23. ୨୩. ୟୀଶୁ ରାଃ ଯାନାମ୍

ଯୋଶେଫ୍ ନୁତୁମ୍ ମିୟାଃ ଧାର୍ମି ହୋଡ଼୍ ଲୋଃ ମାରିୟାମ୍ ଗାଃ ଲୋଟାଦାଆ ହୋବାଛାବାଲେନା। ଚିମ୍ତାଙ୍ଗ୍ ଇନିଃ ଆୟୁମ୍ କେଦାଏ ଚି ମାରିୟାମ୍ ହୋଡ଼ମୋ ରେ ମେନିଯା ଦୋ ଇନିଃ ସାରିତାଇନାଏ ଚି ଇନିଃ ଆଜାଃ ହୋନ୍ ନାହାଲାଏ। ମେନ୍ଦୋ, ଇନିଃ ମାରିୟାମ୍ କେ ବାଦ୍ନାମ୍ କାଏ ସାନାଙ୍ଗ୍ ତିନା, ଏନାଲାଗିନ୍ ଇନିଃ ଇନିଃଜାଃ ଚେତାନ୍ ରେ ଦାୟା ଲାଗିନ୍ ହାର୍ ଇନିଃ କେ ହାପା-ହାପା ବାଗେ ଲାଗିନ୍ ପାହୋମ୍ କେଦାଏ। ମେନ୍ଦୋ ନେୟାରାଃ ସୀଦା ଚି ଇନିଃ ନେକା ରିକାଏତେୟାଏ, ମିୟାଃ ସିର୍ମାଦାସୀ ଇନିଜାଃ କୁମୁରେ ହିଜୁଃକେତେ ଇନିଃଲୋଃ ବାଖାଣ କେଦାଏ।

ସିର୍ମାଦାସୀ କାଜିକେଦାଏ, “ହେ ଯୋଶେଫ୍, ମାରିୟାମ୍ କେ ଅମାଃ କୁଡ଼ି ବାଇ ଲାଗିନ୍ ଆଲୋମ୍ ବୋରୋୟା। ଇନିଜାଃ ଲାହେଃରେ ଅକନ୍ ହୋନ୍ ମେନିଯା ଇନିଃ ପାବିତାର୍ ଆତ୍ମା ପାଡ଼୍ ଏତେ ତାନିଃ। ଇନିଃ ମିୟାଃ ହୋନ୍ କୋଡ଼ା କେ ଯାନାମ୍ ଇୟାଏ। ଇନିଜାଃ ନୁତୁମ୍ ୟୀଶୁ ମାଣ୍ଡାଅ ଏମେ {ନେୟାରାଃ ଆର୍ତ ତାନାଃ, ‘ପାର୍ମେଶ୍ଵାର୍ ବାଞ୍ଚାଅ ଆଏ’}, ଚିୟାଃଚି ଇନିଃ ହୋଡ଼ୋକୋକେ ଆକୋୱାଃ ପାପ୍ ଏତେ ବାଞ୍ଚାଅ କୋୱାଏ।”

ଏନ୍ତେ, ଯୋଶେଫ୍ ମାରିୟାମ୍ କେ ଆଣାଦି ଜାନାଏ ହାର୍ ଇନିଃକେ ଆଜାଃ କୁଡ଼ି ବାଇକେତେ ଅଡ଼୍ଆଃ ଆଉଲିଯାଏ, ମେନ୍ଦୋ ଇନିଜାଃ ହୋନ୍ ଯାନାମ୍ ସାନ୍ତେ ଯୋଶେଫ୍ ମାରିୟାମ୍ ଲୋଃ କାଏ ଗିତିଃ ଜାନା।

ଚିମ୍ତାଙ୍ଗ୍ ମାରିୟାମ୍ କେ ବୁଗିୟୋଃ ରାଃ ସାମାୟ୍ ନାଡ଼େଏ ହିଜୁଃ ଲେନା, ଦୋ ଇନିଃ ହାର୍ ଯୋଶେଫ୍ ବାଇତୁଲାମ୍ ସାହାର୍ ତେ ସେନ୍ ଲାଗିନ୍ ମିୟାଃ ସାଙ୍ଗିନ୍ ହୋରା ସେନ୍ ଏଟେଃ କେଦାକିନ୍। ଇନ୍ କିନ୍ କେ ଏନ୍ତାଃ ସେନ୍ ଗି ତାଇକେନା ଚିୟାଃଚି ରୋମ୍ ସାର୍କାର୍ ଇସ୍ରାଏଲ୍ ଦିଶୁମ୍ ରେନ୍ ସୋବେନ୍ ହୋଡ଼ୋକୋକେ ଲେକାଲାଗିନ୍ ସାନାଙ୍ଗ୍ ତାଇନାଏ। ଇନ୍‍କୁ ସାନାଙ୍ଗ୍ ତିନାକୋ ଚି ସୋବେନ୍ ହୋଡ଼ୋକୋ ଏନ୍ତାଃ ସେନ୍ କାକୋ ଅକତାଃରେ ଇନ୍‍କୁୱାଃ ପୁର୍ଖାକୋ ତାଇନ୍ ତିନାକୋ। ଦାଉଦ୍ ରାଜା ଗାଃ ଯାନାମ୍ ବାଇତୁଲାମ୍ ସାହାର୍ ରେ ହୋବାଲେନା। ହାର୍ ଇନିଃ ମାରିୟାମ୍ ହାର୍ ଯୋଶେଫ୍ ବାରାନ୍ କିନାଃ ପୁର୍ଖା ହାଡ଼ାମ୍ ତାଇକେନାଏ।

