17. ୧୭. ପାର୍ମେଶ୍ଵାର୍ ରାଃ ନିୟାମ୍ ଥୋଲ୍ ରାଜା ଦାଉଦ୍ ଲୋଃ

ଶାଉଲ୍ ଇସ୍ରାଏଲୀ କୋୱାଃ ପାହିଲା ରାଜା ତାଇକେନାଏ। ଇନିଃ ଶାଲାଙ୍ଗି ହାର୍ ସୁନ୍ଦାର୍ ତାଇକେନାଏ, ଜେଲେକା ଇନ୍‍କୁ ସାନାଙ୍ଗ୍ ତିନାକୋ ଏନ୍ ଲେକାଗୀ। ଇସ୍ରାଏଲୀ ଚେତାନ୍ ରେ ରାଇଜ୍ ରାଃ ସିଦାରେୟାଃ ଚିମିନ୍ ବାରାଶ୍ ରେ ଶାଉଲ୍ ମିୟାଃ ବୁଗିନ୍ ରାଜା ତାଇକେନାଏ। ମେନ୍ଦୋ ତାୟୋମ୍ତେ ଇନିଃ ମିୟାଃ ଦୁଷ୍ଟ ହୋଡ଼୍ ବାଇଜାନାଏ ଅକନିଃ ଚି ପାର୍ମେଶ୍ଵାର୍ ରାଃ କାଜିକେ କାଏ ମାନାତିଙ୍ଗ୍ ଜାନା, ଏନାଲାଗିନ୍ ପାର୍ମେଶ୍ଵାର୍ ଏଟାଃ ମିହୋଡ଼୍ ହୋଡ଼୍ କେ ସାଲାକିଜାଏ ଅକନିଃ ଚି ମୂଷିଙ୍ଗ୍ ହୁଲାଙ୍ଗ୍ ଆଜାଃ ଜାଗାରେ ରାଜା ବାଇୟୋଗାଏ।

ପାର୍ମେଶ୍ଵାର୍ ଦାଉଦ୍ ନୁତୁମ୍ ମିୟାଃ ଜାୱାନ୍ ଇସ୍ରାଏଲୀ ହୋଡ଼ କେ ସାଲାକେତେ ମୂଷିଙ୍ଗ୍ ହୁଲାଙ୍ଗ୍ ଶାଉଲ୍ ରାଜା ରାଃ ଜାଗାରେ ରାଜା ବାଇ ଲାଗିନ୍ ସେକାଡ଼୍ ଏଟେଃ କିଜାଏ। ଦାଉଦ୍ ବାଇତୁଲାମ୍ ସାହାର୍ ରେନ୍ ମିୟାଃ ମିଣ୍ଡି ଗୁପିନିଃ ତାଇକେନାଏ। ଏଟାଃ ଏଟାଃ ସାମାୟ୍ ରେ, ଦାଉଦ୍ କୁଲାଃ ହାର୍ ଭାଲୁ ବାରାନ୍ ଜାନ୍ତୁ କୀନ୍ କେ ଗୋଏଃ ଲେଃ କିନାଏ ଚିୟାଃଚି ଦାଉଦ୍ ମିଣ୍ଡି ଗୁପି ସାମାୟ୍ ରେ ଆଜାଃ ଆପୁଗାଃ ମିଣ୍ଡିକୋକେ ଇନ୍‍କୁ ଗୋଏଃ ସାନାଙ୍ଗ୍ ଲେଦାକୋ। ଦାଉଦ୍ ମିୟାଃ ନାରାମ୍ ହୋଡ଼୍ ହାର୍ ଧାର୍ମି ହୋଡ଼୍ ତାଇକେନାଏ। ଇନିଃ ପାର୍ମେଶ୍ଵାର୍ ରେ ଭାରୋସା ତାଇନାଏ ହାର୍ ଆଜାଃ କାଜିକୋକେ ଆୟୁମ୍ କେଦାଏ।

