1. कोव

इना रीतीसी सुरुवातमा परमेश्वर आखी चीजोक बोनाव्यू. चू छोव दाहडामा संसारोन एने जो काय तेरेमा छे तीनु आखा काजे बोनाव्यु. परमेश्वरोन लारे धोरतिक बोनावनेन बादमा ची आनदारलाम एने ठारली होती, काहाकी हिमी तोक परमेश्वर तीनामा कानली बी चीजोक नि बोनावलू होतु. बाकीन परमेश्वरोन आत्मा पाणी पोर फिरती होती.

ओवतेन परमेश्वर कोयु, “विजावो होय” एने विजावो होय गोयो. देव देख्यु की विजावो वारू से चु तीनाक “दाहडु” कोयु. परमेश्वर तीनाक आंदारलानचा गोथु ओलोग कोऱ्यू एने आंदारलाक “रात” कोयु. परमेश्वर कोव बोनावनेन पेहले दाहडे विजावो बोनाव्यु.

कोव बोनावनेन दिसरे दाहडे, परमेश्वर कोयु “पाणीन उपोर एन अंतर होये” एने एक अंतर होय गोयू. परमेश्वर तिना अंतर काजे “वादवो कोयू.”

तीसरे दाहडे, परमेश्वर कोयु “पाणी एक जागे एकठो होय जाय एने सुकली धोरती देखाये.” चू सुकला जागा काजे “कोव” कोयू एने पाणी काजे “दोरियु” कोयू. परमेश्वर देख्यू कि जो चू बोनावलू होतु चो वारू होतो.

ओवतेन परमेश्वर कोयु, "धोरतीपोर ओलोग ओलोग भातीन झाडे तीयार होये " एने तोसोत होयो. परमेश्वर देख्यु की चु जो बी तीयार कोरलु से चो आखो वारू से.

कोव बोनावनेन चोवथे दाहडे, परमेश्वर कोयू “आपसा बुलोन लारे सूर्य, चांद एने तारा बोनाव्यु. परमेश्वर तीनुकाजे धोरतीपोर विजावो आपने कोरता दाहडु एने रात, मुसुम ने साल देखाडने कोरता बोनाव्यु.

पाचवे दाहडे., परमेश्वर कोयू, “जीवतला जोनावरे पाणी काजे बोर दे एने वादवामा चिल्ला उळे.” इना रीतीसी चू पाणीमा झेपने वावा आखा जंतू काजे एने चिल्ला काजे बोनाव्यू. परमेश्वर देक्यू कि यो वारू छे एने तीनुक आशिष आप्यू.

कोवोन साहवे दाहडे, परमेश्वर कोयु, “धोरतीपोर रोयण्या जोनवरे तीयार होये,” एने परमेश्वरोन कोयलान तोसु आखो होय गोयो. इना रितीसी थुलाक पावन्या जोनवरे, धोरतीपोर रेंगनायन्या ने थुलाक बोयडाम रोयण्या जोनवरे तीयार होये. एने परमेश्वर देख्यु की यो वारू छे.

ओवतेन परमेश्वर कोयु, “आवू आपनु मानुस काजे आपने सारखू बोनावसु. तीनुक धोरतीपोर एने आखा जोनवरो पोर हुकुम चालाडता आवडसे."

ओवतेन परमेश्वर धुवू लीन तिनासी मानुस काजे बोनाव्यू नेए तेरा नाकोम जीवाय आपन्यु दोम फुक्यु. इना मानसोन नाव आदाम मेक्यू. परमेश्वर आदम काजे रोयनेवाटु एक बगीचो तीयार कोऱ्यू एने तेरी राखवावी कोरनेन कोरता तीनाक चा सारीक मेक्यु.

तिना बगीचान ईचमा, परमेश्वर दुय खास झाडे लागाड्यु. जीवायीन झाडे एने वारुभुंडो ग्यान आपने वावो झाड. परमेश्वर आदम काजे कोयु की चु बगीचा माइन कानलाबी झाडोन फोव खाय सोकतेलु, बाकीन वारुभुंडान ग्यान आपन्या झाडोन फोव झुन खातु. ओगोर तु तीना झाडोन फोव खाश ती तु साचलीन मोर जाईश.

ओवतेन परमेश्वर कोयु,“मानसोन एखलो रोयनो वारुभुंडान नी होय. बाकीन जोनवोरोमा आदाम वाटु वारु जुडीदार नी जोड्यो.

एरेन कोरता परमेश्वर आदम काजे वारुत ओसी नींद आप्यु. ओवतेन परमेश्वर आदमोन चा गोथी एक फासवी निकावीन एक बायोर तीयार कोरीन तीनीक आदाम ओगोव लाव्यु.

आदाम तिनीक देख्यू एने कोयु, “कोम से कोम यी मारेन तोसी छे. यी बायोर कोवायसे काहाकी यी मानसोन चा गोथी बोनावली से.” एरेन कोरीन मानुस तिन्दरा आसीबासाक सुडीन आपना बायोर सी भेसकाईन रोहसे.

परमेश्वर माणूस काजे एने बायोर काजे तेरा रूपमा बोनाव्यू. परमेश्वर तीनुकाजे बोरकत आप्यु, एने तीनुक कोयू "तुमूकाजे रेट पुरयापुरायटा होये ने धोरती भोर नाखु,” एने परमेश्वर देख्यु की आखो वारु से, एने तीनु आखान बारामा खुश होयुयो आखो कोवोन सहावे दाहडे होयो.

सातवे दाहडे कोव घोडनेन काम पुरो होयो. ओवतेन आपना कामोम गोथु तीने दाहडे देव आराम कोऱ्यू. परमेश्वर सातवे दाहडा काजे बोरकत आपीन चुखलो ठेराव्यु काहाकी तीने दाहडे चुखलो आपसा कामोम गोथु आराम कोऱ्यू . ईना रीतीसी कोव ने तेरेम माईन आखो परमेश्वर तीयार कोऱ्यू.