36. ୩୬. ରୂପ୍ ବାଦ୍‍ଲାଓ ଜାନା

ମୁସିଙ୍ଗ୍,ୟୀଶୁ ଆଜାଃ ତିନ୍ ଝାନ୍ ଚେଲା,ପାତ୍ରାସ୍,ୟାକୁବ୍, ହାର୍ ଯୋହାନ୍ କେ ଆଜାଃ ଗାତିରେ ଇଦିକିଜାଏ। (ନେ ଯୋହାନ୍ ନୁତୁମ୍ ଚେଲା ଏନ୍ ହୋଡ଼୍ ନାହାଲାଏ ଅକନିଃ ୟୀଶୁକେ ବାପ୍ତିମା ଏମ୍ ଲିଯାଏ)ଇନିଃ ବିନ୍ତି ଲାଗିନ୍ ମିୟାଃ ସାଲାଙ୍ଗି ବୁରୁ ଚେତାନ୍ ରେ ସେନୋଃ ଜାନାଏ।

ଚିମ୍ତା ୟୀଶୁ ବିନ୍ତି ତାଇନାଏ ଦୋ ଇନିଜାଃ ମେଃମୁହାଡ୍ ଶିଙ୍ଗୀ ଲେକା ମାସ୍କାଲ୍ ଜାନା। ଇନିଜାଃ ଲିଜାଃ ମାର୍ସାଲ୍ ଲେକା ମାସ୍କାଲ୍ ଲେକା ପୁଣ୍ଡୀ ଜାନା, ଅକନାଃ ଅତେଦିଶୁମ୍ ରେ ଜେତାଏ ହୋଡ଼୍ ରିକା କାଏ ଧାଡ଼ିୟାଃ।

ଏନ୍ତେ ମୁଶା ନାବୀ ହାର୍ ଏଲିୟା ନାବୀ ନେଲ୍ ଯାନାକିନ୍। ନେ ହୋଡ଼ୋକିନ୍ ନେନ୍ ଅତେଦିଶୁମ୍ ରେ ନେନ୍ ସାମାୟେ ତେ ସାଓ-ସାଓ ବାରାସ୍ ତେ ସିଦା ତାୟୋଃ ତିନାକିନ୍। ଇନ୍ କିନ୍ ୟୀଶୁଲୋଃ ଆଜାଃ ଗୋନୋଏଃ ବିସାଏରେ ବାଖାଣ୍ ତିନାକିନ୍, ଚିୟାଃଚି ଇନିଃ ସେକାଡ଼୍ ଗି ୟୀରୁଶାଲେମ୍ ସାହାର୍ ରେ ଗୋଜୋଗାଏ।

ଚିମ୍ତା ମୁଶା ନାବୀ ହାର୍ ଏଲିୟା ନାବୀ ୟୀଶୁଲୋଃ ବାଖାଣ୍ ତିନାକିନ୍ ଏନ୍ତେ ପାତ୍ରାସ୍ ୟୀଶୁକେ କାଜିକିଜାଏ, “ଆଲେୟାଃ ଲାଗିନ୍ ନେତାଃ ତାଇନ୍ ବୁଗିନ୍ ତାନାଃ। ଆଲେ ଆପି ମାଣ୍ଡାପ୍ ବାଇୟାଲେ, ମିୟାଃ ଆମାଃ ଲାଇ, ମିୟାଃ ମୁଶା ନାବୀ ଲାଇ, ହାର୍ ମିୟାଃ ଏଲିୟା ନାବୀ ଲାଇ।”ମେନ୍ଦୋ ପାତ୍ରାସ୍ କାଏ ସାରିତିନା ଚି ଇନିଃ ଚିନ୍ଆଃ କାଜିତାନାଏ।

ଚିମ୍ତା ପାତ୍ରାସ୍ ବାଖାଣ୍ ତାଇନାଏ, ଦୋ ମିୟାଃ ମାସ୍କାଲ୍ ରିମିଲ୍ ଲେକା ହିଜୁଃକେତେ ଇନ୍‍କୁୱାଃରେ ହାରୁପ୍ କେଦାଏ। ଆଡୋଃ ରିମିର୍ ତେ ମିୟାଃ କାଜି ହିଜୁଃତାନ୍ ଆୟୁମ୍ କେଦାକୋ। ଇନିଃ କାଜିକେଦାଏ, “ନିଇ ଇଙ୍ଗ୍ଆଃ ହୋନ୍ ତାନିଃ ଅକନିଃକେ ଇଙ୍ଗ୍ ଦୁଲାଡ଼୍ ତାନିଙ୍ଗ୍। ଇନିଜାଃ ଆୟୁମ୍ ଏପେ।”ଏନ୍ ଆପି ଚେଲାକୋ ବୋରୋଜାନାକୋ ହାର୍ ଅତେ ଚେତାନ୍ ରେ ଉୟୁଃ ଜାନାକୋ।

ଏନ୍ତେ ୟୀଶୁ ଇନ୍‍କୁକେ ଜୁଟିଇ କେଦାଏ ହାର୍ କାଜିକେଦାଏ, “ଆରୋପେ ବୋରୋୟା। ବିରିଃ କେନୋଃପେ।” ଚିମ୍ତା ଇନ୍‍କୁ ସୋବେନ୍ ପାଡ଼୍ ନେଲ୍ କେଦାକୋ, ଦୋ ଇନ୍‍କୁ ମିହୋଡ଼୍ ଗି ୟୀଶୁକେ ନେଲ୍ କିଜାକୋ।

ୟୀଶୁ ହାର୍ ଆପିଚେଲା କୋଲୋଃ ଏନ୍ ବୁରୁତେ ରୁଆଡ଼୍ ଲାଥାର୍ ଆଡ୍ ଗୁ ଜାନାକୋ। ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ନାଆଃ ଅକନାଃ ନେତାଃରେ ହୋବାଜାନା ଇନ୍‍କୁୱା କାଜି ବାଖାଣ୍ ଅକଏ ୟଗି ଆଲୋପେ କାଜିୟାଃ। ଇଙ୍ଗ୍ ସେକାଡ଼୍ ଗି ଗୋଏଃ କେନୋଗିଙ୍ଗ୍ ହାର୍ ଆଡୋଃଗି ଜିବିରିଦିଙ୍ଗ୍। ଏନା ତାୟୋମ୍ତେ,ଆପେ ହୋଡ଼ୋକୋକେ ଉଦୁବ୍ କୋପେ।”