16. ୧୬. ବାଞ୍ଚାଅନିଃ

ୟାହୋଶୁ ରାଃ ଗୋନୋଏଃ ତାୟୋମ୍ତେ, ଇସ୍ରାଏଲୀ ହୋଡ଼ୋକୋ ପାର୍ମେଶ୍ୱାର୍ ରାଃ ଆନାଚୁ କୋକେ କାକୋ ମାନାତିଙ୍ଗ୍ କେଦା। ଇନ୍‍କୁ ପାର୍ମେଶ୍ୱାର୍ ରାଃ ଆଇନ୍ କୋକେ କାକୋ ମାନାତିଙ୍ଗ୍ କେଦା, ହାର୍ ସାରେଜାକାନ୍ କାନାନୀ କୋକେ କିରିୟା ଏମାକାନ୍ ଦିଶୁମ୍ ଏତେ କାକୋ ଅଡୋଙ୍ଗ୍ କେଃକୋୱା। ଇସ୍ରାଏଲୀ ହୋଡ଼ୋକୋ ସାର୍ତି ପାର୍ମେଶ୍ୱାର୍ କେ ସେୱା ରାଃ ଜାଗା ରେ କାନାନୀ ଦେଓତା କୋକେ ସେୱା ଏଟେଃ କେଦାକୋ। ଇସ୍ରାଏଲୀ କୋତାଃ ଜେତାଏ ରାଜା କାକୋ ତାଇକେନା, ଏନାମେନ୍ତେ ସୋବେନ୍ କୋ ଏନାଗି ରିକା କେଦାକୋ ଅକନାଃ ଆକୋକେ ଠାଉକା ଆଦାକେଃ କୋୱା।

ପାର୍ମେଶ୍ୱାର୍ କେ କାକୋ ମାନାତିଙ୍ଗ୍ ରାଃ ହୋରାତେ, ଇସ୍ରାଏଲୀ ହୋଡ଼ୋକୋ ମିୟାଃ ନେକା ନାମୁନା ଏଟେଃ କେଦାକୋ ଅକନାଃ କେ ଘାରି-ଘାରି ଇନ୍‍କୁ ରିକା କେଦାକୋ। ଏନ୍ ନାମୁନା ନେଲେକା ତାଇକେନା: ଇସ୍ରାଏଲୀ ହୋଡ଼ୋକୋ ଚିମିନ୍ ଶିର୍ମା ସାନ୍ତେ କାକୋ ମାନାତିଙ୍ଗ୍ ଇୟା, ଏନ୍ତେ ଇନିଃ ଇନ୍‍କୁ ୱାଃ ବାଇରୀକୋକେ ଇନ୍‍କୁ କେ ହାରୁୱାଅ ଲାଗିନ୍ ଇନ୍‍କୁ କେ ଆଚୁ କେତେ ଇନ୍‍କୁ କେ ଦାଣ୍ଡ ଏମାକୋୱାଏ। ନେ ବାଇରୀ କୋ ଇସ୍ରାଏଲୀ କୋୱାଃ ଜିନିଷ୍ କୋକେ କୁମ୍ଡ଼ୁ କେ ତାଇକେନାକୋ, ଇନ୍‍କୁ ୱାଃ ସାମ୍ପାତି କୋକେ ନାଶ ତାଇକେନାକୋ, ହାର୍ ଇନ୍‍କୁ ଏତେ ଚିମିନାଙ୍ଗ୍ କୋକେ ଗୋଏଃକୋ ତାଇକେନାକୋ। ଏନ୍ତେ ଇସ୍ରାଏଲ୍ କୋୱାଃ ବାଇରୀ କୋୱାଃ ହୋରାତେ ଇନ୍‍କୁ ୱାଃ ଚେତାନ୍ ରେ ଚିମିନ୍ ଶିର୍ମା ସାନ୍ତେ ସାତାଅ ରିକା ରାଃ ତାୟୋମ୍ତେ, ଇସ୍ରାଏଲୀ ଆକୋ ଆକୋୱାଃ ପାପ୍ କୋକେ ପାସ୍ତାଅ ୟାକୋ ହାର୍ ପାର୍ମେଶ୍ୱାର୍ ଏତେ ଆକୋକେ ବାଞ୍ଚାଅ କୋକାଏ ମେନ୍ତେ ବିନ୍ତି ୟାକୋ।

