14. ୧୪. ଟୋନାଙ୍ଗ୍ ରେ ଆଃ ଜାନାକୋ

ପାର୍ମେଶ୍ଵାର୍ ଇସ୍ରାଏଲୀ କୋକେ ଏନ୍ ନିୟାମ୍ କୋକେ କାଏ ଉଦୁବ୍ କେଦାଏ ଅକନାଃ ଇନ୍‍କୁୱାଃ ଲାଗିନ୍ ଥଲାକାନ୍ ଏନ୍ ନିୟାମ୍ ଲେକାତେ ମାନାତିଙ୍ଗ୍ ରାଃ ତାଇକେନା, ଆଡୋଃ ଇନିଃ ସିନାଇ ବୁରୁ ଏତେ ଆୟୁର୍ତେ ଆୟାର୍ ଇଦି କେଃକୋୱାଏ। ଇନିଃ ଇନ୍‍କୁକେ କିରିୟା ଦିଶୁମ୍ ତେ ଇଦି ସାନାଙ୍ଗ୍ ତାଇନାଏ। ନେ ଦିଶୁମ୍ କେ କାନାନ୍ ହଁ କାଜିୟୋଃ ତାଇନା। ପାର୍ମେଶ୍ଵାର୍ ରିମିଲ୍ ଖୁଣ୍ଟୁ ରେ ହୋବାକେତେ ଇନ୍‍କୁୱାଃ ଆୟୁର୍-ଆୟୁର୍ ସେନ୍ କେଦାଏ, ହାର୍ ଇନ୍‍କୁ ଇନିଜାଃ ତାୟୋମ୍-ତାୟୋମ୍ ସେନ୍ କେଦାକୋ।

ପାର୍ମେଶ୍ଵାର୍ ଆବ୍ରାହାମ୍, ଇସାହାକ୍, ହାର୍ ୟାକୁବ୍ ଲୋଃ କିରିୟା ଲେଦାଏ ଚି ଇନିଃ କିରିୟା ରାଃ ଏନ୍ ଦିଶୁମ୍ ଇନ୍‍କୁୱାଃ ବାଂଶ୍ ରେନ୍ କୋକେ ଏମାକୋୱାଏ, ମେନ୍ଦୋ ନେ ସାମାୟ୍ ରେ ଏନ୍ତାଃରେ ଥିମ୍ବାଗି ଏଟାଃଜାତିରେନ୍ ହୋଡ଼ୋକୋ ତାଇନ୍ ତାଇନାକୋ। ଇନ୍‍କୁକେ କାନାନୀ କାଜିତାଇନାକୋ। ନେ କାନାନୀ ହୋଡ଼ୋକୋ ପାର୍ମେଶ୍ଵାର୍ କେ କାକୋ ଆରାଧାନା ତାଇନା ହାର୍ ଇନିଜାଃ ଆନାଚୁ କୋକେ କାକୋ ମାନାତିଙ୍ଗ୍ ତାଇନା। ଇନ୍‍କୁ କାସାର୍ତି ଦେଓତା କୋକେ ସେୱା ତାଇନାକୋ ହାର୍ ଥିମ୍ବାଗି ଏତ୍କାନ୍ କାମିକୋ ରିକା ତାଇନାକୋ।

ପାର୍ମେଶ୍ଵାର୍ ଇସ୍ରାଏଲୀ କୋକେ କାଜିକେଦାଏ, “ଚିମ୍ତାଙ୍ଗ୍ ଆପେ ଏନ୍ କିରିୟାକାନ୍ ଦିଶୁମ୍ ରେ ସେଟେର୍ ଆପେ ଏଣ୍ଡେ ଏନ୍ତାଃରେନ୍ ସୋବେନ୍ କାନାନୀ କୋଏତେ ଗେନା ରେ ତାଇନ୍ ପେ। ଇନ୍‍କୁ ଲୋଃ ଆଲୋପେ ଗାତିନା, ହାର୍ ଇନ୍‍କୁ ଲୋଃ ଆଲୋପେ ଆଣାଦିନା। ଆପେକେ ଇନ୍‍କୁୱାଃ ସୋବେନ୍ ମୂର୍ତିକୋକେ ନାଷ୍ଟ ରିକାରାଃ ମେନାଃ। ଆଗାର୍ ଆପେ ଇଙ୍ଗ୍ଆଃ ଆନାଚୁ କୋକେ କାପେ ମାନାତିଙ୍ଗ୍ଏୟା, ଏଣ୍ଡେ ଆପେ ଇଙ୍ଗ୍ କେ ବାଗେକେତେ ଇନ୍‍କୁୱାଃ ମୂର୍ତିକୋକେ ଆରାଧାନା ରିକା ଏଟେଃ କେୟାପେ।”

