30. ୩୦. ୟୀଶୁ ପାଞ୍ଚ୍ ହାଜାର୍ ହୋଡ଼ୋକୋକେ ଖିୟାଅ କୋତାନାଏ

ୟୀଶୁ ଆଜାଃ କୁଲାକାନ୍ ଚେଲାକୋକେ ପାର୍ଚାର୍ ଲାଗିନ୍ତେ ହାର୍ ହୋଡ଼ୋକୋକେ ସିଖାଅ ଏମ୍ ଲାଗିନ୍ ଏଟାଃ-ଏଟାଃ ଥିମ୍ବା ହାତୁକୋରେ କୁଲ୍ କେଃକୋୱାଏ। ଅକତାଃ ୟୀଶୁ ତାଇକେନାଏ ଏନ୍ତାଃ ଇନ୍‍କୁ ରୁଆଡ଼୍ ଜାନାକୋ ଦୋ ଇନ୍‍କୁ ଇନିଃକେ ଉଦୁବ୍ କିଜାକୋ ଚି ଇନ୍‍କୁ ଚିନାଃ-ଚିନାଃ ରିକା ଲେଦାକୋ। ଏନ୍ତେ ୟୀଶୁ ଇନ୍‍କୁକେ ସାମୁଦାର୍ ରାଃ ଏଟାଃ ଫାରୋମ୍ ପାଡ଼୍ ଇନ୍‍କୁୱାଃ ଲୋଃ ମିୟାଃ ସୁନ୍ ଶାନ୍ ଜାଗାରେ ସେନ୍ କେତେ କାଟୀଃ ସାମାୟ୍ ସାଥାଅନ୍ ଲାଗିନ୍ କେଡ଼ା କେଃକୋୱାଏ। ଏନ୍ତେ: ଇନ୍‍କୁ ମିୟାଃ ଡୋଙ୍ଗାରେ ଚେତାନ୍ ଦୁବ୍ ଜାନାକୋ ହାର୍ ସାମୁଦାର୍ ରାଃ ଏଟାଃ ଫାରୋମ୍ ସେନ୍ ଜାନାକୋ।

ମେନ୍ଦୋ ଏନ୍ତାଃରେ ନେକାନ୍ ହୋଡ଼ୋକୋ ତାଇକେନାକୋ ଅକନ୍ କୋ ୟୀଶୁ ହାର୍ ଚେଲାକୋକେ ଡୋଙ୍ଗାରେ ସେନ୍ ତାନ୍ ନେଲ୍ ଲାଆକୋ। ନେ ହୋଡ଼ୋକୋ ଇନିଜାଃ ଆୟୁର୍ ସେନ୍ ଫାରୋମ୍ ଲାଗିନ୍ ସାମୁଦାର୍ ରାଃ ଗେନା-ଗେନାତେ ନିର୍ କେଦାକୋ। ଏନ୍ତେ: ଚିମ୍ତାଙ୍ଗ୍ ୟୀଶୁ ହାର୍ ଆଜାଃ ଚେଲାକୋ ସେଟେର୍ ଜାନାକୋ ଦୋ ମିଃଥିମ୍ବା ହୋଡ଼ୋକୋୱାଃ ଭିଡ଼୍ ଇନିଃକେ ତାଙ୍ଗୀତାନ୍ ଏନ୍ତାଃରେ ଶୀଦାରେ ତାଇକେନାକୋ।

ଏନ୍ ଭିଡ଼୍ ରେ କୁଡ଼ିକୋ ହାର୍ ହୋନ୍ କୋକେ କାଲେକାକେତେ ୫,୦୦୦ ତେ ଥିମ୍ବାଗି କୋଡ଼ାକୋ ତାଇକେନାକୋ। ୟୀଶୁ ଏନ୍ ହୋଡ଼ୋକୋୱାଃ ରେ ମାରାଙ୍ଗ୍ ଦାୟା ହିଜୁଃଲେନା। ୟୀଶୁ ଲାଗିନ୍ ଇନ୍‍କୁ କାଗୁପିତାନ୍ ମିଣ୍ଡିକୋ ଲେକା ତାଇକେନାକୋ। ଏନାଲାଗିନ୍ ଇନ୍‍କୁକେ ସିଖାଅ କେଃକୋୱାଏ ହାର୍ ଇନ୍‍କୁୱାଃ ଭିତାର୍ ଅକନ୍ କୋ ବିମାର୍ ରେ ତାଇକେନାକୋ ଇନ୍‍କୁକେ ଚାଙ୍ଗାଇ କେଃକୋୱାଏ।