ଚିମ୍ତାଙ୍ଗ୍ ଦାଉଦ୍ ନାଆ ଜାୱାନ୍ ଗି ତାଇକେନାଏ, ଇନିଃ ଜିଲିଙ୍ଗ୍-ମୋଟା ଗୋଲିଆତ୍ ଲୋଃ ଲାଡ଼ାଇ ଜାନାଏ। ଗୋଲିଆତ୍ ମିୟାଃ ବୁଗିନ୍ ଲାପାଡ଼ାଇ ସାରିକାଃ ମିୟାଃ ସିପାହୀ ତାଇକେନାଏ। ଇନିଃ ଥିମ୍ବାଗି ପେଡ଼େଜାନ୍ ହାର୍ ଲାଗ୍-ଭାଗ୍ ଆପି ମିଟାର୍ ସାଲାଙ୍ଗୀ ତାଇକେନାଏ! ମେନ୍ଦୋ ଏଣ୍ଡେ ଅଗି ପାର୍ମେଶ୍ଵାର୍ ଗୋଲିଆତ୍ କେ ଗୋଏଃ ହାର୍ ଇସ୍ରାଏଲୀ କୋକେ ବାଚାଅ ଲାଗିନ୍ ଦାଉଦ୍ ରାଃ ସାହେତା କିଜାଏ। ଏନାରାଃ ତାୟୋମ୍ତେ, ଦାଉଦ୍ ଇସ୍ରାଏଲୀ କୋୱାଃ ବାଇରୀ କୋକେ ହାରୁୱାଅ କେତେ ଚିମିନ୍-ଚିମିନ୍ ଧର୍ ଜିତାଅ ଜାନାଏ। ଦାଉଦ୍ ମିୟାଃ ମାରାଙ୍ଗ୍ ସିପାହୀ ବାଇଜାନାଏ, ହାର୍ ଇନିଃ ଥିମ୍ବାଗି ଲାଡ଼ାଇ କୋରେ ଇସ୍ରାଏଲୀ ସିପାହୀ କୋକେ ଆୟାର୍ ଇଦି କେଃକୋୱାଏ। ଏନାଲାଗିନ୍ ହୋଡ଼ୋକୋ ଇନିଜାଃ ଥିମ୍ବାଗି ସାହାରାଅ କେଦାକୋ।

ହୋଡ଼ୋକୋ ଦାଉଦ୍ କେ ଇମିନ୍ ଦୁଲାଡ଼୍ ମାଣ୍ଡାଅ କେଦାକୋ ଚି ଶାଉଲ୍ ଇନିଃ କେ ହିଶିଙ୍ଗା କିଜାଏ। ଆଖିର୍ ରେ, ଶାଉଲ୍ ଇନିଃ କେ ଗୋଜି ଲାଗିନ୍ ସାନାଙ୍ଗ୍ ତାଇନାଏ, ଏନାଲାଗିନ୍ ଦାଉଦ୍ ଇନିଃତେ ହାର୍ ଆଜାଃ ଶିପାହୀ କୋଏତେ ଉକୁ ଲାଗିନ୍ ଟୋନାଙ୍ଗ୍ ତେ ସେନୋଃ ଜାନାଏ। ମୁଷିଙ୍ଗ୍ ହୁଲାଙ୍ଗ୍, ଚିମ୍ତାଙ୍ଗ୍ ଶାଉଲ୍ ହାର୍ ଆଜାଃ ଶିପାହୀ କୋ ଦାଉଦ୍ ରାଃ ଦାଣାରେ ତାଇକେନାକୋ ଦ ଶାଉଲ୍ ମିୟାଃ ଗୁଫାରେ ବୋଲୋ ଜାନାଏ। ନେୟା ଏନ୍ ଗୁଫା ତାଇକେନା ଅକନାଃରେ ଦାଉଦ୍ ଉକୁ କାନ୍ ତାଇକେନାଏ, ମେନ୍ଦୋ ଶାଉଲ୍ ଇନିଃ କେ ନେଲ୍ କାଏ ଧାଡ଼ିକିଜାଏ। ଦାଉଦ୍ ଶାଉଲ୍ ରାଃ ତାୟୋମ୍ ପାଡ଼୍ ଏତେ ଆଜାଃ ନାଡ଼େଏ ସେନ୍ ଜାନାଏ ହାର୍ ଆଜାଃ ଲିଜାଃ ରାଃ ମିୟାଃ ଖାଣ୍ଡା ହାଃ କେଦାଏ। ତାୟୋମ୍ତେ, ଚିମ୍ତାଙ୍ଗ୍ ଶାଉଲ୍ ଏନ୍ ଗୁଫାଏତେ ଅଡୋଙ୍ଗ୍ ଜାନାଏ ଦ ଦାଉଦ୍ ଇନିଃକେ ହାକାଅ କେତେ ଏନ୍ ସାବାକାନ୍ ଲିଜାଃ ଖାଣ୍ଡାକେ ଦେଖାଅ କିଜାଏ। ନେଲେକାତେ, ଶାଉଲ୍ ସାରିକେଦାଏ ଚି ଦାଉଦ୍ ରାଜା ବାୟେନ୍ ଲାଗିନ୍ ଇନିଃକେ ଗୋଏଃ ଲାଗିନ୍ ମାନା କେଦାଏ।