ସୋବେନ୍ ସାମାୟ୍ ଇସ୍ରାଏଲୀ କୋ ପାସ୍ତାଅ କେଦାକୋ, ପାର୍ମେଶ୍ୱାର୍ ଇନ୍‍କୁ କେ ଛୋଡ଼ାଅ କୋୱାଏ। ଇନିଃ ନେଲେକା ମିୟାଃ ବାଞ୍ଚାଅନିଃ ଏମ୍ ରାଃ ହୋରାତେ ରିକା କେଦାଏ। ମିହୋଡ଼ ନେଲେକାନ୍ ହୋଡ଼ ଅକନିଃ ଇନ୍‍କୁ ୱାଃ ବାଇରୀ କୋଲୋଃ ଲାଡ଼ାଇୟାଏ ହାର୍ ଇନ୍‍କୁ କେ ହାରୁୱାଅ କୋୱାଏ। ଏନ୍ତେ ଦିଶୁମ୍ ରେ ଶାନ୍ତି ହୋବାଅଃୱା, ହାର୍ ଛୋଡ଼ାଅନିଃ ଇନ୍‍କୁ ୱାଃ ରେ ବୁଗିନ୍ ଲେକାତେ ରାଇଜ୍ ୟାଏ। ପାର୍ମେଶ୍ୱାର୍ ହୋଡ଼ୋକୋକେ ବାଚାଅ ଲାଗିନ୍ତେ ବାଞ୍ଚାଅ ହୋଡ଼ ଥିମ୍ବାଗି କୁଲ୍ କେଃକୋୱାଏ। ପାର୍ମେଶ୍ୱାର୍ ନେଲେକା ଆଡୋଃଗି ଇମ୍ତା ରିକାକେଦାଏ ଚିମ୍ତାଙ୍ଗ୍ ଇନିଃ ମିଦ୍ୟାନୀ କୋକେ, ଅକନ୍ କୋ ନାଡ଼େଏ ରେନ୍ ବାଇରୀ ଝୁଣ୍ଡ୍ କୋ ତାଇକେନାକୋ, ଇସ୍ରାଏଲୀ କୋକେ ହୁରୁୱାଅ ଲାଗିନ୍ତେ ଆଚୁ କେଃକୋୱାଏ।

ମିଦ୍ୟାନୀ କୋ ଇସ୍ରାଏଲୀ କୋୱାଃ ସୋବେନ୍ ଚାଶ୍ କାନ୍ ତେୟାଃ କୋକେ ସାତ୍ ଶିର୍ମା ସାନ୍ତେ ଇଦିକେଦାକୋ। ଇସ୍ରାଏଲୀ ହୋଡ଼ୋକୋ ନିମିନ୍ ବୋରୋ ଲେନ୍ ତାଇକେନାକୋ, ଚି ଇନ୍‍କୁ ଗୁଫା କୋରେ ଉକୁ ଜାନାକୋ, ଏନାତେ ମିଦ୍ୟାନୀ କୋକେ କାକୋ ନାମୋଗା। ଆଖିର୍ ରେ, ଇନ୍‍କୁ ଆକୋକେ ବାଞ୍ଚାଅ କାଏ ମେନ୍ତେ ପାର୍ମେଶ୍ୱାର୍ କେ କେଡ଼ା କିଜାକୋ।

ଗିଦୋନ୍ ନୁତୁମ୍ ମିହୋଡ଼ ଇସ୍ରାଏଲୀ ହୋଡ଼ ତାଇକେନାଏ। ମୂଷିଙ୍ଗ୍, ଇନିଃ ଉକୁକାନ୍ ଜାଗା ରେ ଯାଙ୍ଗ୍ କୋଟା ତାଇନାଏ ଏନାମେନ୍ତେ ଚି ମିଦ୍ୟାନୀକୋ ଏନାକେ କାକୋ କୁମ୍ଡ଼ୁ ଧାଡ଼ିକା। ୟାହୋୱା ପାର୍ମେଶ୍ୱାର୍ ରାଃ ସିର୍ମାଦାସୀ ଗିଦୋନ୍ ନାଡ଼େଏ ରେ ହିଜୁଃନାଏ ହାର୍ କାଜିକିଜାଏ, “ହେ ସୁରବୀର୍ ପାର୍ମେଶ୍ୱାର୍ ଆମ୍ ଲୋଃ ମେନିଜା। ଜୁ ହାର୍ ଇସ୍ରାଏଲୀ ହୋଡ଼ୋକୋ କୋକେ ବାଞ୍ଚାଅକୋମ୍।”