ମାରିୟାମ୍ ହାର୍ ଯୋଶେଫ୍ ବାଇତୁଲାମ୍ ସାହାର୍ ସେଟେର୍ ଯାନାକିନ୍, ମେନ୍ଦୋ ଇନ୍ କିନାଃ ତାଇନ୍ ଲାଗିନ୍ ଜାଗା କା ତାଇକେନା। ପାଶୁକୋ ତାଇନ୍ ଗୋଣାରେ ଇନ୍ କିନ୍ ଜାଗା ନାମ୍ କେଦାକିନ୍। ମାରିୟାମ୍ ଆଜାଃ ହୋନ୍ କେ ଏନ୍ ଜାଗା ରେଗି ଯାନାମ୍ କିଜାଏ। ଇନ୍ କିନ୍ ଏନ୍ ହୋନ୍ କେ ଉରିଃକୋୱାଃ ଡାଡ୍‍କା ରେ ଗିତିଃ ତିଜାକିନ୍ ଚିୟାଃଚି ଏନ୍ତାଃରେ ଇନିଜାଃ ଲାଗିନ୍ ଜେତାନ୍ ଗିଇଃଜାଟି କା ତାଇକେନା। ଇନ୍ କିନ୍ ଇନିଜାଃ ନୁତୁମ୍ ୟୀଶୁ ମାଣ୍ଡାଅ କେଦାକିନ୍।

ଏନ୍ ନୁବାଃ, ଏନ୍ତାଃ ନାଡ଼େଏ ରାଃ ପୀଡ଼ିରେ ଚିମିନ୍ ଗୁପିକୋ ଆକୋୱାଃ ମିଣ୍ଡିକୋକେ ହୋରୋ ତିନାକୋ। ଇମ୍ତାଗି, ମିୟାଃ ସିର୍ମାଦାସୀ ମାସ୍କାଲ୍ ଲୋଃ ଏନ୍ତାଃରେ ନେଲ୍ ଜାନାଏ, ହାର୍ ଇନ୍‍କୁ ବୋରୋଜାନାକୋ। ଏନ୍ ସିର୍ମାଦାସୀ କାଜିକେଦାଏ, “ଆଲୋପେ ବୋରୋୟା, ଚିୟାଃଚି ଇଙ୍ଗ୍ଆଃ ତାଃ ଆପେୟାଃ ଲାଗିନ୍ ବୁଗିନ୍ କାଜି ମେନାଗା। ବାଇତୁଲାମ୍ ସାହାର୍ ରେ ମାସୀହ୍, ଯାନାମ୍ କାନାଏ!”

“ସେନ୍ କେତେ ଏନ୍ ବାଲେଃ ହୋନ୍ କେ ଦାଣାଇପେ, ହାର୍ ଆପେ ଇନିଃ କେ ଲିଜାଃରେ ଉୟୁକାନ୍ ଲୋଃ ହାର୍ ଡାଡ୍‍କା ରେ ଗିତିଃ କାନ୍ ନାମିୟାପେ।” ଇମ୍ତାଗି, ରିମିଲ୍ ଦିଶୁମ୍ ସିର୍ମାଦାସୀକୋତେ ଫେରେଃ ଜାନାକୋ। ଇନ୍‍କୁ ପାର୍ମେଶ୍ଵାର୍ ମାନାରାଙ୍ଗ୍ ତିନାକୋ। ଇନ୍‍କୁ କାଜିତିନାକୋ, “ସୋବେନ୍ ମାନାରାଙ୍ଗ୍ ସିର୍ମାଦିଶୁମ୍ ରେ ତାଇନ୍ ପାର୍ମେଶ୍ଵାର୍ କେ ନାମୋଃକା। ଅତେଦିଶୁମ୍ ରେ ଏନ୍ ହୋଡ଼ୋକୋ ଲାଗିନ୍ ଶାନ୍ତି ହୋବାଅଃକା ଅକୋନ୍ କୋ ନାଙ୍ଗ୍ ଇନିଃ ପାହୋମ୍ କାତେୟାଏ।”

