22. ୨୨. ଯୋହାନ୍ ରାଃ ଜାନାମ୍

ସୀଦା ସାମାୟ୍ ରେ, ପାର୍ମେଶ୍ଵାର୍ ଆଜାଃ ନାବୀକୋଲୋଃ ବାଖାଣ୍ ଲେଦାଏ ଏନାଲାଗିନ୍ ଇନ୍‍କୁ ହୋଡ଼ୋକୋଲୋଃ ବାଖାଣ୍ ତାଇକେନାକୋ। ମେନ୍ଦୋ ଏନ୍ ସାମାୟ୍ ଏତେ ଇଦିକେତେ ୪୦୦ ବାରାଶ୍ ଫାରୋମ୍ ଶାନ୍ ଇନିଃ ଇନ୍‍କୁଲୋଃ କାଏ ବାଖାଣ୍ ଲେଦାଏ। ଏନ୍ତେ ପାର୍ମେଶ୍ଵାର୍ ଜିଖାରିୟା ନୁତୁମ୍ ମିୟାଃ ନାବୀ ରାଃ ନାଡ଼େଏ ମିୟାଃ ସିର୍ମାଦାସୀ କେ କୁଲ୍ କିଜାଏ। ଜିଖାରିୟା ହାର୍ ଆଜାଃ କୁଡ଼ି ପାର୍ମେଶ୍ଵାର୍ କେ ମାଇନ୍ ଇତିନାକିନ୍। ଇନ୍ କିନ୍ ଥିମ୍ବାଗି ହାଡ଼ାମ୍ ବୁଡି ନେନାକିନ୍, ହାର୍ ଇନ୍ କିନ୍ ଆଃ ଜେତାନ୍ ହୋନ୍ ଗାଣା କାକୋତାଇନ୍ କେନା।

ଏନ୍ ସିର୍ମାଦାସୀ ଜିଖାରିୟା କେ କାଜିକିଜାଏ, “ଆମାଃ କୁଡ଼ି ଗାଃତେ ମିୟାଃ କୋଡ଼ାହୋନ୍ ଯାନାମ୍ ଅଗାଏ। ଆମ୍ ଇନିଜାଃ ନୁତୁମ୍ ଯୋହାନ୍ ମାଣ୍ଡାଅ ଏମେ। ପାର୍ମେଶ୍ଵାର୍ ଇନିଃ କେ ପାବିତାର୍ ଆତ୍ମା ତେ ଫେରେଜ୍ ଇୟାଏ, ହାର୍ ଯୋହାନ୍ ହୋଡ଼ୋକୋକେ ମାସୀହ୍ କେ ଗ୍ରାହାନ୍ ଲାଗିନ୍ତେ ବାଇ କୋୱାଏ।” ଜିଖାରିୟା କାଜି କେଦାଏ, “ଇଙ୍ଗ୍ ହାର୍ ଇଙ୍ଗ୍ଆଃ କୁଡ଼ି ହୋନ୍ ଯାନାମେ ଲାଗିନ୍ ଥିମ୍ବାଗି ହାଡ଼ାମ୍ ବୁଡି କାନାଲିଙ୍ଗ୍! ଇଙ୍ଗ୍ ଚିଲିକା ସାରିଇଙ୍ଗ୍ ଯେ ଆମ୍ ଇଙ୍ଗ୍ କେ ସାର୍ତି କାଜିତାନାମ୍?”

