20. ୨୦. ଥୋଲ୍ ଜାନାକୋ ହାର୍ ରୁଆଡ଼୍ ଜାନାକୋ
ଇସ୍ରାଏଲ୍ ରାଇଜ୍ ରେନ୍ କୋ ହାର୍ ୟହୁଦା ରାଇଜ୍ ରେନ୍ କୋ ମାନେ ବାରାନ୍ ରାଇଜ୍ ପାର୍ମେଶ୍ଵାର୍ ବିରୁଦ୍ଦ ରେ ପାପ୍ କେଦାକୋ। ଇନ୍କୁ ଏନ୍ କିରିୟାକେ ଠୋଏଃ ତାଦାକୋ ଅକନାଃ ଚି ପାର୍ମେଶ୍ଵାର୍ ଇନ୍କୁୱା ଲୋଃ ସିନାଏ ବୁରୁରେ ଥଲ୍ ଲେଦାଏ। ପାର୍ମେଶ୍ଵାର୍ ଇନ୍କୁୱା ମୋନ୍ କେ ରୁଆଡ଼୍ ଲାଗିନ୍ ହାର୍ ଆଡୋଃଗି ଆଜାଃ ଆରାଧାନା ଲାଇ ଚେତାଅ ଲାଗିନ୍ ଆଜାଃ ଆୟାର୍ କାଜି କାଜିତାନ୍ କୋକେ କୁଲ୍ କେଦାଏ, ମେନ୍ଦୋ ଇନ୍କୁ ଆଜାଃ କାଜିକେ କାକୋ ମାନାତିଙ୍ଗ୍ କେଦା।
ଏନ୍ତେ ପାର୍ମେଶ୍ଵାର୍ ଇନ୍କୁୱାଃ ବାଇରୀକୋ ଇନ୍କୁକେ ନାଷ୍ଟ କାକୋ ମେନ୍ତେ ପେଡ଼େଏ ଏମ୍ କେତେ ବାରିୟା ରାଇଜ୍ କେ ଦାଣ୍ଡିତ୍ କେଦାଏ। ଆସୁର୍ ମିୟାଃ ଏଟାଃ ରାଇଜ୍ ତାଇକେନା ଏନା ପେଡ଼େଜାନ୍ ହୋବାକାନ୍ ନ୍ତାଇନାଏ। ଇନିଃ ଏଟାଃ ଦିଶୁମ୍ କୋକେ କାୟ ଦାୟା ତିନା। ଇନ୍କୁ ସେନ୍ କେତେ ଇସ୍ରାଏଲ୍ ଦିଶୁମ୍ କେ ନାଷ୍ଟ ତାଦାକୋ। ଆସୁରିୟୋକୋ ହିଜୁଃ କେତେ ଇସ୍ରାଏଲ୍ ରେନ୍ ହୋଡ଼ୋକୋକେ ଗୋଏଃ ତାଦାକୋ, ଅକନାଃ କେ ସାନାଙ୍ଗ୍ କେଦାକୋ ଏନାକେ ଇଦିକେଦାକୋ, ହାର୍ ଦିଶୁମ୍ ରାଃ ଚିମିନ୍ ଜାଗା କୋକେ ଯୁଲ୍ ତାଦାକୋ।
ଆସୁରିୟୋ ରେନ୍ କୋ ସୋବେନ୍ ଆଗୁଆ, କିଶାଣ୍ କୋ, ହାର୍ ନେକାନ୍ ହୋଡ଼ୋକୋକେ ଅକନ୍ କୋଚି ଗୋନୋଙ୍ଗାନ୍ ଜିନିଷ୍ କୋକେ ବାଇ ଧାଡ଼ିତିନାକୋ ମିଃତାଃ ହୁଣ୍ଡି କେଃକୋୱାକୋ ହାର୍ ଇନ୍କୁ ଆକୋକେ ଆସୁର୍ ଦିଶୁମ୍ ଇଦିକେଦାକୋ। ଇସ୍ରାଏଲ୍ ରେ କାଟିଇଃ ଗି ଗାରିବ୍ ଇସ୍ରାଏଲୀ କୋ ବାଚାଅ ଯାନାକୋ।
