۴۰- إنصَلَب يَسُوع

بَعَد ما الحَرَسْ مَسخَرو اليَسُوع، خذو خاطر يِصِلْبُونه. هُمَّا جِبرُو خاطر هُو يحَمِّل صَلِيبِه.

الحُرَاس، خذو اليَسُوع بِمكان إسمِه جُلْجُثَة (یعني جُمْجُمَة رَاس)، وَ دگو إيدِه وَ رِيلِه علیٰ الصَليب بِلمِسَامير. بِس اليَسُوع گال: «يَا أبِي، إعفِي علیٰ هِذُول النَّاس، چِه مَايِدرون شِي سِوون.» إبأمر بِيلاَطُس حَطُو علیٰ رَاس يَسُوع عَلَامه الچان مكتوب عليه: هذا هُو مَلِك اليَهُود.

الحُرَاس گامو يِتشَارِطون علیٰ إهدُوم يَسُوع. هِچِي تَتَحَقَق الچان مكتوب بكتاب المُقدَّس وَ يگول: «يقسمون مَلَابسي بِيناتهُم وَ يلعبون إِقمَار عليهن.»

الحُرَاس صَلَبو إثنين حَرَاميِه هم، وَ خلو صَليب اليَسُوع بيناتهُم. وَاحد مِن الحَرَاميِه چان يِمَسخِر اليَسُوع وَ الثاني گِله: «إنتِ ماتخَاف مِن الله؟ إحنا مذِنبين بِس هذا الزِلمِه لا.» تالي گِل اليَسُوع: «يا اليَسُوع إذكرني بلملکوت.» اليَسُوع گِله: «إنتِ اليوم تدخل وَياي بِالجِنِّه.»

رُوَسَاء الیَهُود و النَّاس الچانو مِلتِمين إهناك مَسخرو اليَسُوع وَ گالو: «لو إنتِ إبن الله إنزل مِن الصَليب وَ نِجي روحَك! وَ تالي إحنا كِلنا نأمِن بيك.»

الوكت چان الظُهر، بِس فِرد نُوبا السِمِه إبذيچ المنطقه إنگلَب إسْوِد.

و اليَسُوع صَاح: «كِلشي خَلَص، يَا أبي، إسلِّم رَوحي بيدِك.» وَ دِنِگ رَاسِه وَ سِلِم روحه. مِن طِلْعَت الرُوح مِن اليَسُوع، الگاع إهتِزِت وَ السِتَار الچبير الچان بِلمَعبَد ( قُدْسَ الأَقْدَاسْ) وَ يجزي الناس مِن حُضور الله، مِن فوق لِحَدر إنشِگ وَ إنجِسِم.

اليَسُوع إبمُوتِه فَتَح دَرُب لِلنَّاس، خاطر إبنِفِسهُم إيون الحُضور الله. مِن حَارِس الرومي شَاف بِعيُونِه إشصَار، گال: «صِدِگ هذا الزِلمِه ماچان مِذنِب، هُو چان إبن الله.»

بَعدِين نَفَرين مِن رُوَسَاء اليَهُود إبِسِم نِيقُودِيمُوس و يُوسف، إللي چان عِدهُم إيمَان بِاليَسُوع إللی هُو المَسِيح المَوعُود، رَاحو البِيلاطُس وَ رَادو مِنِه يِنطِيهُم جِسِد اليَسُوع. هُما لِفُو الجِثمَان بِگمَاش الكَتَان وَ حَطَّو إبگبُر مِن صَخَر، وَ حَطَّو صَخرَه چبيره جِدَّام بَاب الگبُر خاطر يِنسِد.