4. ୦୪. ଆବ୍ରାହାମ୍ ଲୋଃ ପାର୍ମେଶ୍ଵାର୍ ରାଃ ନିୟାମ୍‍ଥଲ୍

ବାଇଡ଼୍ ହିଜୁଃ ରାଃ ଚିମିନ୍ ବାରାସ୍ ରାଃ ତାୟୋମ୍ତେ, ଅତେଦିଶୁମ୍ ରେ ଥିମ୍ବାଗି ହୋଡ଼ୋକୋ ତାଇନ୍ ତାଇନାକୋ, ହାର୍ ଇନ୍‍କୁ ଆଡୋଃଗି ପାର୍ମେଶ୍ଵାର୍ ରାଃ ହାର୍ ମିହୋଡ଼୍ ଏଟାଃ ନିଜାଃ ରାଃ ବିରୁଦ୍ଦ୍ ରେ ପାପ୍ କେଦାକୋ। ଚିୟାଚି ଇନ୍‍କୁ ସବେନ୍ କୋ ମିୟାଃଗି ଭାଷାରେ ବାଖାଣ ତାଇନାକୋ, ଏନାମେନ୍ତେ ଇନ୍‍କୁ ମିଃତାଃ ହୁଣ୍ଡି ଜାନାକୋ ହାର୍ ପାର୍ମେଶ୍ଵାର୍ ରାଃ ଆନାଚୁ ଲେକାତେ ଅତେଦିଶୁମ୍ କେ ଫେରେଃ ବାଗିକେତେ ମିୟାଃ ସାହାର୍ ବାଇ କେଦାକୋ।

ଇନ୍‍କୁ ଥିମ୍ବାଗି ଘାମାଣ୍ଡି ତାଇ କେନାକୋ, ହାର୍ ଇନ୍‍କୁ କେ ଚିଲ୍ଲକା ଜୀଦାନ୍ ଜିହିଃ ରାଃ ମେନାଃ ନେୟା ରାଃ ବିଷାୟ ରେ ଇନ୍‍କୁ ପାର୍ମେଶ୍ଵାର୍ ରାଃ ଆନାଚୁ କେ ମାନାତିଙ୍ଗ୍ କାକୋ ସାନାଙ୍ଗ୍ ତାଇନା। ନେତାଃ ସାନ୍ତେ ଚି ଇନ୍‍କୁ ମିୟାଃ ନେକା ମାରାଙ୍ଗ୍ ଗୂମାଟ୍ ବାଇସୁରୁ କେଦାକୋ ଚି ଏନା ସିର୍ମାଦିଶୁମ୍ ସାନ୍ତେ ସେଟେରା। ପାର୍ମେଶ୍ଵାର୍ ନେଲ୍ କେଦାଏ ଚି ଆଗାର୍ ଇନ୍‍କୁ ମିଃତେ ଏତ୍କାନ୍ କାମି କାତେୟାକୋ,ଏଣ୍ଡେ ଇନ୍‍କୁ ଥିମ୍ବାଗି ପାପ୍ କାମିକୋ କାମି ୟାକୋ।

ଏନାମେନ୍ତେ ପାର୍ମେଶ୍ଵାର୍ ଇନ୍‍କୁୱାଃ ବାଖାଣ୍ କେ ଚିମିନ୍-ଚିମିନ୍ ଆଲାଗ୍-ଆଲାଗ୍ ଭାଷା ରେ ବାଦ୍ଲାଅ ତାଦାଏ ହାର୍ ଏନ୍ ହୋଡ଼ୋ କୋକେ ସବେନ୍ ଅତେଦିଶୁମ୍ ରେ ପାସ୍ରାଅ ତାଃକୋୱାଏ। ଅକନ୍ ସାହାର୍ କେ ଇନ୍‍କୁ ବାଇ ସୁରୁ ଲେଦାକୋ,ଏନାରାଃ ନୁତୁମ୍ ବାବେଲ୍ କାଜିୟାନା, ଏନାରାଃ ମାନେ “ଗାଡ଼ବାଡ଼ାଅ’’ ତାନାଃ।

