21. ୨୧. ପାର୍ମେଶ୍ଵାର୍ ମାସୀହ୍ ରାଃ କିରିୟା ଏମ୍ ତାନାଏ

ଚିମ୍ତାଙ୍ଗ୍ ପାର୍ମେଶ୍ଵାର୍ ନେ ଅତେଦିଶୁମ୍ କେ ବାଇଲାଆଏ, ଇନିଃ ସାରିତାଇନାଏ ଚି ଇନିଃକେ ତାୟୋମ୍ତେ ଜାହୁଲାଙ୍ଗ୍ ମାସୀହ୍ କୁଲ୍ ହୋବାଅଃୱା। ଇନିଃ ଆଦାମ୍ ହାର୍ ହାୱା କିନ୍ତେ କିରିୟା କେଦାଏ ଚି ଇନିଃ ନେକା ରିକାୟାଏ। ଇନିଃ କାଜିକେଦାଏ ଚି ହାୱାତେ ମିୟାଃ ବାଂଶ୍ ଯାନାମ୍ ଇଦିୟାଏ ଅକଏ ବିଙ୍ଗ୍ ରାଃ ଭୋଅକେ ତିକା ସେରେଦେୟାଏ। ଅକନ୍ ବିଙ୍ଗ୍ ହାୱା କେ ଲୋଗୋ କିଜାଏ ଇନିଃଗି ଶାଏତାନ୍ ତାଇକେନାଏ। ପାର୍ମେଶ୍ଵାର୍ ରାଃ କାଜି ରାଃ ମାନେ ତାଇକେନା ମାସୀହ୍ ଯାଲେକାତେ ଶାଏତାନ୍ କେ ହାରାୟିଆଏ।

ପାର୍ମେଶ୍ଵାର୍ ଆବ୍ରାହାମ୍ କେ କିରିୟା ଲାଆଏ ଚି ଆଜାଃ ହୋରାତେ ଅତେଦିଶୁମ୍ ରେନ୍ ସୋବେନ୍ କିଲିରେନ୍ କୋ ଆଶିଷ୍ ନାକେୟାକୋ। ପାର୍ମେଶ୍ଵାର୍ ତାୟୋମ୍ତେ ଯାହାନ୍ ସାମାୟ୍ ରେଅଗି ମାସୀହ୍ କେ କୁଲ୍ ରାଃ ହୋରାତେ ନେ କିରିୟା କାନ୍ ତେୟାଃ କେ ପୁରାଆଏ। ଏନ୍ ମାସୀହ୍ ଅତେଦିଶୁମ୍ ରେନ୍ ସୋବେନ୍ ଜାତି କୋଏତେ ହୋଡ଼ୋକୋକେ ଆକୋୱାଃ ପାପ୍ ଏତେ ଛଡ଼ାଅ କୋୱାଏ।

ପାର୍ମେଶ୍ଵାର୍ ମୁଶାକେ କିରିୟା କେତେ କାଜିଲିଯାଏ ଯେ ହିଜୁଃ ସାମାୟ୍ ରେ ଇନିଃ ମୁଶା ନାବୀ ଲେକା ମିୟାଃ ଏଟାଃ ଆୟାର୍ କାଜି କାଜିନିଃ(ନାବୀ) କେ କୁଲେଆଏ। ନେ ଆୟାର୍ କାଜି କାଜିନିଃ ମାସୀହ୍ ହୋବାଅଗାଏ। ନେଲେକାତେ, ପାର୍ମେଶ୍ଵାର୍ ଆଡୋଃ ମିଶା କିରିୟା କେଦାଏ ଚି ଇନିଃ ମାସୀହ୍ କେ କୁଲେଆଏ।

ପାର୍ମେଶ୍ଵାର୍ ଦାଉଦ୍ ରାଜାକେ କିରିୟା ଏମ୍ ଲିଜାଏ ଚି ଇନିଜାଃ ମିୟାଃ ବାଂଶ୍ ଏତେ ମାସୀହ୍ ହୋବାଅଗାଏ। ଇନିଃ ରାଜା ହୁୟୋଗାଏ ହାର୍ ପାର୍ମେଶ୍ଵାର୍ ରାଃ ହୋଡ଼ୋକୋୱାଃ ଚେତାନ୍ ସୋବେନ୍ ହୁଲାଙ୍ଗ୍ ଲାଗିନ୍ତେ ରାଇଜ୍ ଏୟାଏ।

