦାର୍ ରାଃ ଦାଆ କେ ଜୋମ୍ ପାଡ଼୍ ହାର୍ ଲେଙ୍ଗା ପାଡ଼୍ ବାର୍ ହାଟିଙ୍ଗ୍ ତାଦାଏ, ଅକନାଃଏତେ ସାମୁଦାର୍ ହୋବାକେତେ ମିୟାଃ ହୋରା ବାଇଜାନା।
ଇସ୍ରାଏଲୀ ହୋଡ଼ୋକୋ ଆକୋୱାଃ ବାରାନ୍ ପାଡ଼୍ ଦାଆ ରାଃ ଭୀତ୍, ସାମୁଦାର୍ ଥାଲା ରେ ରୋହୋଡ଼୍ ଅତେ ହୋବାକେତେ ସେନ୍ ଇଦି ଜାନାକୋ।
ଏନ୍ତେ ପାର୍ମେଶ୍ଵାର୍ ଏନ୍ ହୋରା ଏତେ ରିମିଲ୍ କେ ଚେତାନ୍ତେ ଉଠାଅ ଇଦିକେଦାଏ ଏନାତେ ମିଶାର୍ ଦିଶୁମ୍ ରେନ୍ ହୋଡ଼ୋକୋ ଇସ୍ରାଏଲୀ ହୋଡ଼ୋକୋକେ ବାଚାଅ କେତେ ସେସେନ୍ ତେୟାଃକେ ନେଲେକାକୋ। ମିଶାର୍ ଦିଶୁମ୍ ରେନ୍ ହୋଡ଼ୋକୋ ଇନ୍କୁକେ ସାବ୍ ଲାଗିନ୍ ଅତୋଙ୍ଗ୍ ନାଙ୍ଗ୍ ବିଚାର୍ କେଦାକୋ।
ଏନାମେନ୍ତେ, ଇନ୍କୁ ସାମୁଦାର୍ ଥାଲା ହୋରା ଏତେ ଇସ୍ରାଏଲୀ ହୋଡ଼ୋକୋକେ ଅତୋଙ୍ଗ୍ କେଃକୋୱାକୋ, ମେନ୍ଦୋ ପାର୍ମେଶ୍ଵାର୍ ମିଶାର୍ ଦିଶୁମ୍ ରେନ୍ କୋକେ ବୋରୋ ତାଃକୋୱାଏ ହାର୍ ଇନ୍କୁ ୱାଃ ରାଥ୍ ଗାଡି କୋକେ ଆଟ୍କାଅ ତାଦାଏ। ଇନ୍କୁ କିର୍ଲାଅ ଏଟେଃ କେଦାକୋ, “ନେର୍ପେ! ଇସ୍ରାଏଲୀକୋ ପାଡ଼୍ ଏତେ ପାର୍ମେଶ୍ଵାର୍ ଲାଡ଼ାଇ ତାନାଏ!”
ସୋବେନ୍ ଇସ୍ରାଏଲୀକୋ ସାମୁଦାର୍ ରାଃ ଏଟାଃ ଫାରୋମ୍ ପାଡ଼୍ ସେଟେର୍ ଜାନାକୋ। ଏନ୍ତେ ପାର୍ମେଶ୍ଵାର୍ ମୁଶାକେ କାଜିକିଜାଏ ଚି ଇନିଃ ଆଡୋଃଗି ଦାଆ ପାଡ଼୍ ତିଇ ଜିଲିଙ୍ଗ୍ ଏକାଏ। ଚିମ୍ତାଙ୍ଗ୍ ମୁଶା ଏନ୍କା ରିକା କେଦାଏ, ଦୋ ଦାଆ ମିଶାର୍ ରେନ୍ ହୋଡ଼ୋକୋ ଚେତାନ୍ ରେ ହିଜୁଃ ଲେନା ହାର୍ ସାମୁଦାର୍ ଆଜାଃ ସୀଦା ଲେକାଗି ମେଶାଜାନା। ସୋବେନ୍ ମିଶାର୍ ରେନ୍ ସିପାହୀ କୋ ସାମୁଦାର୍ ରେ ଦୁବିଃ ଜାନାକୋ।