ଚିମିନ୍ ସାମାୟ୍ ରାଃ ତାୟୋମ୍ତେ, ଶାଉଲ୍ ଲାଡ଼ାଇ ରେ ଗୋଏଃ ଜାନାଏ, ହାର୍ ଦାଉଦ୍ ଇସ୍ରାଏଲ୍ ରାଃ ରାଜା ବାଇଜାନାଏ। ଇନିଃ ମିୟାଃ ବୁଗିନ୍ ରାଜା ତାଇକେନାଏ, ହାର୍ ହୋଡ଼ୋକୋ ଇନିଃକେ ଦୁଲାଡ଼୍ଇ ତାଇକେନାକୋ।ପାର୍ମେଶ୍ଵାର୍ ଦାଉଦ୍ କେ ଆଶିଷ୍ କିଜାଏ ହାର୍ ଇନିଃକେ ସୋବେନାଃତେ ଫେରେଃ ବାଇକିଜାଏ। ଦାଉଦ୍ ଥିମ୍ବାଗି ଲାପ୍‍ଡ଼ାଇ କୋ ଲାଡ଼ାଇନାଏ, ହାର୍ ପାର୍ମେଶ୍ଵାର୍ ଇସ୍ରାଏଲୀ କୋୱାଃ ବାଇରୀ କୋକେ ହାରୁୱାଅ ରେ ଇନିଜାଃ ଦେଙ୍ଗା କେଦାଏ। ଦାଉଦ୍ ୟୀରୁଶାଲେମ୍ ସାହାର୍ କେ ଜିତାଅ କେତେ ଏନାକେ ଆଜାଃ ରାଜଧାନୀ ବାଇକେଦାଏ, ଆକ୍ତାରେ ଇନିଃ ତାଇଜାନାଏ ରାଇଜ୍ କେଦାଏ। ଦାଉଦ୍ ଚାଲିଶ୍ ବାରାଷ୍ ସାନ୍ ରାଜା ତାଇକେନାଏ। ନେସାମାୟ୍ ଭିତାର୍ ରେ, ଇସ୍ରାଏଲ୍ ପେଡ଼େଜାନ୍ ହାର୍ କିଶାଣ୍ ବାଇଜାନା।

ଦାଉଦ୍ ମିୟାଃ ମାନ୍ଦିର୍ ବାଇ ସାନାଙ୍ଗ୍ ତାଇନାଏ। ଅକତାଃ ରେ ସୋବେନ୍ ଇସ୍ରାଏଲୀ କୋ ପାର୍ମେଶ୍ଵାର୍ କେ ଆରାଧାନା ରିକା ଧାଡ଼ିୟାକୋ ହାର୍ ଇନିଜାଃ ଲାଗିନ୍ ଦାଣେ ରାକାବ୍ ଧାଡ଼ିୟାକୋ। ଲାଗ୍ ଭାଗ୍ ୪୦୦ ବାରାଶ୍ ସାନ୍ତେ, ଏନ୍ ହୋଡ଼ୋକୋ ମୁଶା ତେ ବାଇକାନ୍ ମିଃତାଃ ହୁଣ୍ଡୀନ୍ ତାମ୍ବୂ ରେ ପାର୍ମେଶ୍ଵାର୍ ରାଃ ଆରାଧାନା ରିକା ତିନାକୋ ହାର୍ ଇନିଜାଃ ଲାଗିନ୍ ଦାଣେ ରାକାବ୍ ତାଇନାକୋ।