ଏନ୍ ସିର୍ମାଦାସୀ ଜିଖାରିୟା କେ କାଜି କେଦାଏ, “ଆମାଃ ନାଡ଼େଏ ନେ ବୁଗିନ୍ ସାନ୍ଦେଶ୍ କେ ଆଉୱେ ଲାଗିନ୍ ଇଙ୍ଗ୍ ପାର୍ମେଶ୍ଵାର୍ ପାଡ଼୍ ଏତେ କୁଲାକାନିଙ୍ଗ୍। ଚିୟାଃଚି ଆମ୍ ଇଙ୍ଗ୍ଆଃରେ କାମ୍ ବିଶ୍ଵାସ୍ କେଦା, ଏନାଲାଗିନ୍ ହୋନ୍ ଆଉରି ଯାନାମ୍ ସାନ୍ତେ ଆମ୍ କାଜି କାମ୍ ଧାଡ଼ିୟାମ୍।” ଇମ୍ତାଙ୍ଗ୍ ଗି, ଯିଖାରିୟା କାଜି କାଏ ଧାଡ଼ିଜାନା। ଏନ୍ତେ ଏନ୍ ସିର୍ମାଦାସୀ ଯିଖାରିୟା ରାଃ ନାଡ଼େଏ ସେନୋଃ ଜାନାଏ। ଏନାରାଃ ତାୟୋମ୍ତେ, ଯିଖାରିୟା ଅଡ଼୍ଆଃ ତେ ରୁଆଡ଼୍ ଜାନାଏ ହାର୍ ଇନିଜାଃ କୁଡ଼ି ହୋଡ଼ମୋ ରେ ତାଇନ୍ ଜାନାଏ।

ଚିମ୍ତାଙ୍ଗ୍ ଏଲିଶିବା ଛାଅ ମାହିନା ରାଃ ହୋଡ଼ମୋ ରେ ତାଇଲେନାଏ, ଦୋ ଏନ୍ ସିର୍ମାଦାସୀ ଇମ୍ତାଗି ଏଲିଶିବା ରାଃ ପେଡ଼ାକୋତାଃ ନେଲ୍ ଜାନାଏ, ଅକନିଜାଃ ନୁତୁମ୍ ମାରିୟାମ୍ ତାଇକେନା। ମାରିୟାମ୍ ଡିଣ୍ଡା କୁଡ଼ି ତାଇକେନାଏ ହାର୍ ଆଣାଦି ଲାଗିନ୍ ଜୋସେଫ୍ ନୁତୁମ୍ ମିୟାଃ କୋଡ଼ା ଲୋଃ ଇନ୍ କିନ୍ଆଃ ଲୋଟାଦାଆ ହୋବାଲେନା। ସିର୍ମାଦାସୀ କାଜିକେଦାଏ,”ଆମ୍ ହୋଡ଼ମୋ ରେ ତାଇନାମ୍ ହାର୍ ମିୟାଃ କୋଡ଼ାହୋନ୍ ଜାନାମିୟାମ୍। ଆମ୍ କେ ଇନିଜାଃ ନୁତୁମ୍ ଯୀଶୁ ମାଣ୍ଡାଅ ମେନାଃ। ଇନିଃ ମାଗାଙ୍ଗ୍-ପେଡ଼େଜାନ୍ ପାର୍ମେଶ୍ଵାର୍ ଗାଃ କୋଡ଼ାହୋନ୍ ହୋବାଅଗାଏ ହାର୍ ସୋବେନ୍ ହୁଲାଙ୍ଗ୍ ସାନ୍ତେ ରାଇଜ୍ ଏୟାଏ।”

ମାରିୟାମ୍ କାଜିକେଦାଏ,”ନେୟା ଚିଲିକା ହୋବାଅଗା, ଚିୟାଃଚି ଇଙ୍ଗ୍ ଡିଣ୍ଡା ଗିୟାଇଙ୍ଗ୍?” ଏନ୍ ସିର୍ମାଦାସୀ ବିଝାଅ କିଜାଏ, “ପାବିତାର୍ ଆତ୍ମା ଆମାଃରେ ହିହୁଗା, ହାର୍ ପାର୍ମେଶ୍ଵାର୍ ରାଃ ପେଡ଼େଏ ଆମ୍ କେ ଉମ୍ବୁଲ୍ ମେୟାଏ। ଏନାମେନ୍ତେ ଏନ୍ ବାଲେଃ ହୋନ୍ ପାବିତାର୍ ହୋବାଃଅ ଆଏ, ହାର୍ ଇନିଃ ପାର୍ମେଶ୍ଵାର୍ ରାଃ ହୋନ୍ କୋଡ଼ା ହୋବାଃଅ ଆଏ।” ସିର୍ମାଦାସୀ ଅକନାଃ ଆଏଃକେ କାଜିଲାଆଏ ଏନାକେ ମାରିୟାମ୍ ବିଶ୍ଵାସ୍ କେଦାଏ।