ଚିମିନ୍ ଶାଅ ବାରାଶ୍ ରାଃ ତାୟୋମ୍ତେ, ପାର୍ମେଶ୍ଵାର୍ ଆବ୍ରାମ୍ ନୁତୁମ୍ ମିୟାଃ ହୋଡ଼ୋ ଲୋଃ ବାଖାଣ୍ କେଦାଏ। ପାର୍ମେଶ୍ଵାର୍ ଇନିଃକେ କାଜିକିଜାଏ, “ଆମାଃ ଦିଶୁମ୍ ହାର୍ ଅଡ଼୍ଆଃ ରେନ୍ କୋକେ ବାଗେ କେତେ ଏନ୍ ଦିଶୁମ୍ ତେ ସେନୋଃ ମେ ଅକନାଃ କେ ଇଙ୍ଗ୍ ଆମ୍ କେ ଉଦୁବା ମେୟାଇଙ୍ଗ୍। ଇଙ୍ଗ୍ ଆମ୍ କେ ଆଶିଷ୍ ଏମା ମେୟାଇଙ୍ଗ୍ ହାର୍ ଆମାଃତେ ମିୟାଃ ମାରାଙ୍ଗ୍ ଜାତି ବାଇୟିଙ୍ଗ୍। ଇଙ୍ଗ୍ ଆମାଃ ନୁତୁମ୍ କେ ମାରାଙ୍ଗ୍ ବାଇୟିଙ୍ଗ୍। ଅକଏ ଆମ୍ କେ ଆଶିଷ୍ ଏମେୟାଏ ଇଙ୍ଗ୍ ଇନିଃକେ ଆଶିଷ୍ ଏମାଇୟିଙ୍ଗ୍, ହାର୍ ଅକଏ ଆମ୍ କେ ସାର୍ପାଅ ମେୟାଏ ଇନିଃକେ ସାର୍ପାଅ ୟାଇଙ୍ଗ୍। ଆମାଃ ଚାଲ୍ତେ ଅତେଦିଶୁମ୍ ରେୟାଃ ସବେନ୍ ଅଡ଼୍ଆଃ ରେନ୍ କୋ ଆଶିଷ୍ ନାମେୟାକୋ।“

ଏନ୍ତେ: ଆବ୍ରାମ୍ ପାର୍ମେଶ୍ଵାର୍ ରାଃ କାଜିକେ ମାନାତିଙ୍ଗ୍ ଜାନାଏ। ଇନିଃ ଆଜାଃ ସବେନ୍ ଦାସୀକୋକେ ହାର୍ ଆଜାଃ ସବେନ୍ ସାମ୍ପାତି କୋଲୋଃ ଆଜାଃ କୁଡ଼ି ସାରା କେ ଇଦିକିଜାଏ ହାର୍ ଏନ୍ ଦିଶୁମ୍ ତେ ସେନ୍ଓ ଜାନାଏ ଅକନାଃ ଚି ପାର୍ମେଶ୍ଵାର୍ ଉଦୁବ୍ ଲିଜାଏ, କାନାନ୍ ହୋଡ଼ୋକୋୱାଃ ଦିଶୁମ୍।

ଚିମ୍ତାଙ୍ଗ୍ ଆବ୍ରାମ୍ କାନାନ୍ ଦିଶୁମ୍ ସେଟେର୍ ଜାନାଏ ଦ ପାର୍ମେଶ୍ଵାର୍ ଇନିଃକେ କାଜିକିଜାଏ, “ଆମାଃ ସବେନ୍ ପାଡ଼୍ ନେଲେମ୍। ଇଙ୍ଗ୍ ଆମ୍ କେ ନେ ସବେନ୍ ଦିଶୁମ୍ ଏମାମେୟାଇଙ୍ଗ୍ ହାର୍ ଆମାଃ ବାଂଶ୍ ରେନ୍ କୋ ସବେନ୍ ହୁଲାଙ୍ଗ୍ ଲାଗିନ୍ ଆଧିକାର୍ ମାଣ୍ଡାଅୟାକୋ। ଏନ୍ତେ ଆବ୍ରାମ୍ ଏନ୍ ଦିଶୁମ୍ ରେ ତାଇନ୍ ଏଟେଃ କେଦାଏ।

ମଲ୍କିସେଦାକ୍ ନୁତୁମ୍ ମିୟାଃ ହୋଡ଼ ତାଇକେନାଏ ଅକନିଃ ଚି ମାରାଙ୍ଗ୍-ଉତ୍ତାର୍ ପାର୍ମେଶ୍ଵାର୍ ରାଃ ୟାଜାକ୍ ତାଇକେନାଏ। ମୂଶିଙ୍ଗ୍ ହୁଲାଙ୍ଗ୍ ଚିମ୍ତାଙ୍ଗ୍ ଆବ୍ରାମ୍ ଆଜାଃ ଲାଡ଼ାଇ ରାଃ ତାୟୋମ୍ତେ ହିଜୁଃ ତାଇନାଏ ଦୋ ଇନିଃ ହାର୍ ଆବ୍ରାମ୍ ଭେଁଟ୍ ଜାନାକିନ୍। ମଲ୍କିସେଦାକ୍ ଆବ୍ରାମ୍ କେ ଆଶିଷ୍ ଏମ୍ କିଜାଏ ହାର୍ କାଜିକିଜାଏ “ମାରାଙ୍ଗ୍-ଉତ୍ତାର୍ ପାର୍ମେଶ୍ଵାର୍ ଅକଏ ସିର୍ମାଦିଶୁମ୍ ହାର୍ ଅତେଦିଶୁମ୍ ରେନ୍ ଗୋମ୍ କେ ତାନିଃ ଇନିଃ ଆମ୍ କେ ଆଶିଷ୍ ଏମେକାଏ।” ଏନ୍ତେ ଆବ୍ରାମ୍ ଲାଡ଼ାଇ ରେ ଜିତାଅକାନ୍ ସବେନ୍ ଜିନିଷ୍ କୋରାଃ ଦାଶ୍ ହାନାଟିଙ୍ଗ୍ ଏତେ ମିୟାଃ ହାନାଟିଙ୍ଗ୍(ଦାଶ୍ଵା ଭାଗ୍) ମଲ୍କିସେଦାକ୍ କେ ଏମ୍ କିଜାଏ।

ଏନ୍ତେ ଚିମିନ୍ ବାରାସ୍ ବିତାଅ ଜାନା, ଏଣ୍ଡେ ହଁ ଗି ଆବ୍ରାମ୍ ହାର୍ ସାରା ରାଃ ମିୟାଦୋ ହୋନ୍ କାକୋ ତାଇକେନା। ପାର୍ମେଶ୍ଵାର୍ ଆବ୍ରାମ୍ ଲୋଃ ବାଖାଣ କେଦାଏ ହାର୍ ଆଡୋଃଗି କିରିୟା ଏମ୍ କିଜାଏ ଚି ଆଜାଃ ମିୟାଃ କୋଡ଼ାହୋନ୍ ହୋବାୱାଏ ହାର୍ ଜେଲେକା ରିମିଲ୍‍ଦିଶୁମ୍ ରେ ଇପିଲ୍ କୋ ମେନାକୋଆ ଏନ୍ ଲେକାଗି ଇନିଜାଃ ଥିମ୍ବାଗି ବାଂଶ୍ କୋ ହୋବାଅଃୱାକୋ। ଆବ୍ରାମ୍ ପାର୍ମେଶ୍ଵାର୍ ରାଃ କିରିୟା କାଜି ରେ ବିଶ୍ଵାସ୍ କେଦାଏ। ପାର୍ମେଶ୍ଵାର୍ କାଜିଉଦୁବ୍ କେଦାଏ ଚି ଆବ୍ରାମ୍ ମିୟାଃ ଧାର୍ମି ହୋଡ଼ ତାଇକେନାଏ ଚିୟାଃଚି ଇନିଃ ପାର୍ମେଶ୍ଵାର୍ ରାଃ କିରିୟା କାଜି ରେ ବିଶ୍ଵାସ୍ ଲେଦାଏ।

ଏନ୍ତେ, ପାର୍ମେଶ୍ଵାର୍ ଆବ୍ରାମ୍ ଲୋଃ ମିୟାଃ ନିୟାମ୍‍ଥଲ୍ କେଦାଏ। ନିୟାମ୍‍ଥଲ୍ କେ ନେଲେ ରେ, ଏନା ବାରାନ୍ ଦାଲ୍ କୋୱାଃ ଭିତାର୍ ରେ ମିୟାଃ ଏଟାଃନିଜାଃ ନାଙ୍ଗ୍ କାମି କୋକେ ରିକାୟାଏ ମେନ୍ତେ ମିୟାଃ ରୋଜୋଟ୍ ହୋବାଅଃୱା। ପାର୍ମେଶ୍ଵାର୍ ଆବ୍ରାମ୍ କେ ଏନ୍ କିରିୟା କାଜି ଇମ୍ତାଙ୍ଗ୍ ଏମ୍ ଲେଦାଏ ଚିମ୍ତାଙ୍ଗ୍ ଆବ୍ରାମ୍ ଦୁଡ଼ୁମ୍ ତାଇକେନାଏ, ମେନ୍ଦୋ ଇନିଃ ଏଣ୍ଡେ ରେହଗି ପାର୍ମେଶ୍ଵାର୍ କେ ଆୟୁମ୍ ଧାଡ଼ି ତାଇନାଏ। ପାର୍ମେଶ୍ଵାର୍ କାଜିକିଜାଏ, “ଇଙ୍ଗ୍ ଆମାଃ ହୋଡ଼ମୋ ଏତେ ଆମାଃ ନାଙ୍ଗ୍ ମିୟାଃ ହୋନ୍ କଡ଼ା ଏମାମେୟାଇଙ୍ଗ୍। ଇଙ୍ଗ୍ ଆମାଃ ବାଂଶ୍ ରେନ୍ କୋକେ ନେ “କାନାନ୍” ଦିଶୁମ୍ ଏମାକୋତାନିଙ୍ଗ୍।” ମେନ୍ଦୋ ନାଆ ସାନ୍ତେ ଆବ୍ରାମ୍ ରାଃ ମିୟାଦୋ ହୋନ୍ କଡ଼ା କାକୋ ତାଇକେନା।