۲۲- یَحیانین دونیایَه گَلمَسی

چوخ گِئچمیش لَردَن تانری پِیغَمبَرلَر واسیطَسیلَه اؤز اِئلینَن دانیشیردی . ۴۰۰ ایل گِچمیشدی آما تانری اؤز اِئلینَن دانیشمامیشدی. بیردَن تانرینین مَلَکی زکریا آدیندا بیر قوجا کاهینَه گُؤرسَندی . اُو وَ حایات یولداشی اِلیزابِت، تانریدان قورخان اینسانلاریدیلار. اونلار قُوجِیدیلَر وَ اِلیزابِتین اوشاقی اُولموردی.

تانرینین مَلَکی زَکریا یا دِئدی: «سَنین حایات یولداشین بیر اوغلان دُوغاجاق . سَن اُونون آدین یَحیی قویاجاقسان. تانری اونی روح القدوسونان دُولدوراجاق وَ یَحیی اینسانلاری، وَعدَه سی وئِریلَن مَسیحین گَلمَسینَه حاضیر اِئلیَجاق.» زَکریا جَوابیندا دِئدی: «مَن وَ حایات یولداشیم اوشاق صاحیبی اولماق اوچون چوخ یاشْلییق! هاردان بیلیم کی مَنَه دوزون دییرسَن؟«

تانرینین مَلَکی زَکریا یا جَواب وِئردی :«مَن تانرینین طَرَفینْدَن گؤندَریلْمیشَم کی بو خوش خَبَری سَنَه یِئتیرَم. ایندی کی سَن مَنیم سؤزلَریمَه اینانمادین، اوشاق دونیایا گَلَنَ زامانا جاق دانیشماق گؤجونی اَئلدَن وِئرَجاقسان .» او وَقتدَن زکریا دانیشا بیلمَدی. سونرا تانرینین مَلَکی زَکریانین یانین دان گِئتدی. زَکریا اِئوَه قاییتْدی وَ چوخ ‌زامان گِئچمَدی حایات یولداشی بویلو اولدی.

اُو زامان کی الیزابت آلتی آیلیق بویلیدی، اُو مَلَک بیردَن اِلیزابِتین قوهومونا کی آدی مَریَمیدی گُؤرسَندی. اُو باکیرَه قیز وَ یوسوف آدیندا بیر کیشینین نیشانلیسیدی. مَلَک اُونا دِئدی: «سَن بویلو اولاجاقسان وَ بیر اُوغلان دوغوب وَ اونون آدین عیسی قُویاجاخسان. او اوجا تانرینین اوغلی اولاجاق وَ اونون حوکم اِئلَمَگی سونونا قَدَر قالاجاق.»

مریم جواب وِئردی : «مَن باکیرَه اولدوغوم حالدا بو ایش نَجور اولاجاق؟» مَلَک اونا آچیخلادی : «روح القدوس سَنَه گَلَجاق وَ تانرینین گؤجی سَنَه کولگَه سالاجاق . بونا گؤرَه اُو اوغلان موقَدس و اوجا تانرینین اُوغلی چاغیریلاجاق. » مریم اُو مَلَکین سُؤزلَرینَه ایناندی وَ هَر نَه کی اُو دِئمیشدی، قَبول اِئلَدی.

بوایشدَن بیرآززاماندان سونرا، مَریَم اِلیزابِتین اِئوینَه گِئتدی. الیزابِت هَمَن کی مَریَمین سَلامین اِئشیتدی، اوشاق بَطنین دَه تَرپَشْماقا باشلادی. اونلار، تانری اونلارا اِئلَدیکلَری ایشلَر اوچون چوخ شادلیق اِئلَدیلَر. مَریَم اوچ آیا یاخین اِلیزابِتین یانیندا قالدی وَ سونرا اِئوَه قاییتدی.

بو اولدوقلاردان سونرا الیزابت بیر اوغلان دونیا یه گَتیردی. اُو وَ زَکَریا اُوجور کی مَلَک دِئمیشدی اونون آدین یَحیی قُویدولار. سونرا تانری گینَه زکَریانین دیلین آچدی و زکریا دِئدی: تانریا شُوکر اُولسون. چونکی اُواِئلینین کُومَگینَه گَلدی! وَ سَن ای اُوغلوم اوجا تانرینین پیغَمبَری چاغریلاجاقسان وَ اینسانلارا دییَجاقسان کی گوناهلارینین باغشیلانماسینین یولونی نَئجور تاپسینلار.