15. ୧୫. କିରିୟା ଏମାକାନ୍ ଦିଶୁମ୍
ଆଖିର୍ ରେ, ନାଆ ଏନ୍ ସାମାୟ୍ ହିଜୁଃଲେନ୍ ତାଇନା ଚି ଇସ୍ରାଏଲୀ ହୋଡ଼ୋକୋ କିରିୟାଏମାକାନ୍ ଦିଶୁମ୍, କାନାନ୍ ରେ ବୋଲୋୱାକୋ। ଏନ୍ ଦିଶୁମ୍ ରେ ୟାରିହୋ ନୁତୁମ୍ ରେ ମିୟାଃ ସାହାର୍ ତାଇକେନା। ଏନ୍ ସାହାର୍ କେ ବାଚାଅ ଲାଗିନ୍ତେ ଏନାରାଃ ସୋବେନ୍ ପାଡ଼୍ କେଟେଃ ଭିତ୍ ଏମାକାନ୍ ତାଇନା। ୟାହୋଶୁ ଏନ୍ ସାହାର୍ କେ ସାରିନ୍ ଲାଗିନ୍ ବାର୍ହୋଡ଼୍ କେ ଉକୁ-ଉକୁ କୁଲ୍ କେଃକୋୱାଏ। ଏନ୍ ସାହାର୍ ରେ ରାହାବ୍ ନୁତୁମ୍ ମିୟାଃ ବେଶ୍ୟା ତାଇନ୍ ତାଇନାଏ। ଇନିଃ ଏନ୍ ଉକୁ-ଉକୁ କୁଲାକାନ୍ କିନ୍ କେ ଉକୁତାଃ କିନାଏ, ହାର୍ ତାୟୋମ୍ତେ ଇନିଃ ଇନ୍କିନ୍ କେ ଏନ୍ ସାହାର୍ ଏତେ ବାଚାଅ ଅଡୋଙ୍ଗ୍ ଲାଗିନ୍ ଦେଙ୍ଗାକେଃ କିନାଏ। ଇନିଃ ନେକା ଏନାଲାଗିନ୍ ରିକାକେଦାଏ ଚିୟାଃଚି ଇନିଃ ପାର୍ମେଶ୍ଵାର୍ କେ ବିଶ୍ଵାସ୍ ତାଇନାଏ। ଅକନ୍ ସାମାୟ୍ ଇସ୍ରାଏଲୀ କୋ ୟାରିହୋ ସାହାର୍ କେ ନାଶ୍ ୟାକୋ ଇମ୍ତା ଇନ୍କୁ ରାହାବ୍ ହାର୍ ଇନିଜାଃ ପାରିବାର୍ ରେନ୍ କୋକେ ବାଚାଅ କୋୱାକୋ ମେନ୍ତେ କିରିୟା ଏମ୍ କେଦାକିନ୍।
ଇସ୍ରାଏଲୀ ହୋଡ଼ୋକୋକେ କିରିୟା ଏମାକାନ୍ ଦିଶୁମ୍ ରେ ବୋଲୋଲାଗିନ୍ ୟାର୍ଦାନ୍ ଗାଡ଼ା ଫାରୋମ୍ ରାଃ ତାଇକେନା। ପାର୍ମେଶ୍ଵାର୍ ୟାହୋଶୁ କେ କାଜିକିଜାଏ, “ୟାଜାକ୍ କୋକେ ସୀଦା ସେନ୍ ରିକା କୋମ୍।’’ ଚିମ୍ତାଙ୍ଗ୍ ୟାଜାକ୍ କୋ ୟାର୍ଦାନ୍ ଗାଡ଼ା ରେ ଆକୋୱାଃ କାଟାକେ ମାଣ୍ଡାଅ କେଦାକୋ ଦୋ ଦାଆ ଆତୁତିନା ଏନା ବାନ୍ଦ୍ ଜାନା, ଏନାମେନ୍ତେ ଚି ଇସ୍ରାଏଲୀ କୋ ନାଇ ରାଃ ଏଟାଃ ଫାରୋମ୍ ରୋହୋଡ଼୍ ଅତେରେ ସେନ୍-ସେନ୍ ଫାରୋମ୍ ଧାଡ଼ିୟାକୋ।