ମେନ୍ଦୋ ଏନ୍ତାଃରେ ନାଥାନ୍ ନୁତୁମ୍ ମିୟାଃ ନାବୀ ତାଇକେନାଏ। ପାର୍ମେଶ୍ଵାର୍ ଇନିଃକେ ଦାଉଦ୍ ତାଃ ନେୟା କାଜିଲାଗିନ୍ କୁଲ୍ କିଜାଏ: “ଆମ୍ ଥିମ୍ବାଗି ଲାପାଡ଼ାଇ ଲାଡ଼ାଇ କାନାମ୍, ଏନାଲାଗିନ୍ ଆମ୍ ଇଙ୍ଗ୍ଆଃ ଲାଗିନ୍ ନେ ମାନ୍ଦିର୍ କେ କାମ୍ ବାଇୟା। ଆମାଃ ହୋନ୍ କୋଡ଼ା ନେୟାକେ ବାଇୟାଏ। ଏଣ୍ଡେ ରେହ ଇଙ୍ଗ୍ ଆମ୍ କେ ଥିମ୍ବାଗି ଆଶିଷ୍ ମେୟାଇଙ୍ଗ୍। ଆମାଃ ମିୟାଃ କିଲିରେନ୍ ଏତେ ସାଦାଏ ଲାଗିନ୍ ଇଙ୍ଗ୍ଆଃ ହୋଡ଼ୋକୋୱାଃ ଚେତାନ୍ ରେ ରାଜା ଲେକା ରାଇଜ୍ ଏୟାଏ।” ସୋବେନ୍ ହୁଲାଙ୍ଗ୍ ଲାଗିନ୍ତେ ରାଇଜ୍ ନିଃ ଇନିଃ ଦାଉଦ୍ ରାଃ ମିୟାଃଗି କିଲିରେନ୍ ମାସୀହ୍ ତାଇକେନାଏ। ମାସୀହ୍ ପାର୍ମେଶ୍ଵାର୍ ରାଃ ସାଲାକାନ୍ ହୋଡ଼୍ ତାଇକେନାଏ ଅକନିଃ ଅତେଦିଶୁମ୍ ରେନ୍ ହୋଡ଼ୋକୋକେ ଆକୋୱାଃ ପାପ୍ ତେ ବାଞ୍ଚାଅ କୋୱାଏ।

ଚିମ୍ତାଙ୍ଗ୍ ଦାଉଦ୍ ନାଥାନ୍ ଗାଃ ସାନ୍ଦେଶ୍ କେ ଆୟୁମ୍ କେଦାଏ ଦୋ ଇନିଃ ପାର୍ମେଶ୍ଵାର୍ କେ ଧାନ୍ୟାବାଦ୍ କିଜାଏ ହାର୍ ଇନିଜାଃ ମାନାରାଙ୍ଗ୍ କେଦାଏ। ପାର୍ମେଶ୍ଵାର୍ ଆଜାଃ ନୁତୁମ୍ କେ ମାରାଙ୍ଗ୍ ତାଇନାଏ ହାର୍ ଆଏଃକେ ଥିମ୍ବାଗି ଆଶିଷ୍ ଏମ୍ ତାଇନାଏ। ସାର୍ତିଗି, ଦାଉଦ୍ ନେୟା କାଏ ସାରିତାଇନା ଚି ପାର୍ମେଶ୍ଵାର୍ ନେ କାଜିକୋକେ ଚିଉଲା ରିକାୟାଏ। ନାଆ ଆଲେ ସାରିତାନାଲେ ଚି ଇସ୍ରାଏଲୀ କୋକେ ମିୟାଃ ହିଜୁଃ ସାମାୟ୍ ଶାନ୍, ଲାଗ୍ ଭାଗ୍ ୧,୦୦୦ ବାରାଶ୍ ସାନ୍ତେ ମାସୀହ୍ ରାଃ ହିଜୁଃ ରାଃ ତାଙ୍ଗି ପାଡ଼ାଅଃୱା।

ଦାଉଦ୍ ଥିମ୍ବାଗି ବାରାଶ୍ ସାନ୍ତେ ଠିକ୍ ଲେକାତେ ହାର୍ ଆଜାଃ ହୋଡ଼ୋକୋୱାଃ ଚେତାନ୍ ରେ ରାଇଜ୍ କେଦାଏ। ଇନିଃ ଥିମ୍ବାଗି ସୁକୁତେ ପାର୍ମେଶ୍ଵାର୍ ରାଃ କାଜିକୋକେ ମାନାତିଙ୍ଗ୍ ତାଇନାଏ ହାର୍ ପାର୍ମେଶ୍ଵାର୍ ଇନିଃ କେ ଆଶିଷ୍ କିଜାଏ। ଏଣ୍ଡେଅଗି, ଆଏଃ ଆୟାଃ ଜୀଦାନ୍ ରାଃ ଟୁଣ୍ଡୁ ସାମାୟ୍ ରେ ଇନିଃ ପାର୍ମେଶ୍ଵାର୍ ରାଃ ବିରୁଧ୍ ରେ ଥିମ୍ବାଗି ମାରାଙ୍ଗ୍ ପାପ୍ ଲେଦାଏ।