ଗିଦୋନ୍ ଆଃ ଆପୁ ତାଃ ମିୟାଃ ବେଦୀ ତାଇଲେନା ଅକନାଃ ଚି ମୂର୍ତି ଲାଗିନ୍ ଜିମାଲେନ୍ ତାଇକେନା। ପାର୍ମେଶ୍ୱାର୍ ଗିଦୋନ୍ କେ ସୋବେନ୍ ଏତେ ସୀଦା କାମି ନାଙ୍ଗ୍ କାଜିକିଜାଏ, ଏନା ଏନ୍ ବେଦୀ କେ ଧାଶୁଡ଼ ରାଃ ତାଇକେନା। ମେନ୍ଦୋ ଗିଦୋନ୍ ହୋଡ଼ୋକୋକେ ବୋରୋ କୋତାଇନାଏ, ଏନାମେନ୍ତେ ଇନିଃ ନିଦା ସାନ୍ତେ ହୋରୋ କେଦାଏ। ଏନ୍ତେ ଇନିଃ ବେଦୀ କେ ଧାଶୁଡ଼ ତାଦାଏ ହାର୍ ଏନାକେ ରାପୁଃ ଗୁଣ୍ଡା ତାଦାଏ। ଇନିଃ ନାଡ଼େଏ ରେଗି ପାର୍ମେଶ୍ୱାର୍ ନାଙ୍ଗ୍ ମିୟାଃ ବେଦୀ ବାଇକେଦାଏ ହାର୍ ଏନାରେ ପାର୍ମେଶ୍ୱାର୍ ନାଙ୍ଗ୍ ଦାଣେ ରାକାବ୍ କେଦାଏ।

ଏଟାଃ ହୁଲାଙ୍ଗ୍ ସେତାଃ ପାଡ଼ ହୋଡ଼ୋକୋ ନେଲ୍ କେଦାକୋ ଚି ଜେତାଏ ମିହୋଡ଼ ବେଦୀ କେ ଧାଶୁଡ଼ ତାଦାଏ ହାର୍ ନାଶ୍ ତାଦାଏ, ହାର୍ ଇନ୍‍କୁ ଥିମ୍ବାଗି ଖିସ୍ ଜାନାକୋ। ଇନ୍‍କୁ ଗିଦୋନ୍ କେ ଗୋଏଃ ଲାଗିନ୍ତେ ଇନିଜାଃ ଅଡ଼୍ଆଃ ସେନ୍ ଜାନାକୋ, ମେନ୍ଦୋ ଗିଦୋନ୍ ରାଃ ଆପୁ ତେ କାଜି କେଃକୋୱାଏ, “ଆପେ ଆପେୟାଃ ପାର୍ମେଶ୍ୱାର୍ କେ ଚିନାଃ ମେନେଃ ଦେଙ୍ଗାଇ ତାନାପେ? ଆଗାର୍ ଇନିଃ ଦେଓତା ତାନିଃ, ଏଣ୍ଡେ ଇନିଃ ଆପାନ୍ କେ ବାଞ୍ଚାଅନ୍ କାଏ!” ଚିୟାଃଚି ଇନିଃ ନେୟା କାଜିକେଦାଏ, ହୋଡ଼ୋକୋ ଗିଦୋନ୍ କେ କାକୋ ଗୋଏଃ କିଜା।