ଚିମ୍ତାଙ୍ଗ୍ ଇସ୍ରାଏଲୀ କୋ କାନାନ୍ ରାଃ ସିମାନ୍ ତାଃ ସେଟେର୍ ଜାନାକୋ, ଦୋ ମୁଶା ଇସ୍ରାଏଲୀ କୋୱାଃ ସବେନ୍ କିଲି କୋଏତେ ମିହୋଡ଼-ମିହୋଡ଼ ବାରା ଝାନ୍ ହୋଡ଼ୋକୋକେ ସାଲା କେଃକୋୱାଏ। ଇନ୍‍କୁକେ ଏନ୍ ଦିଶୁମ୍ ସେନ୍ କେତେ ଏନ୍ ଦିଶୁମ୍ କେ ସାରିଉରୁମ୍ ଲାଗିନ୍ ଆଚୁକେଃକୋୱାଏ ଚି ନେଲେକାକୋ ଚି ଏନ୍ ଦିଶୁମ୍ ଚିଲିକା ମେନାଃ। ଇନ୍‍କୁକେ ଏନ୍ କାନାନୀ ହୋଡ଼ୋକୋ କୋକେ ହ ସାରିଉରୁମ୍ ରାଃ ତାଇକେନା ଚି ଇନ୍‍କୁ ପେଡ଼େଜାନ୍ ତାଇକେନାକୋ ଚି ନାରାଦୁରା ତାଇକେନାକୋ।

ଏନ୍ ବାରା ଝାନ୍ କୋଡ଼ାକୋ ଗୋଟା କାନାନ୍ ଦିଶୁମ୍ କେ ଚାଲିଶ୍ ଦିନ୍ ସାନ୍ତେ ହୋନୋର୍ କେଦାକୋ ଏନାତାୟୋମ୍ତେ ଇନ୍‍କୁ ରୁଆଡ଼ ହିଜୁଃନାକୋ। ଇନ୍‍କୁ ହୋଡ଼ୋକୋକେ ଉଦୁବ୍ କେଦାକୋ, “ଏନ୍ ଦିଶୁମ୍ ରେ ଥିମ୍ବାଗି ଯଅକୋ ହୁୟୋଗା ହାର୍ ଥିମ୍ବାଗି ଯଅକୋ ହୋବାକାନା!” ମେନ୍ଦୋ ଦାସ୍ ଝାନ୍ ସାରିଉରୁମ୍ ନାଙ୍ଗ୍ ସେନାକାନ୍ ହୋଡ଼ୋକୋ କାଜିକେଦା, “ଇନ୍‍କୁୱାଃ ସାହାର୍ କୋ ଥିମ୍ବାଗି କେଟେଃ ଗିୟା ହାର୍ ଏନ୍ ହୋଡ଼ୋକୋ ଜିଲିଙ୍ଗ୍-ଚାକାର୍ ମେନାକୋୱା! ଆଗାର୍ ଆବୁ ଇନ୍‍କୁଲୋଃ ଲାପାଡ଼ାଇ ୟାବୁ ଏଣ୍ଡେ ଜାଲେକାତେ ଇନ୍‍କୁ ଆବୁକେ ହାରାଅ ତାବୁୱାକୋ ହାର୍ ଆବୁକେ ଗୋଏଃ ତାବୁୱାକୋ!”

