41. ୪୧. ପାର୍ମେଶ୍ଵାର୍ ୟୀଶୁକେ ଗୋଜାକାନ୍ ଏତେ ଜିହିଃବିରିଦିଆଏ

ସିପାହୀ କୋଆଃ ହୋରାତେ ୟୀଶୁକେ କୁରୁସ୍ ରେ ରାକାବ୍ ରାଃ ତାୟୋମ୍ତେ, ୟାହୁଦୀ ଆଗୁୱାକୋ ପିଲାତୁସ୍ କେ କାଜିକିଜାକୋ, “ଏନ୍ ବେଦାନିଃ ୟୀଶୁ କାଜିଲେଦାଏ ଚି ଇନିଃ ଆପୀ ହୁଲାଙ୍ଗ୍ ରାଃ ତାୟୋମ୍ତେ ଗୋଜାକାନ୍ କୋଏତେ ଜିହିଃବିରିଦଗାଏ। ଜେତାଏ ମିହୋଡ଼୍ ନେୟା କେ ସାରି ଲାଗିନ୍ କାବାର୍ କେ ହୋରୋ ପାଡ଼ାୱା ଚି ଇନିଜାଃ ଚେଲାକୋ ଇନିଜାଃ ହୋଡ୍ମୋକେ କାକୋ ଚର୍ହା ଇଦିକାଦା। ଆଗାର୍ ଇନ୍‍କୁ ନେକା ରିକାଏ ରେଦୋ ଇନ୍‍କୁ କାଜିୟାକୋ ଚି ଇନିଃ ଗୋଜାକାନ୍ ଏତେ ଜିହିଃବିରିଃ କାନାଏ।”

ପିଲାତୁସ୍ କାଜିକିଜାଏ, “ଚିମିନ୍ ସିପାହୀକୋକେ ଇଦି କେକୋମ୍,ହାର୍ ଜେଲେକା ଆପେ ରିକାଧାଡ଼ି ୟାପେ ଏନ୍ ଲେକା କାବାର୍ କେ ହରୟାପେ।” ଏନାଲାଗିନ୍ ଇନ୍‍କୁ ଏନ୍ କାବାର୍ ରାଃ ବୋଲୋଦ୍ଵାର୍ ରାଃ ଦିରିରେ ମିୟାଃ ମୋହର୍ ଲାଗାଆ ତାଦାକୋ। ଇନ୍‍କୁ ନେୟାସାରିନ୍ ଲାଗିନ୍ ଏନ୍ତାଃରେ ସିପାହୀକୋକେ ହୋରୋ ରିକାକେଦାଏ ଚି ଜେତାଏ ୟଗି ଇନିଜାଃ ହୋଡ୍ମୋକେ ଆଲୋକାକୋ ଚର୍ହାଏକା।

ୟୀଶୁ କେ କାବାର୍ ଏମ୍ ରାଃ ମେୟାଙ୍ଗ୍ ସାଥାଅନ୍ ହୁଲାଙ୍ଗ୍ ତାଇକେନା। ଜେତାଏ ୟଗି ସାଥାଅନ୍ ହୁଲାଙ୍ଗ୍ ରେ କାକୋ କାମୀ ତିନା, ଏନାଲାଗିନ୍ ୟୀଶୁ ରାଃ ଜେତାୟଗି ଗାତିକୋ କାବାର୍ ତାଃ କାକୋ ହିଜୁଃ କାନ୍ ତାଇନା। ମେନ୍ଦୋ ସାଥାଅନ୍ ହୁଲାଙ୍ଗ୍ ରାଃ ଏଟାଃ ହୁଲାଙ୍ଗ୍, ଭୋର୍ ସେତାଃ ରେ, ଚିମିନ୍ କୁଡ଼ିକୋ ୟୀଶୁରାଃ କାବାର୍ ତାଃ ସେନ୍ ଲାଗିନ୍ ସେକାଡ଼୍ ଜାନାକୋ। ଇନ୍‍କୁ ଇନିଜାଃ ହୋଡ୍ମୋରେ ଆଡୋଃଗି ଶୋଆନ୍ ସୁନୁମ୍ ଗୋସୋଃ ସାନାଙ୍ଗ୍ ତିନାକୋ।