ପାର୍ମେଶ୍ଵାର୍ ୟେରିମିୟା ନାବୀ ଲୋଃ ବାଖାଣ୍ କେଦାଏ ହାର୍ କାଜିକେଦାଏ ଚି ମୂଷିଙ୍ଗ୍ ହୁଲାଙ୍ଗ୍ ଇନିଃ ମିୟାଃ ନାୱାଃ ନିୟାମ୍ ଥୋଲେଆଏ। ଏନ୍ ନାୱାଃ ନିୟାମ୍ ଇସ୍ରାଏଲୀ କୋଲୋଃ ସିନାଇ ବୁରୁରେ ଥଲାକାନ୍ ମାରି ନିୟାମ୍ ଲେକା କାହୋବାୱା। ଚିମ୍ତାଙ୍ଗ୍ ହୋଡ଼ୋକୋଲୋଃ ଇନିଃ ଆଜାଃ ନାୱାଃ ନିୟାମ୍ କେ ଥଲେଆଏ, ଦୋ ଇନିଃ ଇନ୍‍କୁୱାଃରେ ଆପାନ୍ କେ ହୋଡ଼ୋ ରାଃ ଲେକା ଉଦୁବୋଗାଏ। ସୋବେନ୍ ମିପୀୟାଃ ହୋଡ଼କୋ ଆଏଃକେ ଦୁଲାଡ଼୍ ମାଣ୍ଡାଅୟାକୋ ହାର୍ ଆଜାଃ ଆଇନ୍ କେ ମାନାତିଙ୍ଗ୍ ଲାଗିନ୍ ସାନାଙ୍ଗ୍ ଏୟାଏ। ପାର୍ମେଶ୍ଵାର୍ କାଜିକେଦାଏ ଚି ନେୟା ଆଜାଃ ଆଇନ୍ କେ ଇନ୍‍କୁୱାଃ ହିରିଦାୟ ରେ ଅଲ୍ କେଃ ଲେକା ହୋବାୱାଃ। ଇନ୍‍କୁ ଆଜାଃ ହୋଡ଼ୋ ହୋୟୋଗାକୋ, ହାର୍ ପାର୍ମେଶ୍ଵାର୍ ଇନ୍‍କୁୱାଃ ପାପ୍ କୋକେ ଛାମା ୟାଏ। ଇନିଃ ମାସୀହ୍ ହୁୟୋଗାଏ ଇନ୍‍କୁୱାଃଲୋଃ ଏନ୍ ନାୱାଃ ନିୟାମ୍ କେ ଥୋଲେୟାଏ।

ପାର୍ମେଶ୍ଵାର୍ ରାଃ ନାବୀ କୋ ନେୟା ଅଗି କାଜିକେଦାକୋ ଚି ମାସୀହ୍ ମିୟାଃ ନାବୀ ହୋବାୱାଃଏ। ମିୟାଃ ନାବୀ ଏନ୍ ହୋଡ଼୍ ତାନିଃ ତାନିଃ ଅକଏ ପାର୍ମେଶ୍ଵାର୍ ରାଃ ବାଚାନ୍ କେ ଆୟୁମ୍ ଏୟାଏ ଏନ୍ତେ ହୋଡ଼ୋକୋକେ ପାର୍ମେଶ୍ଵାର୍ ରାଃ ବାଚାନ୍ କେ ଉଦୁବେୟାଏ। ଅକନିଃ କେ କୁଲେଲାଗିନ୍ ପାର୍ମେଶ୍ଵାର୍ କିରିୟା ଲେଦାଏ ଇନିଃ ମାସୀହ୍ ପୁରା ନାବୀ କାଜିଅଗାଏ। ମାନେ ଏନ୍ ମାସୀହ୍ ପାର୍ମେଶ୍ଵାର୍ ରାଃ ବାଚାନ୍ କେ ବୁଗିନ୍ ଲେକାତେ ଆୟୁମେୟାଏ, ହାର୍ ଇନିଃ ହୋଡ଼ୋକୋକେ ଏନ୍ ବାଚାନ୍ କେ ବୁଗିନ୍ ଲେକାତେ ଶିଖାଅ ୟାଏ।