ଏନ୍ତେ ଆସୋରିୟୋ ରେନ୍ ହୋଡ଼ୋକୋ ଏନ୍ ଶିଦୁମ୍ ରେ ତାଇନ୍ ଲାଗିନ୍ ଏଟାଃ ଦିଶୁମ୍ ରେନ୍ ହୋଡ଼ୋକୋକେ ଆଉ କେଦାକୋ। ଏନ୍ ଏଟାଃ ଦିଶୁମ୍ ରେନ୍ ହୋଡ଼ୋକୋ ଏନ୍ ସାହାର୍ କୋକେ ଆଡୋଃମିଶା ବାଇରୁଆଡ଼୍ କେଦାକୋ। ଅକନ୍ ଇସ୍ରାଏଲୀ କୋ ଏନ୍ତାଃ ବାଚାଅ ଲେନାକୋ ଇନ୍କୁ ଲୋଃ ଇନ୍କୁ ଆଣାଦି ଜାନାକୋ। ନେ ହୋଡ଼ୋକୋୱାଃ ବାଂଶ୍ କୋକେ ସାମାରୀ କାଜିଜାନାକୋ।
ୟାହୁଦା ରାଇଜ୍ ରେନ୍ ହୋଡ଼ୋକୋ ନେଲ୍ କେଦାକୋ ଚି ପାର୍ମେଶ୍ଵାର୍ ଚିଲ୍କା ଇନିଜାଃ ରେ କାକୋ ବିଶ୍ଵାସ୍ କେଦା ହାର୍ ଇନିଜାଃ କାଜିକେ କାକୋ ମାନାତିଙ୍ଗ୍ ରାଃ ଚାଲ୍ତେ ଇସ୍ରାଏଲ୍ ରାଇଜ୍ ରେନ୍ ହୋଡ଼ୋକୋକେ ଦାଣ୍ଡିତ୍ ଲେଃକୋୱାଏ। ମେନ୍ଦୋ ଏଣ୍ଡେଅଗି ଇନ୍କୁ କାନାନି କୋୱାଃ ବେଦ୍ତା ଗାଃ ମୂର୍ତିକୋକେ ପୂଜା କେଦାକୋ। ପାର୍ମେଶ୍ଵାର୍ ଇନ୍କୁକେ ଚେତାଅ ଲାଗିନ୍ ଆୟାର୍ କାଜି କାଜିତାନ୍ କୋକେ କୁଲ୍ କେଦାଏ, ମେନ୍ଦୋ ଇନ୍କୁ ଆୟୁମ୍ କାକୋ ସାନାଙ୍ଗ୍ କେଦା।
ଲାଗ୍-ଭାଗ୍ ୧୦୦ ବାରାଶ୍ ରାଃ ତାୟୋମ୍ତେ ଆସୋରିୟୋ ରେନ୍ କୋ ଇସ୍ରାଏଲ୍ ରାଇଜ୍ କେ ନାଶ୍ ତାଦାକୋ। ପାର୍ମେଶ୍ଵାର୍ ବାବିଲୋନ୍ ରେନ୍ ରାଜା, ନାବୁକାଦନେସ୍ସାର୍ କେ ୟାହୁଦା ରାଃ ରାଇଜ୍ ଚେତାନ୍ ରେ ଲାଡ଼ାଇ ଲାଗିନ୍ କୁଲ୍ କିଜାଏ। ବାବିଲୋନ୍ ମିୟାଃ ପେଡ଼େଜାନ୍ ଦିଶୁମ୍ ତାଇକେନା। ୟାହୁଦା ରେନ୍ ରାଜା ନାବୁକାଦନେସ୍ସାର୍ ଗାଃ ଦାସୀ ବାଇଜାନାଏ ହାର୍ ସୋବେନ୍ ସିର୍ମା ଆଏଃକେ ଥିମ୍ବାଗି ଧାନ୍ ଏମ୍ ଲାଗିନ୍ ରାଜି ଜାନାଏ।
ମେନ୍ଦୋ ହୁଡିଙ୍ଗ୍ ଶିର୍ମା ରାଃ ତାୟୋମ୍ତେ, ୟାହୁଦା ରେନ୍ ରାଜା ବାବିଲୋନ୍ ଚେତାନ୍ ରେ ବିଦ୍ରୋହ କେଦାଏ। ଏନ୍ତେ; ବାବିଲିୟୋନ୍ କୋ ହିଜୁଃ ରୁଆଡ଼୍ କେତେ ୟାହୁଦା ରାଇଜ୍ ଚେତାନ୍ ଲାଡ଼ାଇ କେଦାକୋ। ଇନ୍କୁ ୟୀରୁଶାଲେମ୍ ସାହାର୍ କେ ଜିତାଅ କେଦାକୋ, ମାନ୍ଦିର୍ କୋକେ ଧାଶୂଡ୍ ତାଦାକୋ, ହାର୍ ସାହାର୍ ହାର୍ ମାନ୍ଦିର୍ ରାଃ ସୋବେନ୍ ଧାନ୍ କୋକେ ରେଏଃ କେଦାକୋ।
