۳۹- عیسی نین مَحکَمه سی
گِئجه یاریسی سربازلار عیسی نی بویوک کاهینی اِئوینَه آپاردیلار کی اونی سورغویا چَکسین.پترس دا اؤزاقدان اونلارین دالیسیجاق گِئدیردی .او وقت کی عیسی نی اِئوین ایچَریسینَه آپاردیلار ،پترس اِئوین اِئشیگیندَه اوتون یانیندا دایانمیشدی کی اؤزون قیزیشدیرسین.
اِئوین ایچیندَه، یَهودیلَرین بویوکلَری عیسی نی سورغویا چَکیردی لَر . اونلار یالانچی شاهیدلَری گَئتیرمیشدیلَر کی عیسی یا بُهتان یاخالار. آما اونلارین سُؤزلَری بیربیرینَن توتموردی ، بونا گُؤرَه یَهودیلَرین رَهبَرلَری عیسی نین گوناهکارلیقین ایثبات اِئلییَنمَدیلَر. عیسی دا هِئچ سُؤز دیلَه گَتیرمَدی.
سونون دا، بویوک کاهین عیسی یا باخدی وَ دِئدی:« بیزَه دِئنَن کی سَن دیری تانرینین اوغلو، مَسیح سَن؟»
عیسی دِئدی:« بَلی، اُؤزومَم وَ بیر گون گُؤرَجاقسیز کی تانرینین ساغ اَئلیندَه اَئیْلَشمیشَم وَ گوْی دَن، یِئرین اؤزونَه قاییداجاقام.» بویوک کاهین کی عیسی نین بو سُؤزلَریندَن حیرصلَنمیشْدی ، اُؤز پالتارین جیردی وَ اوجا سَسینَن قیشقیردی وَ او بیرسی دین رَهبَرلَرَه دِئدی: «بیز دَه آیری شاهیدلَر ایستَمیریک. هامیز اِئشیتدیز کی دِئدی مَن تانرینین اوغلویام. سیزین رَأییز نَمنَه دی ؟»
هامی یَهودین رَهبَرلَری بویوک کاهِنین سُؤزونَه، جَواب وِئردیلَر:« اونون حَقی اؤلومدور.» او زامان عیسی نین گُؤزلَرین باقلادیلار وَ اؤزونَٕه توپوردولَر وَ اونو دُؤوب وَ آلچاقلادیلار.
پِترُس اِئوین اِئشیگیندَه دایانمیشدی . بیر کَنیز اونو گُؤروب دِئدی: «سَن دَه عیسیٰ نَنی دین .» پِترُس دانْدی. بیر آز کِئچدی آیری کَنیز دَه هَمَن سُؤزو دِئدی وَ گِئنَه پِترُس دانْدی. سونون دا، او آداملاری کی اوردا دایانمیشدیلار، اونا دِئدیلَر: « بیز بیلیریک کی سَن عیسی نین شاگیردلَرینین بیری سَن، چون کی سَن دَه جَلیلی سَن.»
او زامان پِترُس آند ایچدی وَ دِئدی:« تانری مَنی لَعنَت اِئلَسین اَگَر بو کیشینی تانیسام». او دَم خوروز بانلادی وَ عیسی قاییدیب و پِترُسا باخدی.
پترس گِئتدی و زولوم زولوم آغلادی. اوزاماندا خائین یهودا گوردی یهودلارین رهبرلری عیسی نی اؤلومَه مَحکوم اِئلیبلَر . غم اونی گوتورْدی ، گِئدی کی اؤزون اؤلدورَه.
بو گونلَرده روملی بویوک باش پیلاتس، یهودانین حاکیمیدی. یهودلارین بویوکلَری عیسی نی اونون یانینا آپاردیلار اونلارین ایستَدیکْلَری کی پیلاتس عیسی نی اؤلومَه مَحکوم اِئلسین. پیلاتس عیسی دان سوروشدی:«دوزدی کی سن یهودون پادیشاهیسان ؟»
عیسی جَواب وِئردی:« دوز دِئدین. آما منیم پادیشاهلیقیم یِئر اؤزوندَه دَییر. اَگَر بوجوریدی مَنیم آرخامداکی لار ، مَنَه گورَه ساواشاردیلار. آما مَن بو دونیایا گَئلمیشم تانرینین حاق اولماقینی بوتون خَلقَه دییَم .هَرکیم حقیقتی سِئویر، مَنَه قولاق آساجاق .» پیلاتُس سُؤروشدی: «دوغرو سُؤز نَمنَه دی ؟»
پیلاتُس عیسی نان دانیشاندان سونرا، جماعتین یانینا گِئدیب وَ دِئدی:« مَن هِئچ بیر گوناه بو آدام دا گؤرمَدیم کی اؤلومَه لاییق اولا.» آما یَهودیلَرین بویوک لَری وَ جَماعَت ،قیشقیردیلار «اونی چارمیخا چَئکین.» پیلاتُس دِئدی:« او گوناهکار دَییر » آما جماعت بو یول قیشقیریب وَ سَسلَرینی اوجالتدیلار.اوندان سونرا پیلاتُس اوچونْجو یول دِئدی:« او گوناه کار دَییر.»
پیلاتُس بَلمَه شوردان قورخورْدی ، قبول اِئلَدی وَ عیسی نی گَزمَه لَرَه تاپشیردی کی اونی چارمیخا چَئکَلَر . رومی گَزمَه لَری عیسی نی شاللاق لادیلار وَ اونا بیر شاهانه پالتار گِیدیریب و باشینا تیکاندان تاج قویدولار . اونا آلچاقلادیلار و دِئدیلَر:« یاشاسین یهودون پادشاهی.» بو ناغیل موقدس کیتابین یازیلاریندان آلینیب:
متی انجیلینین ۲۶ بولومی ۵۷ بولوم ۲۶ دَن ۲۷ آیَه لَری مرقس انجیلینین ۱۴ بولومی ۵۳ آیه لَری لوقا انجیلینین ۲۲ بولومی ۵۴ بولوم ۲۳ دَن ۲۵ آیه لَری یوحنا انجیلینین ۱۸ بولومی ۱۲ بولوم ۱۶ دَن ۱۹ آیه لَری
رایگان برای استفاده، اقتباس و اشتراکگذاری تحت مجوز باز (CC BY-SA 4.0).