ଇମ୍ତାଗି କାଲେବ୍ ହାର୍ ୟାହୋଶୁ ହାର୍ ଏଟାଃ ସାରିଉରୁମ୍ ନାଙ୍ଗ୍ କୁଲାକାନ୍ ବାର୍ହୋଡ଼ କିନ୍ କାଜିକେଦାକିନ୍, “ନେୟା ସାର୍ତି ତାନାଃ ଚି କାନାନ୍ ଦିଶୁମ୍ ରେନ୍ ହୋଡ଼ୋକୋ ଜିଲିଙ୍ଗ୍ ହାର୍ ପେଡ଼େଜାନ୍ ମେନାକୋୱା, ମେନ୍ଦୋ ଜାଲେକାତେଗି ଆବୁ ଇନ୍‍କୁକେ ହାରାଅ କୋୱାବୁ! ପାର୍ମେଶ୍ଵାର୍ ଆବୁୱାଃ ପାଡ଼ ଏତେ ଲାଡ଼ାଇୟାଏ!”

ମେନ୍ଦୋ ହୋଡ଼ୋକୋ କାଲେବ୍ ହାର୍ ୟାହୋଶୁ ରାଃ ବାଖାଣ କେ କାକୋ ଆୟୁମ୍ କେଦା। ଇନ୍‍କୁ ମୁଶା ହାର୍ ହାରୁନ୍ ଚେତାନ୍ ରେ ଖିସ୍ ଜାନାକୋ ହାର୍ କାଜିକେଦାକୋ, “ଆମ୍ ଆଲେକେ ନେ ବୋରୋଆନ୍ ଜାଗା ଚିନାଃ ଲାଗିନ୍ ଆଉକେଃ ଲେୟାମ୍ ? ଆଲେକେ ମିଶାର୍ ରେଗି ତାଇନ୍- ତାଇନ୍ କେନା। ଆଗାର୍ ଆଲେ ଏନ୍ ଦିଶୁମ୍ ସେନୋଗାଲେ ଦ ଲାଡ଼ାଇ ରେ ଗୋଏଃ କେନୋଗାଲେ, ହାର୍ କାନାନ୍ ଦିଶୁମ୍ ରେନ୍ ହୋଡ଼ୋକୋ ଆଲେୟାଃ କୁଡ଼ିକୋକେ ହାର୍ ହୋନ୍ କୋକେ ଦାସୀ ବାଇ କୋୱାକୋ।” ଏନ୍ ହୋଡ଼ୋକୋ ଆକୋୱାଃ ଲାଗିନ୍ତେ ଏଟାଃ ମିହୋଡ଼୍ କେ ଆଗୁଆ ବାଇସାନାଙ୍ଗ୍ କେଦାକୋ ଅକଏ ଚି ଇନ୍‍କୁକେ ଆଡୋଃମିଶା ମିଶାର୍ ଦିଶୁମ୍ ତେ ରୁଆଡ଼୍ ଇଦିକୋୱାଏ।

ଚିମ୍ତାଙ୍ଗ୍ ଏନ୍ ହୋଡ଼ୋକୋ ନେକା କାଜିକେଦାକୋ ଦ ପାର୍ମେଶ୍ଵାର୍ ଥିମ୍ବାଗି ଖିସ୍ ଜାନାଏ। ଇନିଃ ମିଃତାଃ ହୁଣ୍ଡିଏନ୍ ତାମ୍ବୂ ରେ ହିଜୁଃ ଜାନାଏ ହାର୍ କାଜିକେଦାଏ, “ଆପେ ଇଙ୍ଗ୍ଆଃ ବିରୁଦ୍ଦ୍ ରେ ବିଦ୍ରୋହ୍ କେଦାପେ, ଏନାମେନ୍ତେ ଆପେ ସୋବେନ୍ କୋ ନେ ଟନାଙ୍ଗ୍ ରେ ଆଦୋ ଗାପେ। ହାର୍ ସବେନ୍ ମିପିହୋଡ଼ ଅକନିଃକେ ବିଶ୍ ବାରାଷ୍ ୟାଦ ଏନାଏତେ ଥିମ୍ବା ବାରାଷ୍ ହୋବାକାନା ଇନିଃ ଏନ୍ତାଃରେ ଗୋଏଃ କେନୋଗାଏ ହାର୍ ଚିଉଲା ହଁ ଏନ୍ ଦିଶୁମ୍ ରେ ବୋଲୋ କାଏ ଧାଡ଼ିୟା ଅକାନାଃ କେଚି ଇଙ୍ଗ୍ ଆପେକେ ଏମାପେତାନିଙ୍ଗ୍। ଖାଲି କାଲେବ୍ ହାର୍ ୟାହୋଶୁ ଏଣ୍ଡେରେ ବୋଲୋ ଆକିନ୍।”