ବିଦ୍ରୋହ ଚାଲ୍ତେ ୟାହୁଦା ରେନ୍ ରାଜା କେ ଶାଜାଇ ଏମ୍ ଲାଗିନ୍, ନାବୁକାଦନେସ୍ସାର୍ ରାଃ ସିପାହୀ କୋ ରାଜା ଗାଃ ହୋନ୍ କୋଡ଼ା କୋକେ ଇନିଜାଃ ନାଡ଼େଏରେ ଗୋଏଃ କେଃକୋୱାକୋ ହାର୍ ଇନିଃ କେ ଆନ୍ଦା ତିଜାକୋ। ଏନାରାଃ ତାୟୋମ୍ତେ, ଇନ୍କୁ ରାଜାକେ ଇଦି କିଜାକୋ ଏନାତେ ବାବିଲୋନ୍ ରାଃ ଜେଲ୍ ଅଡ଼୍ଆଃ ରେ ଗୋଏଃ କେନୋଃ କାଏ।
ନାବୁକାଦନେସ୍ସାର୍ ହାର୍ ଆଜାଃ ସିପାହୀ କୋ ୟାହୁଦା ରାଇଜ୍ ରେନ୍ ଲାଗ୍-ଭାଗ୍ ସୋବେନ୍ ହୋଡ଼ୋକୋକେ ବାବିଲୋନ୍ ତେ ଇଦି କେଃକୋୱାକୋ, ଖାଲି ଗାରିବ୍ ହୋଡ଼ୋକୋକେ ବାଗେ ତାଦାକୋ ତାକି ଇନ୍କୁ ଲୟୋଙ୍ଗ୍ ରେ ଚାଷ୍ କାମିକାକୋ। ନେ ସମାୟ ରାଃ କାଜି କେ ଥୋଲ୍ ଜାନାକୋ କାଜିକାନା, ଅକନାଃ ଏତେ ପାର୍ମେଶ୍ଵାର୍ ରାଃ ହୋଡ଼ୋକୋକେ କିରିୟା କାନ୍ ଦିଶୁମ୍ତେ ଅଡୋଙ୍ଗ୍ ଲାଗିନ୍ ଜାବ୍ରାଇ ରିକାଲେନା।
ପାର୍ମେଶ୍ଵାର୍ ଆଜାଃ ହୋଡ଼ୋକୋକେ ଆକୋୱାଃ ପାପ୍ ଲାଗିନ୍ ଥଲ୍ କେତେ ଇଦିଜାନ୍ ରାଃ ହୋରାତେ ଦାଣ୍ଡିତ୍ ଲେଃକୋୱାଏ, ଏଣ୍ଡେଅଗି ଇନିଃ ଆକୋକେ ଆଜାଃ କିରିୟା କାନ୍ କେ କାଏ ରିଡ଼ିଙ୍ଗ୍ ଲେଦାଏ। ପାର୍ମେଶ୍ଵାର୍ ଆଜାଃ ହୋଡ଼ୋକୋକେ ମେଏଃ ତେ ନେଲ୍ ହୋରୋ ମାଣ୍ଡାଅ କେଃକୋୱାଏ ହାର୍ ଆଜାଃ ଆୟାର୍ କାଜି କାଜିତାନ୍ କୋୱାଃ ହୋରାତେ ଇନ୍କୁଲୋଃ ବାଖାଣ ତାଇକେନାଏ। ଇନିଃ କିରିୟା କେଦାଏ ଚି ୭୦ ବାରାଷ୍ ରାଃ ତାୟୋମ୍ତେ, ଇନ୍କୁ ଆଡୋଃମିଶା କିରିୟାକାନ୍ ଦିଶୁମ୍ତେ ରୁଆଡ଼୍ ହିଜୁଃୱାକୋ।