ଏନ୍ତେ ମିଦ୍ୟାନୀ କୋ ଇସ୍ରାଏଲୀ କୋୱାଃ ଏତେ ଆଡୋଃଗି କୁମ୍ଡ଼ୁ ଲାଗିନ୍ ହିଜୁଃ ନାକୋ। ଇନ୍‍କୁ ନିମିନ୍ ଥିମ୍ବା ହୋଡ଼ୋକୋ ତାଇଲେନାକୋ ଚି ଇନ୍‍କୁ କେ କାଗିନ୍ତିଅଃ ଧାଡ଼ିୟୋଃ ତାଇନା। ଗିଦୋନ୍ ଇସ୍ରାଏଲୀ ହୋଡ଼ୋକୋକେ ଇନ୍‍କୁ ଲୋଃ ଦୋଲା ଲାଡ଼ାଇୟାବୁ ମେନ୍ତେ କେଡ଼ା କେଃକୋୱାଏ। ଗିଦୋନ୍ ପାର୍ମେଶ୍ୱାର୍ ଏତେ ବାରିୟା ଚିହ୍ନା ଆସିକେଦାଏ ଏନାତେ ଇନିଃ ସାରିଧାଡ଼ିୟାଏ ଚି ପାର୍ମେଶ୍ୱାର୍ ସାର୍ତିଗି ଇସ୍ରାଏଲ୍ ହୋଡ଼ୋକୋକେ ବାଞ୍ଚାଅ ନାଙ୍ଗ୍ ଆଏଃକେ କାଜିତାନାଏ।

ସୀଦା ଚିହ୍ନା ଲାଗିନ୍, ଗିଦୋନ୍ ମିଣ୍ଡୀ ରାଃ ଉହୁର କେ ଅତେ ରେ ମାଣ୍ଡାଅ କେଦାଏ ହାର୍ ପାର୍ମେଶ୍ୱାର୍ କେ ବିନ୍ତି କେଦାଏ ଚି ସେତାଃ ରାଃ ଶିଶିର୍ ଦାଆ ମିଣ୍ଡୀ ରାଃ ଉହୁର୍ ରେ ଭାଇର୍ ଉୟୁଗୋଃକା, ଅତେ ରେ କାହା। ପାର୍ମେଶ୍ୱାର୍ ଏନ୍ ଲେକାଗି ରିକା କେଦାଏ। ଏଟାଃ ନିଦା, ଇନିଃ କାଜିକେଦାଏ ଚି ଅତେ ଲୁମୋଃକା ମେନ୍ଦୋ ମିଣ୍ଡୀ ଉହୁର୍ କାଲୁମୋଃକା। ପାର୍ମେଶ୍ୱାର୍ ଏନାକେହ ଗି ରିକା କେଦାଏ। ନେ ବାରିୟା ଚିହ୍ନା ନାମେ ରାଃ ହୋରାତେ, ଗିଦୋନ୍ ବିଶ୍ଵାସ୍ କେଦାଏ ଚି ପାର୍ମେଶ୍ୱାର୍ ସାର୍ତିଗି ସାନାଙ୍ଗ୍ ତାଇକେନାଏ ଚି ଇସ୍ରାଏଲୀ କୋକେ ମିଦ୍ୟାନୀ କୋଏତେ ବାଚାଅ କୋୱାଏ।

ଏନ୍ତେ ଗିଦୋନ୍ ସିପାହୀ କୋକେ ଆୟାଃ ନାଡ଼େଏ କେଡ଼ାକେଃ କୋୱାଏ, ହାର୍ ୩୨,୦୦୦ କୋଡ଼ାକୋ ହିଜୁଃ ଲେନାକୋ। ମେନ୍ଦୋ ପାର୍ମେଶ୍ୱାର୍ କାଜିକେଦାଏ ଚି ନିକୁ ମିଃଥିମ୍ବା ମେନାକୋୱା। ଏନ୍ତେ ଗିଦୋନ୍ ୨୨,୦୦୦ କୋଡ଼ାକୋକେ ଅଡ଼୍ଆଃ କୁଲ୍ ତାଃକୋୱାଏ, ଅକନ୍ କୋ ଲାପାଡ଼ାଇ ତେ ବୋରୋ ତାଇକେନାକୋ। ପାର୍ମେଶ୍ୱାର୍ ଗିଦୋନ୍ କେ କାଜିକିଜାଏ ଇନିଜାଃତାଃ ନାଆ ଅଗି ଥିମ୍ବା କୋଡ଼ାକୋ ମେନାକୋୱା। ଏନାମେନ୍ତେ ଗିଦୋନ୍ ୩୦୦ ସିପାହୀ କୋକେ ସାଲାକେତେ ବାକି ସୋବେନ୍ କୋକେ ଅଡ଼୍ଆଃ କୁଲ୍ ତାଃକୋୱାଏ।

