6. ୦୬. ପାର୍ମେଶ୍ଵାର୍ ଇସ୍‍ହାକ୍ ଲାଗିନ୍ ଯୋଗାଡ଼୍ ତାନାଏ

ଚିମ୍ତାଙ୍ଗ୍ ଆବ୍ରାହାମ୍ ଥିମ୍ବାଗି ହାଡ଼ାମ୍ ହୋବା ଲେନ୍ତାଇକେନାଏ ଇମ୍ତା ଆଜାଃ ହୋନ୍‍କଡ଼ା, ଇସ୍‍ହାକ୍, ମିୟାଃ ଜାୱାନ୍ କଡ଼ା ହୋବାଲେନ୍ ତାଇକେନାଏ। ଏନାଲାଗିନ୍ ଆବ୍ରାହାମ୍ ଆଜାଃ ହୋନ୍‍କଡ଼ା ଇସ୍‍ହାକ୍ କେ ଆଣାଦୀ ନାଙ୍ଗ୍ ଏନ୍ ଦିଶୁମ୍ ତେ ମିୟାଃ କୁଡ଼ି ଆଉ ଲାଗିନ୍ତେ ଆଜାଃ ମିୟାଃ ଦାସୀ କେ କୁଲ୍ କିଜାଏ ଅକତାଃ ରେ ଇନିଃଜା ପେଡ଼ାକୋ ତାଇନ୍ ତାଇକେନାକୋ।

ଅକତାଃ ରେ ଆବ୍ରାହାମ୍ ରାଃ ପେଡ଼ାକୋ ତାଇନ୍ କେନାକୋ ଏନ୍ ଦିଶୁମ୍ ତେ ସେସେନ୍ ନାଗିନ୍ତେ ମିୟାଃ ସାଙ୍ଗିନ୍ ହୋରା ସେସେନ୍ ରାଃ ତାୟୋମ୍ତେ ପାର୍ମେଶ୍ଵାର୍ ଏନ୍ ଦାସୀ କେ ରିବିକା ଲୋଃ ନାପାମ୍ କିଜାଏ। ଇନିଃ ଆବ୍ରାହାମ୍ ରାଃ ହାଗା ଗାଃ ଯାଇହୋନ୍ ତାଇକେନାଏ।

ରିବିକା ଆଜାଃ ଅଡ଼୍ଆଃ ରେନ୍ କୋକେ ବାଗେ କେତେ ଏନ୍ ଦାସୀ ଲୋଃ ରୁଆଃଡ଼ ସେନ୍ ଲାଗିନ୍ ମାନାତିଙ୍ଗ୍ ଜାନାଏ। ଜେଲେକା ଇନ୍ କିନ୍ ସେଟେର୍ ଜାନାକିନ୍ ଇସ୍‍ହାକ୍ ଏନ୍ କୁଡ଼ି କେ ଆଣାଦି ଜାନାଏ।

ଏନ୍ତେ ଥିମ୍ବାଗି ହୁଲାଙ୍ଗ୍ ରାଃ ତାୟୋମ୍ତେ, ଆବ୍ରାହାମ୍ ଗୋଏଃ ଜାନାଏ। ଏନ୍ତେ ପାର୍ମେଶ୍ଵାର୍ ଆବ୍ରାହାମ୍ ରାଃ ହୋନ୍‍କଡ଼ା ଇସ୍‍ହାକ୍ କେ, ଆବ୍ରାହାମ୍ ଲୋଃ ଥଲାକାନ୍ ନିୟାମ୍ ରାଃ ଚାଲ୍ତେ ଆଶିଷ୍ ଏମ୍ କିଜାଏ। ଏନ୍ ନିୟାମ୍‍ଥଲ୍ ରେ ପାର୍ମେଶ୍ଵାର୍ ରାଃ ମିୟାଃ କିରିୟା ତାଇଲେନା ଚି ଆବ୍ରାହାମ୍ ରାଃ କାଲେକାଧାଡ଼ିୟୋଃ ବାଂଶ୍ କୋ ହୋବାୱାକୋ। ମେନ୍ଦୋ ଇସ୍‍ହାକ୍ ରାଃ କୁଡ଼ି ରିବିକା ରାଃ ହୋନ୍ ଗାଣାକୋ କାକୋ ହୋବାଅଃ ତାଇନା।

ଇସ୍‍ହାକ୍ ରିବିକା ଲାଗିନ୍ତେ ବିନ୍ତି କେଦାଏ, ହାର୍ ପାର୍ମେଶ୍ଵାର୍ ଇନିଃ କେ ଜାଁୱା ହୋନ୍ ହୋବାଅଃ ଲାଗିନ୍ତେ ହୋଡ଼ୋମୋ ରେ ତାଇନ୍ ରାଃ ପେଡ଼େଏ ଏମ୍ କେଦାଏ। ଏନ୍ ହୋନ୍ କିନ୍ ରିବିକା ରାଃ ଲାହେଃ ରେ ତାଇନ୍ ଇମ୍ତା ରେଗି ଇନ୍ କିନ୍ ଆକିନ୍ ରେ ଲାଡ଼ାଇ ଜାନାକିନ୍, ଏନାମେନ୍ତେ ଅକନାଃ ହୋବାଅଃ ତାଇକେନା ରିବିକା ଏନାକେ ପାର୍ମେଶ୍ଵାର୍ କେ ଉଦୁବ୍ କିଜାଏ।

ପାର୍ମେଶ୍ଵାର୍ ରିବିକା କେ କାଜିକେଜାଏ, “ଆମ୍ ବାରିୟା ହୋନ୍‍କଡ଼ା କିନ୍ କେ ଯାନାମ୍ କିନାମ୍। ଇନ୍ କିନାଃ ବାରିୟା ବାଂଶ୍ ଏଟାଃ-ଏଟାଃ ଜାତି ବାଇ କେନୋଗାକିନ୍। ଇନ୍ କିନ୍ ମିହୁଡ଼ ଏଟାଃନିଃ ଲୋଃ ଲାପାଡ଼ାଇ ଆକିନ୍। ମେନ୍ଦୋ ମାରାଙ୍ଗ୍ କୋଡ଼ା ହୋନ୍ ତେ ହୋବାକାନ୍ ଜାତି କେ ହୁଡିଙ୍ଗ୍ କୋଡ଼ା ହୋନ୍ ତେ ହିଜୁଃକାନ୍ ଜାତି ରାଃ ଆନାଚୁ କେ ମାନାତିଙ୍ଗ୍ ହୋବାଅଃୱା।”

ଚିମ୍ତାଙ୍ଗ୍ ରିବିକା ରାଃ ହୋନ୍ କିନ୍ ଯାନାମ୍ ନାକିନ୍, ଇମ୍ତା ମାରାଙ୍ଗ୍ ହୋନ୍ ଆରାଃ ହାର୍ ହୋଡ଼ମୋ ରେ ଉବ୍ କୋ ଅଡ଼ୋଙ୍ଗ୍ ଲେନା, ହାର୍ ଇନ୍‍କୁ ଆଜାଃ ନୁତୁମ୍ ଏଷାଓ ମାଣ୍ଡାଅ କେଦାକୋ। ଏନ୍ତେ ହୁଡିଙ୍ଗ୍ ହୋନ୍ ଏଷାଓ ରାଃ ଏଡ଼ିକେ ଶାବ୍ କେତେ ଯାନାମ୍ ନାଏ, ହାର୍ ଇନ୍‍କୁ ଆଜାଃ ନୁତୁମ୍ ୟାକୁବ୍ ମାଣ୍ଡାଅ କେଦାକୋ।