ଚିମ୍ତାଙ୍ଗ୍ ହୋଡ଼ୋକୋ ପାର୍ମେଶ୍ଵାର୍ କେ ନେକା କାଜିତାନ୍ ଆୟୁମ୍ କିଜାକୋ, ଦୋ ଇନ୍‍କୁ ଦୁକୁ ଜାନାକୋ ଚିୟାଃଚି ଇନ୍‍କୁ ପାପ୍ ଲେଦାକୋ। ଏନାମେନ୍ତେ ଇନ୍‍କୁ କାନାନ୍ ରେନ୍ ହୋଡ଼ୋକୋୱାଃ ଲୋଃ ଲାଡ଼ାଇ ରିକା ଲାଗିନ୍ ବିଚାର୍ କେଦାକୋ। ମୁଶା ଇନ୍‍କୁକେ ଆଲୋ ସେନ୍ କାକୋ ମେନ୍ତେ ଚେତାଅ କେଃକୋୱାଏ, ଚିୟାଃଚି ପାର୍ମେଶ୍ଵାର୍ ଇନ୍‍କୁ ଲୋଃ କାଏ ସେନା, ମେନ୍ଦୋ ଇନ୍‍କୁ ଆଜାଃ କାଜିକେ କାକୋ ଆୟୁମ୍ କେଦା।

ପାର୍ମେଶ୍ଵାର୍ ନେ ଲାଡ଼ାଇ ରେ ଇନ୍‍କୁୱାଃ ଲୋଃ କାଏ ସେନ୍ କାନ୍ ତାଇନା, ଏନାମେନ୍ତେ କାନାନି ହୋଡ଼ୋକୋ ଇନ୍‍କୁକେ ହାରାଅ ତାଃକୋୱାକୋ ହାର୍ ଇନ୍‍କୁ ଏତେ ଥିମ୍ବା କୋକେ ଗୋଏଃ ତାଃକୋୱାକୋ। ଏନ୍ତେ ଇସ୍ରାଏଲୀ କୋ କାନାନ୍ ଏତେ ରୁଆଡ଼ ଜାନାକୋ। ହାର୍ ହିଜୁଃ ଚାଲିଶ୍ ବାରାଶ୍ ସାନ୍, ଇନ୍‍କୁ ଟନାଙ୍ଗ୍ ରେ ନେତେ-ହାନ୍ତେ ହୋନୋର୍ ବାଡ଼ା ୟାକୋ।

ଇସ୍ରାଏଲୀ ହୋଡ଼ୋକୋ ଟନାଙ୍ଗ୍ ରେ ଆଦାକାନ୍ ଚାଲିଶ୍ ବାରାଶ୍ ସାନ୍ତେ, ପାର୍ମେଶ୍ଵାର୍ ଇନ୍‍କୁୱାଃ ସୋବେନ୍ ଦାର୍କାର୍ ଜିନିଷ୍ କୋକେ ଏମାଃକୋୱାଏ। ଇନିଃ ଇନ୍‍କୁକେ ସିର୍ମାଏତେ “ମାନ୍ନା” କାଜିଅଗା ଏନ୍ ହୋଲୋଙ୍ଗ୍ କେ ଏମାଃ କୋୱାଏ। ଇନିଃ ମିଃଥିମ୍ବା ଗୁଣ୍ଡ୍ରି ଅଡ଼େ କୋକେ ହ (ଅକନ୍ କୋ ଠିକ୍ ଭାଇର୍ ରେନ୍ ଅଡ଼େ ମାରାଙ୍ଗ୍ ହ କାହା, ହୁଡିଙ୍ଗ୍ ହ କାହା) ଇନ୍‍କୁୱାଃ ଡେରା ତାଃ ରେ କୁଲ୍ କେଦାଏ ଏନାତେ ଇନ୍‍କୁ ତାଃ ଜୋମେ ଲାଗିନ୍ ମାସ୍ ତାଇନୋଃକା। ଏନ୍ ହୁଲାଙ୍ଗ୍ କୋରେ, ପାର୍ମେଶ୍ଵାର୍ ଇନ୍‍କୁୱାଃ ଲିଜାଃ କୋକେ ହାର୍ ଖାର୍ପାକୋକେ ଚେଚ୍ଆଃ କାଏ ଏମ୍ କେଦା।