ନେୟା ହୋବାଃଅ ତାୟୋମ୍ତେ ସେକାଡ଼୍ ଗି, ମାରିୟାମ୍ ସେନ୍ କେତେ ଏଲିଶିବା ଲୋଃ ଭେଟ୍ ଜାନାଏ। ଚିଲ୍ କା ମାରିୟାମ୍ ଇନିଃକେ ଜୋହାର୍ କିଜାଏ, ଏଲିଶିବା ଗାଃ ହୋନ୍ ଆଜାଃ ଲାହେଃ ଭିତାର୍ ରେ ଏନେଃ ଜାନାଏ। ଇନ୍ କିନାଃ ଲାଗିନ୍ତେ ପାର୍ମେଶ୍ଵାର୍ ଅକନାଃ ରିକା ଲାଆଏ ଏନାରେ ଏନ୍‍ ବାରାନ୍ କୁଡ଼ି କିନ୍ ମିଶାତେ ରାଶିକା ଜାନାକିନ୍। ଏଲିଶିବା ଲୋଃ ଆପୀ ମାହିନା ତାଇଯାନ୍ ରାଃ ତାୟୋମ୍ତେ, ମାରିୟାମ୍ ଅଡ଼୍ଆଃତେ ରୁଆଡ଼୍ ଜାନାଏ।

ଏନାରାଃ ତାୟୋମ୍ତେ, ଏଲିଶିବା ଆଜାଃ ହୋନ୍ କେ ଯାନାମ୍ କିଜାଏ। ଜିଖାରିୟା ହାର୍ ଏଲିଶିବା ଏନ୍ ହୋନ୍ ରାଃ ନୁତୁମ୍ ଯୋହାନ୍ ମାଣ୍ଡାଅ କେଦାକିନ୍, ଜେଲେକା ଚି ଏନ୍ ସିର୍ମାଦାସୀ ଆଚୁ ଲେଃକିନାଏ। ଏନ୍ତେ ପାର୍ମେଶ୍ଵାର୍ ଜିଖାରିୟା କେ ବାଖାଣ୍ ଲାଗିନ୍ ପେଡ଼େଏ ଏମ୍ କିଜାଏ। ଇମ୍ତା ଜିଖାରିୟା କାଜିକେଦାଏ, “ପାର୍ମେଶ୍ଵାର୍ ରାଃ ମାନାରାଙ୍ଗ୍ ହୋବାଅଃକା, ଚିୟାଃଚି ଇନିଃ ଆଜାଃ ହୋଡ଼ୋକୋକେ ଦେଙ୍ଗା ଲାଗିନ୍ ମୋନେ ମାଣ୍ଡାଅ କାଦାଏ! ହେ ଇଙ୍ଗ୍ଆଃ ହୋନ୍, ଆମ୍ ସୋବେନ୍ତେ-ପେଡ଼େଜାନ୍ ପାର୍ମେଶ୍ଵାର୍ ରାଃ ନାବୀ ବାୟୋଗାମ୍। ଆମ୍ ହୋଡ଼ୋକୋକେ ଉଦୁବେ ୟାମ୍ ଚି ଇନ୍‍କୁ ଚିଲିକା ଆକୋୱାଃ ପାପ୍ କୋଲାଗିନ୍ ଛାମା ନାମେୟାକୋ!”