25. ୨୫. ଶାଏତାନ୍ ୟୀଶୁକେ ପାରିକ୍ଷା

ୟୀଶୁ ବାପ୍ତିସ୍ମା ଇଦି ରାଃ ତାୟୋମ୍ତେ ସେକାଡ଼୍ ଗି, ପାବିତାର୍ ଆତ୍ମା ଇନିଃକେ ଟୋନାଙ୍ଗ୍ ରେ ଇଦିକିଜାଏ। ୟୀଶୁ ଏନ୍ତାଃରେ ଚାଲିସ୍ ଦିନ୍ ହାର୍ ଚାଲିସ୍ ନିଦା ତାଇକେନାଏ। ଏନ୍ ସାମାୟ୍ ଇନିଃ ଉପାସ୍ କେଦାଏ, ହାର୍ ଶାଇତାନ୍ ୟୀଶୁ ରାଃ ନାଡ଼େଏ ହିଜୁଃକେତେ ପାପ୍ ରିକାଲାଗିନ୍ ଇନିଃକେ ପାରିକ୍ଷା କେଦାଏ।

ସୀଦା, ଶାଏତାନ୍ ୟୀଶୁକେ କାଜିକିଜାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ କୋଡ଼ା ତାନ୍ ମେ ରେଦୋ ନେ ଦିରି କେ ହୋଲୋଙ୍ଗ୍ ବାଇତାମେ ଏନାତେ ଆମ୍ ଜୋମ୍ ଦାଡ଼ିୟାମ୍!”

ମେନ୍ଦୋ ୟୀଶୁ ଶାଏତାନ୍ କେ କାଜିକିଜାଏ, “ପାର୍ମେଶ୍ଵାର୍ ରାଃ ବାଚାନ୍ ରେ ନେୟା ଅଲାକାନା, ‘ଜିହିଃ ତାଇଲାଗିନ୍ ହୋଡ଼ୋକୋକେ ହୋଲୋଙ୍ଗ୍ ରାଃ ଭାଇର୍ ଦାର୍କାର୍ ବାନୋଃ, ମେନ୍ଦୋ ଇନ୍‍କୁକେ ସୋବେନ୍ ଏନ୍ କାଜି ରାଃ ଦାର୍କାର୍ ମେନାଃ ଅକନାଃ ପାର୍ମେଶ୍ଵାର୍ ଇନ୍କୁ କେ କାଜିକୋୱାଏ!”

ଏନ୍ତେ ଶାଏତାନ୍ ୟୀଶୁ କେ ମାନ୍ଦିର୍ ରାଃ ଚୁଟାତେ ଇଦିକିଜାଏ। ଇନିଃ ୟୀଶୁ କେ କାଜିକିଜାଏ, “ଆଗାର୍ ଆମ୍ ପାର୍ମେଶ୍ଵାର୍ ରାଃ ହୋନ୍ କୋଡ଼ା ତାନ୍ ମେ ଏଣ୍ଡେ ନେତାଃଏତେ ଲାଥାର୍ ଦନ୍ ତାମେ, ଚିୟାଃଚି ଅଲାକାନା, ’ପାର୍ମେଶ୍ଵାର୍ ଆମ୍ କେ ତେଲାଲାଗିନ୍ ଆଜାଃ ସିର୍ମାଦାସୀ କୋକେ ଆଚୁକୋୱାଏ ଚି ଆମାଃ କାଟାରେ ଦିରି କା ଠୋଗୋଗା।”

ମେନ୍ଦୋ ୟୀଶୁ ଏନାକେ କାଏ ରିକାକେଦାଏ ଅକନାଃ ଶାଏତାନ୍ ଇନିଃକେ ରିକାଲାଗିନ୍ କାଜିଲିଯାଏ। ଏନାକେ ବାଗିକେତେ ଇନିଃ କାଜିକେଦାଏ, “ପାର୍ମେଶ୍ଵାର୍ ସୋବେନ୍ କୋକେ କାଜିତାନାଏ, ’ଆମ୍ ପ୍ରାଭୂ ଆମାଃ ପାର୍ମେଶ୍ଵାର୍ କେ ଆଲୋମେ ପାରିକ୍ଷା ୟା।’’

ଏନ୍ତେ ଶାଏତାନ୍ ଇନିଃକେ ଅତେଦିଶୁମ୍ ରାଃ ସୋବେନ୍ ରାଇଜ୍ ଦେଖାଅ କିଜାଏ। ଇନିଃ ଆଏଃକେ ଦେଖାଅ କିଜାଏ ଯେ ଏନାକୋ ଚିମିନ୍ ପେଡ଼େଜାନ୍ ମେନାଃ, ହାର୍ ଏନାକୋ ଚିମିନ୍ ଧାନ୍ ସାମ୍ପାତି ତେ ଫେରେଃ ମେନାଃ। ଇନିଃ ୟୀଶୁକେ କାଜିକିଜାଏ, “ଇଙ୍ଗ୍ ଆମ୍ କେ ନେୟା ସୋବେନାଃ ଏମାମିଙ୍ଗ୍ ଆଗାର୍ ଆମ୍ ଇଙ୍ଗ୍ କେ ଇକ୍ ଡ଼ୁମ୍ କେତେ ଇଙ୍ଗ୍ଆଃ ଆରାଧାନ୍ ୟାମ୍।”

ୟୀଶୁ କାଜିକିଜାଏ, “ହେ ଶାଏତାନ୍, ଇଙ୍ଗ୍ଆଃ ନାଡ଼େଏ ତେ ସେନୋଃମେ! ପାର୍ମେଶ୍ଵାର୍ ରାଃ ବାଚାନ୍ ରେ ଇନିଃ ହୋଡ଼ୋକୋକେ ଆଚୁ କୋତାନାଏ,’ସାଦାଏ ଆମାଃ ପ୍ରାଭୂ ପାର୍ମେଶ୍ଵାର୍ କେ ଭାଇର୍ ଆରାଧାନା ଇମେ। ପାର୍ମେଶ୍ଵାର୍ ରାଃ ରୁପ୍ ରେ ସାଦାଏ ଇନିଃକେଗି ମାଇନ୍ ଇମେ।‘ ”

ୟୀଶୁ ଶାଏତାନ୍ ରାଃ ପାରିକ୍ଷା ତେ କାଏ ହାରାଅ ଜାନା, ଏନାଲାଗିନ୍ ଶାଏତାନ୍ ୟୀଶୁ ରାଃ ନାଡ଼େଏ ତେ ନିର୍ ଜାନାଏ। ଏନ୍ତେ ସିର୍ମାଦାସୀକୋ ହିଜୁଃକେତେ ୟୀଶୁ ରାଃ ସେୱାଃ କେଦାକୋ।