ଏନ୍ ହୋଡ଼ୋକୋ ୟାର୍ଦାନ୍ ଗାଡ଼ା(ନାଇ) ଫାରୋମ୍ ଜାନାକୋ ଏଣ୍ଡେ ପାର୍ମେଶ୍ଵାର୍ ୟାହୋଶୁ କେ କାଜିକିଜାଏ ଚି ୟାରିହୋ ସାହାର୍ କେ ଲାଡ଼ାଇ ଲାଗିନ୍ତେ ସେକାଡ଼୍ କାନ୍ କାକୋ, ଏନ୍ ସାହାର୍ ଥିମ୍ବାଗୀ କେଟେଃ ତାଇକେନା ଏନାରେହ। ପାର୍ମେଶ୍ଵାର୍ ଏନ୍ ହୋଡ଼ୋକୋକେ କାଜିକେଦାଏ ଚି ଆକୋୱାଃ ୟାଜାକ୍ କୋ ହାର୍ ସିପାହୀ କୋ ମୁଷିଙ୍ଗ୍ ରେ ମିଶା ଛାଅ ଦିନ୍ ସାନ୍ତେ ଏନ୍ ସାହାର୍ କେ ବିୟୁର୍ ହିଜୁଃ ରାଃ ମେନାଃ। ଏନ୍ତେ ୟାଜାକ୍ କୋ ହାର୍ ସିପାହୀ କୋ ଏନ୍ ଲେକାଗି ରିକା କେଦାକୋ।
ଏନ୍ତେ ସାତ୍ଵା ହୁଲାଙ୍ଗ୍ ରେ, ଇସ୍ରାଏଲୀ କୋ ଏନ୍ ସାହାର୍ ରାଃ ସୋବେନ୍ ପାଡ଼୍ ସାତ୍ ବେର୍ ହୋନୋର୍ କେଦାକୋ। ଇନ୍କୁୱାଃ ସାହାର୍ କେ ସୋବେନ୍ ପାଡ଼୍ ସାତ୍ଵା ବେର୍ ବିୟୁର୍ ହିଜୁଃ ରାଃ ତାୟୋମ୍ତେ, ୟାଜାକ୍ କୋ ଆକୋୱାଃ ତୁର୍ହି କୋକେ ଅଙ୍ଗ୍ କେଦାକୋ ହାର୍ ସିପାହୀ କୋ ଜୋର୍ତେ କାଉରି କେଦାକୋ।
ଇମ୍ତା ୟାରିହୋ ସାହାର୍ ରାଃ ସୋବେନ୍ ପାଡ଼୍ ରାଃ ଘେରା ଭୀତ୍ ଉୟୁଃ ଜାନା! ଜେଲେକା ପାର୍ମେଶ୍ଵାର୍ ଆଚୁ ଲେଃକୋତାଇନାଏ ଏନ୍ ଲେକାଗୀ ଇସ୍ରାଏଲୀ କୋ ସାହାର୍ ରାଃ ସୋବେନ୍ ଜିନିଷ୍ କୋକେ ନାଷ୍ଟ ତାଦାକୋ। ଇନ୍କୁ ଖାଲି ରାହାବ୍ ହାର୍ ଆଜାଃ ପାରିବାର୍ କେ ବାଗେ ତାଦାକୋ, ଇନ୍କୁ ଇସ୍ରାଏଲୀ କୋୱାଃ ମିୟାଃ ହାନାଟିଙ୍ଗ୍ ବାଇଲେନାକୋ। ଚିମ୍ତାଙ୍ଗ୍ କାନାନ୍ ରେ ତାଇନ୍ ଏଟାଃ ହୋଡ଼ୋକୋ ଆୟୁମ୍ କେଦାକୋ ଚି ଇସ୍ରାଏଲୀ କୋ ୟାରିହୋ କେ ନାଷ୍ଟ ତାଦାକୋ, ଦୋ ଇନ୍କୁ ବୋରୋ ଜାନାକୋ ଚି ଇସ୍ରାଏଲୀ କୋ ଇନ୍କୁ ଲୋଃ ହଗି ଲାଡ଼ାଇ ୟାକୋ।
ପାର୍ମେଶ୍ଵାର୍ ଇସ୍ରାଏଲୀ କୋକେ ଆନାଚୁ ଏମ୍ ଲେଃକୋତାଇନାଏ ଚି କାନାନ୍ ରେ ତାଇତାନ୍ ଯାହାନ୍ ଜାତି କୋଲୋଃ ଶାନ୍ତିକିରିୟା ଆଲୋପେ ରିକାୟା। ମେନ୍ଦୋ ଗିବୋନିୟୋ ନୁତୁମ୍ ମିୟାଃ କାନାନି ଜାତିରେନ୍ କୋ ୟାହୋଶୁ କେ ଲୋଗୋ କିଜାଏ ଚି ଇନ୍କୁ କାନାନ୍ ଦିଶୁମ୍ ତେ ସାଙ୍ଗିନ୍ ମିୟାଃ ଜାଗାରେନ୍ ତାନ୍ କୋ। ଇନ୍କୁ ୟାହୋଶୁ ଲୋଃ ଶାନ୍ତିକିରିୟା ଜୋମ୍ କେତେ ବାପାଇୟୋଗାବୁ ମେନ୍ତେ ଆର୍ଜି କେଦାକୋ। ୟାହୋଶୁ ହାର୍ ଏଟାଃ ଇସାଏଲୀ ଆଗୁୱାକୋ ପାର୍ମେଶ୍ଵାର୍ କେ କାକୋ କୁଲିକିଜା ଚି ଇନ୍କୁକେ ଚିନାଃ ରିକା ରାଃ ମେନାଃ। ଏନାକେ ବାଗି କେତେ ଇନ୍କୁ ଗିବୋନିୟୋ କୋଲୋଃ ଶାନ୍ତିକିରିୟା ଜୋମ୍ କେଦାକୋ।
ଆପି ହୁଲାଙ୍ଗ୍ ରାଃ ତାୟୋମ୍ତେ, ଇସ୍ରାଏଲୀ କୋ ସାରିକେଦାକୋ ଚି ଗିବୋନୀ ହୋଡ଼ୋକୋ କାନାନ୍ ରେଗି ତାଇନ୍ ତିନାକୋ। ଇନ୍କୁ ଖିସ୍ ଜାନାକୋ ଚିୟାଃଚି ଗିବୋନୀ କୋ ଇନ୍କୁକେ ଧୋକା ଏମ୍ ଲେଦାକୋ। ମେନ୍ଦୋ ଇନ୍କୁ ଆକୋଲୋଃ ରିକାକାନ୍ ଶାନ୍ତିକିରିୟା କେ ବାଇମାଣ୍ଡାଅ କେଦାକୋ ଚିୟାଃଚି ଏନା ପାର୍ମେଶ୍ଵାର୍ ରାଃ ନାଡ଼େଏରେ ହୋବାଲେନା। ଏନ୍ତେ ହୁଡିଙ୍ଗ୍ ସାମାୟ୍ ରାଃ ତାୟୋମ୍ତେ, କାନାନ୍ ରେ ତାଇନ୍ ତାନ୍ ମିୟାଃ ଏଟାଃଜାତି, ଏମୋରିୟୋ ରେନ୍ ରାଜାକୋ ଆୟୁମ୍ କେଦାକୋ ଚି ଗିବୋନୀ କୋ ଇସ୍ରାଏଲୀ କୋଲୋଃ ଶାନ୍ତିକିରିୟା ଯୋମ୍ କାଦାକୋ, ଏନାଲାଗିନ୍ ଇନ୍କୁ ଆକୋୱାଃ-ଆକୋୱାଃ ସିପାହୀ କୋକେ ମିଃତାଃ କେତେ ମିୟାଃ ମାରାଙ୍ଗ୍ ସିପାହୀଦାଲ୍ ବାଇକେଦାକୋ ହାର୍ ଗିବୋନୀ କୋୱାଃ ଚେତାନ୍ ରେ ଲାଡ଼ାଇ କେଦାକୋ। ଗିବୋନୀ କୋ ଆକୋୱାଃ ସାହେତା ଲାଗିନ୍ ୟାହୋଶୁ ରାଃ ନାଡ଼େଏ ରେ ମିୟାଃ ସାନ୍ଦେସ୍ କୁଲ୍ କେଦାକୋ।
ଏନ୍ତେ: ୟାହୋଶୁ ଇସ୍ରାଏଲୀ କୋୱାଃ ସିପାହୀ କୋକେ ମିଃତାଃ ହୁଣ୍ଡି କେଦାଏ ହାର୍ ଗିବୋନୀ ହୋଡ଼ୋ କୋତାଃ ନାଡ଼େଏ ସେଟେର୍ ଲାଗିନ୍ ଇନ୍କୁ ଗୋଟା ନିଦା ସେନ୍ କେଦାକୋ। ସେତାଃ ଇଦାନ୍ ଇମ୍ତାରେ ଇନ୍କୁ ଏମୋରିୟୋ କୋୱାଃ ସିପାହୀ କୋକେ ଆକ୍ଦାନ୍ଦା ଛାବା ତାଦାକୋ ହାର୍ ଇନ୍କୁ ଲୋଃ ଲାଡ଼ାଇ କେଦାକୋ।
ଏନ୍ ହୁଲାଙ୍ଗ୍ ପାର୍ମେଶ୍ଵାର୍ ଇସ୍ରାଏଲୀ କୋ ଲାଗିନ୍ ଲାଡ଼ାଇ ଜାନାଏ। ଇନିଃ ଏମୋରିୟୋ କୋକେ ବୋରୋତାଃ କୋୱାଏ ହାର୍ ଇନିଃ ମାପ୍ରାଙ୍ଗ୍ ଆରିଲ୍ ଦିରି ଉୟୁକେତେ ଥିମ୍ବାଗି ଏମୋରିୟୋ କୋକେ ଗୋଏଃ ତାଃକୋୱାଏ।