ଏନ୍ କୁଡ଼ିକୋ ସେଟେର୍ ରାଃ ସିଦା, କାବାର୍ ରେ ମିୟାଃ ଭୁଇଁଡ଼ୋଲ୍ ହୋବାଜାନା। ସିର୍ମାତେ ମିୟାଃ ସିର୍ମାଦାସୀ ହିଜୁଃକେତେ ଏନ୍ ଦିରିକେ ଉଦୁର୍ ତାଦାଏ ଅକନାଃ କାବାର୍ ରାଃ ବୋଲୋ ଦ୍ଵାର୍ ରେ ହାରୁବ୍ କାନ୍ ତାଇନା ହାର୍ ଏନାରେ ଦୁବ୍ ଜାନାଏ। ଏନ୍ ସିର୍ମାଦାସୀ ମାସ୍କାଲ୍ ଲେକା ଚାମ୍ କାଃଅ ତାଇନାଏ। କାବାର୍ ରେ ଅକନ୍ ସିପାହୀକୋ ତାଇକେନାକୋ ଇନିଃକେ ନେଲ୍ କିଜାକୋ। ଇନ୍‍କୁ ଇମିନ୍ ବୋରୋକାନ୍ ତାଇକେନାକୋ ଚି ଗୋଜୋଃକାନ୍ ଲେକା ଅତେରେ ଉୟୁଃ ଜାନାକୋ।

ଚିମ୍ତାଙ୍ଗ୍ କୁଡ଼ିକୋ କାବାର୍ ତାଃ ସେଟେର୍ ଜାନ୍ ରେ ଏନ୍ ସିର୍ମାଦାସୀ ଇନ୍‍କୁ କାଜିକେଦାଏ, “ଆଲୋପେ ବୋରୋୟା। ୟୀଶୁ ନେତ୍ଆଃରେ ବାଙ୍ଗୁଇଜା। ଇନିଃ ଗୋଜାକାନ୍ କୋଏତେ ଜିହିଃବିରିଦ୍ କାନାଏ, ଜେଲେକା ଚି ଇନିଃ କାଜିଲାଆଏ ଚି ଇନିଃ ଜିହିଃବିରିଦୋଗାଏ! କାବାର୍ ରେ ଦାଣାଇପେ ହାର୍ ନେଳିପେ।”ଏନ୍ କୁଡ଼ିକୋ କାବାର୍ ରାଃ ଭିତାର୍ ହାର୍ ଅକତାଃରେ ୟୀଶୁରାଃ ହୋଡ୍ମୋକେ ମାନ୍ ଡାଅ ଲାଆକୋ ଏନ୍ତାଃରେ ଦାଣାକିଜାକୋ ହାର୍ ନେଲ୍ କିଜାକୋ ଚି ଇନିଜାଃ ହୋଡ୍ମୋ କା ତାଇକେନା!

ଏନ୍ତେ ଏନ୍ ସିର୍ମାଦାସୀ ଏନ୍ କୁଡ଼ିକୋକେ କାଜିକେଦାଏ, “ସେନ୍ କେତେ ଆଜାଃ ଚେଲାକୋକେ ଉଦୁବାକୋପେ, ‘ୟୀଶୁ ଗୋଜାକାନ୍ କୋଏତେ ଜିହିଃବିରିଦା କାନାଏ ହାର୍ ଇନିଃ ଆପେୟାଃ ଆୟୁର୍-ଆୟୁର୍ ଗାଲିଲ୍ ସାହାର୍ ତେ ସେନୋଗାଏ।’”

ଏନ୍ କୁଡ଼ିକୋ ଆକ୍ ଦାନ୍ଦା ଜାନାକୋ ହାର୍ ଥିମ୍ବାଗି ରାଶିକା ଜାନାକୋ। ଇନ୍‍କୁ ନେ ଶୁକୁକାଜି ଉଦୁବ୍ ଲାଗିନ୍ ନିର୍ କେଦାକୋ।

ଚିମ୍ତାଙ୍ଗ୍ ଏନ୍କୁଡ଼ିକୋ ଚେଲାକୋକେ ନେ ଶୁକୁକାଜି ଉଦୁବ୍ ଲାଗିନ୍ ଆକୋୱାଃ ସାଣ୍ଡାକ୍ ରେ ତାଇକେନାକୋ, ଦ ୟୀଶୁ ଇନ୍‍କୁ ତାଃ ନେଲ୍ ଜାନାଏ। ଇନିଜାଃ କାଟାସୁବାରେ ଇନ୍‍କୁ ଇକ୍ଡ଼ୁମ୍ ଜୋହାର୍ କିଜାକୋ। ଏନ୍ତେ ୟୀଶୁ କାଜିକେଃକୋୱାଏ, “ଆଲୋପେ ବୋରୋୟାଃ। ସେନ୍ କେତେ ଇଙ୍ଗ୍ଆଃ ଚେଲାକୋକେ ଗାଲିଲ୍ ସାହାର୍ ତେ ସେନୋଃ ଲାଗିନ୍ କାଜିକୋପେ ଇନ୍‍କୁ ଏନ୍ତାଃରେ ଇଙ୍ଗ୍ କେ ନେଲିଙ୍ଗ୍ ୟାଃକୋ।”