ଚିମ୍ତାଙ୍ଗ୍ ଇସ୍ରାଏଲୀକୋ ନେଲ୍ କେଦାକୋ ଚି ମିଶାର୍ ରେନ୍ ହୋଡ଼ୋକୋ ଗୋଏଃ ଜାନାକୋ, ଇମ୍ତା ଇନ୍କୁ ପାର୍ମେଶ୍ଵାର୍ ଚେତାନ୍ ରେ ବିଶ୍ଵାସ୍ କେଦାକୋ। ହାର୍ ଇନ୍କୁ ବିଶ୍ଵାସ୍ କେଦାକୋ ଚି ମୁଶା ପାର୍ମେଶ୍ଵାର୍ ପାଡ଼୍ ଏତେ ମିହୁ୍ଡ଼୍ ନାବୀ ତାନିଃ।
ଇସ୍ରାଏଲୀ ହୋଡ଼ୋକୋ ନେୟା ଲାଗିନ୍ ହ ଥିମ୍ବା ରାଶିକାନ୍ ତାଇକେନାକୋ ଚିୟାଃଚି ପାର୍ମେଶ୍ଵାର୍ ଇନ୍କୁକେ ଗୋଜୋଃ ଏତେ ହାର୍ ଦାସୀ ବାଇନ୍ତେ ବାଚାଅ ଲେଃକୋୱାଏ। ନାଆ ଇନ୍କୁ ପାର୍ମେଶ୍ଵାର୍ କେ ଆରାଧାନା ରିକା ଲାଗିନ୍ତେ ହାର୍ ଇନିଜାଃ ଆନାଚୁ କୋକେ ମାନାତିଙ୍ଗ୍ ଲାଗିନ୍ତେ ରାଡ଼ା ଲେନ୍ ତାଇକେନାକୋ। ଇସ୍ରାଏଲୀ ହୋଡ଼ୋକୋ ଆକୋୱାଃ ରାଡ଼ାକାନ୍ ତେୟାଃ ରାଃ ପାରାବ୍ ମାନାତିଙ୍ଗ୍ ଲାଗିନ୍ ହାର୍ ପାର୍ମେଶ୍ଵାର୍ କେ ମାନାରାଙ୍ଗେ ଲାଗିନ୍ ଚିମିନ୍ ଗି ଦୁରାଙ୍ଗ୍ କୋ ଦୁରାଙ୍ଗ୍ କେଦା। ଚିୟାଃଚି ଇନିଃ ଇନ୍କୁକେ ମିଶାର୍ ଦିଶୁମ୍ ରେନ୍ ସିପାହୀ କୋଏତେ ବାଚାଅ ଲେଃକୋୱାଏ।
ପାର୍ମେଶ୍ଵାର୍ ଇସ୍ରାଏଲୀ କୋକେ ସୋବେନ୍ ବାରାସ୍ ମିୟାଃ ପାରାବ୍ ମାନାତିଙ୍ଗ୍ ରାଃ ଆନାଚୁ ଏମ୍ କେଃକୋୱାଏ, ନେୟାକେ ପାହୋମ୍ ମାଣ୍ଡାଅ ଲାଗିନ୍ ଚି ଚିଲ୍କା ପାର୍ମେଶ୍ଵାର୍ ମିଶାର୍ ଦିଶୁମ୍ ରେନ୍ ହୋଡ଼ୋକୋକେ ହାରାଓ କେଃକୋୱାଏ ହାର୍ ଇନ୍କୁକେ ଦାସୀ ହୋବାଅଃତେ ରାଡ଼ା କେଃକୋୱାଏ। ନେୟା କେ ଫାସାହ୍ ପାରାବ୍ କାଜିଜାନା। ନେୟାରେ ଇନ୍କୁକେ ନେ ପାରାବ୍ ମାନାତିଙ୍ଗ୍ ଲାଗିନ୍ ମିୟାଃ ବୁଗିନ୍ ମିଣ୍ଡି କେ ଦାଣେ ଏମ୍ ରାଃ ତାଇକେନା, ଏନାକେ ରାପାଃ ରାଃ ତାଇକେନା, ହାର୍ ଏନାକେ କାମେଶାକାନ୍ ଖାମିର୍ ହୋଲୋଙ୍ଗ୍ ଲୋଃ ଜୋଜୋମ୍ ତାଇକେନା।
ବାଇବାଲ୍ ରାଃ ମିୟାଃ କାହାନୀ: ସେସେନ୍ ପୁଥି ୧୨: ୩୩-୧୫:୨୧
Free to use, adapt, and share under an open license (CC BY-SA 4.0).