ଶିଙ୍ଗୀ ଡୁବିଜୋଃ ସାମାୟ୍ ରେ, ଚେଲାକୋ ୟୀଶୁକେ କାଜିକିଜାକୋ, “ନାଆ ଦେରି ଜାନା ହାର୍ ନାଡ଼େଏ-ଜାପାଃରେ ଜେତାନ୍ ଟୋଲା ହ ବାନୋଗା। ନେ ହୋଡ଼ୋକୋକେ ବିଦାତାକୋମ୍ ଚି ଇନ୍‍କୁ ସେନ୍ କେତେ ଯୋଜୋମାଃ ନାମ୍ ଧାଡ଼ିୟାକୋ।”

ମେନ୍ଦୋ ୟୀଶୁ ଚେଲାକୋକେ କାଜିକେଦାଏ, “ଆପେ ଇନ୍‍କୁକେ ଯୋମ୍ ଲାଗିନ୍ ଯାହାନାଃ ଏମାକୋପେ!” ଇନ୍‍କୁ କାଜିକେଦାକୋ, “ଆଲ ନେକା ଚିଲ୍‍କା ରିକାଧାଡ଼ିୟାଲେ? ଆଲେୟାଃ ତାଃ ପାଞ୍ଚ୍ ଠୁର୍ ହୋଲୋଙ୍ଗ୍ ହାର୍ ବାରିୟା ହୁଡିଙ୍ଗ୍ ହାକୁ ଭାଇର୍ ମେନାଃ।”

ୟୀଶୁ ଆଜାଃ ଚେଲାକୋକେ କାଜିକେଦାଏ ଚି ଏନ୍ ଭିଡ଼ ରେନ୍ ହୋଡ଼ୋକୋକେ ତାସାଃରେ ପାଚାଶ୍-ପାଚାଶ୍ ପାନ୍ତି-ପାନ୍ତିରେ ଦୁବ୍ କୋପେ ମେନ୍ତେ କାଜିକେଦାଏ।

ଏନ୍ତେ ୟୀଶୁ ପାଞ୍ଚଠୁର୍ ହୋଲୋଙ୍ଗ୍ ହାର୍ ବାରିୟା ହାକୁକେ ଇଦିକେତେ ସିର୍ମାପାଡ଼୍ ନେଲ୍ କେଦାଏ, ହାର୍ ଏନ୍ ଯୋଜୋମାଃ ଲାଗିନ୍ ପାର୍ମେଶ୍ଵାର୍ କେ ଧନ୍ୟାବାଦ୍ ଏମ୍ କେଦାଏ।

ଆଡୋଃ ୟୀଶୁ ହୋଲୋଙ୍ଗ୍ ହାର୍ ହାକୁକୋକେ ଖାଣ୍ଡାଅ କେଦାଏ। ଇନିଃ ହୋଡ଼ୋକୋକେ ଏମ୍ ଲାଗିନ୍ ଆଜାଃ ଚେଲାକୋକେ ଖାଣ୍ଡାକାନ୍ ତେଆଃ କେ ଇନିଃ ଏମ୍ କେଦାଏ। ଚେଲାକୋ ଏନ୍ ଯୋଜୋମାଃ ତେୟାଃକୋକେ ହାଟିଙ୍ଗ୍ ଲାଗାଅ ଜାନାକୋ, ହାର୍ ଏନା କାଛାବାଜାନା! ସୋବେନ୍ ହୋଡ଼ୋକୋ ଯୋମ୍ କେତେ ବି ଜାନାକୋ।

ଏନା ତାୟୋମ୍ତେ, ଚେଲାକୋ ଏନ୍ ଯୋଜୋମାଃ ତେୟାଃକୋ ହୁଣ୍ଡିକେଦାକୋ ଅକନାଃକେ କାକୋ ଯୋମ୍ ଲାଆ ହାର୍ ଇନ୍‍କୁ ବାରା ଡାଲିରେ ଫେରେଃ କେଦାକୋ! ଏନା ସୋବେନାଃ ଯୋଜୋମାଃ ଏନ୍ ପାଞ୍ଚ୍ ଠୁର୍ ହୋଲୋଙ୍ଗ୍ ହାର୍ ବାରିୟା ହାକୁ ତେ ହିଜୁଃ ଲେନା।