ଇସ୍ରାଏଲୀ ୟାଜାକ୍ କୋ ହୋଡ଼ୋକୋ ଲାଗିନ୍ ପାର୍ମେଶ୍ଵାର୍ ରାଃ ଆୟୁର୍ ରେ ଦାଣେ ରାକାବ୍ କାକୋ ବାଗେ କେଦା। ନେ ଦାଣେ ହୋଡ଼ୋକୋୱାଃ ପାପ୍ ଲାଗିନ୍ତେ ଇନ୍‍କୁକେ ପାର୍ମେଶ୍ଵାର୍ ରାଃ ହୋରାତେ ଦାଣ୍ଡ ଏମୋଃତେ ଏନ୍ ଜାଗାରେ ଦାଣେ ଏମ୍ ତିନାକୋ। ୟାଜାକ୍ କୋ ହୋଡ଼ୋକୋ ଲାଗିନ୍ ହଗି ବିନ୍ତି ତିନାକୋ। ମେନ୍ଦୋ, ଏନ୍ ମାସୀହ୍ ପୁରା ତାଇୟାର୍ କାନ୍ ମାରାଙ୍ଗ୍ ୟାଜାକ୍ ହୁୟୋଗାଏ। ଅକନିଃ ପାର୍ମେଶ୍ଵାର୍ କେ ଏମ୍ ଲାଗିନ୍ ମିୟାଃ ତାଇୟାର୍ କାନ୍ ଦାଣେ ରାଃ ଲେକାତେ ଆପାନ୍ କେ ରାକାବ୍ ତାଆଏ। ମାନେ, ଇନିଃ ଚିଉଲା କାଏ ପାପ୍ ଏୟା, ଚିମ୍ତାଙ୍ଗ୍ ଇନିଃ ଆପାନ୍ କେ ଦାଣେ ଲାଗିନ୍ ଏମେଆଏ, ଦୋ ଅତେଦିଶୁମ୍ ରାଃ ଜେତାନ୍ ଦାଣେ ଏମ୍ କା ପାଡ଼ାଅଗା।

ହୋଡ଼ୋକୋୱାଃ ଚେତାନ୍ ରେ ରାଜା ହାର୍ ମାପାରାଙ୍ଗ୍ କୋ ରାଇଜ୍ ଏଆକୋ, ହାର୍ ଇନ୍‍କୁ ସାମାୟ୍-ସାମାୟ୍ ରେ ଗାଲ୍ତି ୟାକୋ। ଦାଉଦ୍ ରାଜା ଇସ୍ରାଏଲୀ କୋକେ ଭାଇର୍ ରାଇଜ୍ କେଦାଏ, ମେନ୍ଦୋ ରାଜା ଦାଉଦ୍ ରାଃ କିଲି ଏତେ ମାସୀହ୍ ସୋବେନ୍ ଅତେଦିଶୁମ୍ ରେ ରାଇଜ୍ ଏୟାଏ, ହାର୍ ସୋବେନ୍ ହୁଲାଙ୍ଗ୍ ଲାଗିନ୍ ରାଇଜ୍ ଏୟାଏ। ନେୟା ବାଗିକେତେ, ଇନିଃ ସୋବେନ୍ ହୁଲାଙ୍ଗ୍ ସାନ୍ ବୁଗିନ୍ ଲେକାତେ ରାଇଜ୍ ଏୟାଏ, ହାର୍ ଠିକ୍ ଲେକାତେ ବିଚାର୍ ଏୟାଏ।