ଲାଗ୍-ଭାଗ୍ ୭୦ ବାରାଷ୍ ରାଃ ତାୟୋମ୍ତେ, ଫାରାସ୍ ରେନ୍ ରାଜା କୁସୃ ବାବିଲୋନ୍ କେ ହାରାଅ କେଦାଏ, ଏନାଲାଗିନ୍ ବାବିଲୋନ୍ ରାଃ ରାଇଜ୍ ହୋବାଅଃ ଜାଗାରେ ଫାରାସ୍ ରାଃ ରାଇଜ୍ ଚିମିନ୍ ଦିଶୁମ୍ କୋରେ ରାଇଜ୍ କେଦାଏ। ଇସ୍ରାଏଲୀ କୋ ନାଆ ୟାହୁଦୀ କାଜିଅଃ ତାଇନାକୋ। ଇନ୍କୁଏତେ ଥିମ୍ବାଗି ହୋଡ଼ୋକୋ ଆପାନାଃ ପୁରା ଜୀଦାନ୍ କେ ବାବିଲୋନ୍ ରେ ବିତାଅ ଲେଦାକୋ। ହୁଡିଙ୍ଗ୍ କାନ୍ ଚିମିନ୍ ହାଡ଼ାମ୍ ୟାହୁଦୀ କୋକେ ଭାଇର୍ ୟାହୁଦା ରାଃ ଦିଶୁମ୍ କେ ମୋନେ ତାଇକେନା।
ଫାରାସୀକୋ ଥିମ୍ବାଗି ପେଡ଼େଜାନ୍ ତାଇକେନାକୋ, ମେନ୍ଦୋ ଇନ୍କୁ ଆକୋ ଜିତାଅ କାନ୍ ହୋଡ଼ୋକୋ ଚେତାନ୍ ରେ ଦାୟା କେଦାକୋ। ଫାରାସୀ କୋୱାଃ ରାଜା ବାଈଏନ୍ ରାଃ କାଟୀଃ ସାମାୟ୍ ରାଃ ତାୟୋମ୍ତେ, କୁସୃ ରାଜା ଆନାଚୁ ଏମ୍ କେଦାଏ ଚି ଜେତାଏଗି ୟାହୁଦୀ କୋ ୟାହୁଦା ଦିଶୁମ୍ ରୁଆଡ଼୍ ସାନାଙ୍ଗ୍ ରେଦୋ, ଇନିଃ ଫାରାସୀତେ ଅଡୋଙ୍ଗ୍ କେତେ ୟାହୁଦା ଦିଶୁମ୍ ରୁଆଡ଼୍ କାଏ। ନେତାଃ ସାନ୍ତେଚି ଇନିଃ ଇନ୍କୁକେ ମାନ୍ଦିର୍ ବାଇଲାଗିନ୍ ଧାନ୍ ହଗି ଏମ୍ କେଦାଏ। ଏନ୍ତେ: ଥଲାକାନ୍ ରାଃ ସାତାର୍ ବାରାଷ୍ ତାୟୋମ୍ତେ, ୟାହୁଦୀ କୋୱାଃ ମିୟାଃ ହୁଡିଙ୍ଗ୍ ଝୁଣ୍ଡ୍ ୟାହୁଦା ଦିଶୁମ୍ ରେ ୟୀରୁଶାଲେମ୍ ସାହାର୍ ତେ ରୁଆଡ଼୍ ଜାନାକୋ।
ଚିମ୍ତାଙ୍ଗ୍ ଏନ୍ ହୋଡ଼ୋକୋ ୟୀରୁଶାଲେମ୍ ସେଟେର୍ ଜାନାକୋ ଦୋ ଇନ୍କୁ ମାନ୍ଦିର୍ କେ ହାର୍ ସାହାର୍ ରାଃ ସୋବେନ୍ ପାଡ଼୍ ରାଃ ଘେରା-ଭୀତ୍ କେ ବାଇରୁଆଡ଼୍ କେଦାକୋ। ଫାରାସୀ ହୋଡ଼ୋକୋ ନାଆ ଅଗି ଇନ୍କୁୱାଃ ଚେତାନ୍ ରେ ରାଇଜ୍ ତିନାକୋ ମେନ୍ଦୋ ଆଡୋଃମିଶା ଇନ୍କୁ କିରିୟା କାନ୍ ଦିଶୁମ୍ ରେ ତାଇୟୋତାଇନାକୋ ହାର୍ ମାନ୍ଦିର୍ ରେ ଆରାଧାନା ତାଇନାକୋ।
ବାଇବାଲ୍ ମିୟାଃ କାହାନୀ; ୨ ରାଜା ୧୭;୨୪-୨୫; ୨ କିଲି [ବାଂଶ] ୩୬; ଏଜ୍ରା ୧-୧୦ ନେହେମିୟା ୧-୧୩
Free to use, adapt, and share under an open license (CC BY-SA 4.0).