18. ୧୮. ହାନାଟିଙ୍ଗ୍ କାନ୍ ରାଇଜ୍

ଦାଉଦ୍ ରାଜା ଚାଲିଶ୍ ବାରାଶ୍ ଶାନ୍ ରାଇଜ୍ କେଦାଏ। ଏନ୍ତେ ଇନିଃ ଗୋଏଃ ଜାନାଏ, ହାର୍ ଇନିଜାଃ ହୋନ୍ କୋଡ଼ା ଇସ୍ରାଏଲ୍ ଚେତାନ୍ ରେ ରାଇଜ୍ ସୁରୁ କେଦାଏ। ପାର୍ମେଶ୍ଵାର୍ ସୁଲେମାନ୍ ଲୋଃ ବାଖାଣ କେଦାଏ ହାର୍ ଇନିଃକେ କୁଲିକିଜାଏ ଚି ଇନିଃ ସୋବେନ୍ ଏତେ ଥିମ୍ବା ଚିନାଃ ସାନାଙ୍ଗ୍ ତାନାଏ ଚି ପାର୍ମେଶ୍ଵାର୍ ଆଜାଃ ଲାଇ ରିକାୟାଏ। ସୁଲେମାନ୍ ପାର୍ମେଶ୍ଵାର୍ କେ ଆସିକିଜାଏ ଚି ଇନିଃ ଆଏଃକେ ଥିମ୍ବାଗି ସେଣାନ୍ ବାଇକାଏ। ନେ ବାକାଣ ପାର୍ମେଶ୍ଵାର୍ କେ ସୁକୁକିଜା, ଏନାଲାଗିନ୍ ପାର୍ମେଶ୍ଵାର୍ ସୁଲେମାନ୍ କେ ଅତେଦିଶୁମ୍ ରେନ୍ ହୋଡ଼ୋକୋୱାଃ ରେ ସୋବେନ୍ ଏତେ ସେଣାନ୍ ହୋଡ଼୍ ବାଇକିଜାଏ। ସୁଲେମାନ୍ ଥିମ୍ବାଗି ବାଖାଣ୍ କୋ ଶିଖାଅ ଜାନାଏ ହାର୍ ଇନିଃ ମିୟାଃ ସେଣାନ୍ ହାକିମ୍ ତାଇକେନାଏ। ପାର୍ମେଶ୍ଵାର୍ ଇନିଃ କେ ଥିମ୍ବାଗି କିଶାଣ୍ ହ ବାଇତିଜାଏ.

ୟୀରୁଶାଲେମ୍ ରେ ସୁଲେମାନ୍ ଏନ୍ ମାନ୍ଦିର୍ କେ ବାଇକେଦାଏ। ଅକନାଃ ଲାଇ ଇନିଜାଃ ଆପୁ ସାନାଙ୍ଗ୍ ଲେଦାଏ ହାର୍ ଜିନିଷ୍ କୋ ହୁଣ୍ଡି ଲେଦାଏ। ନାଆ ହୋଡ଼ୋକୋ ମିଃତାଃ ହୁଣ୍ଡୀନ୍ ତାମ୍ବୂ କେ ବାଗେକେତେ ମାନ୍ଦିର୍ ରେ ପାର୍ମେଶ୍ଵାର୍ ରାଃ ଆରାଧାନା ରିକା ତିନାକୋ ହାର୍ ଆଜାଃ ଲାଗିନ୍ ଦାଣେ ରାକାବ୍ ତିନାକୋ। ପାର୍ମେଶ୍ଵାର୍ ହିଜୁଃ କେତେ ମାନ୍ଦିର୍ ରେ ତାଇୟୋ ତାଇନାଏ, ହାର୍ ଆଏଃ ଆଜାଃ ହୋଡ଼ୋକୋ ଲୋଃ ତାଇନ୍ ତାଇନାଏ।

ମେନ୍ଦୋ ସୁଲେମାନ୍ ଏଟାଃ ଦିଶୁମ୍ କୋରେନ୍ କୁଡ଼ିକୋକେ ଦୁଲାଡ଼୍ କେଦାଏ। ଇନିଃ ଥିମ୍ବାଗି, ଲାଗ୍ ଭାଗ୍ ୧୦୦୦ କୁଡ଼ିକୋକେ ଆଣାଦୀ କେତେ ପାର୍ମେଶ୍ଵାର୍ କେ କାଏମାନାତିଙ୍ଗ୍ କିଜାଏ! ନେଣ୍ଡେକୋଏତେ ଥିମ୍ବାଗୀ କୁଡ଼ିକୋ ଏଟାଃ ଦିଶୁମ୍ ତେ ହିଜୁଃ ଲେନାକୋ ହାର୍ ଆକୋୱାଃ ଲୋଃ ଆକୋୱାଃ ଦେବ୍ତା କୋକେ ଆଉକେଦାକୋ ହାର୍ ଇନ୍‍କୁକେ ପୂଜା କେଦାକୋ। ଚିମ୍ତାଙ୍ଗ୍ ସୁଲେମାନ୍ ହାଡ଼ାମ୍ ଜାନାଏ ଦୋ ଆଜୋଗି ଆକୋୱାଃ ଦେବ୍ତା କୋକେ ପୂଜା କେଦାଏ।