ଏନ୍ ନିଦା ପାର୍ମେଶ୍ୱାର୍ ଗିଦୋନ୍ କେ କାଜିକିଜାଏ, “ମିଦ୍ୟାନୀ କୋୱାଃ ଡେରା ତାଃ ସେନ୍ ପେ ହାର୍ ଇନ୍‍କୁ ୱାଃ ବାଖାଣ ଆୟୁମେପେ। ଚିମ୍ତାଙ୍ଗ୍ ଆପେ ଆୟୁମେୟାପେ ଚି ଇନ୍‍କୁ ଚିନାଃ କାଜି ତାନାକୋ, ଦୋ ଆପେ ଇନ୍‍କୁ ଲୋଃ ଲାଡ଼ାଇ ଲାଗିନ୍ତେ କାପେ ବୋରୋୟା।” ଏନାମେନ୍ତେ ଏନ୍ ନିଦା, ଗିଦୋନ୍ ଇନ୍‍କୁ ୱାଃ ଡେରା ତାଃ ସେନ୍ ଜାନାଏ ହାର୍ ଇନିଃ ମିୟାଃ ମିଦ୍ୟାନୀ ସିପାହୀ କେ ଆଜାଃ ଗାତି କେ ଆୟାଃ କୁମୁ ବାରେ ଉଦୁବ୍ ତାନ୍ ଆୟୁମ୍ କିଜାଏ। ଏନ୍ ହୋଡ଼ ରାଃ ଗାତି ତେ କାଇକିଜାଏ, ନେ କୁମୁ ରାଃ ମାନେ ନେୟା ତାନାଃ ଚି ଗିଦୋନ୍ ରାଃ ସିପାହୀ କୋ, ଆବୁ ମିଦ୍ୟାନୀ ସିପାହୀ କୋକେ ହାରାଅ ବୁୱାକୋ!” ନେୟା ଆୟୁମ୍ କେତେ ଗିଦୋନ୍ ପାର୍ମେଶ୍ୱାର୍ ରାଃ ଆରାଧାନା କେଦାଏ।

ଏନ୍ତେ ଗିଦୋନ୍ ଆଜାଃ ସିପାହୀ କୋତାଃ ରୁଆଡ଼ ଜାନାଏ, ହାର୍ ଇନ୍‍କୁ ଏତେ ସୋବେନ୍ ମୀପିହୋଡ଼ କେ ମିୟାଃ ଦିରିଙ୍ଗ୍, ମିୟାଃ ହାସା ଚାଟୁ, ହାର୍ ମିୟାଃ ଜୁଲୋଃ ତାନ୍ ମାଶାଲ୍ ଏମ୍ କେଃକୋୱାଏ। ଇନ୍‍କୁ ଏନ୍ ଡେରା କୋଏ କେସେଃ କେଦାକୋ ଅକତାଃ ମିଦ୍ୟାନୀ ସିପାହୀ କୋ ଦୁଣୁମ୍ ଲେନାକୋ। ଗିଦୋନ୍ ରାଃ ୩୦୦ ସିପାହୀ କୋତାଃ ଚାଟୁ କୋରେ ମାଶାଲ୍ କୋ ତାଇକେନା, ଏନାମେନ୍ତେ ମିଦ୍ୟାନୀ କୋ ମାଶାଲ୍ କୋରାଃ ଜୁନୁଲ୍ ତେୟାଃ କେ କାକୋ ନେଲ୍ ଧାଡ଼ିତାଇନା।

ଏନ୍ତେ ଗିଦୋନ୍ ଆଃ ସୋବେନ୍ ସିପାହୀକୋ ମିଶାତେ ଆକୋୱାଃ ଚାଟୁ କୋକେ ରାପୁଃ ତାଦାକୋ, ହାର୍ ଇମ୍ତାଗି ମାଶାଲ୍ କୋରାଃ ଯୁନୁଲ୍ କେ ଦେଖାଅ କେଦାକୋ। ଇନ୍‍କୁ ଆକୋୱାଃ ଦିରିଙ୍ଗ୍ କୋକେ ଅଙ୍ଗ୍ କେଦାକୋ ଆଡୋଃ କାଉରି ଏଟେଃ କେଦାକୋ, “ୟାହୋୱା ହାର୍ ଗିଦୋନ୍ ନାଗିନ୍ତେ ତାଲ୍‍ୱାର୍!”