ମୁଶିଙ୍ଗ୍ ହୁଲାଙ୍ଗ୍ ଦାଉଦ୍ ଆଜାଃ ମାହାଲ୍ ତେ ବାହାରି ଲୋଡୋକେଦାଏ ହାର୍ ମିୟାଃ ସୁନ୍ଦାର୍ କୁଡ଼ି କେ ଗାଦିନ୍ ତାନ୍ ସାମାୟ୍ ରେ ନେଲ୍ କିଜାଏ। ଇନିଃ ଏନ୍ କୁଡ଼ିକେ କାଏ ସାରିତାଇନା, ମେନ୍ଦୋ ଇନିଃ କୁଲି କେତେ ସାରିକିଜାଏ ଚି ଇନିଜାଃ ନୁତୁମ୍ ବେତ୍ସେବା ତାଇକେନା।

ଆଜାଃ ମେଏଃକେ ଏଟାଃ ପାଡ଼୍ ନେଲ୍ ଚାହି, ମେନ୍ଦୋ ଦାଉଦ୍ ଇନିଃକେ ଆଜାଃ ନାଡ଼େଏତେ ଆଉଲାଗିନ୍ ମିହୋଡ଼୍ କେ କୁଲ୍ କିଜାଏ। ଇନିଃ ଆଜାଃ ଲୋଃ ଗିତିଃ ଜାନାଏ ହାର୍ ଇନିଃକେ ଅଡ଼୍ଆଃ କୁଲ୍ ତିଜାଏ। କାଟୀଃ ସାମାୟ୍ ରାଃ ତାୟୋମ୍ତେ ବେତ୍ସେବା ନେୟା କାଜିକେତେ ଦାଉଦ୍ ଆଃ ନାଡ଼େଏରେ କାଜି କୁଲ୍ କେଦାଏ ଚି ଇନିଃ ହୋଡ଼ମୋ ରେ ମେନିଜା।

ବେତ୍ସେବା ରାଃ କୋଡ଼ା ଉରିୟାହା ନୁତୁମ୍ ମିହୋଡ଼୍ ହୋଡ଼୍ ତାଇକେନାଏ। ଇନିଃ ଦାଉଦ୍ ରାଃ ବୁଗିନ୍ ସିପାହୀ କୋଏତେ ମିହୋଡ଼୍ ତାଇକେନାଏ। ନେ ସାମାୟ୍ ରେ ଇନିଃ ଲାଡ଼ାଇ ଲାଗିନ୍ ବାହାରେ ସେନ୍ କାନ୍ ତାଇକେନାଏ। ଦାଉଦ୍ ଉରିୟାହା କେ ଲାଡ଼ାଇ ଏତେ କେଡ଼ାକିଜାଏ ହାର୍ ଇନିଃ ଆଜାଃ ନିଜ୍ କୁଡ଼ି ଲୋଃ ତାଇନ୍ ଲାଗିନ୍ କାଜିକିଜାଏ। ମେନ୍ଦୋ ଏଟାଃ ସିପାହୀକୋ ଲାଡ଼ାଇ ରେ ତାଇକେନାକୋ ଏନାଲାଗିନ୍ ଉରିୟାହା କେ ଅଡ଼୍ଆଃ ତେ ରୁଆଡ଼୍ ସେନ୍ ଲାଇ ମାନାକିଜାଏ। ଏନ୍ତେ ଦାଉଦ୍ ଉରିୟାହା କେ ଆଡୋଃମିଶା ଲାଡ଼ାଇ ରେ କୁଲ୍ ତିଜାଏ ହାର୍ ସିପାହୀ କୋୱାଃ ଗୋମ୍କେ କେ କାଜିକିଜାଏ ଯେ ଇନିଃକେ ନେକାନ୍ ଜାଗାରେ ମାଣ୍ଡାଅଃ କାଏ ଅକ୍ତାରେ ବାଇରୀକୋ ଥିମ୍ବାଗି ପେଡ଼େଜାନ୍ ତାଇନାକୋ ଏନାତେ ଇନିଃ ଗୋଜୋଃ କାଏ। ଦୋ ନେକା ହୋବାଜାନା ଚି ଉରିୟାହା ଲାଡ଼ାଇ ରେ ଗୋଏଃ ଜାନାଏ।