ଏନାଲାଗିନ୍ ପାର୍ମେଶ୍ଵାର୍ ସୁଲେମାନ୍ ତେ ଖିସ୍ କାନ୍ ତାଇକେନାଏ। ଆଏଃକେ କାଜିକିଜାଏ ଚି ଇନିଃ ଇସ୍ରାଏଲ୍ ଦିଶୁମ୍ କେ ବାରିୟା ରାଇଜ୍ ରେ ହାନାଟିଙ୍ଗ୍ ରାଃ ହୋରାତେ ଇନିଃକେ ଦାଣ୍ଡ ଏମେଆଏ। ଇନିଃ ସୁଲେମାନ୍ ରାଃ ଗୋଜୋଃ ରାଃ ତାୟୋମ୍ତେ ଏନ୍ କା ରିକାୟାଏ।

ସୁଲେମାନ୍ ଗୋଜୋଃ ରାଃ ତାୟୋମ୍ତେ, ରାହାବିଆମ୍ ରାଜା ବାଇଜାନାଏ। ଇସ୍ରାଏଲ୍ ଦିଶୁମ୍ ରେନ୍ ହୋଡ଼ୋକୋ ଇନିଃ କେ ଆକୋୱାଃ ରାଜା ବାଇଲାଗିନ୍ ମିଃତାଃ ହୁଣ୍ଡି ଜାନାକୋ। ଇନ୍‍କୁ ରାହାବିଆମ୍ କେ କାଜିକିଜାକୋ ଚି ସୁଲେମାନ୍ ଆକୋକେ ଥିମ୍ବା କାଠିନ୍ କାମି ରିକାକୋ ତାଇନାଏ ହାର୍ ଥିମ୍ବାଗି ମାଲ୍ ଗୁଜାରି ଇଦିତାଇନାଏ। ଇନ୍‍କୁ ରାହାବିଆମ୍ କେ ଆର୍ଜି କିଜାକୋ ଚି ଇନ୍‍କୁତେ କାଟୀଃ କାମି ରିକାକାଏ।

ମେନ୍ଦୋ ରାହାବିଆମ୍ ଇନ୍‍କୁକେ ମାରାଙ୍ଗ୍ ଡ଼ୋଣ୍ଡୋ ଲେକା ବାଖାଣ କେଦାଏ, “ଆପେ କାଜିଆପେ ଚି ଇଙ୍ଗ୍ଆଃ ଆପୁ ସୁଲେମାନ୍ ଆପେକେ କାଠିନ୍ କାମୀ ଆଚୁକେଃପେୟାଏ। ମେନ୍ଦୋ ଇଙ୍ଗ୍ ଆପେକେ ଆଜାଃତେ ହଁଗି ଥିମ୍ବା କାଠିନ୍ କାମୀ ରିକାପେଇଙ୍ଗ୍, ହାର୍ ଇଙ୍ଗ୍ ଆଜାଃତେ ହଁଗି ଥିମ୍ବା ହାସୁ ଏମାପେଇଙ୍ଗ୍।”

ଚିମ୍ତାଙ୍ଗ୍ ହୋଡ଼ୋକୋ ଆଏଃକେ ଏନ୍ କା କାଜିକେ ଆୟୁମ୍ କେଦାକୋ ଦୋ ଇନ୍କୁ ଆଜାଃ ବିରୁଧ୍ ରେ କାଜି ଜାନାକୋ। ହାର୍ ଦାଶ୍ କିଲି କୋ ଆଏଃକେ ବାଗେ ତିଜାକୋ: ଆଜାଃ ଲୋଃ ଭାଇର୍ ବାରିୟା କିଲିଗି ବାଚାଅନା। ନେ ବାରିୟା କିଲିଗି ଆକୋଗୀ ୟାହୁଦା ରାଇଜ୍ କାଜିଜାନା।

ବାଚାଅକାନ୍ ଦାଶ୍ କିଲିରେନ୍ କୋ ୟାରୋବାମ୍ ନୁତୁମ୍ ରେନ୍ ମିୟାଃ ହୋଡ଼୍ କେ ଆକୋୱାଃ ରାଜା ବାଇକିଜକୋ। ନେ କିଲିରେନ୍ କୋ ଉତାର୍-ପୂର୍ବ୍ ରେ ତାଇନ୍ ତିନାକୋ। ଇନ୍‍କୁଗୀଗି ଇସ୍ରାଏଲ୍ ରାଇଜ୍ କାଜିଜାନାକୋ।

