1. दुनिया उप्जासौ

अइना कौनी की लरै परमेश्वर से जम्मा बथौ उप्जासौ। उसौ टुगौ ज्या कौ दुनिया बनासौ हग जौरी इन उसै जम्मा बनासौ। परमेश्वर सै थग्जा बनाम गौ निगम हग वम्मग री साचौ निसौ खौवक्की इता वासै परमेश्वर से खरी बथौ री म्ब्नादे निसौ। हग परमेश्वर सै लमै ती गै यरतौ फैरसी गै निसौ।

हग परमेश्वर सै लुक्सौ की,“छऩ्त लैलौ!” हग छऩ्त कलै। परमेश्वर सै दौबसौ छऩ्त बुदै इऩ हग्ची उसै “निछ” लुग्सो। हग उसै वम्मंग य़करौ कसुगतै हग उसे “मुन्छ” लुक्सौ। परमेश्वर से दुनिया हुग्मंचग लरै निछै छंन्त हुग्सौ

दुनिया बनासो नैजा ची परमेश्वर से लुक्सौ, “ती गौ यरतौ तिगै यकरौ यकरौ लैलौ|” हग तिगै यकरौ कलै| परमेश्वर से यकरौ कसुगसिदै जा तिम्बु लूक्सौ।

सुम ज्या ची परमेश्वर से लुक्सौ, “ती तिगै बग कौ थुमसिलौ हग्ची कछरत बंग दिखासौ।“ उसै कछऱतै बग जा “थग्जा” लुक्सौ हग्ची ती जा पुदै “यगती” लूक्सौ। परमेश्वर सै तिऩ्सौ की उसै बढ़िया इन बुदै कलै।

हग्ची परमेश्वर से लुक्सो, “थंग्जा कौ यकरौ यकरौ ची सिन उप्जासौ|” हग्ची अतिनी लिच्चौ| परमेश्वर से तिन्लग कची उसै कबनादै निसौ हग्ची बढ़िया निसौ।

दुनिया सुमगै पी जा ची परमेश्वर से लुक्सो, “तिम्बु कौ छऩ्त लैलौ|” हग्ची नि, जी ला हंग करमा तिन्तै हुग्सौ| परमेश्वर से उजा थग्जा छऩ्त दाम दग्ची निछै औऱ मुन्छै, छेतै खतै यकरौ यकरौ वर्ष सुग्मौ दगंची बनासौ|

ना जा ची परमेश्वर से लुक्सो, “टग्दै पुदै ती कौ निसिदै जिव जन्तु बिननलौ हग्ची तिम्बु कौ चिपचै फगचो|” अइऩी रूकतै उसै ती कौ चग्सीदै जीव जन्तु हग्ची चिपचै री बनासौ। परमेश्वर से तिन्सौ की अइऩी बुदै निसौ उसै बुदै लैय्ग लुकै आशीर्वाद दासौ ।

दुनिया बनाम गै टुगै ज्या ची परमेश्वर से लुकसों , “थग्जा निदै वाला यकरौ यकरौ टंग रै लियंग|” हग परमेश्वर सै लुक्सिदै रूकतै कलै। उना टंग मंग ठुगसिदै निसौ, उना थग्जा निसिदै उना जगंल कौ निदै जीव जन्तु निसौ। हग परमेश्वर सै तिन्सौ की अयरी बुदै इऩ।

हग्ची परमेश्वर सै लुक्सौ, “रनी जिसै मी गै रूप जिगंना रूक्तै बनातौ। हंग जै थग्जा राजा बनकै नियगै।

हग्ची परमेश्वर सै सा कौरगै उसै मी बनासौ, हग्ची उसै श्वांस दासौ। हंग मी गै मींन आदम निसौ। परमेश्वर सै आदम गै दग्ची तिगै पुदै स्वार बनासौ हग्ची उगै रेख देख हुग्मौ दग्ची आदम अत्कौ तासौ।

अती स्वार गै गुन्दा कौ परमेश्वर सै निसै खास सिन यिब्सौ तिगै बुदै जिन्दगी गै सिन यिब्सौ हग्ची तिगै यदै जी बुदै गै ज्ञान दासौ।परमेश्वर सै आदम जा लुक्सौ की अती स्वार कौ जिन्दगी गै सिन हग्ची बुदै जी यदै गै ज्ञान दामौ दग्ची सिन यिब्सौ हग्ची खयरी सिन कौ ची फल जा तरखनौ। हग्ची उसै अती सिन कौची फल जायगनौ ता हिचियग्न|

हंग परमेश्वर सै लुक्सौ, “यौरासिरी गै दग्ची तौग्मी निमौ बुदै मुनी। “खव्की खरी जीव जन्तु आदम गै साथौ लै मतरयंग।

हग्ची परमेश्वर सै आदम जा बढिया इपा कौ यक्सौ।हग्ची परमेश्वर सै आदम गै तिगै रिब कौरगै लकै उसै तिगै चमै बनासौ।हग्ची उसै आदम गै निदकौ कैरगै दैसौ।

जसौ आदम सै चमै तिन्सौ ता उसै लुक्सौ, “खव्की अइता जिना रूकतै इन! अइ जा ‘चमै’ लोयगनै, खव्की अइ सिरी गै अम्ची कबनासिदै लै|” हग्ची अती सिरी उगै ना जी बा हतीगै देसौ हग्ची रिथी तै जोरौ तिगै लकै देगंन।

परमेश्वर सै सिरी जी चमै गै रूप रंग बनासौ। उसै उजा आशीर्वाद दासौ हग्ची उसै लुक्सौ , “मथै यम्बा सैन्मंग हंग ख्वै खुमै पैदा हुगसौ हग्ची थग्जा बिन्लौ!” हग्ची परमेश्वर सै तिनसौ की जैयरी उसै बनासौ अती बढिया निसौ, हग्ची उसी जम्मइ पुतिसि खुश कलै।अइ जम्मइ दुनिया बनाम गै टुगै ज्या कल्तै निसौ।

उसै निसै ज्या ची आशिर्वाद दासौ हग्ची उसै शुद्ध बनासौ, हग्ची अती ज्या उसै जम्मा बथौ गै दुनिया बनागै गै निगम पुच्यौदै निसौ।हग्ची अइनी रूक्तै परमेश्वर सै दुनिया कौ जयरी बथौ बनासौ उसै जम्मा दुनिया बनासौ।