28. ୨୮. କିଶାଣ୍ ଜାୱାନ୍ ରାଇଜ୍ ନିଃ(ହାକିମ୍)

ମୂଷିଙ୍ଗ୍, ମିହୋଡ଼୍ କିଶାଣ୍ ଜାୱାନ୍ ରାଇଜ୍ ତାନ୍ ନିଃ ୟୀଶୁ ରାଃ ନାଡ଼େଏ ହିଜୁଃକେତେ ଇନିଃକେ କୁଲିକିଜାଏ, “ହେ ବୁଗିନ୍ ଗୁରୁ, ଜାନାଓ ଜୀଦାନ୍ ନାମେ ଲାଗିନ୍ ଇଙ୍ଗ୍ କେ ଚିନାଃ ରିକା ପାଡ଼ାଅଃୱା?” ୟୀଶୁ ଇନିଃ କେ କୁଲିକିଜାଏ, ଆମ୍ ଇଙ୍ଗ୍ କେ ‘ବୁଗିନ୍’ ଚିନ୍ଆଃ ମେନ୍ତେ କାଜିଙ୍ଗ୍ ତାନାମ୍? ମେନ୍ଦୋ ମିହୋଡ଼୍ ଗି ବୁଗିନ୍ ମେନିଯା ହାର୍ ଇନିଃ ପାର୍ମେଶ୍ଵାର୍ ତାନିଃ। ମେନ୍ଦୋ ଆଗାର୍ ଆମ୍ ଜାନାଓ ଜୀଦାନ୍ ନାମ୍ ସାନାଙ୍ଗ୍ ରେଦୋ ପାର୍ମେଶ୍ଵାର୍ ରାଃ ନିୟାମ୍ କୋ ମାନାତିଙ୍ଗ୍ ଏମେ।”

ଇନିଃ କୁଲିରୁଆଡ଼୍ କିଜାଏ, “ଇଙ୍ଗ୍ କେ ଅକନାଃ-ଅକନାଃ ଆନାଚୁ କୋକେ ମାନାତିଙ୍ଗ୍ ରାଃ ମେନାଃ?” ୟୀଶୁ କାଜିକିଜାଏ, “ହୋଡ଼୍ ଆଲୋମ୍ ଗୋଗୋଏଃଜା। ଆଲୋମ୍ ଚର୍ହାୟା। ଆଲୋମ୍ ବ୍ୟବିଚାର୍ ଏ। ଆଲୋମ୍ ଲୋଗୋଆ। ଆମାଃ ଏଙ୍ଗା-ଆପୁ କିନାଃ ଜାତାନ୍ ଦୁଲାଡ଼୍ କିନ୍ ମେ, ହାର୍ ଆମାଃ ନାଡ଼େଏ-ଜାପାଃ କୋକେ ଆପାନାଃ ଲେକା ଦୁଲାଡ଼୍ କୋମେ।”

ମେନ୍ଦୋ ଏନ୍ ଜାୱାନ୍ କୋଡ଼ା କାଜିକେଦାଏ, “ଇଙ୍ଗ୍ ଦୋ ହୋନ୍ ସାମାୟ୍ ଏତେ ଗି ନେ ସୋବେନ୍ ଆନାଚୁ କୋକେ ମାନାତିଙ୍ଗ୍ ହିଜୁଃ ତାନିଙ୍ଗ୍। ଇଙ୍ଗେ ସୋବେନ୍ ହୁଲାଙ୍ଗ୍ ଜିହିଃ ତାଇନ୍ ଲାଗିନ୍ ନାଆଅଗି ଚିନାଃ ରିକାଇଙ୍ଗ୍?” ୟୀଶୁ ଇନିଃକେ ନେଲ୍ କିଜାଏ ହାର୍ ଆଏଃକେ ଦୁଲାଡ଼୍ କିଜାଏ।

ୟୀଶୁ କାଜିରୁଆଡ଼ କିଜାଏ, “ଆଗାର୍ ଆମ୍ ସିଦ୍ଧ ହୋବାଅଃ ସାନାଙ୍ଗ୍ ତାନାମ୍ ରେଦୋ ସେନ୍ କେତେ ଆମାଃ ସୋବେନ୍ ତେୟାଃକେ ଆଖ୍ରିଙ୍ଗ୍ ତାମ୍ ହାର୍ ଏନ୍ ଧାନ୍ କୋକେ ଗାରିବ୍ ହୋଡ଼ୋ କୋକେ ହାଟିଙ୍ଗ୍ ତାକୋମ୍, ହାର୍ ଆମ୍ କେ ସିର୍ମା ରେ ଧାନ୍ ନାମୋଗା। ଏନ୍ତେ ଜିଜୁଃ କେତେ ଇଙ୍ଗ୍ କେ ଅତୋଙ୍ଗ୍ ଙ୍ଗିଙ୍ଗ୍ ମେ।”