ନେତାଃ ସାନ୍ତେ ଚି ପାର୍ମେଶ୍ଵାର୍ ଇନ୍‍କୁକେ ଦାଆ ନୁଏ ଲାଗିନ୍ ଆକ୍‍ଦାନ୍ଦାଅ ଲେକା ମାରାଙ୍ଗ୍ ସେରେଙ୍ଗ୍ ଏତେ ଦାଆ ଅଡୋଙ୍ଗ୍ କେଦାଏ। ମେନ୍ଦୋ ନେ ସୋବେନ୍ ରିକା କେତେ ଅଗି, ଇସ୍ରାଏଲୀ ହୋଡ଼ୋକୋ ପାର୍ମେଶ୍ଵାର୍ ରାଃ ବିରୁଦ୍ଧ୍ ରେ ହାର୍ ମୁଶା ରାଃ ବିରୁଦ୍ଧ୍ ରେ କାଜି ଏଟେଃକେଦାକୋ ହାର୍ ମୋନ୍ ରେ କୁର୍ବୁର୍ରାଅ ଜାନାକୋ। ଏଣ୍ଡେଅ ପାର୍ମେଶ୍ଵାର୍ ବିଶ୍ଵାସେନିଃ ତାଇକେନାଏ। ଇନିଃ ଅକନ୍ କିରିୟା ଜୋମ୍ ଲେଦାଏ ଚି ଇନିଃ ଆବ୍ରାହାମ୍, ଇସାହାକ୍, ହାର୍ ୟାକୁବ୍ ରାଃ କିଲିରେନ୍ କୋ ଲାଗିନ୍ ରିକାୟାଏ ଇନିଃ ଏନାକେ ରିକାକେଦାଏ।

ଆଡୋଃ ଏଟାଃ ମିୟାଃ ସାମାୟ୍ ରେ ଚିମ୍ତାଙ୍ଗ୍ ଏନ୍ ହୋଡ଼ୋକୋ ତାଃ ଦାଆ କାତାଇକେନା, ପାର୍ମେଶ୍ଵାର୍ ମୁଶା କେ କାଜିକିଜାଏ, “ସେରେଙ୍ଗ୍ ଲୋଃ ବାଖାଣେମ୍, ହାର୍ ଏନାତେ ଦାଆ ଅଡୋଙ୍ଗ୍ଆ।” ମେନ୍ଦୋ ମୁଶା ସେରେଙ୍ଗ୍ ଲୋଃ କାଏ ବାଖାଣ କେଦାଏ। ମେନ୍ଦୋ ଏନା ବାଗି କେତେ, ଇନିଃ ଲାଠି ଏତେ ସେରେଙ୍ଗ୍ ରେ ବାର୍ସା ବିଡ଼ାକେଦାଏ। ନେଲେକାତେ ଇନିଃ ପାର୍ମେଶ୍ଵାର୍ କେ କାଏ ମାଇନ୍ କିଜା। ସୋବେନ୍ କୋୱାଃ ନୁଏ ଲାଗିନ୍ ଦାଆ ଦ ସେରେଙ୍ଗ୍ ଏତେ ଅଡୋଙ୍ଗ୍ ଜାନା, ମେନ୍ଦୋ ପାର୍ମେଶ୍ଵାର୍ ମୁଶା କେ ଖିସ୍ ଜାନାଏ। ଇନିଃ କାଜିକେଦାଏ, “ଚିୟାଃଚି ଆମ୍ ନେକା କେଦାମ୍, ଏନାମେନ୍ତେ ଆମ୍ କିରିୟା ଏମାକାନ୍ ରାଃ ଦିଶୁମ୍ ରେ ବୋଲୋ କାମ୍ ଧାଡ଼ିୟା।”