ପାର୍ମେଶ୍ୱାର୍ ମିଦ୍ୟାନୀ କୋୱାଃ ହୋଶ୍ କେ ଆଃ ତାଦାଏ ଏନାତେ ଇନ୍‍କୁ ଆକୋ-ଆକୋ ରେଗି ବିପିଡ଼ା ହାର୍ ଗୋଗୋଏଃ ଏଟେଃ କେଦାକୋ। ଗିଦୋନ୍ ସେକାଡ଼ ଗି ସାନ୍ଦେସ୍ ଏହେମ୍ କୋକେ କୁଲ୍ କେଃକୋୱାଏ ଚି ଇନ୍‍କୁ ଥିମ୍ବାଗି ଆଡୋଃ ଏଟାଃ ଇସ୍ରାଏଲୀ କୋକେ ଅଡ଼୍ଆଃ ଏତେ କେଡ଼ା ଆଉକୋୱାକୋ ହାର୍ ମିଦ୍ୟାନୀ କୋକେ ଦୋୟା ଦୋୟା ଅତୋଙ୍ଗ୍ ହାର୍-ଲାଗିନ୍ତେ ଦେଙ୍ଗା ଚାକୋ। ଇନ୍‍କୁ ହିନକୁଏତେ ଥିମ୍ବାଗି ହୋଡ଼ୋକୋକେ ଗୋଏଃ ତାଃକୋୱାକୋ, ହାର୍ ସାରେଜାକାନ୍ କୋକେ ଇସ୍ରାଏଲ୍ କୋୱାଃ ଦିଶୁମ୍ ଏତେ ହାର୍ ଅଡୋଙ୍ଗ୍ କେଃକୋୱାକୋ। ପାର୍ମେଶ୍ୱାର୍ ଇନ୍‍କୁ କେ ଏନ୍ ହୁଲାଙ୍ଗ୍ ୧,୨୦,୦୦୦ ମିଦ୍ୟାନୀ ହୋଡ଼ୋକୋକେ ଗୋଏଃ ଏମ୍ କୋୱାଏ। ନେଲେକାତେ ପାର୍ମେଶ୍ୱାର୍ ଇସ୍ରାଏଲୀ କୋକେ ବାଞ୍ଚାଅ କେଃକୋୱାଏ।

ଏନ୍ତେ ହୋଡ଼ୋକୋ ଗିଦୋନ୍ କେ ଆକୋୱାଃ ରାଜା ବାଇନାଙ୍ଗ୍ ସାନାଙ୍ଗ କେଦାକୋ। ଗିଦୋନ୍ ଇନ୍‍କୁ କେ ନେଲେକା ରିକାକାକୋ ମେନ୍ତେ କାଏ ଆଚୁ କେଃକୋୱାଏ, ମେନ୍ଦୋ ଇନିଃ ଇନ୍‍କୁ ଏତେ ଚିମିନାଙ୍ଗ୍ ସୋନା ରାଃ ଚୂଡ଼ି କୋକେ ଆସିକେଃ କୋୱାଏ ଅକନାଃ ଇନ୍‍କୁ ସୋବେନ୍ କୋ ମିଦ୍ୟାନୀ କୋଏତେ ଇଦିଲେଃ ତାଇକେନାକୋ। ହୋଡ଼ୋକୋ ଗିଦୋନ୍ କେ ମିଃଥିମ୍ବା ସୋନା ଏମ୍ କିଜାକୋ।