ଉରିୟାହା ଲାଡ଼ାଇ ରେ ଗୋଏଃଜାନ୍ ରାଃ ତାୟୋମ୍ତେ ଦାଉଦ୍ ବେତ୍ସେବା ଲୋଃ ଆଣାଦି ଜାନାଏ। ତାୟୋମ୍ତେ, ଇନିଃ ଦାଉଦ୍ ରାଃ ହୋନ୍ କେ ଯାନାମ୍ କିଜାଏ। ଦାଉଦ୍ ଅକନାଃ ରିକାଲାଆଏ ଏନାତେ ପାର୍ମେଶ୍ଵାର୍ ଥିମ୍ବାଗି ଖିସ୍କାନ୍ ତାଇକେନାଏ, ଏନାଲାଇ ଇନିଃ ନାଥାନ୍ ନାବୀ କେ ଦାଉଦ୍ ତାଃ ନେୟା କାଜିଲାଗିନ୍ କୁଲ୍ କିଜାଏ ଚି ଇନିଜାଃ ପାପ୍ ଚିମିନ୍ ସିତୃ ତାଇକେନା। ଦାଉଦ୍ ଆଜାଃ ପାପ୍ କେ ପାସ୍ତାଅ କେଦାଏ ହାର୍ ପାର୍ମେଶ୍ଵାର୍ ଇନିଃକେ ଛାମା ତିଜାଏ। ଦାଉଦ୍ ଆପାନାଃ ଜୀଦାନ୍ ରେୟାଃ ସାରେଜାକାନ୍ ସାମାୟ୍ ରେ, ଆପାନାଃ କେଟେଃ ସାମାୟ୍ କୋରେହ ପାର୍ମେଶ୍ଵାର୍ ରାଃ ତାୟୋମ୍-ତାୟୋମ୍ ସେସେନ୍ କେଦାଏ ହାର୍ ଇନିଜାଃ କାଜିକୋକେ ମାନାତିଙ୍ଗ୍ କେଦାଏ।

ମେନ୍ଦୋ ଦାଉଦ୍ ରାଃ ହୋନ୍ ଗୋଏଃ ଜାନାଏ। ନେଲେକାତେ ପାର୍ମେଶ୍ଵାର୍ ଦାଉଦ୍ କେ ଦାଣ୍ଡ ଏମ୍ କିଜାଏ। ନେୟା ବାଗିକେତେ, ଦାଉଦ୍ ରାଃ ଗୋଜୋଃ ସାନ୍ତେ, ଆଏଃ ଆଜାଃ ପାରିବାର୍ ରେନ୍ ଚିମିନ୍ ହୋଡ଼ୋକୋ ଆଜାଃ ବିରୁଧ୍ ରେ ଲାଡ଼ାଇ କେଦାକୋ, ହାର୍ ଦାଉଦ୍ ରାଃ ପେଡ଼େଏ ଘାଟାଅ ଛାବାଲେନା। ମେନ୍ଦୋ ପାର୍ମେଶ୍ଵାର୍ ବିଶ୍ଵାସ୍ ଲେକାନିଃ ଗି ତାଇକେନାଏ ହାର୍ ନାଆ ଅଗି ଇନିଃ ଏନା ରିକା କେଦାଏ ଅକନାଃ ଇନିଃ ଦାଉଦ୍ କେ କାଜିଲିଯାଏ ଚି ଏନା ରିକାୟାଏ, ଦାଉଦ୍ ଇନିଜାଃ କାଏ ମାନାତିଙ୍ଗ୍ ଜାନା ଏଣ୍ଡେ ରେହ, ତାୟୋମ୍ତେ, ଦାଉଦ୍ ହାର୍ ବେତ୍ସେବା ଗାଃ ଏଟାଃ ହୋନ୍ କୋଡ଼ା ଯାନାମ୍ ହୋବାଜାନାଏ, ହାର୍ ଇନ୍ କିନ୍ ଇନିଜାଃ ନୁତୁମ୍ ସୁଲେମାନ୍ ମାଣ୍ଡାଅ କେଦାକିନ୍।