ଅକନାଃ ୟୀଶୁ କାଜିଲାଆଏ ଏନାକେ ଏନ୍ ଜାୱାନ୍ ହୋଡ଼୍ ଆୟୁମ୍ କେଦାଏ ଦୋ ଇନିଃ ଥିମ୍ବାଗି ଉଦାଷ୍ ଜାନାଏ, ଚିୟାଃଚି ଇନିଃ ଥିମ୍ବାଗି ଧାନୀ ତାଇକେନାଏ ହାର୍ ଇନିଃ ଆଜାଃ ସୋବେନ୍ ସାମ୍ପାତି କୋକେ ଏମ୍ କାଏ ସାନାଙ୍ଗ୍ ତିନା। ଇନିଃ ମେଃଏ ମୁହାଡ୍ କେ ତିରୁପ୍ କେତେ ୟୀଶୁ ରାଃ ନାଡ଼େଏ ତେ ସେନୋଃ ଜାନାଏ।

ଏନ୍ତେ ୟୀଶୁ ଆୟାଃ ଚେଲା କୋକେ କାଜିକେଦାଏ, “ପାର୍ମେଶ୍ଵାର୍ ରାଃ ରାଇଜ୍ ରେ ଧାନୀ ହୋଡ଼୍ କୋକେ ବୋଲୋଲାଗିନ୍ତେ ଥିମ୍ବାଗି କାଠିନ୍ ମେନାଃ! ହାଁ, ମିୟାଃ ଧାନୀ ହୋଡ଼ ପାର୍ମେଶ୍ଵାର୍ ରାଃ ରାଇଜ୍ ରେ ବୋଲୋତେୟାଃ କେ ଜୋକା ଲେରେ ଯାହାନ୍ ଉଟ୍ କେ ସୁଇ ରାଃ ଉଣ୍ଡୁଃ ରେ ବୋଲୋ କେତେ ଅଡୋଙ୍ଗ୍ ତେୟାଃ ସାହାଜ୍ ତାନାଃ।”

ଅକନାଃ ୟୀଶୁ କାଜିକେଦାଏ ଏନାକେ ଚେଲାକୋ ଚିମ୍ତାଙ୍ଗ୍ ଆୟୁମ୍ କେଦାକୋ ଦୋ ଇନ୍‍କୁ ଆକ୍ ଦାନ୍ଦା ଜାନାକୋ। ଇନ୍‍କୁ କାଜିକେଦାକୋ, ଆଗାର୍ ନେୟା ନେକା ମେନାଃ ରେଦୋ ପାର୍ମେଶ୍ଵାର୍ ଅକଏ କେ ବାଚାଇୟାଏ?”

ୟୀଶୁ ଚେଲାକୋୱା ପାଡ଼୍ ନେଲ୍ କେଦାଏ ହାର୍ କାଜିକେଦାଏ, “ହୋଡ଼ୋକୋ ଆକୋ ଆପାନ୍ କେଗି ବାଞ୍ଚାଅ ଲାଗିନ୍ ମୁସ୍କିଲ୍ ଗିଆ। ମେନ୍ଦୋ ପାର୍ମେଶ୍ଵାର୍ ଲାଗିନ୍ ଜେତାନ୍ ତେୟାଃ ମୁସ୍କିଲ୍ ବାନୋଗା।”

ପାତ୍ରାସ୍ ୟୀଶୁ କେ କାଜି କିଜାଏ, “ଆଲେ ସୋବେନ୍ ଚେଲା ଆଲେୟାଃ ସୋବେନାଃ କେ ବାଗିକେତେ ଆମାଃ ତାୟୋମ୍ ଅତୋଙ୍ଗ୍ କାଃମେୟାଲେ। ଦୋ ଆଲେୟାଃ ନାଲା ଚିନାଃ ହୋବାଅଃୱା?”

ୟୀଶୁ କାଜିରୁଆଡ଼ କେଦାଏ, “ଜାହାଁଏ ଗି ଇଙ୍ଗ୍ ଆଃ ଲାଗିନ୍ ଅଡ଼୍ଆଃ, ହାଗା, ମିଶି, ଏଙ୍ଗା, ଆପୁ, ହୋନ୍ କୋ ୟାଦୋ ସାମ୍ପାତି କୋକେ ବାଗେ କାଦାଏ, ଇନିଃ ଏନାଏତେ ୧୦୦ ଗୁନା ଥିମ୍ବା ନାମେୟାଏ ହାର୍ ଜାନାଓ ଜୀଦାନ୍ ଅଗି ନାମେୟାଏ। ମେନ୍ଦୋ ଥିମ୍ବାଗି ଅକନ୍ କୋ ଆୟୁର୍ ମେନାକୋୱା ଇନ୍‍କୁ ତାୟୋମ୍ କେନୋଗାକୋ, ହାର୍ ଥିମ୍ବାଗି ଅକନ୍ କୋ ତାୟୋମ୍ ରେ ମେନାକୋୱା ଇନ୍‍କୁ ଆୟୁର୍ ହୋବାଅୱାକୋ।