41. परमेश्वर यीशु जा पज्यंगतै कौची टग्नं

सैनिकों अम्ची यीशु जा कूस कौ चढाम गै निग्म, यहूदी प्रधान सै पिलातुस जा लुक्सौ, अती झुठी यीशु सै लुक्सौ की अती सुम ज्या गै निग्म पज्यंगतै कौची रचीयंग। खमी जा अइ निश्रित सुग्मौ दग्ची कब्र गै निगरानी सुग्मौ पडियंग की उगै चेले अतीगै गौबरंग खुगै ता मौकरन्, खव्की उसै अइना सुग्मौचंग ता उसीसै लौयंगन्न की अती हिचित कौची रचियंग।

पिलातुस सै लुक्सौ, उनइ सैनिक मंग जा कोरनी, हंग जसौ गन हुंग तरकनो अतनइ कब्र गै ओगे ताम, अइ दग्ची उसीसै अती कब्र गै मौरंग कौची उंग कौ तिगै मोहरा क्लगातै, उसीसै अइ निश्रित सुग्मौ दग्ची अतकौ सैनिक जा री क्सौयौग्तै की खमी री उगै गैबरंग खु मतर्लो।

यीशु गै हिचिम गै निग्म ची ज्या सब्त गै ज्या निसो, खमी री सब्त गै ज्या लंन सुंग मतरसीदै निसौ, अइ दग्ची यीशु जा खमी री साथौ कब्र कौ मरादै निन्चौ, परन्तु सब्त गै निग्म गै ज्या, बंग्खर मथै भोर जा, उना खुतिस्या यीशु गै कब्र कौ दैम दग्ची तैयार लिच्चौ, अती उसीगै गैबरंग कौ हंग मसाला लगाम चिन्खै निसौ।

उसी खुतिस्या गै नब्मचंग लरै, कब्र कौ तिगै पौदै रिंन रासौ, स्वर्ग कौची तिगै स्वर्गदूत रागै अती ऊंगजा चिरकिन्तै जइ कब्र गै मौरंगपा प्गच्यासीदै निसौ हंग अती यरतौ क्सौयग्सी, स्वर्गदूत छन्तै गै रौकतै ङौकै निसौ, कब्र कौ जइ सैनिक निसौ, उसीसै उजा तिन्नचौ, उसी अइना क्जैरतै निन्चौ कि पज्यग्तै गै रौकतै थग्जा चिरंगिंन।

अती खुतिस्या कब्र कौ नब्चौ ता उसी स्वर्गदूत सै उसीजा लुक्सौ, मज्यरमौ। यीशु अइकौ मुनी, अती जिगै लैंम सै ज्यु अग्सौ, जत्ना की उसै लुक्सौ कि अती ज्यु रचियंग, कब्र कौ मानी हंग दौब्नी, उसी खुतिस्या सै कब्र गै चुकौ हंग जइकौ यीशु गै गौबरंग क्तासिदै निसौ अतकौ मासिसौ हंग दौबसौ कि उगै गौबरंग अतकौ मरासौ।

अती स्वर्गदूत सै उसी खुतिस्या जा लुक्सौ, दैंगलकै उसीगै डग्मी जा बतानी, यीशु प्जयंगतै कौची ज्यु करचीतै इन हंग अती गनीगै लरै लरै गलील कौ दैयंग।

अती खुतिस्या हा कलै हंग मथै खुश कलै, अती डग्मी जा अइ कथा सुनाम दग्ची ज्यंगसौ।

अती खुतिस्या डग्मी जा अइ बडिया कथा बताम दग्ची अपीगै अम कौ निसौ, ता यीशु सै लुक्सौ, मज्यरमौ। दैंगै जिंगै डग्मी जा गलील दिनी लौई, अती अतकौ जिजा दौबयंग।