ମେନ୍ଦୋ ୟାରୋବାମ୍ ପାର୍ମେଶ୍ଵାର୍ ରାଃ ବିରୁଦ୍ଦ ରେ କାଜି କେଦାଏ ହାର୍ ହୋଡ଼ୋକୋକେ ପାପ୍ ରିକାକେଃକୋୱାଏ। ଆଏଃ ଆଜାଃ ହୋଡ଼ୋକୋୱାଃତେ ଆରାଧାନା ଲାଗିନ୍ ବାରିୟା ମୂର୍ତି ବାଇକେଦାଏ। ଇନ୍‍କୁ ନାଆ ୟାହୁଦା ରାଇଜ୍ ରେ ୟିରୁସାଲେମ୍ ରେ ପାର୍ମେଶ୍ଵାର୍ ରାଃ ମାନ୍ଦିର୍ ରେ ଆଜାଃ ଆରାଧାନା ଲାଇତେ କାକୋ ସେନ୍ ଜାନା।

ୟାହୁଦା ରାଇଜ୍ ହାର୍ ଇସ୍ରାଏଲ୍ ରାଇଜ୍ ବାଇରୀ ବାଇଯାନାକିନ୍ ହାର୍ ଚିମିନ୍ ଧାଅ ମିୟାଃ ଏଟାଃ ନିଜାଃ ବିରୁଦ୍ଦ ରେ ଲାପାଡ଼ାଇ ଏଟେଃ ଜାନାକିନ୍।

ଇସ୍ରାଏଲ୍ ରାଃ ନାୱା ରାଇଜ୍ ରେ ସୋବେନ୍ ରାଜାକୋ ଦୁଷ୍ଟ ତାଇକେନାକୋ। ନେଣ୍ଡେତେ ଚିମିନ୍ ରାଜାକୋ ଆଜାଃ ଜାଗାରେ ରାଜା ବାଇଏନ୍ ସାନାଙ୍ଗ୍ କୋ ଏଟାଃ ଇସ୍ରାଏଲୀ କୋୱାଃତେ ଗୋଏଃ ଯାନାକୋ।

ଇସ୍ରାଏଲ୍ ରାଇଜ୍ ରେନ୍ ରାଜକୋ ହାର୍ ଥିମ୍ବାତେ ଦୋ ହୋଡ଼ୋକୋ ମୂର୍ତି କୋୱାଃ ପୂଜା କେଦାକୋ, ଚିମ୍ତାଙ୍ଗ୍ ଇନ୍‍କୁ ନେକା କେଦାକୋ, ଆଡୋଃ ଇନ୍‍କୁ ପ୍ରାୟ ସାମାୟ୍ ରେ ବେଶ୍ୟାକୋଲୋଃ ଗିତିଇ ଜାନାକୋ ହାର୍ ନେତାଃ ସାନ୍ତେଚି ଚିମିନ୍ ଧାଅ ମୂର୍ତି କୋୱାଃ ଆୟୁର୍ ରେ ହୋନ୍ କୋକେ ଦାଣେ ରାକାବ୍ ତାଇନାକୋ।

ୟାହୁଦା ରାଇଜ୍ ରେନ୍ ରାଜାକୋ, ଦାଉଦ୍ ରାଃ କିଲିରେନ୍ ତାଇକେନାକୋ। ନେ ରାଜା ଭିତାର୍ ରେ ଚିମିନ୍ କୋ ବୁଗିନ୍ ରାଜା ତାଇକେନାକୋ ଅକନ୍ କୋଚି ନିୟାମ୍ ଲେକାତେ ରାଇଜ୍ କେଦାକୋ ହାର୍ ପାର୍ମେଶ୍ଵାର୍ ରାଃ ଆରାଧାନା କେଦାକୋ। ମେନ୍ଦୋ ୟାହୁଦା ରେନ୍ ଥିମ୍ବା ରାଜାକୋ ଦୁଷ୍ଟ ତାଇକେନାକୋ। ଇନ୍‍କୁ ବୁରାଇତେ ରାଇଜ୍ କେଦାକୋ ହାର୍ ମୂର୍ତି କୋକେ ପୂଜା କେଦାକୋ। ନେତାଃ ସାନ୍ତେ ଚି ଚିମିନ୍ ରାଜାକୋ ଲୋଗୋ ଦେବବ୍ତା କୋୱାଃ ଆୟୁର୍ ରେ ଆକୋୱାଃ ହୋନ୍ କୋକେ ଅଗି ଦାଣେ ରାକାବ୍ କେଦାକୋ। ୟାହୁଦା ରାଇଜ୍ ରେନ୍ ଥିମ୍ବା ହୋଡ଼ୋକୋ ଅଗି ପାର୍ମେଶ୍ଵାର୍ ରାଃ ବିରୁଦ୍ଦରେ କାଜି କେଦାକୋ ହାର୍ ଏଟାଃ ଦେବ୍ତା କୋୱାଃ ପୂଜା କେଦାକୋ।