ଏନ୍ତେ ସିର୍ମାଦାସୀକୋ ସେନୋଃ ଜାନାକୋ। ଏନ୍ ମିଣ୍ଡୀଗୁପି କୋ ଆକୋୱାଃ ମିଣ୍ଡିକୋକେ ବାଗେ କେତେ ବାଲେଃ ହୋନ୍ କେ ନେଲ୍ ଲାଗିନ୍ ସେନ୍ ଜାନାକୋ। ସେକାଡ଼୍ ଗି ଇନ୍‍କୁଏନ୍ ଜାଗାରେ ସେଟେର୍ ଯାନାକୋ ହାର୍ ଇନ୍‍କୁ ଇନିଃକେ ଗୋଣା ରାଃ ଡାଡ୍‍କାରେ ଗିତିଃକାନ୍ ନେଲ୍ କିଜାକୋ, ଜେଲେକା ଚି ଏନ୍ ସିର୍ମାଦାସୀ କାଜିଲେଦାଏ। ଇନ୍‍କୁ ଥିମ୍ବାଗି ରାଶିକାନ୍ ତାଇକେନାକୋ। ଏନ୍ତେ ଏନ୍ ମିଣ୍ଡୀ ଗୁପିତାନ୍ କୋ ଏନ୍ତା ରୁଆଡ଼୍ ଜାନାକୋ ଅକୋତାଃ ଇନ୍‍କୁୱାଃ ମିଣ୍ଡୀକୋ ତାଇକେନାକୋ। ଇନ୍‍କୁ ଅକନାଃକୋ ଆୟୁମ୍ ଲାଆକୋ ହାର୍ ନେଲ୍ ଲେଦାକୋ ଏନ୍ ସୋବେନ୍ ଲାଗିନ୍ ଇନ୍‍କୁ ପାର୍ମେଶ୍ଵାର୍ ରାଃ ମାନାରାଙ୍ଗ୍ ତିନାକୋ।

ପୁର୍ବ୍ ପାଡ଼୍ ସାଗିନ୍ ମିୟାଃ ଦିଶୁମ୍ ରେନ୍ ଚିମିନ୍ ପାଣ୍ଡିତ୍ କୋ ତାଇକେନାକୋ। ଇନ୍‍କୁ ଇପିଲ୍ କୋକେ ପାଢ଼ାଅ ସାରିଲେନାକୋ ହାର୍ ଇନ୍‍କୁ ଥିମ୍ବାଗି ସେଣାନ୍ ତାଇକେନାକୋ। ଇନ୍‍କୁ ମିୟାଃ ଆସାଧାରାନ୍ ଇପିଲ୍ କେ ରିମିଲ୍ ଦିଶୁମ୍ ରେ ନେଲ୍ କିଜାକୋ। ଇନ୍‍କୁ କାଜିକେଦାକୋ ଚି ନେୟାରାଃ ଆର୍ଥ ତାନାଃ ଯେ ୟାହୁଦୀ କୋୱାଃ ମିୟାଃ ନାୱା ରାଜା ରାଃ ଯାନାମ୍ ହୋବାକାନା। ଏନାଲାଗିନ୍ ଇନ୍‍କୁ ଏନ୍ ବାଲେଃ ହୋନ୍ କେ ନେନେଲ୍ ଲାଗିନ୍ ଆକୋୱାଃ ଦିଶୁମ୍ ଏତେ ସେସେନ୍ ଏଟେଃ ଲାଗିନ୍ ସାନାଙ୍ଗ୍ କେଦାକୋ। ମିୟାଃ ଜିଲିଙ୍ଗ୍ ହୋରା ସେନ୍ ତାୟୋମ୍ତେ, ଇନ୍‍କୁ ବାଇତୁଲାମ୍ ହିଜୁଃ ନାନାକୋ ହାର୍ ଏନ୍ ଅଡ଼୍ଆଃକେ ନାମ୍ କେଦାକୋ ଅକତାଃରେ ୟୀଶୁ ହାର୍ ଇନିଜାଃ ଏଙ୍ଗା-ଆପୂକିନ୍ ତାଇନ୍ କେନାକିନ୍।

ଚିମ୍ତାଙ୍ଗ୍ ଏନ୍ ପାଣ୍ଡିତ୍ କୋ ୟୀଶୁ କେ ଆଜାଃ ଏଙ୍ଗା ଲୋଃ ନେଲ୍ କିଜାକୋ ଦୋ ଇନ୍‍କୁ ଇକ୍‍ଡ଼ୁମ୍ କେତେ ଇନିଜାଃ ଆରାଧାନା କେଦାକୋ। ଇନ୍‍କୁ ୟୀଶୁ କେ ଗୋନୋଙ୍ଗାନ୍ ଜିନିଷ୍ କୋ ଭେଟ୍ କିଜାକୋ। ଆଡୋଃ ଇନ୍‍କୁ ଆକୋୱାଃ ଅଡ଼୍ଆଃତେ ରୁଆଡ଼୍ ଜାନାକୋ।