ପାର୍ମେଶ୍ଵାର୍ ଶିଙ୍ଗୀ କେ ହଁ ରିମିଲ୍ଦିଶୁମ୍ ରେ ମିୟାଃ ଜାଗାରେ ହୋକା ତାଜାଏ ଏନାତେ ଇସ୍ରାଏଲୀ କୋକେ ଥିମ୍ବା ସାମାୟ୍ ନାମୋଃକା ଚି ଏମୋରିୟୋ କୋକେ ପୁରା ହାରୁୱାଅ ତାକାକୋ। ଏନ୍ ହୁଲାଙ୍ଗ୍, ପାର୍ମେଶ୍ଵାର୍ ଇସ୍ରାଏଲୀ କୋ ଲାଗିନ୍ ମିୟାଃ ମାରାଙ୍ଗ୍ ଜିତାଅ ନାମ୍ କେଦାଏ।
ଚିମ୍ତାଙ୍ଗ୍ ପାର୍ମେଶ୍ଵାର୍ ଏନ୍ ସିପାହୀ କୋକେ ହାରାଅ ରାଃ ତାୟୋମ୍ତେ, ଥିମ୍ବାଗି କାନାନୀ ଜାତି ରେନ୍ ହୋଡ଼ୋକୋ ଇସ୍ରାଏଲୀ କୋୱାଃ ଚେତାନ୍ ରେ ଲାଡ଼ାଇ ଲାଗିନ୍ ହୁଣ୍ଡି ଜାନାକୋ। ୟାହୋଶୁ ହାର୍ ଇସ୍ରାଏଲୀ କୋ ଇନ୍କୁଲୋଃ ଲାଡ଼ାଇ ଜାନାକୋ ହାର୍ ଇନ୍କୁକେ ଗୋଏଃ ତାଃକୋୱାକୋ।
ନେ ଲାପାଡ଼ାଇ ରାଃ ତାୟୋମ୍ତେ, ପାର୍ମେଶ୍ଵାର୍ ଇସ୍ରାଏଲୀ କୋୱାଃ ସୋବେନ୍ କିଲିରେନ୍ କୋକେ ଏନ୍ ଦିଶୁମ୍ ରେ ଆକୋୱାଃ ହାନାଟିଙ୍ଗ୍ ଏମାଃକୋୱାଏ। ଏନ୍ତେ ପାର୍ମେଶ୍ଵାର୍ ଇସ୍ରାଏଲୀ କୋକେ ଆକୋୱାଃ ସୋବେନ୍ ଶିମାନ୍ ରେ ଶାନ୍ତି ଏମ୍ କେଦାଏ।
ଚିମ୍ତାଙ୍ଗ୍ ୟାହୋଶୁ ହାଡ଼ାମ୍ ଜାନାଏ ଦ ଇନିଃ ସୋବେନ୍ ଇସ୍ରାଏଲୀ ହୋଡ଼ୋକୋକେ ମିଃତାଃ କେଡ଼ା କେଃକୋୱାଏ। ଏନ୍ତେ ୟାହୋଶୁ ଏନ୍ ହୋଡ଼ୋକୋକେ ମୋନେ ରିକାକେଃକୋୱାଏ ଚି ଇନ୍କୁ ଏନ୍ ନିୟାମ୍ ଥୋଲ୍ କେ ମାନାତିଙ୍ଗ୍ ଲାଗିନ୍ କିରିୟା ଜୋମ୍ ଲେଦାକୋ, ଅକନାଃ ପାର୍ମେଶ୍ଵାର୍ ଇନ୍କୁ ଲୋଃ ସିନାଇ ବୁରୁରେ ଥୋଲ୍ ଲେଦାଏ। ଏନ୍ ହୋଡ଼ୋକୋ ପାର୍ମେଶ୍ଵାର୍ ରେ ବିଶ୍ଵାସ୍ ରେ ତାଇନ୍ ହାର୍ ଇନିଜାଃ ଆଇନ୍ ନିୟାମ୍ କେ ମାନାତିଙ୍ଗ୍ ୟାକୋ ମେନ୍ତେ କିରିୟା ଜୋମ୍ କେଦାକୋ।
ବାଇବାଲ୍ ମିୟାଃ କାହାନୀ: ୟାହୋଶୁ ଆଧ୍ୟାୟ ୧-୨୪
Free to use, adapt, and share under an open license (CC BY-SA 4.0).