ଏନ୍ତେ ଗିଦୋନ୍ ସୋନା କେ ଇଦିକେତେ ମିୟାଃ ଖାସ୍ ଲିଜାଃ ବାଇକେଦାଏ, ଜେଲେକା ଚି ମାରାଙ୍ଗ୍ ୟାଜାକ୍ ତୂସୀଙ୍ଗେନ୍ ତାଇକେନାଏ। ମେନ୍ଦୋ ହୋଡ଼ୋକୋ ନେୟାକେ ମୂର୍ତି ଲେକା ପୂଜା ରିକା ଏଟେଃ କେଦାକୋ। ଏନାମେନ୍ତେ ପାର୍ମେଶ୍ୱାର୍ ଇସ୍ରାଏଲୀ ହୋଡ଼ୋକୋକେ ଆଡୋଃଗି ଦାଣ୍ଡ୍ ଏମାଃକୋୱାଏ, ଚିୟାଃଚି ଇନ୍‍କୁ ମୂର୍ତି କୋକେ ପୂଜା ତାଇକେନାକୋ। ପାର୍ମେଶ୍ୱାର୍ ଇନ୍‍କୁ ୱାଃ ବାଇରୀ କୋକେ ଇନ୍‍କୁ କେ ହାରୁୱାଅ କାକୋ ମେନ୍ତେ ଆଚୁକେଃ କୋୱାଏ। ଇନ୍‍କୁ ଆଖିର୍ ପାର୍ମେଶ୍ୱାର୍ ଏତେ ଆଡୋଃଗି ଦେଙ୍ଗା ଆସିକେଦାକୋ, ହାର୍ ପାର୍ମେଶ୍ୱାର୍ ଇନ୍‍କୁ କେ ଆଡୋଃ ମିହୋଡ଼ ବାଞ୍ଚାଅନିଃ କୁଲ୍ କେଦାଏ।

ନେଲେକା ଚିମିନ୍ ବେର୍ ହୋବାଜାନା: ଇସ୍ରାଏଲ୍ ହୋଡ଼ୋକୋ ପାପ୍ ୟାକୋ, ପାର୍ମେଶ୍ୱାର୍ ଇନ୍‍କୁ କେ ଦାଣ୍ଡ୍ ଏମାକୋୱାଏ, ଇନ୍‍କୁ ପାସ୍ତାଅଗାକୋ, ହାର୍ ପାର୍ମେଶ୍ୱାର୍ ଇନ୍‍କୁ କେ ବାଞ୍ଚାଅ ଲାଗିନ୍ ଜେତାଏ ମିହୋଡ଼ କେ କୁଲିୟାଏ। ଚିମିନ୍ ଶିର୍ମା ସାନ୍ତେ, ପାର୍ମେଶ୍ୱାର୍ ଚିମିନ୍ ଗି ବାଞ୍ଚାଅ ହୋଡ଼ କୋକେ କୁଲ୍ କେଃକୋୱାଏ ଅକନ୍ କୋ ଇସ୍ରାଏଲୀ ହୋଡ଼ୋକୋକେ ଇନ୍‍କୁ ୱାଃ ବାଇରୀ କୋଏତେ ବାଚାଅ କେଃକୋୱାକୋ।

ଆଖିର୍ ରେ, ହୋଡ଼ୋକୋ ପାର୍ମେଶ୍ୱାର୍ ଏତେ ଏଟାଃ ଦିଶୁମ୍ ଲେକା ମିୟାଃ ରାଜା ଆସିକିଜାକୋ। ଇନ୍‍କୁ ମିୟାଃ ନେକାନ୍ ରାଜା ସାନାଙ୍ଗ ତାଇକେନାକୋ ଅକନିଃ ଜିଲିଙ୍ଗ୍ ହାର୍ ପେଡ଼େଜାନ୍ ତାଇନାଏ, ହାର୍ ଅକନିଃ ଇନ୍‍କୁ କେ ଲାପାଡ଼ାଇ ରେ ଇଦି ଧାଡ଼ିକୋୱାଏ। ପାର୍ମେଶ୍ୱାର୍ ନେ ଆର୍ଜି ତେ କାଏ ସୁକୁ ଜାନାଏ, ମେନ୍ଦୋ ଜେଲେକା ଇନ୍‍କୁ ଆସି ଲେଦାକୋ, ଇନିଃ ଇନ୍‍କୁ ମିହୋଡ଼ ରାଜା ଏମାଃକୋୱାଏ।