ଚିମ୍ତାଙ୍ଗ୍ ଇସ୍ରାଏଲୀ କୋ ଚାଲିଶ୍ ବାରାଶ୍ ସାନ୍ ଟନାଙ୍ଗ୍ ରେ ଆଃ ଲେନାକୋ, ଇମ୍ତା ଅକନ୍ କୋ ପାର୍ମେଶ୍ଵାର୍ ରାଃ ବିରୁଦ୍ଧ୍ ରେ ବିରୋଧ୍ ଲେଦାକୋ, ଇନ୍‍କୁ ସୋବେନ୍ କୋ ଗୋଏଃ ଲେନ୍ ତାଇକେନାକୋ। ଏନ୍ତେ ପାର୍ମେଶ୍ଵାର୍ ଏନ୍ ହୋଡ଼ୋକୋକେ ଆଡୋଃମିଶା ଏନ୍ କିରିୟା ରାଃ ଦିଶୁମ୍ ରାଃ ସିମାନ୍ ସାନ୍ତେ ସୋତୋଃ ଆଉ କେଃକୋୱାଏ। ନାଆ ମୁଶା ଥିମ୍ବାଗି ହାଡ଼ାମ୍ ଲେନାଏ, ଏନାଲାଗିନ୍ ପାର୍ମେଶ୍ଵାର୍ ହୋଡ଼ୋକୋକେ ଆୟୁର୍ ସୋତୋଃ ଇଦିକୋ ଲାଗିନ୍ତେ ମୁଶା କେ ଦେଙ୍ଗା ଲାଗିନ୍ତେ ୟାହୋଶୁ କେ ସାଲାକିଜାଏ। ପାର୍ମେଶ୍ଵାର୍ ମୁଶା କେ ନେ ହ କିରିୟା ଜୋମ୍ ଲେଦାଏ ଚି, ମୁଷିଙ୍ଗ୍ ହୁଲାଙ୍ଗ୍ ଇନିଃ ଏନ୍ ହୋଡ଼ୋକୋ ଲାଗିନ୍ତେ ମୁଶା ଲେକା ମିୟାଃ ନାବୀ କେ କୁଲେୟାଏ।

ଏନ୍ତେ ପାର୍ମେଶ୍ଵାର୍ ମୁଶା କେ ମିୟାଃ ବୁରୁ ରାଃ ଚୁଟା ତେ ରାକାବ୍ ଲାଗିନ୍ କାଜିକିଜାଏ ଏନାତେ ଇନିଃ କିରିୟା ଏମାକାନ୍ ରାଃ ଦିଶୁମ୍ କେ ନେଲ୍ ଧାଡ଼ିୟାଏ। ମୁଶା ଏନ୍ କିରିୟା ଏମାକାନ୍ ରାଃ ଦିଶୁମ୍ କେ ନେଲ୍ କେଦାଏ। ମେନ୍ଦୋ ପାର୍ମେଶ୍ଵାର୍ ଇନିଃକେ ଏନ୍ ଦିଶୁମ୍ ରେ ବୋଲୋଲାଗିନ୍ ଆଚୁ କାଏ ଏମ୍ କିଜା। ଏନ୍ତେ ମୁଶା ଗୋଏଃ ଜାନାଏ, ହାର୍ ଇସ୍ରାଏଲୀ କୋ ତିସ୍ ଦିନ୍ ସାନ୍ତେ ଦୁକୁ ମାନାତିଙ୍ଗ୍ କେଦାକୋ। ୟାହୋଶୁ ଇନ୍‍କୁୱାଃ ନାୱା ଆୟାର୍ ଇଦିନିଃ ବାଇଜାନାଏ। ୟାହୋଶୁ ମିହୋଡ଼ ବୁଗିନ୍ ଆଗୁୱା ତାଇକେନାଏ। ଚିୟାଃଚି ଇନିଃ ପାର୍ମେଶ୍ଵାର୍ ଚେତାନ୍ ରେ ଭାରୋଷା କେଦାଏ ହାର୍ ଆଜାଃ କାଜିକୋକେ ମାନାତିଙ୍ଗ୍ କେଦାଏ।