ପାର୍ମେଶ୍ଵାର୍ ରାଃ ନାବୀ କୋ ମାସୀହ୍ ରାଃ ବିଶାୟ ରେ ଥିମ୍ବାଗି କାଜିକୋ କାଜିଲାଆକୋ। ଉଦାହାରାନ୍ ଲାଗିନ୍, ମାଲାଖି କାଜିକେଦାଏ ଚି ମାସୀହ୍ ରାଃ ହିଜୁଃ ରାଃ ସୀଦାରେ ମିୟାଃ ଏଟାଃ ନାବୀ ହିଜୁଃଗାଏ। ଏନ୍ ନାବୀ ଥିମ୍ବାଗି ଖାସ୍ ହୋବାଅଗାଏ। ନେୟା ବାଗି କେତେ, ୟାଶାୟାହ୍ ନାବୀ ଅଲ୍ କେଦାଏ ଚି ମାସୀହ୍ ମିୟାଃ କୁଆଁରି ଡ଼ିଣ୍ଡା କୁଡ଼ି ତେ ଯାନାମ୍ ଇଦିଆଏ। ହାର୍ ମିକା ନାବୀ କାଜିକେଦାଏ ଚି ମାସୀହ୍ ବାଇଥେଲେମ୍ ହାତୁରେ ଯାନାମ୍ ଇଦିଆଏ।

ୟାଶାୟାହ୍ ନାବୀ କାଜିକେଦାଏ ଚି ମାସୀହ୍ ଗାଲିଲ୍ ଜାଗା ରେ ତାଇନୋଗାଏ। ଅକନ୍ ହୋଡ଼ୋକୋ ଥିମ୍ବା ଦୁକୁରେ ମେନାକୋଆ ମାସୀହ୍ ଇନ୍‍କୁକେ ଶାନ୍ତି ଏମାକୋୱାଏ। ଇନିଃ ଥଲାକାନ୍ କୋକେ ଅଗି ରାଡ଼ା କୋୱାଏ। ମାସୀହ୍ ବିମାର୍ ହୋବାକାନ୍ କୋକେ ହାର୍ ଅକୋଏକୋ କାକୋ ଆୟୁମ୍ ଏଆ, ନେଲ୍ କାକୋ ଧାଡ଼ିୟା, କାଜି କାକୋ ଧାଡ଼ିୟା, ୟାଦ ସେସେନ୍ କାକୋ ଧାଡ଼ିୟା ଇନ୍‍କୁକେ ୟଗି ଚାଙ୍ଗାଇ କୋୱାଏ।

ୟାଶାୟାହ୍ ନାବୀ ନେୟାଅଗି କାଜିକେଦାଏ ଚି ହୋଡ଼ୋକୋ ମାସୀହ୍ କେ କାକୋ ଦୁଲାଡ଼ ଈୟା ହାର୍ ଇନିଃକେ ଗ୍ରାହାନ୍ ଲାଗିନ୍ କାକୋ ସାନାଙ୍ଗିୟା। ଏଟାଃ ନାବୀ କୋ କାଜିକେଦାକୋ ଚି ମାସୀହ୍ ରାଃ ମିୟାଃ ଗାତି ଆଜାଃ ବିରୁଦ୍ଦରେ ବିରିଦାଏ। ଯିଖାରିୟା ନାବୀ କାଜିକେଦାଏ ଚି ଆଜାଃ ନେ ଗାତି ନେକା ରିକାଏ ଲାଗିନ୍ ଏଟାଃ ହୋଡ଼ୋକୋଏତେ ରୂପା ରାଃ ତିରିସ୍ ଶିକ୍କା ଇଦିୟାଏ। ନେୟା ବାଗି କେତେ, ଚିମିନ୍ ନାବୀକୋ କାଜିକେଦାକୋ ଚି ହୋଡ଼ୋକୋ ମାସୀହ୍ କେ ଗୋଜିୟାକୋ, ହାର୍ ଇନ୍‍କୁ ଆଜାଃ ଲିଜାଃ କେ ଇଦି ଲାଗିନ୍ ଖୁଡ଼ଖୁଡ଼ି ଏନେଜାକୋ।

ନାବୀ କୋ ନେୟା ଅଗି କାଜିକେଦାକୋ ଚି ମାସୀହ୍ ଚିଲ୍ଲକା ଗୋଯୋଗାଏ। ୟାଶାୟାହ୍ ନାବୀ ଆୟାର୍ କାଜି-କାଜିକେଦାଏ ଚି ମାସୀହ୍ କେ ବେଜି ୟାକୋ, ଆଏଃକେ ମାଜାଃକ୍ ୟୀଆକୋ, ହାର୍ ଆଏଃକେ ବିଡ଼ାଇୟାକୋ। ଇନ୍‍କୁ ଆଏଃକେ ହୋଟୋର୍ ୟିଆକୋ ହାର୍ ଆଏଃ ମାରାଙ୍ଗ୍ ଦୁକୁ ହାର୍ ହାସୁରେ ଗୋଏଃ କେନୋଗାଏ, ଯାବ୍ ଚି ଆଏଃ ଜେତାନ୍ ଗାଲ୍ତି ଅଗି କାୟ ରିକାକାଆଏ।

ନାବୀ କୋ ନେୟା ୟଗି ଉଦୁବ୍ କେଦାକୋ ଚି ମାସୀହ୍ କାଏ ପାପ୍ ଏୟା। ଇନିଃ ସିଦ୍ଧ ତାଇନାଏ। ମେନ୍ଦୋ ଇନିଃ ନେୟାଲାଗିନ୍ ଗୋଯୋଗାଏ ଚି ପାର୍ମେଶ୍ଵାର୍ ଇନିଃ କେ ଏଟାଃ ହୋଡ଼ୋକୋୱାଃ ପାପ୍ ରାଃ ଚାଲ୍ତେ ଦାଣ୍ଡ୍ ଇୟାଏ। ଇନିଃ ଗୋଜୋଃ ରାଃ ଚାଲ୍ତେ ହୋଡ଼ୋକୋ ପାର୍ମେଶ୍ଵାର୍ ଲୋଃ ମେଶାନ୍ ଧାଡ଼ିୟୋଗାକୋ। ନେୟା ଲାଗିନ୍ ପାର୍ମେଶ୍ଵାର୍ ସାନାଙ୍ଗ୍ ତାଇନାଏ ଚି ମାସୀହ୍ ଗୋଜୋଃ କାଏ।

ନାବୀକୋ ନେୟା ୟଗି ଉଦୁବ୍ କେଦାକୋ ଚି ପାର୍ମେଶ୍ଵାର୍ ମାସୀହ୍ କେ ଗୋଜୋଃ କାନ୍ କୋଏତେ ଜୀବିରିଦ୍ ଇଆଏ। ନେୟା ଉଦୁବେୟାଏ ଚି ନେୟା ସୋବେନ୍ ନାୱାଃ ନିୟାମ୍ କେ ଥୋଲେ ଲାଗିନ୍ ପାର୍ମେଶ୍ଵାର୍ ରାଃ ସାନାଙ୍ଗ୍ ତାଇକେନା, ଏନାତେ ଇନିଃ ଏନ୍ ହୋଡ଼ୋକୋକେ ବାଞ୍ଚାଅ ଧାଡ଼ିକୋୱାଏ ଅକନ୍ କୋ ଇନିଜାଃ ବିରୁଦ୍ଦ ରେ ପାପ୍ କାଦାକୋ।

ପାର୍ମେଶ୍ଵାର୍ ନାବୀକୋକେ ମାସୀହ୍ ରାଃ ବିଶାୟରେ ଥିମ୍ବାଗି କାଜିକୋ ଉଦୁବ୍ କେଦାଏ, ମେନ୍ଦୋ ମାସୀହ୍ ଏନ୍ ନାବୀ କୋ ଜିହିଃ କାନ୍ ସାମାୟ୍ ରେ କାଏ ହିଜୁଃ କାନ୍ ଲେନା। ନେ ଆୟାର୍ କାଜି କାଜିତାନ୍ ରାଃ ୪୦୦ ଏତେ ଥିମ୍ବା ବାରାସ୍ ରାଃ ତାୟୋମ୍ତେ, ଠିକ୍ ସାମାୟ୍ ରେ, ପାର୍ମେଶ୍ଵାର୍ ମାସୀହ୍ କେ ନେ ଅତେଦିଶୁମ୍ ରେ କୁଲ୍ କେଦାଏ।